Kōmeļeļe ko jān Joseph Smith ilo Nauvoo, 1840, jān Theodore Gorka

Nobōm̧ba 10– 16: “Em̧ōj Aō kar Loi Katok ko Am̧ ilo Am̧ Pokake”

Katak im Bujen Ko 129–132

Jān Josep Smith, Irooj eaar bōk jet iaan mennin ittiņo ko jān mour indeeo. Em̧m̧an eo an Anij, aiboojoj eo an lan̄, im aetok in mour indeeo remaron̄ āinwōt reitōn alikkar ilo meram in gospel eo em̧ōj an jepļaaktok, āindein bar ilo kōļmenļo̧kjen ko ad rekadu. Revelesōn ko ilo Katak im Bujen Ko 129–32 rej jet waanjon̄ak rōm̧m̧aan. Anij ej Āinwōt ta? E “ewōr ānbwinnin kanniōk … āinwōt maron̄ un̄ūr wōt ānbwinnin armej.” Lan̄ ej āinwōt ta? “Ejja iiaio̧ eo ej pād ilubwiljid ijin enaaj pād ilubwiljid ijeņ” (Katak im Bujen Ko 130:22, 2). Ilo m̧ool, juon iaan m̧ool ko rekam̧ōņōņō kōn lan̄ ej bwe emaron̄ kakobaik jemjerā an baam̧le raorōk, n̄e kar liāp kōn kajoor eo ekkar. M̧ool ko āinwōt m̧ool kein remaron̄ kōm̧m̧an bwe lan̄ enjab etoļo̧k—en aiboojoj im epaak n̄an tōpare.

Innām, jet iien Anij emaron̄ kajjitōk ippād n̄an kōm̧m̧ane men ko rejjab jokane im epen tōpari. Ippān elōn̄ Armej ro Rekwojarjar etto, m̧are elōn̄ļo̧k jān juon kōrā ekar juon kien. Ekar juon mālijjon̄ epen ilo tōmak eo an Josep Smith, lio pāleen Emma, im eitōn aolep ro raar bōke. N̄an eļļā jān mālijjon̄ in, rekar aikuj eļapļo̧k jān bajjōk en̄jake in errā kōn gospel eo em̧ōj an jepļaaktok; rekar aikuj in bōk juon tōmak em̧wilaļļo̧k ilo Anij kōn menin. Kien in ejako rainin, ak waanjon̄ak in pokake an ro rekar pād ilo tōre ko ej wōnm̧anļo̧k wōt. Im waanjon̄ak in ej im̧we kōj n̄e kajjitōkin kōj n̄an kōm̧m̧ane ko ad “katok ko am̧ ilo am̧ pokake” (Katak im Bujen Ko 132:50).

Ļōmņak ko n̄an Ekkatak ilo M̧weeo im ilo Kabun̄ in

Katak im Bujen Ko 130–132

Anij ekōņaan bwe ro Nejin ren mour.

Elōn̄ men ko jejjab jeļā kaki kōn mour ijo ilōn̄tata ak mour ilo ijo eutiejtata ilo laļ eo an selestial—kain mour rōt eo Anij ej mour kake. Aolepen emaron̄ ļe ļo̧k jān jon̄an ad kiiō maron̄ meleļe. Bōtaab Anij ekar kwaļo̧k jidik in jejjo meļeļe ko raorōk, im elōn̄ iaer kar loi ilo Katak im Bujen Ko 130–32. Kwomaron̄ riiti kajjitōk ko āinwōt kein ilo kōlmenļo̧kjeņ: Ta eo n̄aij ekkatak kōn Anij? Ta eo ij ekkatak kōn mour eo ālkin mour in? Elmen an meļeļe in kōn mour indeeo kōjeraam̧m̧an mour eo aō kiiō?

Bar lale “Our Hearts Rejoiced to Hear Him Speak,” ilo Revelations in Context,, 277–80.

Katak im Bujen Ko 130:20–21; 132:5

Anij ej kōjeraam̧m̧an armej ro rej pokake kien ko An.

Elmen am̧ kar naaj ba, ilo naan ko am̧ make, ta eo Irooj ej katakin ilo Katak im Bujen Ko 130:20–21 im 132:5? Ļōmņak kōn wāween an pedped in katak ko kar jerbal ilo mour eo am̧.

Jet iien, jekdo̧o̧n n̄e jej pokake Anij, kōjeraam̧m̧an ko jej kōjatdikdik kaki rejjab itok wōt kiiō. Elmen am̧ dāpij wōt tōmak im kōjatdikdik eo am̧ n̄e mennin ej waļo̧k? Lale ļōmņak ko ilo ennaan eo an D. Todd Christofferson “Jemdo̧o̧n eo Ad ippān Anij,” (Liaona, Māe 2022, 78–80).

