iKuri ni iTukutuku A

Vei Rau na iTubutubu: Vakarautaki Ira na Luvemu kina Bula Taucoko ena Salatu ni Veiyalayalati ni Kalou

Baleta ni lomani iko, vakabauti iko, ka kila na kemu icavacava o Koya, sa solia vei iko na Tamada Vakalomalagi na madigi mo vukei ira na luvemu mera curu ka toso i liu e na salatu ni Nona veiyalayalati, na salatu kina bula tawamudu (raica na Vunau kei na Veiyalayalati 68:25–28). Oqo e oka kina na nodra vukei mera vakavakarau me ra vakayacora ka maroroya na veiyalayalati tabu, me vaka na veiyalayalati ni papitaiso kei na veiyalayalati e vakayacori ena valetabu. E na veiyalayalati oqo, era na vauci ira kina ena reki na nomu gone vua na iVakabula, o Jisu Karisito.

E vuqa tu na sala me ra vakarautaki kina na luvemu e na ilakolako oqo e na salatu ni veiyalayalati, ka na vukei iko na Tamada Vakalomalagi mo kunea na sala vinaka duadua mo vukei iratou kina. Nio vakasaqara na veivakauqeti, nanuma tiko ni sega ni vuli taucoko e yaco e na gauna ni lesoni sa tuvai tu. Na ka dina, e dua na vuna e mana vakalevu kina na vuli e vale sai koya na madigi meda vuli ena ivakaraitaki kei na veigauna lalai, rawarawa ni veivakavulici—na kena mataqali e dau yaco mai ena taladrodro ni bula e veisiga. Me vaka ga ni dua na iwalewale tudei ni bula taucoko na vakamuri ni salatu ni veiyalayalati, sa vakakina na vulici ni salatu ni veiyalayalati. (Raica na “Vuvale kei na Matavuvale,” Veivakavulici e na iVakarau ni iVakabula [2022], 30–31.)

Sa koto oqo e ra e so na vakasama e na rawa ni veimuataki kina veivakauqeti tale e so. E rawa nio kunea na ikuri ni vakasama me baleta na nodra vakavulici na gone ena Lalai uabula ena “iKuri ni iVakamacala B: Me Baleti Ira na Lalai—Vakarautaki ira na Gone ki na Bula Taucoko ena Salatu ni Veiyalayalati ni Kalou.”

Papitaiso kei na Veivakadeitaki

E vakatavulica o Nifai ni “matamata eda na curuma kina” na salatu ni veiyalayalati “sai koya na veivutuni kei na papitaiso ena wai” (2 Nifai 31:17). Na nomu sasaga mo vukei ira na luvemu me ra vakavakarau ki na papitaiso kei na veivakadeitaki e rawa ni vakotora dei na yavadra e na salatu oya. Na sasaga oqo e tekivu e na veivakavulici me baleta na vakabauti Jisu Karisito kei na veivutuni. E ra oka talega kina na vakavulici ni sala e da vakavouya kina na noda veiyalayalati ni papitaiso e na noda vakaivotavota e na sakaramede e veimacawa.

E vakatavulica o Nifai ni “matamata eda na curuma kina” na salatu ni veiyalayalati “sai koya na veivutuni kei na papitaiso ena wai” (2 Nifai 31:17).

Oqo eso na ivurevure e rawa ni vukei iko: 2 Nifai 31; e dua na ilavelave ni mekasini ni iTokani me baleta na papitaiso; Ulutaga ni Kosipeli, “Papitaiso,” Valenivola Vakosipeli.

• E na veigauna taucoko o sotava kina na veika ka na vakaqaqacotaka na nomu vakabauta na Tamada Vakalomalagi kei Jisu Karisito, vakaraitaka vei luvemu. Vukei ira mera kila ni vakabauta e dua na ka e rawa ni vaqaqacotaki cake ka kaukauwa cake tikoga e na gauna taucoko ni bula. Na cava e so na ka e rawa ni cakava na luvemu me vakatorocaketaka kina na nona vakabauti Karisito ni se bera ni papitaiso?

