Detalye gikan sa Joseph Smith in Nauvoo, 1840 [Joseph Smith didto sa Nauvoo, 1840], ni Theodore Gorka

Nobiyembre 10–16: “Ako Nakakita sa Imong mga Sakripisyo diha sa Pagsunod”

Doktrina ug mga Pakigsaad 129–132

Pinaagi ni Joseph Smith, ang Ginoo mikuha sa pipila ka misteryo sa kahangtoran. Ang kagamhanan sa Dios, ang himaya sa langit, ug ang ka halapad sa kahangtoran ingon og hapit na mapamilyar diha sa kahayag sa gipahiuli nga ebanghelyo, bisan sa limitado nga mga panghunahuna sama sa atoa. Ang mga pagpadayag diha sa Doktrina ug mga Pakigsaad 129–32 maayo nga ehemplo. Sama sa unsa ang Dios? Siya “adunay lawas … nga mahikap ingon sa tawo.” Sama sa unsa ang langit? “Ug kana nga panag-uban nga ania kanato dinhi maanaa kanato didto” (Doktrina ug mga Pakigsaad 130:22, 2). Gani, usa sa labing makalipay nga mga kamatuoran mahitungod sa langit mao nga mahimo kining maglakip sa atong gitamod nga mga relasyon sa pamilya, kon maselyo pinaagi sa tukma nga awtoridad. Ang mga kamatuoran sama niini makahimo og pagbati nga ang langit dili layo—mahimayaon apan makab-ot.

Apan, usahay ang Dios mahimong mosugo kanato sa pagbuhat og mga butang nga ingon og dili komportable ug dili makab-ot. Alang sa daghan nga unang mga Santos, ang dinaghang kaminyoon usa sa ingon nga sugo. Usa kadto ka bug-at nga pagsulay sa hugot nga pagtuo alang ni Joseph Smith, sa iyang asawa nga si Emma, ug sa hapit tanan kinsa nakadawat niini. Aron makalampos niini nga pagsulay, nagkinahanglan pa sila og dili lamang positibo nga mga pagbati mahitungod sa gipahiuli nga ebanghelyo; nagkinahanglan sila og hugot nga pagtuo diha sa Dios nga mas lawom pa kaysa niana. Ang sugo wala na himoa karon, apan ang matinud-anong ehemplo sa mga tawo nga misunod niini nagpadayon gihapon. Ug kini nga ehemplo modasig kanato kon kita hangyoon sa paghimo sa atong kaugalingong “mga sakripisyo diha sa pagsunod” (Doktrina ug mga Pakigsaad 132:50).

Mga Ideya alang sa Pagkat-on diha sa Panimalay ug sa Simbahan

Doktrina ug mga Pakigsaad 130–132

Gusto sa Dios nga mahimaya ang Iyang mga anak.

Adunay daghang butang nga wala nato mahibaloi mahitungod sa kahimayaan o kinabuhi diha sa kinatas-an nga ang-ang sa celestial nga gingharian—ang matang sa kinabuhi nga gipuy-an sa Dios. Daghan pa niini nga tingali sa pagkakaron dili pa nato masabtan. Apan ang Dios mipadayag og pipila ka bililhong timailhan, ug daghan niini makita diha sa Doktrina ug mga Pakigsaad 130–32. Mahimo ka nga magbasa nga maghunahuna og mga pangutana sama niini: Unsa ang akong nakat-onan mahitungod sa Dios? Unsa ang akong nakat-onan mahitungod sa kinabuhi human sa mortalidad? Sa unsang paagi nga kini nga impormasyon mahitungod sa kinabuhing dayon makapanalangin sa akong kinabuhi karon?

Tan-awa usab sa “Our Hearts Rejoiced to Hear Him Speak,” diha sa Revelations in Context, 277–80.

Doktrina ug mga Pakigsaad 130:20–21; 132:5

Ang Dios mopanalangin sa mga tawo nga mosunod sa Iyang mga balaod.

Unsaon nimo pagsulti, sa imong kaugalingong mga pulong, ang unsay gitudlo sa Ginoo diha sa Doktrina ug mga Pakigsaad 130:20–21 ug 132:5? Pamalandongi kon sa unsang paagi nga kini nga baroganan napakita sa imong kinabuhi.

Usahay, bisan kon masulondon kita sa Dios, ang mga panalangin nga atong gilaoman dili moabot dihadiha dayon. Unsaon nimo nga magpabilin ang imong hugot nga pagtuo ug paglaom kon kini mahitabo? Pangitaa ang mga ideya diha sa mensahe ni Elder D. Todd Christofferson“Ang Atong Relasyon sa Dios” (Liahona, Mayo 2022, 78–80).

Tan-awa usab sa 1 Nephi 17:35; Doktrina ug mga Pakigsaad 82:10.

