« Mau reo nō te fa’aho’i-fa’ahou-ra’a mai : Te Sōtaiete Tauturu », Mai, pe’e mai—nō te ’utuāfare ’e te fare purera’a : Te Ha’api’ira’a Tumu ’e te mau Fafaura’a 2025 (2025)
« Te Sōtaiete Tauturu », Mai, pe’e mai—nō te ’utuāfare ’e te fare purera’a : 2025
Mau reo nō te fa’aho’i-fa’ahou-ra’a mai
Te Sōtaiete Tauturu
I te matahiti 1842, i muri a’e i te fa’ati’ara’ahia te Sōtaiete Tauturu i Nāvu, Illinois, ’ua parau te peropheta Iosepha Semita, « ’Aita roa te ’Ēkālesia i hope roa i te fa’ati’ahia tae roa atu ’ua fa’anahohia te mau vahine ». ’Oia ato’a, ’e’ita e hope te hō’ē tuatāpapara’a nō te fa’aho’i-fa’hou-ra’a-hia mai te ’Ēkālesia a te Fatu ’e tāna autahu’ara’a tae roa atu i te taime e ’āmui-ato’a-hia mai te hō’ē tuatāpapara’a o te Sōtaiete Tauturu, tei riro ho’i ’ei « fa’aho’ira’a mai o te hō’ē hōho’a tahito » o te mau pipi vahine a Iesu Mesia.
E ’ohipa faufa’a roa tā Eliza R. Snow i roto i taua fa’aho’i-fa’ahou-ra’a mai. Tei reira ’oia ’a ha’amau-mātāmua-hia ai te Sōtaiete Tauturu ’e, ’ei pāpa’i parau nō te Sōtaiete, ’ua pāpa’i ’oia i te mau nota i roto i te reira mau rurura’a. ’Ua ’ite a’era ’oia iho ē, ’ua fa’anahonahohia te Sōtaiete Tauturu « mai te au i te hōho’a o te autahu’ara’a ». Teie i raro nei tāna mau parau, tei pāpa’ihia ’a tāvini ai ’oia nō te pitiraa o te peresideni rahi nō te Sōtaiete Tauturu, nō te tauturu i tōna mau tuahine ’ia māramarama i te ’ohipa hanahana i pūpūhia mai i te mau tamāhine nō te fafaura’a a te Atua.
Nō te ha’api’i atu ā e mea nāhea te fa’anahonaho-ra’a-hia te Sōtaiete Tauturu, hi’o Mau tamāhine i roto i tō’u nei bāsileia : Te ’ā’amu ’e te ’ohipa a te Sōtaiete Tauturu (2017), 1–25 ; Te pae-’ahuru-ra’a mātāmua o te matahiti o te Sōtaiete Tauturu (2016), 3–175.
Hōho’a pēni nō te fa’anaho-ra’a-hia te Sōtaiete Tauturu nā Paul Mann
Eliza R. Snow
« Noa atu ē nō teie tau te i’oa [Sōtaiete Tauturu], te fa’anahonahora’a rā e mea tahito ïa. ’Ua parau mai ’o [Iosepha Semita] ē, ’ua vai noa na terā fa’anahonahora’a i roto i te ’Ēkālesia i tahito ra, te tahi mau fa’ahōho’ara’a ’o tei fa’a’itehia i roto i te tahi o te mau ’episetole tei pāpa’ihia i roto i te Faufa’a ’Āpī, ma te fa’a’ohipa i te upo’o parau, ‘vahine mā’itihia’ [hi’o 2 Ioane 1:1 ; Te Ha’api’ira’a Tumu ’e te mau Fafaura’a 25:3].