• Ni digidigi cala na luvemu, tukuna e na reki na isolisoli ni veivutuni. Nio digidigi cala, wasea na reki e yaco mai nio veivutuni. Vakadinadinataka ni ena nona sa mai vakararawataki ka mate o Jisu Karisito ena vuku ni noda ivalavala ca, sa rawa ni da veivutuni e veisiga, vosoti, ka ciqoma na kaukauwa ni veisau. Ni vakasaqara na luvemu na veivosoti, vosoti koya e na yalo galala kei na reki.

• Tukuna vua na luvemu me baleta na nomu papitaiso. Vakaraitaka na iyaloyalo ka wasea na nomu vakanananu. Talanoataka na veika o vakila, na sala e vukei iko kina na nomu veiyalayalati ni papitaiso mo kilai Jisu Karisito vakavinaka cake, kei na sala era vakalougatataki tiko ga kina na nomu bula. Vakayaloqaqataka na luvemu me dau taro.

• Ni yaco e dua na papitaiso e na nomu matavuvale se e na nomu tabanalevu, kauta na luvemu me laki raica. Veitalanoataka vata kei na luvemu na veika drau a raica ka vakila. Kevaka e rawa, veitalanoa kei koya e papitaiso ka taroga na taro vakaoqo: “O a cakava vakacava na vakatulewa oqo? O a vakavakarau vakacava?”

• Na gauna o raica kina ni cakava tiko na luvemu e dua na ka e yalataka me cakava, vakacaucautaki koya. Dusimaka ni maroroi ni yalayala e na vukea na noda vakavakarau me da maroroya na veiyalayalati e da vakayacora e na gauna e da papitaiso kina. Na cava e da yalataka vua na Kalou ni da sa papitaiso? Na cava e yalataka vei keda o Koya? (Raica na Mosaia 18:8–10, 13.)

• Talanoataka na sala e sa vakalougatataki iko kina na nomu sa vakadeitaki ka yaco mo lewena Na Lotu i Jisu Karisito ni Yalododonu Edaidai. Kena ivakaraitaki, o toro voleka vakacava vua na Tamada Vakalomalagi kei Jisu Karisito ena nomu qaravi ira na tani kei na nodra qaravi iko na tani? Vukea na luvemu me vakasamataka na sala e so me veiqaravi ka vakaqaqacotaki ira kina e so me vaka ni dua na lewe ni Lotu. Vukei ira talega me ra sotava ka kila na reki e yaco mai ena veiqaravi.

• Nio sotava vata kei na luvemu e dua na gauna tabu (me vaka ena lotu, nio wilika tiko na ivolanikalou, se nio veiqaravi tiko vua e dua), tukuna vua me baleta na veika vakayalo o vakila se vakauqeti kina. Sureta na luvemu me wasea na veika era vakila. Raica na veimataqali sala e rawa ni vosa kina na Yalotabu vei ira na tamata, oka kina na sala e vosa kina o Koya ki vei iko. Vukea na luvemu me kila ka wasea nagauna e sotava kina o koya na veivakauqeti ni Yalo Tabu.

• Drau sarava vata e vica na vidio e na ikumuni ni Valenivola ni Kosipeli ka kena ulutaga na “Rogoci Koya!” Veitalanoataka vata na duidui ni sala e ra rogoca kina na italai ni Turaga na Domona. Sureta na luvemu me droinitaka e dua na itaba se cakava e dua na iyaloyalo me baleta na sala e rogoca kina na domo ni iVakabula.

• Cakava na sakaramede me dua na soqo tabu ka rekitaki e na nomu matavuvale. Wasea vua na luvemu na sala o vakanamata kina vei Jisu Karisito ena gauna ni sakaramede. Vukea na luvemu me cakava e dua na ituvatuva me vakaraitaka ni sa ka tabu vei ira na sakaramede. Me kena ivakaraitaki, nida rogoca tiko na qaqa ni masu ni sakaramede e rawa ni vakananuma vei keda na noda veiyalayalati ni papitaiso.

