Us with Them and Them with Us [Kita uban Kanila ug Sila uban Kanato], ni Caitlin Connolly

Nobiyembre 3–9:“Usa ka Tingog sa Kalipay alang sa mga Buhi ug sa mga Patay”

Doktrina ug mga Pakigsaad 125–128

Sa Agosto 1840, usa ka nagbangotan nga Jane Neyman naminaw ni Propeta Joseph nga namulong diha sa lubong sa iyang higala nga si Seymour Brunson. Ang kaugalingong tin-edyer nga anak nga lalaki ni Jane nga si Cyrus bag-ohay lamang usab nga namatay. Nagdugang sa iyang kasubo mao ang kamatuoran nga si Cyrus wala gayod mabunyagi, ug naguol si Jane kon unsay kahulogan niini sa iyang mahangtorong kalag. Si Joseph naghunahuna usab sa samang butang mahitungod sa iyang minahal nga igsoong lalaki nga si Alvin, kinsa namatay usab nga wala pa mabunyagi. Mao nga mihukom ang Propeta sa pagpakigbahin ngadto ni Jane, ug sa tanan nga diha sa lubong, kon unsay gipadayag sa Ginoo kaniya mahitungod niadtong kinsa namatay nga wala makadawat sa mga ordinansa sa ebanghelyo—ug unsay atong mabuhat sa pagtabang kanila.

Ang doktrina sa bunyag alang sa nga patay nakapatandog sa mga Santos; nakahunahuna dayon sila sa nangamatay nga mga sakop sa pamilya. Karon adunay paglaom alang kanila! Mipakigbahin si Joseph sa ilang hingpit nga kalipay, ug sa usa ka sulat nga nagtudlo niini nga doktrina, migamit siya og malipayon, madasigon nga mga pulong sa pagpahayag sa unsay gitudlo sa Ginoo kaniya mahitungod sa kaluwasan sa mga patay: “Himoa ang mga bukid nga mosinggit sa kalipay, ug tanan kamo nga mga walog mosinggit og kusog; ug tanan kamo nga mga dagat ug uga nga mga yuta mosulti sa mga kahibulongan sa inyong Walay Kataposan nga Hari!” (Doktrina ug mga Pakigsaad 128:23).

Tan-awa sa Mga Santos,, 1:473–88; “Letters on Baptism for the Dead,” Revelations in Context, 272–76.

Mga Ideya alang sa Pagkat-on diha sa Panimalay ug sa Simbahan

Doktrina ug mga Pakigsaad 126

Ang Ginoo gusto kanako nga moamuma sa akong pamilya.

Human makauli gikan sa usa ka misyon sa England—usa sa daghang misyon nga iyang naserbisyohan—nakadawat si Brigham Young og laing importante nga tawag gikan sa Ginoo. Siya gimandoan nga “moamuma sa [iyang] pamilya” (bersikulo 3), kinsa nag-antos nga siya wala nila ikauban. Samtang imong tun-an kini nga seksiyon, ikonsiderar ngano nga ang Ginoo usahay magkinahanglan og sakripisyo sa atong pagserbisyo. Unsay imong mabuhat sa pag-amuma sa imong pamilya?

Tan-awa usab sa “Take Special Care of Your Family,” sa Revelations in Context, 242–49.

Doktrina ug mga Pakigsaad 127:2–4

Makasalig ako sa Ginoo sa lisod nga mga panahon.

Bakak nga mga pasangil ug ang hulga nga dakpon mipugos na usab ni Joseph Smith sa pagtago kaniadtong Agosto 1842. Ug bisan pa niana ang mga pulong nga iyang gisulat ngadto sa mga Santos atol niini nga panahon (karon Doktrina ug mga Pakigsaad 127) puno sa kamalaomon ug kalipay. Unsay gitudlo sa mga bersikulo 2–4 kanimo mahitungod sa Dios? mahitungod kon unsaon nimo pag-atubang ang pagbiaybiay og oposisyon? Unsa nga hugpong sa mga pulong gikan niini nga mga bersikulo ang makatabang kanimo kon ikaw mobati nga gigukod? Hunahunaa ang pagrekord kon giunsa sa Ginoo pagsuporta kanimo diha sa “lawom nga tubig” sa imong kinabuhi.

