“Mantswe a Tsosoloso: Mokgatlho wa Thuso,” Tlayang, Ntshalang Morago—Ya Legae le Kereke: Dithuto le Dikgolagano 2025 (2025)
“Mokgatlho wa Thuso,” Tlayang, Ntshalang Morago—Ya Legae le Kereke: 2025
Mantswe a Tsosoloso
Mokgatlho wa Thuso
Ka 1842, morago ga go rulaganngwa ga Mokgatlho wa Thuso mo Nauvoo, Illinois, Moperofeti Joseph Smith a re, “Kereke e ne e sa rulaganngwa mo go itekanetseng go fitlhelela bomme ka jalo ba rulaganngwa.” Mo go tshwanang, ithutuntsho ya Tsosoloso ya Kereke ya Morena le boperesiti jwa Gagwe ga e a felela go fitlhelela e akaretsa ithutuntsho ya Mokgatlho wa Thuso, jo ka bo bone e leng “tsosoloso ya mofuta wa bogologolo” wa bomme ya barutwana ba ga Jeso Keresete.
Eliza R. Snow o dirile mo maikarabelong a botlhokwa mo tsosolosong eo. O ne a le teng fa Mokgatlho wa thuso lantlha o rulaganngwa mme, jaaka mokwaledi wa mokgatlho, o ne a kwala ka bokopano jwa teng. O itemogetse ka namana gore Mokgatlho wa Thuso o ne o rulagantswe “morago ga mofuta wa boperesiti.” Fa tlase ke mafoko a gagwe, a kwadilwe fa a ne a direla jaaka Poresidente ya Kakaretso ya Mokgatlho wa Thuso ya bobedi, go thusa bokgaitsadi ba gagwe go tlhaloganya tiro ya selegodimo e ba e neetsweng e le barwadie Modimo ba kgolagano.
Go ithuta mo gontsi ka fa Mokgatlho wa Thuso o rulagantsweng, bona Daughters in My Kingdom: The History and Work of Relief Society (2017), 1–25; The First Fifty Years of Relief Society (2016), 3–175.
Setshwantsho sa go rulaganngwa ga Mokgatlho wa Thuso ka Paul Mann
Eliza R. Snow
“Le ntswa leina [Mokgatlho wa Thuso] e ka tswa e le wa letsatsi la malatsi ano, mokgatlho ke wa bogologolo. Re boleletswe ke [Joseph Smith], gore mokgatlho o o tshwanang o ne o le teng mo kerekeng bogologolo, kinolo tse di umakilweng le go dirwa mo go dingwe tsa makwalo a gatisitsweng mo Kgolaganong e Ntšha, di dirisa setlhogo ‘mohumagadi wa mokgethwai’ [bona 2 Johane 1:1; Dithuto le Dikgolagano 25:3].
“Se ke mokgatlho o o ka se neng teng go sena Boperesiti, go tswa mo boammaaruring jwa gore o tsaya taolo ya jone jotlhe le thotloetso mo motsweding oo. Fa Boperesiti bo tsewa go tswa mo lefatsheng, mokgatlho o le jaaka ditlalaletso tse dingwe tsotlhe tsa thulaganyo ya boammaaruri ya kereke ya ga Jeso Keresete mo lefatsheng, o ne wa nyelela. …
“Ka ke ne ke le teng fa go rulaganngwa Mokgatlho wa Thuso wa Bomme wa Nauvoo,’ … le gone ke nnile le maitemogelo a rileng mo mokgatlhong o, gongwe ke ka bua dintlha di se kae tse di ka thusang barwadie Sione mo go tseeng kgato mo maemong a botlhokwa a, mo go tletseng ka ntsifalo ya maikarabelo a mašha. Fa mongwe wa barwadi le bommê mo Iseraele ba ikutlwa ba pitlaganngwa mo seemong sa bone, ba tlaa bona mo go botlhokwa mo go lekaneng go thata nngwe le nngwe le bokgoni jwa go dira molemo mo ba go neetsweng ka botlalo. …
Mokgatlho wa Thuso o ne wa rulaganngwa kwa ntlwaneng e e kwa godimo ya Lebentlele la Ditena tse di Khibidu.
“Gongwe gore potso e tle mo tlhaloganyong, ya ope, Ke eng botlhokwa jwa Mokgatlho wa Thuso wa Bomme? Ke ka fetola—go dira molemo—go tlisa mo thulaganyong di dirisiwa dingwe le dingwe ka bokgoni jo re nang le bone go dira molemo, e seng fela go thusa bahumanegi mme le go boloka mewa. Matsapa a a kopaneng a tlaa fitlhelela go feta mo go ka balelwang mo go ka fitlhelelwang ke maatla a a tlhaga a a farologaneng. …
“Mo go direleng bahumanegi, Mokgatlho wa Thuso wa Bomme o na le ditiro tse dingwe go di dira go na le go tlamela fela matlhoko a mmele. Go humanega ga tlhaloganyo le go lwala ga pelo, le gone go tlhoka kelotlhoko; mme dinako tse dintsi go supegediwa bopelontle—mafoko a se kae a kgakololo, kgotsa le e leng seatla se se bothitho le se se rategang di ka dira molemo o montsi le go amogelwa botoka go na le sekgwama sa gauta. …
“Fa Baitshepi ba phuthega go tswa kwa ntle, baeng go mongwe le mongwe, le go nna batswa setlhabelo ba bao ba gogelang go sele ke bao ba emetseng go tsietsa, Mokgatho [wa Thuso] o tshwanetse go dira mo go [ba] tlhokomeleng, mme o ba itsise mo mokgatlhong o o tla ba ntlafatsang le go ba tsholetsa, le mo godimo ga tsotlhe go ba nonotsha mo tumelong ya Efangele, mme mo go direng jalo, ba ka nna sedirisiwa mo go bolokeng ba bantsi.
“Go ka tlhoka bontsi mo go tlhaloseng ditiro, ditshono le maikarabelo a a tlang le go kgathalela Mokgatlho. … Ya kwa go yone (ka fa tlase ga kaelo ya ga bishopo wa gago) mo go kgatlhang leitlho, ka maikaelelo, ka botlhaga, mo kutlwanong le thapelo, Modimo o tlaa rwesa matsapa a gago ka katlego.”