Tuha’a nō te Joseph Smith in Nauvoo, 1840 [Iosepha Semita i Nāvu, 1840], nā Theodore Gorka

10–16 nō Novema : « ’Ua ’ite ho’i au i tā ’oe mau tusia nā roto i tō ’oe ha’apa’ora’a »

Te Ha’api’ira’a Tumu ’e te mau Fafaura’a 129–132

Nā roto ia Iosepha Semita, ’ua tātara te Fatu i te tahi tuha’a o te miterio o te ora mure ’ore. Te ti’ara’a rahi o te Atua, te hanahana o te ra’i, ’e te ’a’ano o te ora mure ’ore, e au ïa e, ’ua mātau-maita’i-hia i roto i te maramarama o te ’evanelia i faaho’i-fa’ahou-hia mai, e tae roa atu i te mau mana’o popoto mai tō tātou. E hi’ora’a maita’i te mau heheura’a i roto i Te Ha’api’ira’a Tumu ’e te mau Fafaura’a 129–32 . Mai te aha te huru o te Atua ? E « tino tōna […] mai te au i tō te ta’ata nei huru ». Mai te aha te huru o te ra’i ? « E taua huru hoara’a e vai nei i rotopū ia tātou i’ō nei, e vai ato’a ïa i rotopū ia tātou i reira », (Te Ha’api’ira’a Tumu ’e te mau Fafaura’a 130:22, 2). ’Oia mau, hō’ē o te mau parau mau ’oa’oa roa a’e nō ni’a i te ra’i maori rā, tei roto ato’a ïa tō tātou mau aura’a ’utuāfare herehia, mai te mea e tā’atihia te reira e te mana ti’a. E nehenehe te mau parau mau mai teie e fa’ariro i te ra’i ’ei mea atea ri’i—hanahana, e nehenehe e tāpae.

Terā rā, i te tahi taime e nehenehe te Atua e ani mai ia tātou ’ia rave i te mau mea e au ē, e mau mea au ’ore ’e ’e’ita e noa’ahia. Nō te feiā mo’a mātāmua e rave rahi, te fa’aipoipora’a i te mau vahine rau o te hō’ē ïa o terā huru fa’auera’a. ’Ua riro ïa ’ei tāmatara’a teimaha nō te fa’aro’o o Iosepha Semita, tāna vahine ’o Emma, ’e fātata pauroa te mau ta’ata tei fāri’i i te reira. Nō te rātere nā roto i teie tāmatara’a, tītauhia ia rātou hau atu i te mana’o maita’i noa nō ni’a i te ’evanelia i fa’aho’ihia mai ; tītauhia ia rātou te fa’aro’o i te Atua o tei hau atu i te hōhonu i terā. ’Aita e faufa’a fa’ahou tō te reira fa’auera’a i teie mahana, terā rā, te hi’ora’a ha’apa’o maita’i o te mau ta’ata tei ora i te reira, tē vai noa ra ïa. ’E te fa’auru nei teie hi’ora’a ia tātou ’ia anihia ia tātou ’ia rave i tā tātou iho « mau tusia i roto i te ha’apa’ora’a » (Te Ha’api’ira’a Tumu ’e te mau Fafaura’a 132:50).

Mana’o nō te ’apo i te ha’api’ira’a i te ’utuāfare ’e i te fare purera’a

Te Ha’api’ira’a Tumu ’e te mau Fafaura’a 130–132

Tē hina’aro nei te Atua e fa’ateitei i tāna mau tamari’i.

E rave rahi mea ’aita tātou i ’ite nō ni’a i te fa’ateiteira’a ’aore rā te orara’a i roto i te fāito teitei roa a’e o te bāsileia tiretiera—te huru orara’a tā te Atua e ora nei. Te hō’ē tuha’a rahi o te reira, tei ni’a atu paha ïa i tō tātou ’aravihi ’ia hāro’aro’a. Terā rā, ’ua heheu mai te Atua i te tahi mau tāpa’o faufa’a rahi, ’e e rave rahi o te reira ’o tē ’itehia i roto i Te Ha’api’ira’a Tumu ’e te mau Fafaura’a 130–32. E nehenehe ’outou e tai’o ma te tāpe’a noa i roto i te ferurira’a i te mau uira’a mai teie : e aha tā’u e ha’api’i mai nei nō ni’a i te Atua ? E aha tā’u e ha’api’i mai nei nō ni’a i te orara’a i muri mai i te tāhuti nei ? Nāhea teie mau ha’amāramaramara’a nō ni’a i te ora mure ’ore i te ha’amaita’i i tō’u orara’a i teienei ?

