Ten Virgins [Napulo ka Birhen], ni Jorge Cocco

Nobiyembre 17–23: “Pag-andam Kamo alang sa Pag-anhi sa Pamanhonon”

Doktrina ug mga Pakigsaad 133–134

Niadtong 1833, ang manggugubot nga panon miatake ug miguba sa imprintahan sa Simbahan. Ang apil sa mga gitrabaho sa pag-imprinta nianang higayon mao ang Basahon sa mga Sugo—ang unang pagsulay sa Simbahan sa paghugpong sa mga pagpadayag sa Dios sa ulahing mga adlaw ngadto sa usa ka bolyum. Gipangkatag sa mga manggugubot nga panon ang wala pa mabugkos nga mga pahina, ug bisan ang mga maisog nga mga Santos mitipig sa pipila niini, pipila lamang sa dili kompleto nga mga kopya sa Basahon sa mga Sugo ang nahibaloan nga nahibilin.

Unsa ang atong nailhan karon isip ang seksiyon 133 sa Doktrina ug mga Pakigsaad gituyo nga mahimong apendiks ngadto sa Basahon sa mga Sugo, sama sa usa ka gamhanang panapos diha sa kataposan sa gimantala nga mga pagpadayag sa Ginoo. Kini nagpasidaan sa umaabot nga adlaw sa paghukom ug nagsubli sa panawagan nga makita sa tibuok moderno nga pagpadayag: Biyai ang pagkakalibotanon, nga gisimbolo sa Babilonia. Tukura ang Zion. Pangandam alang sa Ikaduhang Pag-anhi. Ug isangyaw kini nga mensahe “ngadto sa matag kanasoran, ug kaliwatan, ug pinulongan, ug katawhan” (bersikulo 37). Ang orihinal nga mga plano alang sa Basahon sa mga Sugo wala matuman, apan kini nga pagpadayag maoy usa ka pahinumdom ug usa ka saksi nga ang buhat sa Ginoo magpadayon, “kay siya mopakita sa iyang balaan nga bukton … , ug ang tanan nga mga katawhan makakita sa kaluwasan sa ilang Dios” (bersikulo 3).

Mga Ideya alang sa Pagkat-on diha sa Panimalay ug sa Simbahan

Doktrina ug mga Pakigsaad 133:4–14

Si Jesukristo mitawag nako sa pagsalikway sa Babilonia ug moadto sa Zion.

Ang espirituwal nga kaatbang sa Zion mao ang Babilonia—usa ka karaang siyudad nga sa tibuok kasulatan nagsimbolo sa pagkadaotan ug espirituwal nga pagkaulipon. Samtang basahon nimo ang Doktrina ug mga Pakigsaad 133:4–14, pamalandongi sa unsa nga paagi nga ang Manluluwas nagtawag kanimo nga “gawas … gikan sa Babilonia” (bersikulo 5) ug “lakaw … ngadto sa … Zion” (bersikulo 9). Giunsa nimo sa pagtubag ang Iyang tawag? Unsa pay imong nakat-onan mahitungod sa Zion gikan sa mensahe ni Elder D. Todd Christofferson “Dali na diri sa Zion”? (Liahona, Nob. 2008, 37–40).

Doktrina ug mga Pakigsaad 133:1–19, 37–39

Makaandam ako karon alang sa Ikaduhang Pag-anhi sa Manluluwas.

Ang duha ka seksiyon 1, ang pasiuna sa Ginoo ngadto sa Doktrina ug mga Pakigsaad, ug seksiyon 133, ang orihinal nga apendiks sa Basahon sa mga Sugo, nagsugod sa samang pangamuyo gikan sa Ginoo: “Patalinghog, O kamo nga mga katawhan sa akong simbahan” (Doktrina ug mga Pakigsaad 1:1; 133:1). Tingali mahimo kang magtuon sa Doktrina ug mga Pakigsaad 133:1–19, 37–39 ug ilista ang mga mensahe nga gidapit sa Ginoo kanimo nga “patalinghogan” (paminawon ug sundon) samtang ikaw mangandam alang sa Iyang Ikaduhang Pag-anhi. Sa partikular, mahimo nimong ilista ang gusto Niya nga imong buhaton sa (1) pag-andam sa imong kaugalingon ug (2) pag-andam sa kalibotan alang sa Iyang pagbalik. Unsay imong nakat-onan gikan niini nga mga lista?