Doktrina ug mga Pakigsaad 132:13–21

Ang Langitnong Amahan mihimo niining posible nga ang mga pamilya mahimong mahangtoron.

Pinaagi ni Propeta Joseph Smith, ang Ginoo mipahiuli sa kamatuoran nga ang mga relasyon sa kaminyoon ug sa pamilya mahimong mahangtoron. Samtang magbasa ka sa Doktrina ug mga Pakigsaad 132:13–21, pangitaa ang hugpong sa mga pulong nga makatabang nimo nga masabtan ang kalainan tali sa unsay “magpabilin” sa kahangtoran ug unsay dili. Sa imong hunahuna unsa ang ipasabot nga aron ang relasyon sa kaminyoon mahimong “pinaagi [sa Ginoo]”? (bersikulo 14).

Diha sa iyang mensahe nga “Agig Pagdayeg Niadtong Miluwas,” si Presidente Dieter F. Uchtdorf mitandi sa mga relasyon sa mahangtorong kaminyoon ngadto sa mga butang “maingon og gamiton pagkahuman ilabay” (Liahona, Mayo 2016, 77–78). Unsa ang gitudlo niini nganha nimo nga pagtandi mahitungod sa pag-amuma—o pagpangandam—sa usa ka relasyon sa kaminyoon? Hunahunaa ang imong mga relasyon sa pamilya—karon ug sa umaabot—samtang magbasa ka sa mensahe ni Elder Uchtdorf. Unsa ang imong nakita didto nga nakahatag nimo og paglaom diha ni Kristo alang sa imong mga relasyon sa pamilya?

Si Presidente Henry B. Eyring mipakigbahin niini nga tambag nga iyang nadawat sa dihang nabalaka siya sa sitwasyon sa iyang pamilya: “Kinahanglan lang nga magpuyo ka nga takos sa celestial nga gingharian, ug mas monindot pa ang mga han-ay sa pamilya kaysa imong mahunahunaan” (diha sa “Usa ka Panimalay Diin ang Espiritu sa Ginoo Mopuyo,” Liahona, Mayo 2019, 25). Sa unsang paagi nga kini nga tambag makatabang nimo o sa usa ka tawo nga imong kaila?

Tan-awa usab sa “Mga Pamilya Mahimong Manag-uban sa Hangtod,” Mga Himno, nu. 188; Mga Hilisgotan ug mga Pangutana, “Kaminyoon,” Librarya sa Ebanghelyo.

Ang kaminyoon mahimong maselyo alang sa kahangtoran diha sa balay sa Ginoo.

Doktrina ug mga Pakigsaad 132:1–2, 29–40

Ang dinaghan nga kaminyoon madawat lamang sa Dios kon Siya nagsugo niini.

Daghang mga tawo nga nagbasa sa Daang Tugon naghunahuna kang Abraham, Jacob, Moises, ug uban pa nga nagminyo og daghang asawa. Kini nga mga sulugoon sa Ginoo nakasala ba og pagpanapaw? Ang Dios miaprobar ba sa ilang mga kaminyoon? Si Joseph Smith adunay susama nga mga pangutana. Pangitaa ang mga tubag nga gihatag sa Dios diha sa Doktrina ug mga Pakigsaad 132:1–2, 29–40.

Ang kaminyoon tali sa usa ka lalaki ug usa ka babaye mao ang sumbanan sa Dios sa kaminyoon (tan-awa ang ulohan sa seksiyon sa Opisyal nga Pahayag 1; Jacob 2:27, 30). Hinuon, adunay mga panahon nga ang Dios mimando sa Iyang mga anak sa pagtuman sa dinaghan nga kaminyoon.

Ang unang mga katuigan sa gipahiuli nga Simbahan mao ang usa niadtong mga panahon sa eksepsiyon. Kon gusto ka nga makakat-on pa og dugang mahitungod sa dinaghan nga kaminyoon taliwala sa unang mga Santos, tan-awa sa “Mercy Thompson and the Revelation on Marriage” (diha sa Revelations in Context, 281–93); Mga Santos, 1:325–29, 493–97, 548–61, 571–74; Mga Hilisgotan ug mga Pangutana, “Plural Marriage in The Church of Jesus Christ of Latter-day Saints,” Gospel Library; “Why Was It Necessary for Joseph Smith and Others to Practice Polygamy?” (bidyo), ChurchofJesusChrist.org.

Why was it necessary for Joseph Smith and others to practice polygamy?

A question from the Worldwide Devotional: A Face to Face Event with Elder Cook on September 9, 2018

Mga Tawo, Mga Dapit, Mga Panghitabo

• Emma Hale Smith

• Fanny Alger

• Helen Mar Kimball Whitney

• Mga Istorya sa Unang Panan-awon

Iklik dinhi aron makakita pa og dugang

Mga Ideya sa Pagtudlo sa mga Bata

Doktrina ug mga Pakigsaad 130:2, 18–19; 132:13, 19

Gusto sa Langitnong Amahan nga ako motutok sa mahangtoron nga mga butang.