’A hi’o ato’a « Our Hearts Rejoiced to Hear Him Speak » Revelations in Context, 277–80.

Te Ha’api’ira’a Tumu ’e te mau Fafaura’a 130:20–21132:5

E ha’amaita’i te Atua i te mau ta’ata ’o tē ha’apa’o i tāna mau ture.

E nāhea ïa ’outou i te fa’ahiti, nā roto i tā ’outou iho mau parau, i te mea tā te Fatu e ha’api’i nei i roto i Te Ha’api’ira’a Tumu ’e te mau Fafaura’a 130:20–21 ’e 132:5 ? ’A feruri nāhea teie parau tumu i te fa’a’itera’ahia mai i roto i tō ’outou orara’a.

I te tahi taime, noa atu e ha’apa’o tātou i te parau a te Atua, e’ita te mau ha’amaita’ira’a tā tātou e tīa’i nei e tae ’oi’oi mai. Nāhea ’outou i te tāpe’a noa i tō ’outou fa’aro’o ’e tō ’outou ti’aturira’a ’ia tupu ana’e te reira ? ’A ’imi i te mau mana’o i roto i te a’ora’a a Elder D. Todd Christofferson « Tō tātou tā’amura’a i te Atua » (Liahona, Mē 2022, 78–80).

Hi’o ato’a 1 Nephi 17:35 ; Te Ha’api’ira’a Tumu ’e te mau Fafaura’a 82:10.

Te Ha’api’ira’a Tumu ’e te mau Fafaura’a 132:13–21

Maoti te Metua i te ao ra i ti’a ai i te mau ’utuāfare ’ia vai mure ’ore.

Nā roto i te peropheta Iosepha Semita, ’ua fa’aho’i fa’ahou mai te Fatu i te parau mau ē, e nehenehe te fa’aipoipora’a ’e te mau aura’a ’utuāfare e riro ’ei mea mure ’ore. ’Ia tai’o ’outou i Te Ha’api’ira’a Tumu ’e te mau Fafaura’a 132:13–21, ’a ’imi i te mau pereota ’o tē tauturu ia ’outou ’ia māramarama i te ta’a-’ē-ra’a i rotopū i te mea e « toe » ē a muri noa atu ’e e aha te ’ore e vai noa ’e a muri noa atu. I tō ’outou mana’o, e aha te aura’a nō te hō’ē auta’atira’a nō te fa’aipoipora’a « nā [te Fatu] » ? (’īrava 14).

I roto i ta’na parau poro’i « ’Ei fa’ahanahanara’a i te feiā ’o tē pāruru nei », te fa’a’ite nei te peresideni Dieter F. Uchtdorf i te aura’a mure ’ore i roto i te fa’aipoipora’a ’e te mau mea « au ’ore » (Liahona, Mē 2016, 77–78). E aha tā teie fa’aaura’a e ha’api’i nei ia ’outou nō ni’a i te huru nō te aupurura’a—’aore rā te fa’aineinera’a nō—te hō’ē aura’a fa’aipoipora’a ? ’A feruri i tō ’outou mau aura’a ’utuāfare—i teienei e ananahi—’a tai’o ai ’outou i te parau poro’i a Elder Uchtdorf. E aha tā ’outou e ’ite ra i reira ’o tē hōro’a ia ’outou i te tīa’ira’a i roto i te Mesia nō tō ’outou mau aura’a ’utuāfare ?

’Ua fa’a’ite te peresideni Henry B. Eyring i teie parau a’o ta’na i fāri’i ’a haape’ape’a ai ’oia nō ni’a i te huru o tōna ’utuāfare : « ’A ora noa ’oe ma te ti’amā nō te bāsileia tiretiera, i reira te mau tā’atira’a ’utuāfare e riro ai ’ei mea nehenehe, hau atu i tē ti’a ia ’oe ’ia feruri » (i roto i te « Hō’ē fare i reira e pārahi ai te Vārua o te Fatu », Liahona, Mē 2019, 25). Nāhea teie parau a’o i te tauturu ia ’outou ’aore rā i te tahi ta’ata tā ’outou i mātau ?