• Na mekasini yadua ni Feperueri ni iTokani e oka kina na itukutuku, italanoa, kei na itaviqaravi me vukei ira na gone mera vakavakarau ki na papitaiso kei na veivakadeitaki. Laiva na luvemu me digitaka e so me wilika ka marautaka vata kei iko. (Raica talega na ikumuni ni “Vakavakarau ki na Papitaiso” e na iwasewase ni gone e na Valenivola ni Kosipeli.)

Lewa ni Matabete kei na iDola

Na matabete sa ikoya na lewa kei na kaukauwa ni Kalou ka dau vakalougatataki ira kina na Luvena. Sa tiko e vuravura nikua na matabete ni Kalou e Na Lotu i Jisu Karisito ni Yalododonu Edaidai. “O ira kece na lewe ni Lotu e ra maroroya na nodra veiyalayalati—marama, turaga, kei na gone—e ra sa vakalougatataki e na kaukauwa ni matabete ni Kalou e na nodra veivale me vakaqaqacotaki ira kei na nodra matavuvale” (iVoladusidusi Raraba: Veiqaravi e Na Lotu i Jisu Karisito ni Yalododonu Edaidai, 3.6, Valenivola Vakosipeli). Na kaukauwa oqo e na vukei ira na lewenilotu e na nodra vakayacora na cakacaka ni veivakabulai ni Kalou kei na bula vakacerecerei e na nodra bula yadua kei na matavuvale (raica naiVoladusidusi Raraba, 2.2).

Nira sa veiqaravi na tagane kei na yalewa e na veikacivi ni Lotu, e ra na vakayacora vakakina e na lewa ni matabete, e na ruku ni nodra veidusimaki o ira e ra taura tu na idola ni matabete. O ira taucoko na luvena na Tamada Vakalomalagi—na Luvena tagane kei na yalewa—era na vakalougataki nira yaco mera kila vakavinaka cake na matabete.

E da ciqoma na cakacaka vakalotu e na lewa ni matabete. O ira na lewe ni Lotu tagane bula kilikili era ciqoma na lewa ni matabete ena veivakatikori ni matabete kei na veitabaki kina itutu ni matabete eso” (iVoladusidusi Raraba, 3.4). O ira era vakaitutu ena matabete e rawa nira vakadonui mai vua e dua e taura tu na idola ni matabete mera qarava na cakacaka vakalotu ni matabete.

Me vulici e so tale na ka me baleta na matabete, raica na Russell M. Nelson,“iYau Vakayalo,” Liaona, Nove. 2019, 76–79; Russell M. Nelson, “Na Vua ni Kaukauwa Vakamatabete,” Liaona, Me 2016, 66–69; “iVakavuvuli ni Matabete,” Wase 3 ena iVoladusidusi Raraba.

• Cakava na cakacaka vakalotu ni matabete me tiki tudei ni nomu bula vakamatavuvale. Me kena ivakaraitaki, vukea na luvemu me vakavakarau vakayalo ki na sakaramede e veimacawa. Vakauqeta na luvemu me vakasaqara na veivakalougatataki ni matabete ena gauna e tauvimate se gadreva kina na vakacegu se veidusimaki. Vakaitovotaki iko mo dusia na sala e so e vakalougatataka kina na Turaga na nomu matavuvale e na kaukauwa ni matabete.

• Nio ni wilika vata na ivolanikalou, vakaraica na madigi e so mo veitalanoataka kina na sala e vakalougatataki ira kina na tamata na Kalou e na Nona kaukauwa. Wasea na veika osa sotava e na gauna sa vakalougatataki iko kina na Kalou mai na Nona matabete. Me baleta na ivakaraitaki ni veivakalougatataki e da ciqoma mai vua na Kalou e na matabete, raica na iVoladusidusi Raraba, 3.2, 3.5.

