« Mau reo nō te fa’aho’i-fa’ahou-ra’a mai : Bāpetizora’a nō tō tātou mau tupuna, ‘te hō’ē ha’api’ira’a tumu hanahana’ », Mai, pe’e mai—nō te ’utuāfare ’e te fare purera’a : Te Ha’api’ira’a Tumu ’e te mau Fafaura’a 2025 (2025)
« Bāpetizora’a nō tō tātou mau tupuna, ‘te hō’ē ha’api’ira’a tumu hanahana’ », Mai, pe’e mai—nō te ’utuāfare ’e te fare purera’a : 2025
Mau reo nō te fa’aho’i-fa’ahou-ra’a mai
Bāpetizora’a nō tō tātou mau tupuna, « te hō’ē ha’api’ira’a tumu hanahana »
Tē fa’a’ite nei teie hōho’a pāpa’i i te ’āpo’o bāpetizora’a nō te hiero nō Nāvu, tei ni’a iho e ’ahuru ma piti pua’atoro.
Phebe ’e Wilford Woodruff
Tē ora ra Phebe Woodruff i pīha’i iho ia Nāvu ’a ha’amata ai ’o Iosepha Semita i te ha’api’i nō ni’a i te rāve’a e bāpetizohia ai oia nō te feiā i ora nā mua atu. ’Ua pāpa’i ’oia nō ni’a i te reira i tāna tāne, ’o Wilford, tē tāvini ra i te hō’ē misiōni i Peretāne :
« ’Ua ha’api’i mai te taea’e Iosepha […] nā roto i te heheura’a ē, e nehenehe te mau ta’ata i roto i teie ’ēkālesia e bāpetizohia nō te tahi atu fēti’i pohe tei ’ore i fāna’o ’ia fa’aro’o i teie ’evanelia, tae noa atu i tā rātou mau tamari’i, te mau metua, te mau taea’e, te mau tuahine, te mau pāpā ’e te mau māmā rū’au, te mau tonton ’e te mau tatie […] I te taime ’a bāpetizohia ai rātou nō tō rātou mau hoa, e matara mai rātou i rāpae i te fare tāpe’ara’a ’e e nehenehe rātou e tītau ia rātou i te ti’afa’ahoura’a ’e e ’āfa’i ia rātou i roto i te bāsileia tiretiera—’ua fāri’i-pōpou-hia teie ha’api’ira’a tumu e te ’ēkālesia ’e tē haere rahi nei rātou, tē vai ra e bāpetizohia e 16 a’e taime […] i te mahana hō’ē ».
I muri a’e, ’ua parau Wilford Woodruff nō ni’a i teie parau tumu : « Te taime iho ’ua fa’aro’o vau i te reira, ’ua ’ōu’a tō’u ’ā’au ma te ’oa’oa […] ’Ua haere au i mua ’e ’ua bāpetizohia vau nō tō’u mau fēti’i pohe ato’a tā’u i ti’a ’ia feruri […] ’Ua hina’aro vau e parau ē, haleluia i te taime ’a fa’a’ite mai ai te heheura’a ia tātou i te bāpetizora’a nō tei pohe. ’Ua mana’o vau ē, e ti’ara’a tō tātou nō ’ia ’oa’oa i te mau ha’amaita’ira’a o te ra’i ».