Hi’o ato’a « E ti’a i te ’utuāfare ’ia ora tāhō’ē », Te mau hīmene, N°185 ; Topics and Questions, « Fa’aipoipora’a », Vaira’a buka ’evanelia.

E nehenehe te fa’aipoipora’a e tā’atihia ē a muri noa atu i roto i te fare o te Fatu.

Te Ha’api’ira’a Tumu ’e te mau Fafaura’a 132:1–2, 29-40

E fāri’ihia te fa’aipoipora’a vahine rau e te Atua mai te mea noa ē, e fa’aue ’oia i te reira.

E rave rahi ta’ata e tai’o i te Faufa’a Tahito e uiui nei nō ni’a ia Aberahama, Iakoba, Mose, ’e te tahi atu mau ta’ata tei fa’aipoipo e rave rahi mau vahine. ’Ua fa’aturi anei teie mau tāvini a te Fatu ? ’Ua fa’ati’a ānei te Atua i tō rātou fa’aipoipora’a ? Mai te reira ato’a te mau uira’a a Iosepha Semita. ’A ’imi i te mau pāhonora’a tā te Atua i hōro’a i roto i Te Ha’api’ira’a Tumu ’e te mau Fafaura’a 132:1–2, 29–40.

Te fa’aipoipora’a i rotopū i te hō’ē tāne ’e te hō’ē vahine ’o te fa’aturera’a ïa a te Atua nō te fa’aipoipora’a (hi’o i te upo’o tufa’a nō te Fa’a’itera’a mana 1 ; Iakoba 2:27, 30). Terā rā, ’ua vai te mau tau ’ua fa’aue te Atua i tāna mau tamari’i ’ia fa’atupu i te fa’aipoipora’a vahine rau.

O te mau matahiti mātāmua o te ’Ēkālesia tei fa’aho’ihia mai o te tahi o te reira mau tau ta’a ’ē. Mai te mea e hina’aro ’outou ’ia ha’api’i rahi atu ā nō ni’a i te fa’aipoipora’a vahine rau i rotopū i te feiā mo’a mātāmua, hi’o « Mercy Thompson and the Revelation on Marriage » (i roto Revelations in Context, 281–93) ; Feiā mo’a, 1:290–92, 432–35, 482–92, 502–4 ; Topics and Questions, « Fa’aipoipora’a vahine rau i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei », vaira’a buka ’evanelia ; « Nō te aha e mea tītauhia te reira nō Iosepha Semita ’e nō vetahi ’ē ’ia fa’aipoipo e rave rahi vahine ? » (video), ChurchofJesusChrist.org.

Why was it necessary for Joseph Smith and others to practice polygamy?

A question from the Worldwide Devotional: A Face to Face Event with Elder Cook on September 9, 2018

Mana’o nō te ha’api’i i te tamari’i

Te Ha’api’ira’a Tumu ’e te mau Fafaura’a 130:2, 18–19 ; 132:13, 19

Tē hina’aro nei te Metua i te ao ra ’ia rōtahi au i ni’a i te mau mea mure ’ore.

• E aha tā Te Ha’api’ira’a Tumu ’e te mau Fafaura’a 132:13 e ha’api’i nei ia tātou nō ni’a i te mau mea o te ao nei ? Pēnei a’e e nehenehe ’outou ’e tā ’outou mau tamari’i e fa’anaho i te hō’ē ’āfata tauiha’a ’aore rā, i te hō’ē pūtē tua i te mau tauiha’a e fa’ahōho’a ra i te mau mea, mai te au i Te Ha’api’ira’a Tumu ’e te mau Fafaura’a 130:2, 18–19 ; 132:19, ’o tā tātou e nehenehe e ’āfa’i nā muri ia tātou i roto i te orara’a a muri a’e.

Te Ha’api’ira’a Tumu ’e te mau Fafaura’a 130:20–21 ; 132:5, 21–23

E ha’amaita’i mai te Atua iā’u ’ia ha’apa’o ana’e au i tāna mau ture.

• Pēnei a’e e nehenehe te hō’ē fa’aaura’a ’ōhie e ha’api’i i tā ’outou mau tamari’i nō ni’a i te ha’apa’ora’a i te mau fa’auera’a a te Atua. ’Ei hi’ora’a, e nehenehe ’outou e ani ia rātou ’ia hōro’a mai ia ’outou i te mau arata’ira’a nō te haere i te hō’ē vāhi, mai te hō’ē fare ha’api’ira’a ’aore rā te hō’ē fare o te ’Ēkālesia. E aha tē tupu ’ia ’ore ana’e tātou e pe’e i te mau arata’ira’a ? I muri iho e nehenehe ’outou e tai’o i Te Ha’api’ira’a Tumu ’e te mau Fafaura’a 130:21 ’e ’ia fa’aau i teie mau arata’ira’a i te mau fa’auera’a tā te Atua i hōro’a mai ia tātou.