• Vakavulica na luvemu ni oti na papitaiso, sa rawa vua me ciqoma na kaukauwa ni matabete e na nona maroroya na veiyalayalati ni papitaiso. Railesuva vata na itukutuku nei Peresitedi Russell M. Nelson “iYau Vakayalo” (Liaona, Nove. 2019, 76–79). Tukuna vua na luvemu na sala e sa kauta mai kina na kaukauwa ni Kalou kina nomu bula na cakacaka vakalotu ni matabete. Me baleta e dua na lisi ni so na sala eda sa vakalougatataki kina e na kaukauwa ni matabete, raica na iVoladusidusi Raraba, 3.5.

• Veitalanoataka na taro “E vakacava tu beka e dua na italai ni Turaga?” Wilika vata na Vunau kei na Veiyalayalati 121:36–42, ka vakasaqara na kena isau. E na veigauna taucoko o raica kina na luvemu (se dua tale) ni vakayagataka tiko e dua na ivakavuvuli se ivakarau ni bula e na veitikina oqo, tukuna cake sara.

• Nio vakayagataka o iko se o luvemu na idola mo dolava kina e dua na katuba se me tekivu taki kina na idini ni motoka, tu mada vakadua ka vakatauvatana na idola oqori kina idola e ra taura tu na iliuliu ni matabete. (Me baleta na ivakamacala ni idola ni matabete, raica na iVoladusidusi Raraba, 3.4.1). Na cava e “dolava” se “tekivutaka” vei keda na idola ni matabete? Raica talega na Gary E. Stevenson, “Evei na Ki kei na Lewa ni Matabete?,” Liaona, Me 2016, 29–32; “Sa Evei na Ki?” (vidio), Valenivola ni Kosipeli.

  Where Are the Keys?

  Priesthood authority and keys start the engine, open the gates of heaven, facilitate heavenly power, and pave the covenant pathway back to our Heavenly Father.

• Nio sa vakatikori kina dua na veikacivi, sureta na luvemu me tiko, ke rawa. Me raica na luvemu nio vakayacora tiko na nomu veikacivi. Sa rawa sara mada ga mo vakasaqara na sala veiganiti e rawa nira vukei iko kina. Vakamacalataka na nomu vakila na kaukauwa ni Turaga e na nomu veikacivi.

Na Papitaiso kei na Vakadeitaki me Baleti ira na Qase e Liu

Na valetabu sa tiki tudei tu mai ni ituvatuva ni Tamada Vakalomalagi vei ira na luvena. Ena valetabu, eda vakayaco veiyalayalati tabu vata kei na Tamada Vakalomalagi ni da vakaitavi e na veicakacaka tabu vakalotu, era dusi taucoko vei Jisu Karisito. Sa vakarautaka na Tamada Vakalomalagi e dua na sala vei ira kece na Luvena me ra veiyalayalati ka vakaitavi ena cakacaka vakalotu, oka kina o ira e ra a sega ni ciqomi ira ena bula oqo. Ena itekivu ni yabaki sa yabaki 12 kina na luvemu, sa veirauti nodra yabaki ni bula mera papitaiso ka vakadeitaki ena valetabu ena vukudra na tubuda era sa mate (raica talega na 1 Korinica15:29).

• Dau gole kina vale ni Turaga ena kena levu ga e rawa. Vakaraitaka vua na luvemu na vuna o lako tiko kina kei na sala e vukei iko kina na valetabu mo toro voleka vua na Tamada Vakalomalagi kei Jisu Karisito.

• Railesuva na taro ni ivolatara ni valetabu ka veitalanoataka vata. Sa rawa mo raica ena tabana e 36–37 ni Me iSakisaki ni iTabagone: Dua na iDusidusi ni Lewai ni Digidigi (2022). Tukuna vua na luvemu na veika e dau yaco e na veivakatarogi ni ivolatara ni valetabu. Wasea na vuna e bibi kina vei iko me dua tiko na nomu ivolatara ni valetabu.