Bar lale 1 Nipai 17:35; Katak im Bujen Ko 82:10.

Katak im Bujen Ko 132:13–21

Jemedwōj Ilan̄ ekar kōm̧m̧an bwe baam̧le ko ren n̄an indeeo.

Jān Rikanaan Josep Smith, Irooj ekar kōjepļaaktok m̧ool eo bwe m̧are im jemjerā ko an baam̧le remaron̄ in n̄an indeeo. Ilo ami riiti Katak im Bujen Ko 132:13–21, pukot naan ko me rej jipan̄ kom̧ meļeļe kōn oktak eo ikōtaan ta eo enaaj “pād” indeeo im ta eo ejjab. Ta kwoj ļōm̧ņak e kōn meļeļein menin bwe juon jemjerā in m̧are ej “jān [Irooj]”? (eoon 14).

Ilo ennaan eo an “In Praise of Those Who Save,” Būreejtōn Dieter F. Uchtdorf ekar keidi jemjerā ko an m̧are indeeo ippān men ko jemaron̄ “joļo̧k” (Liaona, Māe 2016, 77–78). Ta eo ej keidi in ej katakin eok kake kōn wāween kōkaajriri—ak kepooje n̄an—juon jemjerā in m̧are? Ļōmņak kōn jemjerā ko an baam̧le eo am̧—kiiō im n̄an indeeo—ilo am̧ riiti ennaan eo an Elder Uchtdorf. Ta eo kwoj loe ijeņ me ej letok n̄an eok kōjatdikdik ilo Kraist n̄an jemjerā ko an baam̧le eo am̧?

Būreejtōn Henry B. Eyring ekar kwaļo̧k kōkapilōklōk in ke ekar bōke ke ekar inepata kōn jekjek eo ej waļo̧k ilo baam̧le eo an: “Kwon baj mour im erreo n̄an am̧ deļo̧n̄ e aelōn̄ in celestial, im karōk ko an baam̧le renaaj ļapļo̧k aer em̧m̧an jān jon̄an eo komaron̄ in ļōmņake” (ilo “M̧weo Ijo Jetōb eo an Irooj ej Jokwe ie,” Liaona, Māe 2019, 25). Ekōjkan an kapilōk in maron̄ jipan̄ kwe ak juon eo kwoj jeļā kajeen?

Bar lale “Families Can Be Together Forever,” Hymns, no. 300; Topics and Questions, “Marriage,” Gospel Library.

Juon m̧are emaron̄ liāp n̄an indeeo ilo m̧weeo im̧ōn Irooj.

Katak im Bujen Ko 132:1–2, 29–40

M̧are elōn̄ļo̧k jān juon kōrā em̧m̧an ippān Anij wōt eļan̄n̄e Ej kakien e.

Elōn̄ armej raar riiti Kallim̧ur M̧okta remaron̄ lōmņak kōn Ebream̧, Jekab, Moses, im ro jet raar m̧are elōn̄ļo̧k jān juon pāleer. Rijerbal rein an Anij raar ke ļōn̄? Anij ekar ke kōmālim m̧are ko aer? Josep Smith ekar wōr an ejja kajjitōk rōt kein. Kappukot uwaak ko Anij ekar leļo̧k ilo Katak im Bujen Ko 132:1–2, 29–40.

M̧are ikōtaan juon em̧m̧aan im juon kōrā ej jon̄ak in m̧are an Anij (lale heading eo ilo jekjōn eo n̄an Kean̄ Jān Kabun̄ 1; Jekab 2:27, 30). Ijoke, elōn̄ tōre ko me Anij ekar kakien ajri ro Nejin n̄an m̧are elōn̄ļo̧k jān juon.

Iiō ko m̧okta jinoin an Kabun̄ in kar kōjepļaaktok juon iaan tōre ko me ekar lōn̄ oktak. Eļan̄n̄e kwoj kōņaan ekkatak eļapļo̧k kōn m̧are elōn̄ jān juon kōrā ilubwiljin Armej ro Rekwojarjar, lale “Mercy Thompson and the Revelation on Marriage” (ilo Revelations in Context, 281–93); Armej ro Rekwojarjar, 1:290–92, 432–35, 482–92, 502–4; Topics and Questions, “Plural Marriage in The Church of Jesus Christ of Latter-day Saints,” Gospel Library; “Why Was It Necessary for Joseph Smith and Others to Practice Polygamy?” (video), ChurchofJesusChrist.org.

Why was it necessary for Joseph Smith and others to practice polygamy?

