“4–10 Meé. Mōsaia 11–17: ‘Ko ha Maama … ʻOku ʻIkai Lava ʻo Tāmateʻi,’” Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: Tohi ʻa Molomoná 2020 (2020)
“4–10 Meé. Mōsaia 11–17,” Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: 2020
Ko ʻApinetai ʻi he ʻAo ʻo e Tuʻi ko Noá, tā fakatātā ʻe Andrew Bosley
4–10 Meé
Mōsaia 11–17
“Ko ha Maama … ʻOku ʻIkai Lava ʻo Tāmateʻi”
Naʻe fakatupu ʻe he ngaahi lea ʻa ʻApinetaí ha fuʻu liliu lahi ʻi ha taha ʻo e kau fai faleʻi ʻa e Tuʻi ko Noá (vakai, Mōsaia 17:2–4). Lau ʻa e Mōsaia 11–17 mo ha lotu ʻi ho lotó ke ke maʻu ha ngaahi ongo fekauʻaki mo e founga te ke lava ai ʻo liliu.
Lekooti e Ngaahi Ongo ʻOkú ke Maʻú
ʻE lava ke tupu ʻa e ngaahi vela lalahí mei ha kiʻi mofisi pē taha. Ko ʻApinetaí ko e tangata pē toko taha ʻi heʻene fakamoʻoni ki ha tuʻi hau mo ʻene kau houʻeikí. Ko ha konga lahi ʻo ʻene ngaahi leá naʻe ʻikai ke tali, pea tautea ia ke mate. Ka naʻe hanga heʻene fakamoʻoni kia Sīsū Kalaisí, ʻa ia ko e “maama … ʻoku ʻikai lava ʻo tamateʻí” (Mōsaia 16:9), ʻo kamataʻi ha meʻa ʻi he loto ʻo e taulaʻeiki kei siʻi ko ʻAlamaá. Pea naʻe tupu māmālie ʻa e kihiʻi mofisi ko ia ʻo e uluí ʻi he ʻomi ʻe ʻAlamā ha niʻihi kehe tokolahi ke fakatomala mo tui kia Sīsū Kalaisi. Ko e ulo naʻá ne fakapoongi ʻa ʻApinetaí naʻe fakaiku pē ʻo mate, ka ko e afi ʻo e tui naʻe fakatupu ʻe heʻene ngaahi leá naʻe ʻi ai hano ivi tākiekina tuʻuloa ʻi he kakai Nīfaí—pea mo kinautolu ʻoku nau lau ʻene ngaahi leá he ʻaho ní. Ko e tokolahi taha ʻo kitautolu he ʻikai ke tau teitei fehangahangai mo e meʻa naʻe hoko kia ʻApinetaí ʻi heʻetau ngaahi fakamoʻoní, ka ʻoku tau maʻu kotoa ha ngaahi mōmēniti ʻe hoko ai ʻa e muimui kia Sīsū Kalaisí ko ha sivi ʻo ʻetau lototoʻá mo e tuí. Mahalo naʻa hanga ʻe he ako ʻo e fakamoʻoni ʻa ʻApinetaí ʻo tapilipili ʻa e ulo ʻo e fakamoʻoní mo e lototoʻá ʻi homou lotó.
Ngaahi Fakakaukau ki hono Ako Fakataautaha ʻo e Folofolá
Te u lava ʻo tuʻu ʻi he moʻoní, neongo ha taimi te u tuʻu toko taha ai.
Fakakaukau, ʻoku pau naʻe mātuʻaki fakalotosiʻi ke kalanga ʻaki ʻe ʻApinetai ʻe fakatomalá ki ha kakai naʻe ʻikai haʻanau memeʻi mahuʻingaʻia ke liliu ʻenau ngaahi tōʻonga angahalá. Naʻe toutou fakasītuʻaʻi ʻene pōpoakí. Ka naʻe ʻikai teitei foʻi ʻa ʻApinetai.
Ko e fē ha taimi naʻá ke ongoʻi ai naʻá ke tuʻu tokotaha ʻi hono taukapoʻi e moʻoní? ʻI hoʻo lau ʻa e Mōsaia 11–13 mo e 17, ko e hā ʻokú ke ako ʻe lava ʻo tokoni atu ke ke mateuteu ki ha taimi ʻe fie maʻu ai koe ʻe he ʻEikí ke ke taukaveʻi ʻEne ongoongoleleí? Ko e hā ha toe ngaahi tefitoʻi moʻoni ʻokú ke ako mei he sīpinga ʻa ʻApinetaí?
ʻOku fie maʻu ke fakaʻaongaʻi hoku lotó ke mahino e folofola ʻa e ʻOtuá.
Naʻe maheni ʻa e kau taulaʻeiki ʻa e Tuʻi ko Noá mo e folofola ʻa e ʻOtuá—naʻa nau lava ʻo lau maʻuloto ha ngaahi potu-folofola pea nau taku ʻoku nau akoʻi ʻa e ngaahi fekaú. Ka ko e ngaahi fekau ko iá naʻe “ʻikai ke tohi ʻi [honau] lotó,” pea naʻe “ʻikai te nau feinga fakamātoato ʻi [honau lotó] ke nau ʻiloʻi” (Mōsaia 13:11; 12:27). Ko hono olá, naʻe ʻikai liliu ʻenau moʻuí.
