“18–24 Meé. Mōsaia 25–28: ‘Naʻe Ui ʻa Kinautolu ko e Kakai ʻo e ʻOtuá,’” Haʻu, ʻo Muimui ʻIate Au—Maʻa e Fakafoʻituituí mo e Ngaahi Fāmilí: Tohi ʻa Molomoná 2020 (2020)
“18–24 Meé. Mōsaia 25–28,” Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: 2020
Fakaului ʻo ʻAlamā ko e Siʻí, fai ʻe Gary L. Kapp
18–24 Mē
Mōsaia 25–28
“Naʻe Ui ʻa Kinautolu ko e Kakai ʻo e ʻOtuá”
Hili “e hoko mai e leʻo ʻo e ʻEikí kia [ʻAlamaá],” naʻá ne tohi e ngaahi meʻa naʻe folofola ʻaki ʻe he ʻEikí kiate iá “koeʻuhí ke ne maʻu ia” (Mōsaia 26:13, 33). ʻE founga fēfē haʻo muimui ki he sīpinga ʻa ʻAlamaá?
Lekooti e Ngaahi Ongo ʻOkú ke Maʻú
Hili ha meimei toʻu tangata ʻe tolu ʻo e moʻui ʻa e kakai Nīfaí ʻi ha ngaahi fonua mavahevahé, naʻa nau toe hoko ko ha kakai pē taha. Naʻe lau kotoa ʻa e kakai ʻo Limihaí, kakai ʻo ʻAlamaá, mo e kakai ʻo Mōsaiá—pea naʻa mo e kakai ʻo Seilahemalá, naʻe ʻikai ko e hako ʻo Nīfaí, “fakataha mo e kakai Nīfaí” (Mosaia 25:13). Ko hanau tokolahi foki naʻa nau loto ke hoko ko ha kāingalotu ʻo e Siasi naʻe fokotuʻu ʻe ʻAlamaá. Ko ia, naʻe papitaiso ʻa kinautolu kotoa “naʻa nau fie ʻai kiate kinautolu ʻa e huafa ʻo Kalaisí, pea naʻe ui ʻa kinautolu ko e kakai ʻo e ʻOtuá” (Mōsaia 25:23–24). Hili ha ngaahi taʻu lahi ʻo e vāvākoví mo e nofo pōpulá, naʻe faifai pea hangē ʻe fiefia e kakai Nifaí ʻi ha kiʻi vahaʻataimi melino.
Ka naʻe ʻikai fuoloa, kuo kamata ke toe fakatangaʻi ʻe he kau taʻe-tuí ʻa e Kāingalotú. Ko hono fakamamahi tahá, ko e tokolahi taha ʻo e kau taʻetuí ko ha fānau pē ia ʻa e kakai tuí—ʻa e “toʻu tangata kei tupu haké” (Mōsaia 26:1), kau ai mo e ngaahi foha ʻo Mōsaiá mo ha foha ʻe taha ʻo ʻAlamā. Pea naʻe hoko ha mana, pea kuo ʻomi ʻe he fakamatala ʻo e mana ko iá ha ʻamanaki lelei ki he ngaahi mātuʻa loto mamahí ʻo laui-toʻu-tangata. Ka ko e talanoa ʻo e ului ʻa ʻAlamaá ʻoku ʻikai maʻá e mātuʻa pē ʻoku ʻalu-hē ʻenau fānaú. Ko e ului moʻoní ko ha mana ia, ʻi ha ngaahi founga, ʻoku fie maʻu ke hoko ʻiate kitautolu kotoa.
Ngaahi Fakakaukau ki Hono Ako Fakatāutaha ʻo e Folofolá
ʻOku ou fatongia ʻaki ʻeku tuí mo ʻeku fakamoʻoní.
Naʻe aʻusia ʻe kinautolu naʻa nau fanongo ki he malanga ʻa e Tuʻi ko Penisimaní ha ului fakaofo (vakai, Mōsaia 5:1–7), ka ko e uluí ko ha aʻusia fakataautaha ia he ʻikai ke lava ʻo foaki hangē ha tukufakaholó, ki ha fānau ʻa ha taha. Kuo pau ke tau takitaha aʻusia kotoa ʻetau ului ki he ongoongolelei ʻo Sīsū Kalaisí. ʻI hoʻo lau ʻi he Mōsaia 26:1–6 fekauʻaki mo e “toʻu tangata kei tupu hake” ʻo e kakai Nīfai taʻetuí, fakatokangaʻi ange e ngaahi nunuʻa ʻo ʻenau taʻetuí. Te ke toe lava foki ke fakakaukau ki he kakai ʻokú ke fakaʻamu te ke lava ʻo ʻomai kia Kalaisí. Neongo he ʻikai te ke lava ʻo foaki kiate kinautolu hoʻo uluí, ka ʻe lava ke fanafana atu ʻe he Laumālié ha ngaahi meʻa te ke lava ʻo fai ke tokoni ke nau maʻu ʻa e tuí. ʻI hoʻo lau ʻi he Mōsaia 25–28 fekauʻaki mo e founga naʻe tokoniʻi ai ʻe ʻAlamā mo e kau mēmipa kehe ʻo e Siasí e toʻu tangata kei tupu haké, ʻe lava ke ke maʻu ha toe ngaahi fakakaukau.
