Ten Virgins [’Ahuru Pāretenia], nā Jorge Cocco

17–23 nō Novema : « ’A fa’aineine na ’outou nō te taera’a mai o te tāne fa’aipoipo ’āpī »

Te Ha’api’ira’a Tumu ’e te mau Fafaura’a 133–134

I te matahiti 1833, ’ua ’aro ’e ’ua ha’amou te naho’a ta’ata i te fare nene’ira’a parau a te ’Ēkālesia. I roto i te mau ’ohipa e nene’ihia ra i taua taime ra, tē vai ra te Buka nō te mau Fa’auera’a—te tāmatara’a mātāmua a te ’Ēkālesia ’ia ha’aputu i te mau heheura’a a te Atua i te mau mahana hope’a nei i roto hō’ē buka. ’Ua ha’apurara te naho’a ta’ata i te mau ’api tei ’ore ā i tā’amuhia, ’e noa atu ē, ’ua nōa’a i te feiā mo’a itoito i te fa’aherehere mai i te tahi mau ’api, tē tahi noa mau ’api ’aita i hope roa o te Buka nō te mau Fa’auera’a tei roa’a mai.

Tā tātou i mātau ’ei tufa’a 133 nō Te Ha’api’ira’a Tumu ’e te mau Fafaura’a, ’ua mana’ohia te reira ’ia riro ’ei parau hi’u nō te Buka nō te mau Fa’auera’a, mai te periota maere i te hope’a o te mau heheura’a ha’apararehia a te Fatu. Tē fa’aara nei te reira i te hō’ē mahana ha’avāra’a ’e e fa’ahiti fa’ahou i te pi’ira’a e ’itehia i roto i te mau heheura’a nō teie ’anotau : E horo ē te mau mea nā te ao nei, mai tei fa’ahōho’ahia e Babulonia. Patu ia Ziona. Fa’aineinera’a nō te tae-piti-ra’a mai. ’E ’a ha’aparare i teie poro’i « i te mau nūna’a ato’a, i te mau ’ōpū ato’a ’e i te mau reo ato’a, ’e i te mau ta’ata ato’a » (’īrava 37). ’Aita te mau ’ōpuara’a tumu nō te Buka nō te mau Fa’auera’a i tupu, e fa’aha’amana’ora’a rā teie heheura’a ’e e fa’a’itera’a ato’a ho’i ē, e haere tāmau noa te ’ohipa a te Fatu i mua, « e fa’a’ite mai ho’i ’oia i tōna rima mo’a […] ’e e ’ite mai te mau hope’a ato’a o te fenua nei i te fa’aorara’a a tō rātou Atua » (’īrava 3).

Mana’o nō te ’apo i te ha’api’ira’a i te ’utuāfare ’e i te fare purera’a

Te Ha’api’ira’a Tumu ’e te mau Fafaura’a 133:4–14

Tē pi’i mai nei Iesu Mesia iā’u ’ia pāto’i ia Babulonia ’e ’ia haere mai i Ziona.

Te huritua pae vārua o Ziona, ’o Babulonia ïa—e ’oire tahito tei fa’ahōho’ahia i roto i te mau pāpa’ira’a mo’a i te ’ino ’e te fa’atītīra’a pae vārua. ’A tai’o ai ’outou i Te Ha’api’ira’a Tumu ’e te mau Fafaura’a 133:4–14, ’a feruri i te huru tā te Fa’aora pi’ira’a ia ’outou ’ia « fa’aru’e […] ia Babulonia » (’īrava 5) ’e « ’a haere atu na […] i Ziona » (’īrava 9). Tē nāhea ra ’outou i te pāhono i tāna pi’ira’a ? E aha atu ā tā ’outou e ha’api’i mai nei nō ni’a ia Ziona i roto i te a’ora’a a Elder D. Todd Christofferson « Come to Zion » ? (Liahona, Novema 2008, 37–40).

Te Ha’api’ira’a Tumu ’e te mau Fafaura’a 133:1–19, 37–39

E nehenehe au e fa’aineine i teienei nō te tae-piti-ra’a mai o te Fa’aora.

