“Mga Tingog sa Pagpahiuli: Ang Relief Society,” Dali, Sunod Kanako—Alang sa Panimalay ug sa Simbahan: Doktrina ug mga Pakigsaad 2025 (2025)
“Ang Relief Society,” Dali, Sunod Kanako—Alang sa Panimalay ug sa Simbahan: 2025
Mga Tingog sa Pagpahiuli
Ang Relief Society
Kaniadtong 1842, human maorganisar ang Relief Society didto sa Nauvoo, Illinois, si Propeta Joseph Smith miingon, “Ang Simbahan wala gayod maorganisar sa hingpit hangtod ang mga kababayen-an naorganisar.” Sa samang paagi, usa ka pagtuon sa Pagpahiuli sa Simbahan sa Ginoo ug sa Iyang pagkapari dili kompleto hangtod kini naglakip sa usa ka pagtuon sa Relief Society, nga sa kaugalingon “usa ka pagpahiuli sa karaang sumbanan” sa babaye nga mga disipulo ni Jesukristo.
Si Eliza R. Snow may importante nga tahas diha niana nga pagpahiuli. Diha siya sa panahon nga ang Relief Society unang naorganisar ug, isip ang sekretarya sa kapunongan, naghimo og mugbo nga mga sulat atol sa mga miting. Siya nakasaksi gayod nga ang Relief Society naorganisar “subay sa [sundanan] sa pagkapari.” Sa ubos mao ang iyang mga pulong, gisulat samtang siya nagserbisyo isip ang ikaduhang Kinatibuk-ang Presidente sa Relief Society, sa pagtabang sa iyang mga sister sa pagsabot sa balaang buhat nga gisalig ngadto sa mga anak nga babaye sa pakigsaad sa Dios.
Aron makakat-on pa mahitungod kon giunsa pag-organisar ang Relief Society, tan-awa sa Anak nga mga Babaye sa Akong Gingharian: Ang Kasaysayan ug Buhat sa Relief Society (2017), 3–30; The First Fifty Years of Relief Society (2016), 3–175.
Dibuho sa Relief Society nga organisasyon pinaagi ni Paul Mann
Eliza R. Snow
“Bisan og ang ngalan [Relief Society] tingali moderno, ang institusyon naggikan sa karaan. Gisultihan kami ni [Joseph Smith], nga ang sama nga organisasyon diha sa simbahan sa karaan, mga palakbit ngadto sa mga gihimo diha sa pipila ka mga sulat [epistles] nga girekord diha sa Bag-ong Tugon, naggamit sa ulohan, ‘pinili nga babaye’ [tan-awa sa 2 Juan 1:1; Doktrina ug mga Pakigsaad 25:3].
“Kini usa ka organisasyon nga dili matukod kon wala ang Pagkapari, tungod sa kamatuoran nga kini nagdawat sa tanan niining awtoridad ug impluwensya gikan niana nga tinubdan. Sa dihang ang Pagkapari gidala ngadto sa langit, kini nga institusyon ingon man sa tanang sumpay sa tinuod nga kapunongan sa simbahan ni Jesukristo dinhi sa yuta, nawala. …
“Ingon nga nakatambong sa pag-organisar sa ‘Kababayen-an nga Relief Society sa Nauvoo,’ … ug usab nakabaton og igo nga kasinatian niana nga kapunongan, tingali ako makahatag og pipila ka mga ideya nga motabang sa mga anak nga babaye sa Zion sa pagpasakop niining importante kaayong posisyon, nga puno sa bag-o ug daghang mga responsibilidad. Kon adunay anak nga mga babaye ug mga inahan sa Israel nga mibati nga dili maka-impluwensya diha sa ilang sitwasyon karon, sila karon makakita og dagkong mga oportunidad sa paggamit sa mga kasarang nga sila adunay daghan niini. …
Naorganisar ang Relief Society sa taas nga lawak sa Red Brick nga Tindahan.
“Kon adunay mangutana, sa bisan unsa, Unsa ang tumong sa Relief Society sa mga Babaye? Akong tubagon—aron sa paghimo og kaayohan—sa pagdala nga magamit ang matag kapasidad nga kita aduna alang sa pagbuhat og maayo, dili lamang sa paghupay sa kabos apan sa pagluwas og mga kalag. Ang nagkahiusang paningkamot makatuman og labaw sa dili makalkulo nga matuman pinaagi sa labing epektibo nga indibidwal nga mga paningkamot. …
“Sa pagdumala sa kabos, ang Relief Society sa mga Babaye adunay ubang mga katungdanan nga buhaton kay sa paghupay lamang sa mga panginahanglan sa pisikal nga lawas. Ang kakabos sa hunahuna ug ang sakit sa kasingkasing, usab nagkinahanglan og pagtagad; ug sa daghang mga higayon usa ka matang sa pagpahayag—og pipila ka pulong sa pagtambag, o gani mainiton ug mabinationg lamano mohimo og dako kaayo nga kaayohan ug mas mapasalamatan kay sa puntil sa bulawan. …
“Kon ang mga Santos magpundok sa lagyong mga dapit, estranghero ngadto sa tanan, ug may purohan nga mahisalaag pinaagi niadtong kinsa naghulat sa paglingla, ang [Relief] Society kinahanglan nga abtik sa pagbantay [kanila], ug ipailaila sila ngadto sa kapunongan nga mopalambo ug mobayaw, ug labaw sa tanan molig-on kanila diha sa hugot nga pagtuo sa Ebanghelyo, ug sa pagbuhat sa mao, mahimong himan sa pagluwas og daghan.
“Kini nagkinahanglan og daghang mga basahon nga motin-aw sa mga katungdanan, mga pribilehiyo ug mga responsibilidad nga kauban sa mga responsibilidad sa Society. … Buhata ang buluhaton (ubos sa direksyon sa imong bishop) sa paagi nga malinawon, tinuyo, maabtik, panaghiusa ug mainampoon, ug ang Dios mopanalangin sa imong mga kahago og kalamposan.”