Si Presidente Russell M. Nelson mipakigbahin og importante nga mga kamatuoran mahitungod kon unsa ang kahimtang sa kalibotan kon ang Manluluwas mobalik—ug unsaon sa pag-andam. Pangitaa kini nga mga kamatuoran sa iyang mensahe “Ang Umaabot sa Simbahan: Pag-andam sa Kalibotan alang sa Ikaduhang Pag-anhi sa Manluluwas” (Liahona, Abr. 2020, 6–11). Unsa ang imong gibati nga nadasig nga buhaton—o padayonon sa pagbuhat—sa “pag-andam sa kalibotan alang sa pagbalik sa Manluluwas”? (“Tema sa Korum sa Aaronic nga Pagkapari,” Librarya sa Ebangheyo).

Tan-awa usab sa Mateo 25:1–13; Russell M. Nelson, “Hangupon ang Umaabut uban sa Hugot nga Pagtuo,” Liahona, Nob. 2020, 73–76; “Duol, Kamo mga Anak sa Ginoo,” Mga Himno, nu. 29; Mga Hilisgotan ug mga Pangutana, “Ikaduhang Pag-anhi ni Jesukristo,” Librarya sa Ebanghelyo.

Doktrina ug mga Pakigsaad 133:19–56

Ang Ikaduhang Pag-anhi ni Jesukristo mahimong malipayon alang sa matarong.

Samtang ikaw magbasa sa paghulagway sa pagbalik sa Manluluwas diha sa mga bersikulo 19–56, unsa ang imong nakita nga imong paaboton? Unsa nga mga hugpong sa mga pulong ang naghulagway sa gugma sa Ginoo alang sa Iyang mga katawhan? Hunahunaa ang pagrekord sa imong personal nga mga kasinatian uban “sa mahigugmaon nga kaluoy sa [imong] Ginoo, ug sa tanan nga iyang nahatag diha [kanimo] sumala sa iyang kaayo” (bersikulo 52).

Detalye gikan sa Healer [Tig-ayo], ni Kelsy ug Jesse Lightweave

Doktrina ug mga Pakigsaad 134

“Ang mga pangagamhanan [gobyerno] gitukod sa Dios alang sa kaayohan sa katawhan.”

Ang relasyon sa unang mga Santos sa gobyerno makuti. Sa dihang ang mga Santos gipugos sa pagbiya sa Lalawigan sa Jackson, Missouri, niadtong 1833, nangayo sila og tabang gikan sa lokal ug nasyonal nga gobyerno ug walay nadawat. Nianang samang higayon, pipila ka mga tawo nga dili miyembro sa Simbahan mihubad sa mga pagtulun-an mahitungod sa Zion nga nagpasabot nga ang mga Santos misalikway sa awtoridad sa yutan-ong mga gobyerno. Doktrina ug mga Pakigsaad 134 gisulat, diha sa ubang bahin, sa pagklaro sa baroganan sa Simbahan kalabot sa gobyerno. Unsa man ang gisugyot niini nga seksiyon mahitungod kon unsay angay nga bation sa mga Santos sa Ginoo mahitungod sa gobyerno?

Samtang ikaw magtuon sa seksiyon 134, hunahunaa ang pagpangita sa mga baroganan sa gobyerno ug sa mga responsibilidad sa mga lumulupyo. Sa unsa kaha nga mga paagi kini nga mga ideya nagtabang ngadto sa unang mga Santos? Sa unsa nga paagi kini magamit diin ikaw nagpuyo?

Tan-awa usab sa Ang mga Artikulo sa Hugot nga Pagtuo 1:11–12; Mga Hilisgotan ug mga Pangutana, “Kagawasan sa Tinuohan,” Librarya sa Ebanghelyo.

Mga Tawo, Mga Dapit, Mga Panghitabo

• Basahon sa mga Kasugoan

• Doktrina ug mga Pakigsaad

Iklik dinhi aron makakita pa og dugang

Mga Ideya sa Pagtudlo sa mga Bata

Doktrina ug mga Pakigsaad 135:4–5, 14

Ang Ginoo gusto nga ako mopahilayo gikan sa kadaotan sa kalibotan.

• Ikaw ug ang imong mga anak mahimong maglista og pipila ka dapit ug mga sitwasyon nga gusto sa Ginoo nga kita magpahilayo. Dayon mahimo nimong itandi kadtong mga dapit ug mga sitwasyon ngadto sa kahulogan sa “Babel, Babilonia” sa Ang Giya ngadto sa mga Kasulatan (Librarya sa Ebanghelyo). Dayon mahimo ninyong basahon ang Doktrina ug mga Pakigsaad 133:4–5, 14. Unsa ang gipasabot sa “gawas kamo gikan sa Babilonia”? (bersikulo 5). Mahimo usab ikaw mohimo og susama nga lista sa mga dapit ug mga sitwasyon nga gidapit sa Ginoo kanato ug itandi kana nga lista ngadto sa kahulugan sa “Zion” diha sa Ang Giya ngadto sa mga Kasulatan.