Te tufa’a 1, te ’ōmuara’a parau a te Fatu nō Te Ha’api’ira’a Tumu ’e te mau Fafaura’a, ’e te tufa’a 133, te parau hi’u tumu nō te Buka nō te mau Fa’auera’a, tē ha’amata ra te reira nā ni’a i te hō’ē ā pi’ira’a a te Fatu : « ’A fa’aro’o mai na ’o ’outou e te mau ta’ata nō tā’u nei ’ēkālesia » (Te Ha’api’ira’a Tumu ’e te mau Fafaura’a 1:1 ; 133:1). Pēnei a’e e nehenehe ’outou e tuatāpapa i Te Ha’api’ira’a Tumu ’e te mau Fafaura’a 133:1–19, 37–39 ’e ’ia tāpura i te mau poro’i tā te Fatu e ani nei ia ’outou ia « fa’aro’o » ’ia (fa’aro’o ’e ’ia ha’apa’o) ’a fa’aineine ai ’outou nō tōna tae-piti-ra’a mai. Terā rā, e nehenehe ’outou e tāpura i te mau mea tāna e hina’aro ’ia rave ’outou nō te (1) fa’aineine ia ’outou iho ’e (2) tauturu i te fa’aineinera’a i te ao nei nō tōna ho’ira’a mai. E aha tā ’outou i ha’api’i mai i roto i terā mau tāpura ?

’Ua fa’a’ite Russell M. Nelson i te mau parau mau faufa’a rahi nō ni’a i te huru o te ao ’ia ho’i ana’e mai te Fa’aora—’e nāhea ’ia fa’aineine. ’A ’imi i teie mau parau mau i roto i tāna parau poro’i « Te ananahi o te ’Ēkālesia : fa’aineine i te ao nei nō te tae-piti-ra’a mai o te Fa’aora » (Liahona, ’Ēperēra 2020, 6-11). E aha te mea e fa’auruhia ra ia ’outou ’ia rave ’aore rā ’ia tāmau noa i te rave nō te « fa’aineinera’a i te ao nei nō te ho’ira’a mai o te Fa’aora » ? (« Te parau tai’o a te pupu Autahu’ara’a a Aarona », vaira’a buka ’evanelia).

Hi’o ato’a Mataio 25:1–13 ; Russell M. Nelson, « ’A fāri’i i te ananahi ma te fa’aro’o », Liahona, Novema 2020, 73–76 ; « Haere Mai e te mau tamari’i a te Fatu », Te mau hīmene, N°29 ; Topics and Questions, « Tae-piti-ra’a mai o Iesu Mesia », Vaira’a buka ’evanelia.

Te Ha’api’ira’a Tumu ’e te mau Fafaura’a 133:19–56

Te tae-piti-ra’a mai o Iesu Mesia, e ’ohipa ’oa’oa ïa nō te feiā parauti’a.

’Ia tai’o ’outou i te parau nō te ho’ira’a mai o te Fa’aora i roto i te mau ’īrava 19–56, e aha te mea e ’itehia e ’outou tā ’outou e tīa’i rū nei ? E aha te mau parau ’aore rā te mau pereota e fa’a’ite ra i te here o te Fatu nō tōna mau ta’ata ? E nehenehe e pāpa’i i te mau ’ohipa i tupu nō ’outou nō ni’a i « te here marū o tō [’outou] Fatu, ’e te mau mea ato’a ho’i tāna i hōro’a atu nā [’outou] ra mai te au i tōna maita’i » (’īrava 52).

Tuha’a nō te Healer [Fa’aora ma’i], nā Kelsy ’e Jesse Lightweave

Te Ha’api’ira’a Tumu ’e te mau Fafaura’a 134

« ’Ua fa’ata’ahia te mau hau fenua e te Atua ’ei maita’i nō te ta’ata nei ».