Doktrina ug mga Pakigsaad 127:5–8; 128:1–8

“Bisan unsa ang inyong gitala dinhi sa yuta itala didto sa langit.”

Samtang ikaw magbasa diha sa Doktrina ug mga Pakigsaad 127:5–8; 128:1–8, pangitaa ang mga rason nganong ang Ginoo mihatag ni Joseph Smith sa ingon ka piho nga mga panudlo mahitungod sa pagrekord og mga bunyag alang sa patay. Unsa ang gitudlo niini kanimo mahitungod sa Ginoo ug sa Iyang buhat? Unsay imong gibati nga kini nga panudlo mahimong magamit sa imong kaugalingong mga rekord sa pamilya, sama sa personal nga mga journal?

Ang pagbuhat og serbisyo sa templo alang sa atong mga katigulangan nagbugkos sa atong mga kasingkasing ngadto kanila.

Doktrina ug mga Pakigsaad 128:5–25

Ang kaluwasan sa akong mga katigulangan importante sa akong kaluwasan.

Kini klaro gikan sa unsay gipadayag sa Dios pinaagi ni Joseph Smith ngano nga ang atong mga katigulangan kinsa wala mabunyagi niini nga kinabuhi nagkinahanglan nato: kita bunyagan alang kanila aron sila makapili sa pagdawat o pagsalikway niini nga ordinansa. Apan ang Propeta mitudlo usab nga ang kaluwasan sa atong mga katigulangan “gikinahanglan ug mahinungdanon sa atong kaluwasan.” Samtang imong basahon ang Doktrina ug mga Pakigsaad 128:15–18, hunahunaa kon ngano man kaha.

Bersikulo 5 nagtudlo nga ang ordinansa sa mga bunyag sa mga patay “giandam sa wala pa ang katukoran sa kalibotan.” Unsa ang gitudlo niini nga kamatuoran kanimo mahitungod sa Dios ug sa Iyang plano? Unsa ang ikadugang sa mensahe ni Elder Dale G. Renlund nga “Buhat sa Family History ug sa Templo: Pagsilyo ug Pagkaayo” sa imong pagsabot? (Liahona, Mayo 2018, 46–49).

Migamit si Joseph Smith og mga hugpong sa mga pulong sama sa “gahom sa pagbugkos,” “nagsumpay,” ug “hingpit nga pagkahiusa” kon magtudlo mahitungod sa mga ordinansa sa pagkapari ug bunyag alang sa patay. Pangitaa kini ug ang susama nga mga hugpong sa mga pulong samtang ikaw magbasa sa Doktrina ug mga Pakigsaad 128:5–25. Makahunahuna ba ikaw og mga butang nga imong magamit sa paghulagway niini nga hugpong sa mga pulong, sama sa kadena o pisi? Ngano nga maayo kini nga hugpong sa mga pulong sa paghulagway niini nga doktrina?

Ang pagkonsiderar sa mosunod nga mga pangutana makatabang usab sa imong pagtuon niini nga mga bersikulo:

• Sa imong opinyon, ngano nga ang bunyag alang sa mga patay ikonsiderar nga ang “labing mahimayaon sa tanan nga hilisgotan nga naapil sa walay kataposan nga ebanghelyo”? (bersikulo 17). Unsa nga mga kasinatian ang nakatabang nimo nga mobati niini nga paagi?

• Sa unsang pagsabot nga tingali tunglohon ang yuta kon walay “nagsumpay … tali sa mga amahan ug sa mga anak”? (bersikulo 18).