Doktrina ug mga Pakigsaad 133:19–21, 25

Si Jesukristo moanhi pag-usab.

• Ang imong mga anak tingali malingaw sa pagdrama kon unsa kini ka sama sa pag-andam alang sa usa ka butang, sama sa torneyo sa sport, usa ka importante nga bisita, o sa usa ka paborito nga holiday. Nganong ang pagpangandam importante? Dayon mahimo ninyong basahon pagdungan ang Doktrina ug mga Pakigsaad 133:17–19, 21 ug dapita ang imong mga anak sa pagpangita kon unsa ang gidapit sa Ginoo nga atong andamon. Mahimo nimong pakit-on sila og litrato gikan sa latid niining semanaha ug pangutan-a ang imong mga anak unsa ang ilang nahibaloan mahitungod sa Ikaduhang Pag-anhi ni Jesukristo. Unsa pa ang atong makat-onan gikan mga bersikulo 19–25, 46–52? Unsay atong mahimo aron maandam alang niining malipayong kalihokan?

• Mahimo nimong tagoan ang lain-laing mga litrato o mga butang nga naghulagway sa mga butang nga atong mahimo sa pag-andam alang sa Ikaduhang Pag-anhi ni Jesukristo (sama sa pagbasa sa mga kasulatan, pagpakigbahin sa ebanghelyo, o pagserbisyo sa atong mga pamilya). Ipapangita sa mga bata ang mga litrato o mga butang ug hisgoti kon sa unsang paagi nga ang pagbuhat niini nga mga butang makatabang kanato nga maandam sa pagsugat sa Manluluwas kon mobalik na Siya.

• Mahimo usab ninyong kantahon og dungan ang usa ka awit mahitungod sa Ikaduhang Pag-anhi, sama sa “Kon Siya Moanhi Pag-usab” (Songbook sa mga Bata, 32). Ipakigbahin ngadto sa usag usa ang imong gugma alang sa Manluluwas ug ang imong mga pagbati mahitungod sa Iyang pagbalik.

Doktrina ug mga Pakigsaad 133:52–53

Si Jesukristo mahigugmaon ug mabination.

• Ikaw ug ang imong mga anak mahimong motan-aw sa mga litrato nga nagpakita nga si Jesus mahigugmaon ug mabination. (Pananglitan, tan-awa sa Libro sa mga Hulagway sa Ebanghelyo, mga nus. 42, 47.) Unsa pa ang nahimo ni Jesus sa pagpakita sa Iyang gugma ug pagkamabination? Basaha pagdungan ang Doktrina ug mga Pakigsaad 133:52, ug tabangi ang imong mga anak nga maghunahuna og mga paagi nga ilang “mahisgotan ang mahigugmaong kamabination sa ilang Ginoo” ngadto sa uban.

  

Detalye gikan sa In His Light [Sa Iyang Kahayag], ni Greg Olsen

Itudlo ang klaro ug yanong doktrina. Ang Ginoo nagtudlo sa Iyang ebanghelyo pinaagi sa “katin-aw ug kayano” (Doktrina ug mga Pakigsaad 133:57). Unsa ang gisugyot niini nga mga pulong nganha kanimo mahitungod sa pagtudlo sa ebanghelyo sa imong pamilya o klase?

Doktrina ug mga Pakigsaad 134:1–2

Gusto sa Ginoo nga akong sundon ang balaod.

• Ang imong mga anak mahimong maglista sa mga lagda o mga balaod nga ilang gisunod. Unsa kaha ang mahitabo sa kinabuhi kon walay usa nga misunod niini nga mga balaod? Dayon mahimo nimong basahon ang Doktrina ug mga Pakigsaad 134:1–2 uban nila, nga tabangan silang makasabot sa bisan unsa nga mga pulong o mga hugpong sa mga pulong nga tingali wala nila masabti. Ngano nga ang Ginoo gusto nga kita mosunod sa balaod? (tan-awa usab sa Ang mga Artikulo sa Hugot nga Pagtuo 1:12).

Alang sa dugang nga mga ideya, tan-awa ang isyu karong bulana sa Higala nga magasin.

Si Kristo gasul-ob og Pula nga Sinina [Christ in Red Robe], ni Minerva Teichert