« Teie te hō’ē fa’anahonahora’a ’o tē ’ore roa e tupu mai te mea ’aita te autahu’ara’a, nō te mea e huti mai ’oia i tōna mana ’e tōna pūai mai roto mai i terā pū. I te ravera’ahia te autahu’ara’a mai ni’a atu i te fenua nei, ’ua morohi ato’a teie fa’anahora’a mai te tahi atu mau tū’atira’a o te fa’anahora’a mau o te ’Ēkālesia a Iesu Mesia i ni’a i te fenua nei […]
« Nō tō’u taera’a i te fa’anaho-ra’a-hia te ‘Sotaiete Tauturu vahine nō Nāvu’, […] ’e ’oia ato’a nō te fāri’ira’a i te ’itera’a rahi i roto i taua tā’atira’a ra, pēnei a’e e nehenehe au e hōro’a i te tahi mana’o nō te tauturu i te mau tamāhine nō Ziona i roto i te ta’ahira’a i mua i roto i teie ti’ara’a faufa’a rahi, tei ’ī i te mau hōpoi’a ’āpī ’e te rau. Mai te mea te ’ite ra te hō’ē o te mau tamāhine ’e te mau metua vahine ē, ’ua tā’ōti’a-ri’i-hia rātou i roto i tō rātou iho orara’a, e ’ite ïa rātou i teienei i te hō’ē hi’ora’a ateatea nō te mau pūai ’e te mau ’ite tāta’itahi nō te rave i te maita’i tā rātou i fāri’i hua […]
’Ua fa’ati’ahia te Sotaiete Tauturu i roto i te piha i ni’a o te fare toa piriti ’ute’ute.
« E tupu mai anei te uira’a i roto i te ferurira’a o te hō’ē ta’ata : e aha te tumu o te Sōtaiete Tauturu ? E pāhono ïa vau—nō te rave i te maita’i—nō te ha’aputu mai i te mau rāve’a ato’a e roa’a ia tātou nō te rave i te maita’i, ’eiahā noa i roto i te tauturura’a i te feiā veve i te fa’aorara’a rā i te mau vārua. E fa’atupu te tauto’ora’a tāhō’ē i te ’ohipa fāito ’ore, hau atu i tā te pūai tāta’i hō’ē e fa’atupu […]
« I roto i te aupurura’a i te feiā veve, e mau hōpoi’a ’ē atu tā te Sōtaiete Tauturu vahine e rave ’eiaha rā i te tāmārū-noa-ra’a i te mau hia’ai tino. E tītau ato’a te veve o te ferurira’a ’e te ma’i o te ’ā’au i te hi’opo’ara’a ; ’e te parau hāmani maita’i i te mau taime e rave rahi—e tupu te maita’i rahi ’e te māuruuru i te tahi ma’a parau a’o, ’e tae noa atu i te tahi arohara’a rima māhanahana ’e te aupuru, rahi atu ā i te hō’ē pūtē ’auro […]
« I tō te feiā mo’a ha’aputuputura’a mai te tahi atu mau fenua, e mau ta’ata ’e’ē nō te mau ta’ata ato’a, ’e ’o tei ruri-’ē-hia e te fei’a ha’avare, tītauhia i te Sotaiete [tauturu] e rū nō te ha’apa’o ia rātou, ’e ’ia fa’aō ia rātou i roto i te tōtaiete, ’o tē ha’amaita’i ’e ’o tē fa’ateitei, e hau roa atu nō te ha’apūai ia rātou i roto i te fa’aro’o i te ’evanelia, ’e i roto i te reira ravera’a, e riro ïa rātou ’ei mauha’a nō te fa’aora e rave rahi.
« E tītau te reira i te mau buka nō te fa’ata’a i te mau ’ohipa, te mau faufa’a ta’a ’ē ’e te mau hōpoi’a a te Sōtaiete […] ’A haere (i raro a’e i te fa’aterera’a a tō ’outou ’episekōpo) ma te marū, ma te mana’o pāpū, ma te pūai, ma te tāhō’ē ’e ma te pure, ’e e fa’atorōna te Atua i tā ’outou mau tauto’ora’a ma te manuia ».