• Wilika vata na Malakai 4:6. Veitalanoataka na sala e rawa ni vagolei kina na yalomu vei ira na nomu qase e liu. Vulica e so tale na ka me baleti ira na nomu qase e liu e na nomu vakadikeva vata na nomu tuva kawa e na FamilySearch.org. Vakasaqarai ira na tubumu e ra gadreva me ra papitaiso ka vakadeitaki. E rawa ni veivuke na daunivakasala ni valetabu kei na tuvakawa e na nomu tabanalevu.

• Railesuva vata e so na ivurevure e na ikumuni ka kena ulutaga na “Valetabu” e na nodra iwasewase na gone e na Valenivola Vakosipeli. (Raica talega na “Vakarautaki ni Luvemu me Baleta na Papitaiso kei na Veivakadeitaki ni Valetabu” ena ChurchofJesusChrist.org.)

Ciqomi ni Veivakalougatataki Vakapeteriaki

Na veivakalougatataki vakapeteriaki e rawa ni dua na ivurevure ni veidusimaki, veivakacegui, kei na veivakauqeti. E tiko kina na ivakasala mai vua na Tamada Vakalomalagivei keda yadua ka vukei keda meda kila na keda ivakatakilakila tawamudu kei na inaki. Vukea na luvemu me vakavakarau me ciqoma e dua na veivakalougatataki vakapeteriaki ena nomu vakavulici koya ena bibi kei na ituvaki tabu ni veivakalougatataki vakapeteriaki.

Mo vulica eso tale na ka, raica na Ulutaga kei na Taro, “Veivakalougatataki Vakapeteriaki,” Valenivola Vakosipeli; Julie B. Beck , “O Sucu Turaga,” Liaona, Me 2006, 106–8.

• Wasea vei luvemu na veika o sotava e na nomu ciqoma e dua na veivakalougatataki vakapeteriaki. E rawa nio wasea na veika eso me vaka na nomu vakavakarau mo ciqoma, na kena sa vukei iko mo toro voleka yani vua na Kalou, kei na ivakarau o vakayagataka kina na veivakalougatataki ena nomu bula. Sa rawa talega mo sureta na luvemu me veitalanoa kei ira na lewe ni matavuvale tale e so era sa ciqoma na nodra veivakalougatataki vakapeteriaki.

• Railesuva vata na itukutuku nei Elder Randall K. Bennett “Na Nomu Veivakalougatataki Vakapeteriaki—Na Veidusimaki Veivakauqeti mai vua na Tamada Vakalomalagi” kei na itukutuku nei Elder Kazuhiko Yamashita “Na Gauna mo Ciqoma Kina na Nomu Veivakalougatataki Vakapeteriaki” (Liaona, Me 2023, 42–43, 88–90). Veiwaseitaka na veika o sa vulica mai na itukutuku oqo me baleta na vuna e vinakata kina na Tamada Vakalomalagi meda ciqoma e dua na veivakalougatataki vakapeteriaki. Me vulici na iwalewale ni kena ciqomi e dua na veivakalougatataki vakapeteriaki, raica na iVoladusidusi Raraba, 18.17.

• Kevaka e tiko o ira na nomu qase e liu e ra sa ciqoma na veivakalougatataki vakapeteriaki, e rawa ni veivakauqeti mo wilika vata kei na luvemu e so vei ira. Me kerei na nodra veivakalougatataki na qase e liu e ra sa mate, curu kina ChurchofJesusChrist.org, kilikitaka na ivakatakilakila ni akaude ena tutu imatau e cake ni sikirini, ka digitaka na Veivakalougatataki Vakapeteriaki.

• Ni sa ciqoma o luvemu e dua na veivakalougatataki vakapeteriaki, sureta e dua na lewe ni matavuvale mera vola na veika era vakila ka wasea vei luvemu.