ʻI hoʻo lau ‘a e Mōsaia 12:19–30, fakalaulauloto ki he ʻuhinga feinga fakamātoato ʻi homou lotó ke mahino e folofola ʻa e ʻOtuá. ʻOku ueʻi nai koe ʻe he meʻá ni ke ke fai ha faʻahinga liliu ʻi he founga hoʻo ako e ongoongoleleí?
ʻE pouaki ʻe he ʻEikí ʻa ʻEne kau tamaioʻeikí ʻi Heʻene ngāué.
ʻI he tafaʻaki ʻe tahá, ʻoku ʻomai ʻe he aʻusia ʻa ʻApinetaí ha ngaahi sīpinga lahi ki he founga ʻo e poupouʻi ʻe he ʻEikí ʻEne kau tamaioʻeikí—te ke lava ʻo maʻu ha ngaahi sīpinga pehē ʻi he Mōsaia 13:1–9. ʻI he tafaʻaki ʻe tahá, naʻe tuku ʻe he ʻEikí ke fakatangaʻi, tukupōpula, pea mo fakapoongi ʻa ʻApinetai ʻi heʻene fakamoʻoní. Ko e hā ʻokú ke ʻiloʻi ʻi he ngaahi veesi ko ʻení ʻokú ne fakahaaʻi naʻe falala ʻa ʻApinetai ki he ʻEikí? ʻOku tokoniʻi fēfē ʻe he sīpinga ʻa ʻApinetaí ʻa e anga hoʻo fakakaukau ki ho ngaahi uiuiʻí mo e ngaahi fatongiá?
Na‘e faingataʻaʻia ʻa Sīsū Kalaisi maʻaku.
Naʻe tui ʻa Tuʻi ko Noá mo ʻene kau taulaʻeikí naʻe maʻu ʻa e fakamoʻuí mei he fono ʻa Mōsesé. Naʻe fie maʻu ʻe ʻApinetai ke nau ʻiloʻi ʻoku maʻu ʻa e fakamoʻuí mei he Mīsaiá, ʻa Sīsū Kalaisi. Fakatokangaʻi ʻi he Mōsaia 14–15, ʻa e ngaahi foʻi lea mo e ngaahi kupuʻi lea ʻoku nau fakamatalaʻi ʻa e Fakamoʻuí mo e meʻa naʻá Ne fuesia maʻaú. Ko e hā ha ngaahi veesi ʻoku nau fakaloloto ange hoʻo ʻofa mo e houngaʻia kiate Iá?
ʻOku fakatou hoko fēfē ʻa Sīsū Kalaisi ko e Tamai mo e ʻAlo?
ʻOku faʻa fihi ʻa e ngaahi potufolofola ko ʻení he taimi ʻe niʻihi koeʻuhí he ʻoku hangē ʻoku akoʻi ʻe ʻApinetai ko e Tamai Hēvaní mo Sīsū Kalaisí ko e Tokotaha tatau pē, ka ʻoku tau ʻiloʻi ʻokú Na māvahevahe. Ko e hā e ʻuhinga ʻa ʻApinetaí? Naʻá ne akoʻi ko e ʻOtua ko e ʻAló—ʻa Sihova—ʻe hoko ko e Huhuʻí (vakai, Mōsaia 15:1), ʻo nofo ʻi he kakanó, ʻo konga tangata mo konga ʻOtua (veesi 2–3). Naʻá Ne fakamoʻulaloaʻi kakato Ia ki he finangalo ʻo e ʻOtua ko e Tamaí (veesi 5–9). Koeʻuhí ko ia, ʻoku fakatou hoko leva ʻa Sīsū Kalaisi ko e ʻAlo ʻo e ʻOtuá mo e fakafofonga haohaoa fakamāmani ʻo e ʻOtua ko e Tamaí (vakai, Sione 14:6–10).
Naʻe hoko atu ʻa ʻApinetai ʻaki ʻene fakamatalaʻi ʻoku toe hoko ʻa Sīsū Kalaisi ko e Tamai ʻi he ʻuhinga, ko e taimi ʻoku tau tali ai ʻEne huhuʻí, ʻoku tau hoko ko “hono hako” (Mōsaia 15:11–12). Ko hono fakalea ʻe tahá, ʻoku fanauʻi fakalaumālie kitautolu ʻiate Ia (vakai, Mōsaia 5:7).
Vakai foki, Sione 5:25–27; 8:28–29; 17:20–23; “The Father and the Son,” Ensign, ʻEpeleli 2002, 12–18.
Ngaahi Fakakaukau ki he Ako Fakafāmili e Folofolá mo e Efiafi Fakafāmili ʻi ʻApí
ʻI hoʻo lau mo ho fāmilí e folofolá, ʻe lava ke tokoniʻi koe ʻe he Laumālié ke ke ʻiloʻi ʻa e ngaahi tefitoʻi moʻoni ke fakamamafaʻi mo aleaʻí kae lava ke feau e ngaahi fie maʻu ho fāmilí. Ko ha ngaahi fakakaukau ʻeni ʻe niʻihi.