E mea huru ’ātitirau te aura’a i rotopū i te feiā mo’a mātāmua ’e te fa’aterera’a hau. I te fa’ahepo-ra’a-hia te feiā mo’a ’ia haere i rāpae i te mata’eina’a nō Jackson, Missouri, i te matahiti 1833, ’ua ani rātou i te tauturu a te fa’aterera’a hau o te fenua iho e o te hau rahi, ’e ’aita i fāri’i i te hō’ē noa a’e tauturu. I terā ato’a taime, ’ua mana’o te tahi mau ta’ata nā rāpae i te ’Ēkālesia ē, te mau ha’api’ira’a nō ni’a ia Ziona, e mau ha’api’ira’a ïa e parau nei ē, tē pāto’i ra te feiā mo’a i te mana o te mau fa’aterera’a hau i ni’a i te fenua nei. ’Ua pāpa’ihia te tahi tuha’a o Te Ha’api’ira’a Tumu ’e te mau Fafaura’a 134 nō te ha’apāpū i te ti’ara’a o te ’Ēkālesia i ni’a i te fa’aterera’a hau. E aha tā teie tufa’a e parau nei nō ni’a i te mana’o o te feiā mo’a a te Fatu nō ni’a i te fa’aterera’a hau ?

’A tuatāpapa ai ’outou i te tufa’a 134, ’a feruri i te ’imi i te mau parau tumu o te fa’aterera’a hau ’e te mau hōpoi’a a te huira’atira. Nāhea teie mau mana’o i te tauturu i te feiā mo’a matamua ? Nāhea te reira e tano ai i te vāhi tā ’outou e ora ra ?

Hi’o ato’a Te mau Hīro’a Faaroo 1:11–12 ; Topics and Questions, « Ti’amāra’a pae fa’aro’o », Vaira’a buka ’evanelia.

Mana’o nō te ha’api’i i te tamari’i

Te Ha’api’ira’a Tumu ’e te mau Fafaura’a 133:4–5, 14

Tē hina’aro nei te Fatu ’ia fa’aātea ’ē au i te ’ino i roto i te ao nei.

• E nehenehe ’outou ’e tā ’outou mau tamari’i e tāpura i te tahi mau vāhi e mau huru orara’a tā te Fatu e hina’aro ’ia fa’aātea ’ē tātou. I muri iho e nehenehe ’outou e fa’aau i te reira mau vāhi ’e mau huru orara’a i te aura’a o « Babela, Babulonia » i roto i te Arata’i nō te mau pāpa’ira’a mo’a (Vaira’a buka ’evanelia). I muri iho e nehenehe rātou e tai’o i Te Ha’api’ira’a Tumu ’e te mau Fafaura’a 133:4–5, 14. E aha te aura’a ’ia « fa’aru’e […] ia Babulonia » ? (’īrava 5). E nehenehe ato’a ’outou e hāmani i te hō’ē tāpura mai te reira nō te mau vāhi ’e te mau huru orara’a tā te Fatu e ani ia tātou ’e ’ia fa’aau i te reira tāpura i te aura’a o te parau ra « Ziona » i roto i te Arata’i nō te mau pāpa’ira’a mo’a.

Te Ha’api’ira’a Tumu ’e te mau Fafaura’a 133:19-21, 25

E ho’i fa’ahou mai Iesu Mesia.

• E au paha tā ’outou mau tamari’i ’ia ha’uti ta’ata ora i te huru fa’aineinera’a nō te hō’ē mea, mai te hō’ē tata’ura’a tū’aro, te hō’ē rātere faufa’a rahi, ’aore rā te hō’ē mahana fa’afa’aeara’a au-roa-hia. Nō te aha e mea faufa’a te fa’aineinera’a ? I muri iho e nehenehe ’outou e tai’o ’āmui i Te Ha’api’ira’a Tumu ’e te mau Fafaura’a 133:17–19, 21 ’e e ani i tā ’outou mau tamari’i ’ia ’imi i te mea tā te Fatu e ani mai nei ia tātou ’ia fa’aineine nō te reira. E nehenehe ’outou e fa’a’ite ia rātou i te hōho’a i roto i te arata’i ha’api’ira’a nō teie hepetoma ’e ’ia ani i tā ’outou mau tamari’i e aha tā rātou i ’ite nō ni’a i te tae-piti-ra’a mai o Iesu Mesia. E aha atu ā tā tātou e ha’api’i mai nei i roto i te mau ’īrava 19–25, 46–52 ? E aha tā tātou e nehenehe e rave nō te fa’aineine ia tātou nō teie ’ohipa ’oa’oa rahi ?