Ciqomi ni Edaumeni

Na Kalou e vinakata me vakaedaumeni, se vakalougatataki, ira taucoko na Luvena e na “kaukauwa mai lomalagi” (Vunau kei na Veiyalyalati 95:8). Eda gole kina valetabu meda ciqoma ga vakadua na noda edaumeni, ia na veiyalayalati eda cakava vata kei na Kalou kei na kaukauwa vakayalo e solia vei keda o Koya me tiki ni edaumeni e na rawa ni vakalougatataki keda e na veisiga yadua ni noda bula.

• Biuta cake e dua na iyaloyalo ni valetabu e na nomu vale. Tukuna vua na luvemu na veika o vakila ena valetabu. Tukuna vakawasoma na nomu lomana na Turaga kei na Nona vale kei na veiyalayalati o sa cakava e kea. Vakaraica na madigi mo lako kina valetabu vata kei na luvemu me laki papitaiso ka vakadeitaki ena vukudra na qase e liu.

• Vakadikeva vata na temples.ChurchofJesusChrist.org. Wilika vata na itukutuku me vaka na “Me baleta na Edaumeni ni Valetabu” kei na “Vakavakarau ki na Vale ni Turaga.” Vakatara na luvemu me taroga na taro e tiko vua me baleta na valetabu. Me baleta na veidusimaki ni veika o rawa ni tukuna e na taudaku ni valetabu, raica na itukutuku nei Elder David A. Bednar “Vakarautaki me Rawati na Veika Kece e Ganiti” (Liaona, Me 2019, 101–4; raica vakabibi na iwase ka kena ulutaga na “Vulici ni Kosipeli e Kena Usutu na Vuvale ka Tokona na Lotu kei na Vakavakarau ni Valetabu”).

• Ni drau vakaitavi vata kei luvemu se vakadinadinataka e so tale na cakacaka vakalotu (me vaka na sakaramede se veivakalougatataki ni veivakabulai), solia e dua na gauna me veitalanoataki kina na ivakatakarakara e ra vakayagataki e na cakacaka vakalotu. Na cava era matataka na ivakatakarakara? Era vakadinadinataki Jisu Karisito vakacava? Oqo e na vukea na luvemu me vakavakarau me vakasamataka vakatitobu na ibalebale ni cakacaka vakalotu ni valetabu, e vakadinadinataki Jisu Karisito tale ga.

• Vukea na luvemu me raica na sala e maroroya tiko kina o koya na veiyalayalati ni papitaiso e vakamacalataki ena Mosaia 18:8–10, 13. Vukei luvemu talega me raica rawa na sala e vakalougatataki koya kina na Turaga. Tara na nona yalodei na luvemu ena nona rawata me maroroya na veiyalayalati.

• Vakaraitaka e matanalevu ka vakawasoma na sala e dusimaka kina na nomu digidigi na nomu veiyalayalati ni valetabu ka vukei iko mo toro voleka yani vei Jisu Karisito. E rawa nio vakayagataka na iVoladusidusi Raraba, 27.2, mo railesuva kina na veiyalayalati e da vakayacora e na valetabu. Kevaka o sa ciqoma na edaumeni, tukuna vei ira na luvemu na sala e vukei iko kina na qameni ni valetabu mo nanuma tiko na nomu veiyalayalati kei Jisu Karisito (raica na “Sacred Temple Clothing” [vidio], Valenivola Vakosipeli).

Sacred Temple Clothing

From ancient times, men and women have embraced sacred music, different forms of prayer, religious vestments full of symbolism, gestures and rituals to express their innermost feelings of devotion to God.