Mōsaia 11–13; 17
Ko ʻApinetai mo ʻAlamaá ko ha ongo sīpinga fakalaumālie ia ʻo e mateakiʻi ʻo e moʻoní, neongo ʻoku ʻikai manakoa ʻete fai iá. Mahalo ʻe fehangahangai e kau mēmipa homou fāmilí mo ha teke fakasōsiale ke holoki ʻenau ngaahi tuʻunga moʻuí. Ko e hā te nau lava ʻo ako meia ʻApinetai mo ʻAlamā fekauʻaki mo e tuʻu ʻi he moʻoní? ʻE lava ʻa e ngaahi ngāue fakaʻaati ʻoku ʻoatu mo e fakamatala ko ʻení ʻo tokoni ki ho fāmilí ke nau sioloto ki he fakamatalá. Hili hoʻomu ako ʻa e ngaahi vahe ko ʻení, fakakaukau ke mou fakatulamaʻi ha ngaahi meʻa naʻe hoko moʻoni ʻi he moʻuí koeʻuhí ke lava e kau mēmipa homou fāmilí ʻo ako hono tali e ngaahi feinga ke holoki ʻenau ngaahi tuʻunga moʻuí. Pe ko haʻamou fevahevaheʻaki ʻa e ngaahi aʻusia ne mou tuʻu ai ʻi he moʻoní.
Mōsaia 12:33–37; 13:11–24
ʻOku ʻuhinga ki he hā ke ʻai e ngaahi fekau ʻa e ʻOtuá ʻo “tohi ʻi [hotau] lotó”? (Mōsaia 13:11). Mahalo te ke lava ʻo hiki ha ngaahi fakakaukau (pe tā ha ngaahi fakatātā ʻo hoʻo ngaahi fakakaukaú) ʻi ha laʻipepa lahi ʻoku fōtunga hangē ha foʻi hātí. Ko e hā ʻoku mahuʻinga ai kiate kitautolu ‘a e ngaahi fekaú? Te tau lava fēfē ke tohi kinautolu ʻi hotau lotó?
ʻE lava ke tokoni hono ako ʻo e folofolá ke tau tohi ʻa e ngaahi fekaú ʻi hotau lotó.
Mōsaia 14
Te ke maʻu ʻi he vahe ko ʻení ha ngaahi foʻi lea mo ha ngaahi kupuʻi lea ʻoku nau fakamatalaʻi ʻa Sīsū Kalaisi. Mahalo naʻa lava ke lisi kinautolu ʻe homou fāmilí ʻi hoʻomou maʻú. Ko e hā e ongo ʻa e kau mēmipa ʻo e fāmilí fekauʻaki mo e Fakamoʻuí ʻi heʻetau ako ʻa e ngaahi foʻi lea mo e ngaahi kupuʻi lea ko ʻení?
Mōsaia 15:26–27; 16:1–13
ʻOku fakamatalaʻi ʻe he ngaahi veesi ko ʻení ʻa e meʻa ʻe hoko ki he fānau ʻa e ʻOtuá kapau naʻe “ʻikai ke hāʻele mai [ʻa Kalaisi] ki he māmaní” (Mōsaia 16:6) pe ʻikai ke nau muimui kiate Ia. Ko e hā e ngaahi meʻa lelei kuo hoko koeʻuhí he naʻá Ne hāʻele mai mo fai e fakaleleí maʻatautolu? Vakai foki ki he foʻi vitiō “ʻUhinga ʻOku Tau Fie Maʻu ai ha Fakamoʻuí” (ChurchofJesusChrist.org).
Ke maʻu ha ngaahi fakakaukau lahi ange ki hono akoʻi ʻo e fānaú, vakai ki he fokotuʻutuʻu ʻo e uike ní ʻi he Haʻu, ʻo Muimui ʻIate Au—Maʻá e Palaimelí.
Fakatupulaki ʻEtau Founga Akoʻí
Fakaʻaongaʻi e ngaahi talanoá mo e sīpingá ke akoʻi ʻaki e ngaahi tefitoʻi moʻoni ʻo e ongoongoleleí. Naʻe faʻa akoʻi ʻe he Fakamoʻuí ʻa e ngaahi tefitoʻi moʻoni ʻo e ongoongoleleí ʻo fakaʻaongaʻi ha ngaahi talanoa mo ha ngaahi tala-fakatātā. Fakakaukau ki ha ngaahi fakatātā mo ha talanoa mei hoʻo moʻuí te ke ala fakaʻaongaʻi ke akoʻi ʻaki ha tefitoʻi moʻoni ʻo e ongoongoleleí ki ho fāmilí (vakai, Ko e Faiako ʻi he Founga ʻa e Fakamoʻuí, 22
Naʻe Ulo Hono Fofongá ʻo Fuʻu Ngingila ʻAupito, tā fakatātā ʻe Jeremy Winborg