• Unsay nakapadani kanimo mahitungod sa mga pulong ni Joseph Smith diha sa mga bersikulo 19–25? Sa unsa nga paagi kini nga mga bersikulo makaapekto sa imong gibati mahitungod ni Jesukristo? mahitungod sa serbisyo sa templo alang sa imong mga katigulangan? (tan-awa usab sa “Come, Rejoice,” Hymns, nu. 9).

Human sa pagtuon niini nga mga bersikulo, mahimong ikaw adunay bation alang sa imong mga katigulangan. Ang mga ideya sa FamilySearch.org mahimong makatabang.

Ang “Inspirational Videos” diha sa “Temple and Family History” nga koleksiyon sa Gospel Library makahatag nimo og praktikal nga tabang, makapadasig nga mga istorya, ug mga mensahe gikan sa mga lider mahitungod sa family history.

Gamita ang mga kapanguhaan sa Simbahan. Ang mga link sa mga latid sa Dali, Sunod Kanako makahatag og sayon nga pag-akses sa makatabang nga mga kapanguhaan nga makatabang nimo nga masabtan ug magamit ang mga kamatuoran sa ebanghelyo o molihok sa mga impresyon nga imong nadawat. Pananglitan, ang link sa FamilySearch sa ibabaw mosangpot ngadto sa mga kalihokan sama sa paghimo sa imong kaugalingong family tree, pagpangita sa mga katigulangan kinsa nagkinahanglan og mga ordinansa sa templo, nga makakita diin gikan ang imong mga katigulangan, o pag-upload og istorya sa pamilya.

Tan-awa usab sa Kevin R. Duncan, “Ang Tingog sa Kalipay!,” Liahona, Mayo 2023, 95–97.

“Usa ka Mahimayaon ug Talagsaon nga Probisyon.”

Si Presidente Gordon B. Hinckley miingon:

“Ang Pag-ula ni Jesus alang sa tanan nga nagrepresentar og mahinungdanon nga puli nga sakripisyo. Iyang gipahimutang ang sundanan diin Siya nahimong proxy alang sa tanang katawhan. Kini nga sundanan diin ang usa ka tawo makabuhat alang sa laing tawo gihimo diha sa mga ordinansa sa balay sa Ginoo. Dinhi nagserbisyo kita alang niadtong nangamatay na nga wala makahibalo sa ebanghelyo. Kadtong nangamatay adunay opsyon sa pagdawat o pagsalikway sa ordinansa nga gipahigayon. Pareha sila niadtong ania pa sa kalibotan. Ang mga patay gihatagan og pareho nga oportunidad sama sa buhi. Makausa pa, pagkamahimayaon ug pagkatalagsaon ang paagi nga gihimo sa Makagagahom pinaagi sa Iyang pagpadayag ngadto sa Iyang Propeta” (“Ang Pinakaimportanteng Butang nga Gipadayag sa Dios,” Liahona, Mayo 2005, 82–83).

Mga Tawo, Mga Dapit, Mga Panghitabo

• Mga Kapanguhaan sa Kasaysayan sa Doktrina ug mga Pakigsaad: Seymour Brunson

• Brigham Young

• Bunyag alang sa mga Patay

Iklik dinhi aron makakita pa og dugang

Mga Ideya sa Pagtudlo sa mga Bata

Doktrina ug mga Pakigsaad 126:3

Makatabang ko sa pag-amuma sa akong pamilya.

• Sa pagtabang sa imong mga anak nga makat-on sa pagserbisyo sa ilang mga sakop sa pamilya, ikonsiderar ang pagpakigbahin sa impormasyon mahitungod ni Brigham Young diha sa “Kapitulo 49: Ang mga Santos sa Nauvoo” (sa Mga Istorya sa Doktrina ug mga Pakigsaad, 183, o sa tukma nga bidyo sa Gospel Library) o i-summarize ang Doktrina ug mga Pakigsaad 126 sa imong kaugalingong mga pulong. Mahimo nimong hatagan og gibug-aton ang hugpong sa mga pulong “moamuma pag-ayo sa imong banay” (bersikulo 3) ug pakigsulti sa imong mga bata unsay ipasabot sa [pag]-amuma pag-ayo sa atong mga pamilya.