Veiqaravi vaka Daukaulotu

E vakavuvulitaka o Elder David A. Bednar: “Na ka bibi duadua o rawa ni cakava mo vakavakarau kina veikacivi ni veiqaravi sa ikoya mo yaco mada mo dua na daukaulotu ni sa bera sara na nomu lako ikaulotu. … Na ka bibi eke e sega ni baleta na lako ki kaulotu; ia, na ka bibi sa ikoya na noda yaco meda daukaulotu ka veiqaravi e na noda bula taucoko e na yaloda taucoko, igu, vakasama, kei na kaukauwa taucoko. … Oni sa vakavakarau tiko kina cakacaka ni kaulotu e na bula taucoko” (“Yaco mo Dua na Daukaulotu,” Liaona, Nove. 2005, 45–46). Na veika e sotava na luvemu e na nona yaco me dua na daukaulotu ena vakalougatataki koya me tawamudu, ka sega ena gauna ga e rawa ni veiqaravi kina vakadaukaulotu.

Me vulici e so tale na ka, raica na Russell M. Nelson, “Vunautaka na Kosipeli ni Sautu,” Liaona, Me 2022, 6–7; M. Russell Ballard, “Na Veiqaravi ni Kaulotu e Vakalougatataka Tawamudu na Noqu Bula,” Liaona, Me 2022, 8–10; “Vakavakarau ni Daukaulotu: Moici ki na Bula ni Daukaulotu,” Valenivola Vakosipeli.

• iVakaraitaki ni sala me wasei kina na kosipeli e na sala e matau. Dau yadrava tiko na madigi mo wasea vei ira na tani na nomu nanuma me baleta na Tamada Vakalomalagi kei na iVakabula kei na veivakalougatataki o ciqoma mai vua na iVakabula nio lewe ni Nona Lotu. Sureta e so tale me ra tomana na nomu matavuvale e na itaviqaravi ni Lotu kei na veiwekani vakamatavuvale.

• Vakaraica na madigi e so me ratou veimaliwai kina na nomu matavuvale kei ira na daukaulotu. Sureti ira mera vakavulici ira na nomu itokani, se solia me ra vakavulici ira e na nomu vale. Tarogi ira na daukaulotu me baleta na veika era sotava tiko kei na sala sa vukei ira tiko kina na veiqaravi vakadaukaulotu me ra toro voleka yani vei Jisu Karisito. Taroga talega na veika e ra a vakayacora (se diva mera vakayacora) mera vakavakarau me ra daukaulotu.

• Kevaka o daukaulotu, talanoataka vaka rawarawa ka vakawasoma na veika o sa sotava. Se sureti ira na itokani se lewe ni matavuvale era veiqaravi vakadaukaulotu mera veitalanoa taka na nodra. E rawa talega nio veitalanoataka na sala me wasea kina na kosipeli vei ira na tani e na nomu bula taucoko. Vukea na luvemu me vakasamataka na sala e rawa ni wasea kina na kosipeli.

• Solia na madigi vei luvemu me vakavulica kina ki na nomu matavuvale na ivakavuvuli ni kosipeli. E rawa tale ga ni vakatovotovotaka na luvemu me wasea na veika e vakabauta vei ira na tani. Me ivakaraitaki, sa rawa nio veitalanoataka na taro vakaoqo “Eda na vakamacalataka vakacava na iVola i Momani vua e dua e sa bera vakadua ni rogoca?” se “Eda na vakamacalataka vakacava na nona gadrevi na iVakabula vua e dua e sega ni lotu va-Karisito?”

• Vukea na luvemu me yalodei na veitalanoa kei ira na tamata. Na cava e so na sala vinaka me tekivutaki kina e dua na veitalanoa? Vakayaloqaqataka na luvemu me vulica na ivakarau me vakarorogo kina ki na veika e ra kaya na tani, kila na veika e tu e yalodra, ka wasea na dina ni kosipeli ka rawa ni vakalougatataka na nodra bula.

• Vakasaqara na madigi e so me vulica kina na luvemu na itovo vakavanua kei na vakabauta tale e so. Vukei koya me kila ka rokova na ivakavuvuli vinaka ka dina ena nodra vakabauta na tani.