Vakai foki Tokāteline mo e Ngaahi Fuakava 68:25–29.
ʻOku feinga ʻa e kau tamaioʻeiki faivelenga ʻa e ʻOtuá ke fai Hono finangaló.
Te tau ala fakakaukau he taimi ʻe niʻihi ʻoku ʻiloʻi ʻe ha taki faka-Siasi hangē ko ʻAlamaá ʻa e meʻa totonu ke faí. ʻOku tau lau ʻi he Mōsaia 26 ki ha palopalema ʻi he Siasí ne teʻeki aʻusia ʻe ʻAlamā, pea “naʻá ne manavahē telia naʻa ʻiloange kuó ne fai taʻetotonu ʻi he ʻao ʻo e ʻOtuá” (Mōsaia 26:13). Ko e hā ne fai ʻe ʻAlamā ʻi he tūkunga ko ʻení? (vakai, Mōsaia 26:13–14, 33–34, 38–39). Ko e hā ʻoku fokotuʻu mai ‘e he meʻa ne aʻusia ʻe ʻAlamaá fekauʻaki mo e founga hoʻo tali ki he ngaahi palopalema faingataʻa ʻi homou fāmilí, pe ko hoʻo ngāue ʻi he Siasí?
Mahalo naʻa ʻuhingamālie ke lisi ʻa e ngaahi moʻoni naʻe fakahā ʻe he ʻOtuá kia ʻAlamaá, ʻa ia ʻoku maʻu ʻi he Mōsaia 26:15–32. Fakatokangaʻi ange ne ʻi ai ha niʻihi ʻo e ngaahi tali ko ʻení ne ʻikai fenāpasi ia mo e fehuʻi ʻa ʻAlamaá. Ko e hā ʻoku fokotuʻu atu ʻe he meʻá ni fekauʻaki mo e lotú pea mo e maʻu ʻo e fakahā fakafoʻituituí?
Kuo pau ke fanauʻi foʻou ʻa e tangata mo e fefine kotoa pē.
Naʻe mahino naʻe fie maʻu ke fanauʻi foʻou fakalaumālie ʻa ʻAlamā ko e Siʻí, he ko ia mo e ngaahi foha ʻo Mōsaiá ʻa e “kau fakalielia taha ʻo e kau faiangahala,” naʻa nau ʻalu holo ke “fakaʻauha ʻa e Siasi ʻo e ʻOtuá” (Mōsaia 28:4; 27:10). Ka ʻi he hili pē ʻene uluí, naʻe fakamoʻoniʻi ʻe ʻAlamā ʻoku lava ke maʻu—pea mahuʻinga—ki he tokotaha kotoa ʻa e uluí: Naʻá ne pehē, “ʻOua ʻe ofo he ko e faʻahinga kotoa ʻo e tangata kotoa pē… kuo pau ke fānauʻi foʻou” (Mōsaia 27:25; naʻe tānaki atu hono fakamamafaʻí). ʻOkú ke kau mo koe ai.
ʻI hoʻo lau fekauʻaki mo e aʻusia ʻa ʻAlamā ʻoku maʻu ʻi he Mōsaia 27:8–37, te ke lava ʻo ʻahiʻahi fokotuʻu koe ʻi hono tuʻungá. ʻOku ʻikai ke ke feinga ke fakaʻauha ʻa e Siasí, ka te ke lava moʻoni ke fakakaukauʻi ha ngaahi meʻa fekauʻaki mo koe ʻoku fie maʻu ke liliu. Ko hai ha taha, hangē ko e tamai ʻa ʻAlamaá, ʻokú ne poupouʻi mo lotua koe “ʻi he tui lahi”? Ko e hā ha ngaahi aʻusia kuo tokoni ke “fakamahino [kiate koe] ʻa e mālohi mo e mafai e ʻOtuá”? (Mōsaia 27:14). Ko e hā ha “ngaahi meʻa lalahi” kuo fai ‘e he ‘Eikí maʻau pe maʻa ho fāmilí ʻoku totonu ke ke “manatuʻi”? (Mōsaia 27:16). Ko e hā ʻokú ke ako mei he ngaahi lea mo e ngaahi tōʻonga ʻa ʻAlamā ko e Siʻí fekauʻaki mo e ʻuhinga ʻo e toe fanauʻi foʻoú? ʻE ala tokoni atu e ngaahi fehuʻi hangē ko ʻení, ke vakaiʻi hoʻo fakalakalaka ʻi he hala ʻo e fānauʻi foʻoú.
Vakai foki, Mōsaia 5:6–9; ʻAlamā 36; “Conversion” (Gospel Topics, topics.ChurchofJesusChrist.org).