• Unsa ang gitudlo kanato sa Doktrina ug mga Pakigsaad 132:13 mahitungod sa mga butang sa kalibotan? Tingali ikaw ug ang imong mga anak mahimong makaimpake sa maleta o napsak og mga aytem nga nagrepresentar sa mga butang nga, sumala sa Doktrina ug mga Pakigsaad 130:2, 18–19; 132:19, mahimo natong madala sa sunod nga kinabuhi.

Doktrina ug mga Pakigsaad 130:20–21; 132:5, 21–23

Ang Dios mopanalangin nako kon ako mosunod sa Iyang mga balaod.

• Tingali ang yanong pagtandi makatudlo sa imong mga anak mahitungod sa pagsunod sa mga sugo sa Dios. Pananglitan, mahimo ka nga mohangyo nila sa paghatag nimo og direksyon nga molakaw sa usa ka lugar, sama ngadto sa eskwelahan o gambalay sa Simbahan. Unsa ang mahitabo kon dili kita mosunod sa direksiyon? Dayon mahimo ninyong basahon ang Doktrina ug mga Pakigsaad 130:21 ug itandi kini nga mga direksiyon ngadto sa mga sugo sa Dios nga gihatag kanato.

• Mahimo usab ninyong kantahon og dungan ang usa ka awit mahitungod sa pagkamasulundon, sama sa “Sunda ang Kasugoan” (Songbook sa mga Bata, 68–69), ug pangitaa ang mga pulong diha sa Doktrina ug mga Pakigsaad 130:20–21 ug 132:5 nga susama nianang anaa sa awit. Sa unsang paagi nga ang Dios mopanalangin nato kon kita maningkamot sa pagsunod sa Iyang mga sugo?

Doktrina ug mga Pakigsaad 130:22

Ang Langitnong Amahan ug si Jesukristo adunay imortal nga pisikal nga mga lawas.

• Human sa pagbasa og dungan sa Doktrina ug mga Pakigsaad 130:22, ikaw ug ang imong mga anak mahimong motan-aw sa hulagway ni Jesukristo ug motudlo sa Iyang mga mata, Iyang baba, ug ubang parte sa Iyang lawas. Ang imong mga anak mahimong motudlo sa samang mga parte sa ilang kaugalingong mga lawas. Sultihi sila kon ngano nga importante nimo nga mahibalo nga ang atong mga lawas susama sa mga lawas sa Langitnong Amahan ug ni Jesus.

Tungod sa mga ordinansa sa balay sa Ginoo, ang mga pamilya mahimong mahangtoron.

Doktrina ug mga Pakigsaad 132:19

Ang Langitnong Amahan mihimo niining posible nga ang mga pamilya manag-uban sa kahangtoran.

• Tabangi ang imong mga bata sa pagpangita og mga ehemplo sa mga butang nga dili molungtad sa kahangtoran—pagkaon nga mapan-os, mga bulak nga malawos, ug uban pa. Dayon tan-awa og dungan ang Doktrina ug mga Pakigsaad 132:19 ug pangitaa ang importante nga mga hugpong sa mga pulong “walay kataposan nga pakigsaad,” “gibugkos,” “hangtod sa tanan nga kahangtoran,” ug “hangtod sa hangtod.” (Tan-awa usab sa “Kapitulo 55: Usa ka Pagpadayag mahitungod sa Kaminyoon,” diha sa Mga Istorya sa Doktrina ug mga Pakigsaad, 198, o ang katukma nga bidyo diha sa Librarya sa Ebangheyo.) Mahimo usab kamo nga motan-aw sa mga litrato sa inyong pamilya ug mopamatuod nga ang Ginoo mihimo niining posible, pinaagi sa mga ordinansa ug mga pakigsaad sa templo, nga ang mga pamilya molungtad sa kahangtoran.

Chapter 55: A Revelation about Marriage: July 1843

Magmahimong sensitibo sa mga sitwasyon sa pamilya. “Ang mga bata karon anaa sa nagkalain-lain ug komplikado nga mga kahimtang sa pamilya. … [Kita] kinahanglang motabang [niadtong] mibati nga nag-inusara, napasagdan, o wala mahisakop” (Neil L. Andersen, “Bisan Kinsa nga Magadawat Kanila, Magadawat Kanako,” Liahona, Mayo 2016, 49, 52).

Alang sa dugang nga mga ideya, tan-awa ang isyu karong bulana sa Higala nga magasin.

Usa ka lawak sa pagselyo didto sa Paris France Temple