Ciqomi ni Cakacaka Vakalotu ni Veivauci

E na valetabu, sa rawa ni vauci vata e dua na turaga kei na marama vakawati me tawamudu sara. E yaco oqo e na dua na cakacaka vakalotu e vakatokai na “veivauci.” E dina ga ni se yawa sara na gauna me vakaitavi kina na luvemu tagane kei na yalewa ena cakacaka vakalotu oqo, na veika lalai, rawarawa, drau dau cakava vata ena veiyabaki oqori e rawa ni vukei koya me vakavakarau ki na veivakalougatataki totoka oqo.

• Raica vata “Na Matavuvale: Ai Vakaro ki Vuravura Raraba” (Valenivola Vakosipeli). Na cava e vakavulica na ivakaro oqo me baleta na bula marau e na bula vakamatavuvale kei na bula vakawati gugumatua? Cakacaka kei luvemu, me drau digia e dua vei ira na ivakavuvuli e tuvai tu e na ivakaro me vulici. Sa rawa mo raica na ivolanikalou e semati ki na ivakavuvuli o ya e na iDusidusi ki na iVolanikalou. Sa rawa talega mo tuva na lalawa mo vakayagataka vakataucoko kina na ivakavuvuli oqo e na nomu matavuvale. Nio cakacakataka na nomu lalawa, veitalanoataki vata na revurevu ni kena bulataki na ivakavuvuli oya ena bula vakamatavuvale.

• Wilika vata kei luvemu na itukutuku nei Peresitedi Dieter F. Uchtdorf “Veivakacaucautaki Vei Ira Era Veivakabulai” (Liaona, Me 2016, 77–80). Nio yacova na iwase ka kena ulutaga na “Dua na iSoqosoqo ni Veika Cacawale,” o na via vakasaqara na veika ena nomu vale e cacawale kei na veika tale e so e sega. Veitalanoataka na sala e duidui kina na nomu raica na veika e na gauna o vinakata kina me dede na kena vakayagataki tiko. Na cava e vakatura oqo me baleta na sala e dodonu me da raica kina na veimaliwai ni vakamau kei na bula vakamatavuvale? Na cava tale eda vulica mai na itukutuku nei Peresitedi Uchtdorf me baleta na sala e rawa ni vukei keda kina na iVakabula meda tara cake me kaukauwa na bula vakawati kei na matavuvale?

• Dolava vua na luvemu na veika o sa vulica tiko kei watimu me baleta na vakamau tawamudu e kena usutu na Karisito kei na sala o saga tiko mo vinaka cake kina. Kevaka o drau sa vauci vata kei na watimu e na valetabu, vakaraitaka vua na luvemu ena ivakaraitaki na nomu sasaga mo drau maroroya na nomudrau veiyalayalati kei na Turaga. Tukuna vua na luvemu na sala o segata kina me itakele ni nomu veimaliwai na Tamada Vakalomalagi kei na iVakabula kei na Nodrau vukei iko tiko (raica talega na Ulisses Soares, “Ena Veitokani vata kei na Turaga,” Liaona, Nove. 2022, 42–45).

• Ni sa gadrevi me vakayacori na vakatulewa vakamatavuvale, vakayacora na matabose kei na veitalanoa vakamatavuvale. Raica me rogoci ka tauri vakabibi na nodra nanuma kece na lewe ni matavuvale. Vakayagataka na veitalanoa oqo me dua na madigi ni veitalanoa bulabula kei na yalo vinaka e na veimaliwai vakamatavuvale, ena gauna mada ga e duidui kina na ivakarau ni nodratou rai yadua. (Raica na M. Russell Ballard, “Matabose ni Matavuvale,” Liaona, Me 2016, 65.)

• Ni yaco na duidui se veisaqasaqa e na matavuvale, vakaraitaka na vosota kei na yalololoma. Vukea na luvemu me raica na kena qaravi ena sala va-Karisito na veisaqasaqa ka na rawa ni vukei koya ena nona vakavakarau kina dua na vakawati mamarau. Wilika vata na Vunau kei na Veiyalayalati 121:41–42ka veitalanoataka na sala e rawa ni vakayagataki kina na ivakavuvuli e na veitikina oqo kina vakamau.