  Chapter 50: The Saints in Nauvoo: January–July 1841

• Tingali makalingaw alang nimo ug sa imong mga anak ang pagtan-aw og mga litrato sa pamilya (o magdrowing og mga litrato) samtang kamo maghisgot mahitungod sa mga paagi nga kita makatabang sa “pag-amuma” alang sa mga sakop sa pamilya. Mahimo kamong manganta og kanta sama sa “Panimalay Mahimo nga Langit sa Yuta” (Mga Himno, nu. 186).

Doktrina ug mga Pakigsaad 128:5, 12

Ang tanang anak sa Dios nagkinahanglan sa kahigayonan nga mabunyagan.

• Dapita ang imong mga anak sa pagpangita gikan sa Doktrina ug mga Pakigsaad 128:1 unsa nga hilisgotan ang gihunahuna ni Joseph Smith. Mahimo usab silang mosiksik sa bersikulo 17 aron mahibaloan kon unsa nga hilisgotan ang iyang gikonsiderar nga “ang labing mahimayaon.” Tugoti sila nga mopakigbahin sa unsay ilang nahibaloan, ug maghisgot kon nganong kini nga hilisgotan mahimayaon man kaayo.

• Agig dugang sa pagtabang sa mga bata sa pag-andam (ug pagsunod) sa kaugalingon nilang mga pakigsaad sa bunyag, ikaw makatabang nila nga makahibalo unsaon sa pagtabang ang mga tawo kinsa wala mohimo niini nga mga pakigsaad panahon sa ilang pagpakabuhi. Ikonsiderar ang pagsulti sa imong mga anak mahitungod sa usa ka tawo nga imong nailhan nga namatay nga wala mabunyagi. Dayon mahimo ninyong basahon pagdungan ang Doktrina ug mga Pakigsaad 128:5 ug motan-aw og litrato sa usa bunyaganan sa templo (sama sa usa nga anaa sa kataposan niini nga latid). Sultihi ang imong mga anak unsay imong gibati mahitungod sa pagpabunyag diha sa mga templo alang sa mga tawo kinsa mga patay aron nga ang tanan adunay kahigayonan sa paghimo og mga pakigsaad uban sa Langitnong Amahan.

Doktrina ug mga Pakigsaad 128:18

Gusto sa Langitnong Amahan nga makat-on ko mahitungod sa akong family history.

• Tingali makalingaw alang nimo ug sa imong mga anak sa paghimo og kadena nga hinimo sa papel nga adunay mga ngalan sa ilang mga ginikanan, mga apohan, mga apohan sa tuhod, ug uban pa (tan-awa sa pahina sa kalihokan niini nga semana). Dayon mahimo kamong mopakigbahin sa usag usa unsa ang inyong nahibaloan mahitungod niini nga mga katigulangan. Basaha og dungan ang Doktrina ug mga Pakigsaad 128:18 aron mahibalo kon unsa ang “sumpay” nga naghimo sa atong family history nga “tibuok ug walay kulang.” Mahimo usab nimong tan-awon ang bidyo nga “Courage: I Think I Get It from Him” (Gospel Library).

  Courage: I Think I Get It From Him

  Learn about your ancestors strengths to discover your own strengths.

• Dugang nga mga kalihokan sa pagtabang sa imong mga anak nga moapil sa family history makita sa “Ang Templo ug ang Plano sa Kalipay” sa apendiks B o sa FamilySearch.org.

Ang mga ordinansa sa templo motabang nato sa paghiusa sa mga pamilya sama sa mga sumpay sa kadena.

Alang sa dugang nga mga ideya, tan-awa ang isyu karong bulana sa Higala nga magasin.

Ang bunyaganan diha sa Ogden Utah Temple.