“Mga Tingog sa Pagpahiuli: Bunyag alang sa Atong mga Katigulangan, ‘usa ka Mahimayaon nga Doktrina,’” Dali, Sunod Kanako—Alang sa Panimalay ug sa Simbahan: Doktrina ug mga Pakigsaad 2025 (2025)

“Bunyag alang sa Atong mga Katigulangan, ‘usa ka Mahimayaon nga Doktrina,’” Dali, Sunod Kanako—Alang sa Panimalay ug sa Simbahan: 2025

Mga Tingog sa Pagpahiuli

Bunyag alang sa Atong mga Katigulangan, “usa ka Mahimayaon nga Doktrina”

plano [sketch] sa tubigan sa bunyag sa Templo sa Nauvoo — Kini nga plano nagpakita sa tubigan sa bunyag sa Templo sa Nauvoo nga nagtungtong diha sa napulog duha ka mga turo.

Phebe ug Wilford Woodruff

Si Phebe Woodruff nagpuyo duol sa Nauvoo sa dihang si Joseph Smith misugod sa pagtudlo mahitungod sa posibilidad nga mabunyagan alang niadtong nabuhi kaniadto. Misulat siya mahitungod niini ngadto sa iyang bana, si Wilford, kinsa nagserbisyo og misyon sa Inglatera:

“Si Brother Joseph … nahibalo pinaagi sa pagpadayag nga kadtong ania niini nga simbahan mahimong mabunyagan alang ni bisan kinsa sa ilang mga paryente kinsa namatay ug walay pribilihiyo sa pagkadungog niini nga ebanghelyo, bisan alang sa ilang mga anak, mga ginikanan, igsoong mga lalaki, igsoong mga babaye, mga apohan, mga uyoan, ug mga iyaan. … Human dayon nga sila nabunyagan alang sa ilang mga higala buhian sila gikan sa bilangoan ug sila makaangkon kanila sa panahon sa pagkabanhaw ug makadala kanila ngadto sa celestial nga gingharian—kini nga doktrina mainiton nga gidawat sa simbahan ug sila nagpadayon sa dinaghan nga pundok, ang uban bunyagan ingon ka daghan sa 16 ka higayon … sa usa ka adlaw.”

Wala madugay si Wilford Woodruff miingon kabahin niini nga baroganan: “Sa higayon nga ako nakadungog kabahin niini ang akong kalag hilabihan sa kalipay. … Ako mipasiugda ug nabunyagan alang sa akong tanang patay nga mga paryente nga akong nahinumdoman. … Gibati nako ang pag-ingon og hallelujah sa dihang ang pagpadayag miabot nga nagpahayag ngari kanato sa bunyag alang sa patay. Akong gibati nga kita adunay katungod sa pagmaya diha sa mga panalangin sa Langit.”

Vilate Kimball

Sama ni Sister Woodruff, si Vilate Kimball nakadungog mahitungod sa puli nga bunyag samtang ang iyang bana, si Heber, didto sa layo nagsangyaw sa ebanghelyo. Misulat siya ngadto kaniya:

“Si Presidente Smith mipaila og bag-o ug mahimayaong hilisgotan … nga nakahimo sa daghang tawo sa pagbaton og hugot nga pagtuo. Kana mao, ang mabunyagan alang sa patay. Si Pablo namulong niini, diha sa unang Mga Taga-Corinto ika-15 nga kapitulo ika-29 nga bersikulo. Si Joseph nakadawat og mas hingpit nga pagpasabot kabahin niini pinaagi sa Pagpadayag. … Pribilihiyo niini nga simbahan nga mabunyagan alang sa tanan nilang kaparyentehan nga namatay sa wala pa moabot kini nga Ebanghelyo; gani balik ngadto sa ilang Apohan nga lalaki ug Apohan nga babaye sa tuhod. … Sa pagbuhat sa mao, kita naglihok isip tigtabang kanila; ug naghatag kanila sa pribilihiyo nga mobangon sa unang pagkabanhaw. Siya nag-ingon nga isangyaw ngadto kanila ang Ebanghelyo … apan walay ingon nga butang nga ang mga espiritu pagabunyagan. … Sukad kini nga lagda gisangyaw dinhi, ang katubigan sa kanunay nagkapuliki. Sa panahon sa komperensiya usahay adunay gikan sa walo ngadto sa napulo ka Elder diha sa suba magbanos-banos sa pagbunyag. … Gusto ko nga mabunyagan alang sa akong Inahan. Akong gibanabana nga mohulat hangtod ikaw mauli, apan sa ulahing pamulong ni Joseph sa hilisgotan, mitambag siya sa tanan nga mag-abtik ug molihok, ug pagawason ang ilang mga higala gikan sa pagkabilanggo sa labing dali kon mahimo. Busa naghunahuna ako nga moadto ako niini nga semana, kay adunay daghan sa mga silingan nga moadto. Ang uban nabunyagan na og balik-balik sa daghang mga higayon. … Busa imong makita nga adunay higayon alang sa tanan. Dili ba mahimayaon kini nga doktrina?”

Phebe Chase

Sa dihang nahuman na ang tubigan sa bunyag [baptismal font] sa Nauvoo Temple, ang puli nga mga bunyag gipahigayon didto imbes sa suba. Si Phebe Chase, usa ka lumulupyo sa Nauvoo, misulat ngadto sa iyang inahan mahitungod sa templo, naghulagway sa tubigan sa bunyag isip ang lugar diin “kita mabunyagan alang sa atong patay ug mahimong mga manunubos sa Bukid sa Zion.” Mipadayon siya sa pagpasabot nga dinhi niini nga tubigan sa bunyag, “ako nabunyagan alang sa akong mahal nga amahan ug sa tanang nahibilin sa akong patay nga mga higala. … Karon gusto ko nga mahibalo kon unsa ang mga ngalan sa imong amahan ug Inahan aron mapagawas nako sila, tungod kay ako nagtinguha sa paghupay sa Patay. … Ang Ginoo namulong pag-usab ug gipahiuli ang karaang kapunongan.”

Sally Randall

Sa pagsulat ngadto sa iyang mga higala ug pamilya mahitungod sa bunyag alang sa mga sakop sa pamilya nga buhi kaniadto, si Sally Randall mihinumdom sa kamatayon sa iyang anak nga lalaki nga si George:

“O unsa nga panahon sa pagsulay kadto kanako ug kini gani ingon og ako dili makadawat nga naingon niana, apan … ang iyang amahan nabunyagan alang kaniya ug unsa ka mahimayaong butang kini nga kita nagtuo ug nagdawat sa kahingpitan sa ebanghelyo ingon nga kini gisangyaw karon ug mabunyagan alang sa tanan natong patay nga mga higala ug makaluwas kanila kutob kita makakuha og bisan unsa nga kahibalo kabahin kanila.

“Gusto ko nga kinahanglan sulatan mo ako sa mga ngalan sa tanan natong mga paryente nga patay gikan sa mga apohang mga lalaki ug apohang mga babaye sa bisan unsa. Tuyo nakong buhaton unsay akong mahimo sa pagluwas sa akong mga higala ug ako kinahanglan nga malipay gayod og maayo kon pipila kaninyo moari ug motabang kanako kay kini usa ka dakong buhat alang sa usa sa pagbuhat nga mag-inusara. … Ako nagpaabot nga ikaw maghunahuna niini nga usa ka katingalahang doktrina apan imong makaplagan kini nga tinuod.”