Naʻe Fiefia ʻEne Tamaí, tā fakatātā ʻe Walter Rane
ʻOku fanongo ʻa e ʻOtuá ki heʻeku ngaahi lotú pea te ne tali kinautolu ʻo fakatatau mo Hono finangaló.
Mahalo ʻokú ke ʻilo ha mātuʻa ʻokú na tatau mo ʻAlamā ko e Lahí, ʻa ia ʻoku fakahoko ʻe hona fohá pe ʻofefiné ha ngaahi fili fakatupu ʻauha. Pe mahalo ko koe ʻa e mātuʻá. Ko e hā ʻokú ke ʻilo ʻi he Mōsaia 27:14, 19–24 ʻokú ne ʻoatu ha ʻamanaki lelei kiate koe? ‘E ala tākiekina fēfē ʻe he ngaahi veesi ko ʻení hoʻo ngaahi lotu fekauʻaki mo e niʻihi kehé?
Ngaahi Fakakaukau ki Hono Ako Fakafāmili ʻo e Folofolá mo e Efiafi Fakafāmili ʻi ʻApí
ʻI hoʻo lau e folofolá mo ho fāmilí, ʻe lava ke tokoni atu ʻa e Laumālié ke mou ʻiloʻi e ngaahi tefitoʻi moʻoni ke fakamamafaʻi mo aleaʻí, kae lava ke feau e ngaahi fiemaʻu homou fāmilí. Ko ha ngaahi fakakaukau ʻeni ʻe niʻihi.
Mōsaia 25:5–11
Ko e hā e ongo ʻa e kakai ʻo Mōsaiá ʻi he ʻosi ʻene lau ange kiate kinautolu e ngaahi lekooti ʻo e kakai ʻo Sēnifí mo e kakai ʻo ʻAlamaá? Kuo tauhi nai ʻe homou fāmilí ha ngaahi lekooti te mou lava ʻo lau mei ai? Mahalo te ke lava ʻo tānaki atu ki hoʻomou ngaahi lekōtí pe kamata tauhi haʻo lekooti pē ʻaʻau. Ko e hā te ke lava ʻo fakakau, ʻa ia ʻe ala tokoni ki homou fāmilí (kau ai ʻa e toʻu tangata ʻo e kahaʻú) ke “fakafonu ʻa kinautolu ʻaki ʻa e fuʻu fiefia lahi ʻaupito” pea mo ʻilo ki he “angaelei vave ʻa e ʻOtuá”? (Mōsaia 25:8, 10).
Mōsaia 25:16
Ko e hā naʻe mahuʻinga ai ki he kakai ʻo Limihaí ke nau manatuʻi kuo fakatauʻatāinaʻi kinautolu ʻe he ʻEikí mei he nofo pōpulá? Ko e hā kuo fai ʻe he ʻEikí maʻatautolu ʻoku totonu ke tau manatuʻi?
Mōsaia 26:29–31; 27:35
Fakatatau mo e ngaahi veesi ko ʻení, ko e hā kuo pau ke fai ‘e ha taha ka ne maʻu ʻa e fakamolemolé?
Mōsaia 27:21–24
ʻI hoʻo lau e ngaahi veesi ko ʻení, fakakaukauʻi ha taha ʻe lava ke lotua mo ʻaukai ki ai homou fāmilí.
Mōsaia 27–28
Koeʻuhí ke tokoniʻi homou fāmilí ke mou lava ʻo sioloto ki he ngaahi fakamatala ʻi he ngaahi vahe ko ʻení, te ke ala fakaafeʻi ha taha ke ne tā ha ngaahi fakatātā ʻo e kakai he talanoá, pea ngāue ʻaki e ngaahi fakatātaá ke toe fai ʻa e talanoá. Pe te nau ala fiefia ke fakatulamaʻi ʻa e talanoá; ʻe anga fēfē haʻanau fakatātaaʻi ʻa e liliu naʻe foua ʻe ʻAlamā mo e Ngaahi foha ʻo Mōsaiá?
Ki ha ngaahi fakakaukau lahi ange ki hono akoʻi ‘o e fānaú, vakai ki he lēsoni ʻo e uike ko ‘ení ʻi he Haʻu, ‘o Muimui ʻIate Au— Ki he Palaimeli.
Fakatupulaki ʻo ʻEtau Founga Akoʻí
Fakaʻaongaʻi e tā-fakatātaá. “ʻOku ʻi he Tohi Fakatātā ʻo e Ongoongoleleí pea mo e LDS Media Library ʻi he ChurchofJesusChrist.org ha ngaahi ʻīmisi mo ha ngaahi vitiō ʻe lava ʻo tokoni atu ki [homou fāmilí], ke nau sioloto ki he ngaahi fakakaukau pe ngaahi meʻa naʻe hokó” (Ko e Faiako ʻi he Founga ʻa e Fakamoʻuí, 22).
Tā fakatataaʻi ʻo ha ʻangelo ʻi heʻene hā kia ʻAlamā ko e Sií naʻe fai ʻe Kevin Keele