• E nehenehe ’outou e huna i tē tahi mau hōho’a ’aore rā e mau tao’a e fa’ata’a ra i te mau mea tā tātou e nehenehe e rave nō te fa’aineine nō te tae-piti-ra’a mai o Iesu Mesia (mai te tai’ora’a i te mau pāpaira’a mo’a, te fa’a’itera’a i te ’evanelia, ’aore rā, te tāvinira’a i tō tātou ’utuāfare). E vaiiho i tā ’outou mau tamari’i ’ia ’imi i te mau hōho’a ’aore rā te mau tao’a ’e e parau e nāhea te ravera’a i teie mau mea i te tauturu ia tātou ’ia fa’aineine nō te fārerei i te Fa’aora ’ia ho’i mai ’oia.

• E nehenehe ato’a ’outou e hīmene ʼāmui i te hōʼē hīmene nō niʼa i te Tae-Piti-Raʼa mai, mai te hīmene « Quand Jésus reviendra » (Chants pour les enfants, 46–47). ’A fa’a’ite i te tahi ’e te tahi i tō ’outou here i te Fa’aora ’e i tō ’outou mau mana’o nō ni’a i tōna ho’ira’a mai.

Te Ha’api’ira’a Tumu ’e te mau Fafaura’a 133:52–53

E mea here ’e te hāmani maita’i ’o Iesu Mesia.

• E nehenehe ’outou ’e tā ’outou mau tamari’i e hi’o i te mau hōho’a e fa’a’ite ra ē, e mea here ’e e mea hāmani maita’i ’o Iesu. (’Ei hi’ora’a, hi’o Gospel Art Book, nos. 42, 47.) E aha atu ā tā Iesu i rave nō te fa’a’ite i tōna here ’e tōna hāmani maita’i ? E tai’o ’āmui i Te Ha’api’ira’a Tumu ’e te mau Fafaura’a 133:52, ’e e tauturu i tā ’outou mau tamari’i ’ia feruri i te mau rāve’a e nehenehe ai ia rātou ’ia « fa’ahiti […] i te here marū o tō rātou ra Fatu » ia vetahi ’ē.

  

Tuha’a nō te In His Light [I roto i tōna māramarama], nā Greg Olsen

Ha’api’i i te ha’api’ira’a tumu pāpū ’e te ’ōhie. Tē ha’api’i nei te Fatu i tāna ’evanelia ma te « māramarama ’e te ’ōhie » (Te Ha’api’ira’a Tumu ’e te mau Fafaura’a 133:57). E aha tā teie nau ta’o e parau mai nei ia ’outou nō ni’a i te ha’api’ira’a i te ’evanelia i tō ’outou ’utuāfare ’aore rā i te piha ha’api’ira’a ?

Te Ha’api’ira’a Tumu ’e te mau Fafaura’a 134:1–2

Tē hina’aro nei te Fatu ’ia ha’apa’o vau i te ture.

• E nehenehe tā ’outou mau tamari’i e tāpura i te mau arata’ira’a ’aore rā i te mau ture ’o tā rātou e ha’apa’o ra. E aha ïa te huru o te orara’a mai te mea ē ’aita te ta’ata e ha’apa’o i teie mau ture ? I muri iho e nehenehe ’outou e tai’o Te Ha’api’ira’a Tumu ’e te mau Fafaura’a 134:1–2 ’e ’o rātou, ma te tauturu ia rātou ’ia māramarama i te mau ta’o ’aore rā te mau pereota ’o tā rātou e ’ore e ta’a ra. Nō te aha te Fatu e hina’aro ai ia tātou ’ia ha’apa’o i te ture ? (hi’o ato’a Te mau Hīro’a Fa’aro’o 1:12).

Nō te tahi atu ā mau mana’o, ’a hi’o i te ve’a Hoa nō teie nei ’āva’e.

Christ in a Red Robe [Te Mesia i roto i te ’ahu ’ute’ute], nā Minerva Teichert