Vilate Kimball
Mai te tuahine Woodruff, ’ua fa’aro’o Vilate Kimball nō ni’a i te bāpetizora’a nō te feiā pohe i te taime ’a poro ai tāna tāne, ’o Heber, i te ’evanelia i te ātea. ’Ua pāpa’i ’oia iāna :
« ’Ua ’īriti te peresideni Semita i te tahi tumu parau ’āpī ’e te hanahana […] ’e ’ua fa’atupu te reira i te huru oraora i roto i te ’ēkālesia. ’Oia ho’i, ’ia bāpetizohia nō te feiā pohe. ’Ua parau ’o Paulo nō ni’a i te reira i roto i te Korinetia 1, te pene 15 ’e te ’īrava 29. ’Ua fāri’i Iosepha i te hō’ē tātarara’a hau atu nō te reira nā roto i te heheura’a […] E ha’amaita’ira’a ta’a ’ē te reira nō teie ’ēkālesia ’ia bāpetizohia rātou nō te mau fēti’i ato’a i pohe hou teie ’evanelia i tae mai ai ; e tae roa atu i tō rātou tupuna tāne ’e tupuna vahine […] Nā roto i te ravera’a i te reira, tē ha’a nei tātou ’ei ti’a mana nō rātou ; nō te fa’afāna’o ia rātou i te ti’ara’a i roto i te ti’afa’ahoura’a mātāmua. Tē parau ra ’oia ē, e porohia te ’evanelia ia rātou […] ’aita rā te mau vārua e bāpetizohia […] Mai te taime mai ā teie fa’anahora’a i porohia ai i’ō nei, ’aita te pape i fa’aea i te reru. I te taime nō te ’āmuira’a, tē vai ra i te tahi taime e va’u ’aore rā ’ahuru peresibutero i roto i te ’ānāvai nō te bāpetizo i te hō’ē ā taime […] ’Ua hina’aro vau ’ia bāpetizohia vau nō tō’u metua vahine. ’Ua fa’aoti au e tīa’i ’ia ho’i mai ’oe i te fare, terā rā i te taime hope’a ’a paraparau ai Iosepha nō te reira tumu parau, ’ua parau ’oia i te tā’āto’ara’a ’ia ti’a mai ’e ’ia rave, ’e ’ia fa’aora ’oi’oi i tō rātou mau hoa i te tītīra’a. Nō reira, tē feruri nei au e haere i mua i teie hepetoma, nō te mea e rave rahi mau ta’ata nō ’ō nei e haere ra i mua. Tē vai ra ’ua bāpetizo-a’ena-hia rātou e rave rahi taime […] Nō reira, tē ’ite ra ’oe ē, tē vai ra te rāve’a nō te tā’āto’ara’a. E ’ere ānei teie i te hō’ē ha’api’ira’a tumu hanahana ? »
Phebe Chase
I te otira’a te ’āpo’o bāpetizora’a i roto i te hiero nō Nāvu, ’ua ravehia te mau bāpetizora’a mono i reira, e ’ere fa’ahou i roto i te ’ānāvai. ’Ua pāpa’i Phebe Chase, tē noho ra ’oia i Nauvoo, i tōna metua vahine nō ni’a i te hiero, ma te fa’ahiti i te parau nō te ’āpo’o bāpetizora’a ’ei vāhi « e nehenehe tātou e bāpetizohia nō tō tātou feiā pohe ’e nō te riro ’ei fa’aora i ni’a i te mou’a Ziona ». ’Ua fa’ata’a atu ’oia ē, i roto i te ’āpo’o bāpetizora’a, « ’Ua bāpetizohia vau nō tō’u metua tāne here ’e nō te tā’āto’ara’a o te toe’a o tō’u mau hoa […] I teienei, tē hina’aro nei au ’ia ’ite i te i’oa o tō ’oe metua tāne ’e tō ’oe metua vahine ’ia ti’a iā’u ’ia fa’ati’amā ia rāua, nō te mea tē hina’aro nei au e fa’aora i te feiā pohe […] ’Ua paraparau fa’ahou mai te Fatu ’e ’ua fa’aho’i mai i te fa’anahora’a tahito ».
Sally Randall
I te pāpa’ira’a ’oia i tōna mau ho’a ’e i tōna ’utuāfare nō ni’a i te bāpetizora’a nō te mau melo o te ’utuāfare tei ora na, feiā pohe, ’ua fa’aha’amana’o ’o Sally Randall i te parau nō te pohera’a tāna tamaiti ’o George :
« E tāmatara’a rahi ho’i te reira nō’u ’e mai te huru ra ē, ’aita ā i hope, terā rā […] ’ua bāpetizohia tōna metua tāne nōna ’e ’auē ïa ’ohipa hanahana tē ti’aturi nei tātou ’e tē fāri’i nei ho’i i te ’īra’a o te ’evanelia mai tei porohia i teienei ’e ’ua nehenehe ia tātou ’ia bāpetizohia nō te tā’āto’ara’a o tō tātou mau hoa tei pohe ’e ’ia fa’aora ia rātou tei noa’a mai tō tātou ’ite ia rātou.
« Tē hina’aro nei au ’ia pāpa’i mai ’oe i te i’oa o tō tātou ato’a mau fēti’i pohe, ē haere roa i ni’a i te mau pāpā rū’au ’e te mau māmā rū’au e noa’a mai. Tē ’ōpua nei au e rave i tei roa’a iā’u nō te fa’aora i tō’u mau hoa ’e e ’oa’oa roa vau mai te mea e haere mai vetahi ’o ’outou e tauturu iā’u nō te mea, e ’ohipa rahi ho’i te reira nō te hō’ē noa ta’ata […] ’Ua ’ite au ē e mana’o ’outou ē, e ha’api’ira’a tumu huru ’ē teie, e ’ite rā ’outou ē, e parau mau te reira ».