A question from the Worldwide Devotional: A Face to Face Event with Elder Cook on September 9, 2018

Ļōmņak ko n̄an Katakin Ajri ro

Katak im Bujen Ko 130:2, 18–19; 132:13, 19

Jemedwōj Ilan̄ ekōņaan bwe in mije men ko an mour indeeo.

• Ta eo Katak im Bujen Ko 132:13 ej katakin kōj kōn men ko an laļ in? Bōlen kwomaron̄ kanne juon kōban̄ ak pāākpāāk ippān doon kōn aitōm ko me rej bōk jikin men ko me, ekkar n̄an Katak im Bujen Ko 130:2, 18–19; 132:19, jemaron̄ bōk ippād n̄an mour eo tok juon.

Katak im Bujen Ko 130:20–21; 132:5, 21–23

Anij ej kōjeraam̧m̧an eō ilo aō pokake kien ko An.

• Bōlen juon wāween eo epidodo emaron̄ katakin ajri ro nejum̧ n̄an pokake kien ko an Anij. N̄an waanjon̄ak, kwomaron̄ kajjitōk ippāer n̄an tōl eok n̄an etetal juon jikin, āinwōt n̄an juon jikuuļ ak m̧ōnjar an Kabun̄ in. Ta eo ej waļo̧k n̄e jejjab ļoor bun̄ten ko? Innām kwomaron̄ riit Katak im Bujen Ko 130:21 im keidi bun̄ten kein n̄an kien ko Anij ekar letok n̄an kōj.

• Kom̧ maron̄ bar al ippān doon juon al kōn pokake, āinwōt “Keep the Commandments” (Children’s Songbook, 146–47), im pukot naan ko ilo Katak im Bujen Ko 130:20–21 im 132:5 me ejjeļo̧k oktak jān ko ilo al eo. Elmen an Anij kōjeraam̧m̧an kōj n̄e jej kajjieon̄ kōjparok kien ko An?

Katak im Bujen Ko 130:22

Jemedwōj Ilan̄ im Jisōs Kraist ewōr ānbwin jab wabanban.

• Ālkin riiti Katak im Bujen Ko 130:22 ippān doon, kwe im ajri ro nejum̧ maron̄ lale juon pijaan Jisōs Kraist im jiton̄ ļo̧k Mejen, Lon̄iin, im m̧ōttan ko jet ilo Ānbwinnin. Ajri ro nejum̧ remaron̄ jitōn̄ ejja m̧ōttan ko wōt ilo ānbwinnier. Ba n̄an er etke eaorōk n̄an am̧ jeļā ke ānbwinnid ejja āinwōt ānbwin ko an Jemedwōj Ilan̄ im Jisōs Kraist.

Kōn wōt kain̄i ko ilo m̧weeo im̧ōn Irooj, baam̧le ko remaron̄ n̄an indeeo.

Katak im Bujen Ko 132:19

Jemedwōj Ilan̄ eaar kōm̧m̧an bwe baam̧le ko ren ippān doon indeeo.

• Jipan̄ ajri ro nejum̧ pukot waanjon̄ok in men ko me rejjab n̄an indeeo—m̧ōn̄ā ko im rejorāān, wūt ko rem̧ōņakņak, im ko jet. Innem lale Katak im Bujen Ko 132:19 ippān doon, im kappukot ennaan ko āinwōt “bujen eo ejjeļo̧k jem̧ļo̧kin,” “sil,” “ilo aolep indeeo,” im “indeeo im indeeo.” (Bar lale “Chapter 54: Juōn Revelesōn kin Marre,” ilo Bwebwenato Ko Jen Katak im Bujen Ko, 198 ak pijaan alooj eo ekkar ilo Gospel Library.) Kwomaron̄ bar lale pija in baam̧le eo am̧ im kam̧ool e bwe Irooj ekar kōm̧m̧an bwe en tōprak, jān kain̄i im bujen ko an tampeļ, n̄an an baam̧le ko pād n̄an indeeo.

Chapter 55: A Revelation about Marriage: July 1843

Kwon lale jekjek ko an baam̧le eo. “Ajri in raan kein rej pād ilo elōn̄ kain baam̧le ko im jekjek ko an baam̧le ko. … [Jej] aikuj in pukot ļo̧k [ro] rej ajimakeke, makeļo̧k, ak ro likin oror in” (Neil L. Andersen, “Whoso Receiveth Them, Receiveth Me,” Liahona, May 2016, 49, 52).

N̄an ļōmņak ko reļļapļo̧k, lale ennaan eo an allōn̄ in ilo eo Jera māākjiin.

Juon ruum̧ in liāp ilo Paris France Tampeļ