• E nehenehe ato’a ’outou e hīmene āmui i te hō’ē hīmene nō ni’a i te ha’apa’ora’a, mai te « Pour trouver la paix » (Chants pour les enfants, 68), ’e ’ia ’imi i te mau ta’o i roto i Te Ha’api’ira’a Tumu ’e te mau Fafaura’a 130:20–21 ’e te 132:5 e tū’ati i te mau ta’o i roto i te hīmene. Nāhea te Atua i te ha’amaita’i ia tātou ’ia tauto’o ana’e tātou ’ia ha’apa’o i tāna mau fa’aueraa ?

Te Ha’api’ira’a Tumu ’e te mau Fafaura’a 130:22

E tino tāhuti ’ore tō te Metua i te ao ra ’e tō Iesu Mesia.

• I muri a’e i te tai’o-āmui-ra’a i Te Ha’api’ira’a Tumu ’e te mau Fafaura’a 130:22 e nehenehe ’outou ’e tā ’outou mau tamari’i e hi’o i te hō’ē hōho’a o Iesu Mesia ’e e fa’atoro i ni’a i tōna nā mata, tōna vaha ’e te tahi atu mau tuha’a o tōna tino. E nehenehe tā ’outou mau tamari’i e fa’atoro i ni’a i te hō’ē ā mau tuha’a o tō rātou iho tino. E parau ia rātou nō te aha e mea faufa’a nō ’outou ’ia ’ite ē, mai te huru tō tātou tino i te tino o te Metua i te ao ra ’e tō Iesu.

Maoti te mau ’ōro’a o te fare o te Fatu, e nehenehe te mau utuāfare e riro ’ei mea mure ’ore.

Te Ha’api’ira’a Tumu ’e te mau Fafaura’a 132:19

Maoti te Metua i te ao ra i ti’a ai i te mau ’utuāfare ’ia tāhō’ēhia ē a muri noa atu.

• Tauturu i tā ’outou mau tamari’i ’ia ’imi i te mau hi’ora’a o te mau mea e’ita e vai ’e a muri noa atu—te mā’a o te ’ino, te mau tiare e ’ōriorio, e te vai atura. I muri iho, ’a hi’o ’āmui i Te Ha’api’ira’a Tumu ’e te mau Fafaura’a 132:19 ’e ’a ’imi i te mau pereota faufa’a mai « te fafaura’a […] mure ’ore », « tā’atihia », « i roto ho’i i te tau mure ’ore », ’e « ē a muri ē a muri noa atu ». (’A hi’o ato’a « Pene 54 : Te hō’ē heheura’a nō ni’a i te fa’aipoipora’a, i roto Te mau ’ā’amu nō roto mai i te Parau Ha’api’ira’a ’e te mau Parau Fafau, 198, ’aore rā, te video nō ni’a i te reira i roto i te Vaira’a buka ’evanelia.) E nehenehe ato’a ’outou e hi’o i te mau hōho’a o tō ’outou utuāfare ’e e fa’a’ite pāpū ē, ’ua fa’ati’a te Fatu i te reira, nā roto i te mau ōro’a e te mau fafaura’a o te hiero, ’ia vai te mau utuāfare e a muri noa atu.

Chapter 55: A Revelation about Marriage: July 1843

’A ara maita’i i te huru o te orara’a ’utuāfare. « I teie ’anotau, tē ora nei te mau tamari’i i roto i te mau ’utuāfare huru rau ’e te fifi […] Tītauhia [tātou] ’ia fārerei ’ia [rātou] te vai ’ōtahi ra, tei vaiihohia i muri, ’aore rā i rāpae i te ’āua » (Neil L. Andersen, « ’O tei ’ite mai ia rātou ra, ’ua ’ite ïa iā’u », Liahona, Mē 2016, 49, 52).

Nō te tahi atu mau mana’o, ’a hi’o i te ve’a Hoa nō teie ’āva’e.

Te hō’ē piha tā’atira’a i roto i te hiero nō Paris (Farāni)