Fakaului ʻo ʻAlamā ko e Siʻí, fai ʻe Gary L. Kapp

18–24 Mē

Mōsaia 25–28

“Pea Naʻe Ui Kinautolu ko e Kakai ʻo e ʻOtuá”

ʻOku ʻafioʻi ʻe he Tamai Hēvaní ʻa e meʻa ʻoku fie maʻu ke ako ʻe he fānau ʻi hoʻo kalasí mo e founga ke tokoniʻi ai kinautolú. Fekumi ki Heʻene tatakí ʻi hoʻo lau ʻa e Mōsaia 25–28 mo fakamanatu e lēsoni ko ʻení.

Lekooti ʻa e Ngaahi Ongo ʻOkú ke Maʻú

Fakaafeʻi Ke Vahevahe

Fakaʻaliʻali ʻa e fakatātā ʻi he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí, mo kole ki he fānaú ke nau fakamatalaʻi e meʻa ʻoku hoko ʻi he fakatātaá. Kapau ʻoku maheni ʻa e fānaú mo e talanoa ʻo ʻAlamā ko e Siʻí mo e ngaahi foha ʻo Mōsaiá, tuku ke nau vahevahe e meʻa ʻoku nau ʻiloʻí.

Akoʻi e Tokāteliné: Fānau Iiki Angé

Mōsaia 26:30–31

ʻOku finangalo e ʻEikí keu faʻa fakamolemole.

Naʻe akoʻi ʻe he ʻEikí ʻa ʻAlamā ʻokú Ne fakamolemoleʻi ʻa kinautolu ʻoku fakatomalá. ʻOku totonu ke tau muimui ki Heʻene sīpingá ʻaki hono fakamolemoleʻi ʻa kinautolu ʻoku nau faiangahala mai kiate kitautolú.

Ngaahi ʻEkitivitī ʻe Ala Fakahokó

• Lau ki he fānaú ʻa e kupuʻi lea ko ʻeni mei he Mōsaia 26:31: “Pea ke mou fefakamolemoleʻaki foki.” Tuku ke akoako ʻa e fānaú ke toutou lea ʻaki ʻa e “ʻʻoku ou fakamolemoleʻi koe” pea feinga ke ʻilo pe ʻoku nau maaʻusia e ʻuhinga ʻo e fakamolemoleʻi. Vahevahe ha aʻusia mei hoʻo moʻuí ki ha taimi naʻá ke fakamolemoleʻi ai ha taha pe fakamolemoleʻi koe ʻe ha taha.

• Tokoniʻi e fānaú ke nau fakafaivaʻi e fefakamolemoleʻakí. Kole ki ha taha ʻo e fānaú ke pehē pē kuó ne fai ha meʻa ke mamahi pe fakaʻitaʻi ai ha taha kehe. Ko e hā ʻe lava ke lea ʻaki ʻe he tamasiʻi pe taʻahine ʻe tahá ke fakahaaʻi e fakamolemolé?

• Fakaafeʻi e fānaú ke nau tā ha fofonga mamahi ʻi he tafaʻaki ʻe taha ʻo ha laʻipea mo ha fofonga fiefia ʻi he tafaʻaki ʻe tahá. Kole ange ke hiki hake e fakatātā mata mamahí lolotonga ʻenau fakamatala fekauʻaki mo ha aʻusia ʻi hano fakalotomamahiʻi kinautolu ʻe ha kaungāmeʻa pe tokoua. Kole ange ke hiki hake e fakatātā mata malimalí lolotonga ʻenau fakamatala fekauʻaki mo ʻenau fakamolemoleʻi pe teuteu fakamolemoleʻi e tokotaha ko iá.

Mōsaia 27:8–37

ʻOku tokoni e ongoongoleleí ke liliu e kakaí mo hoko ʻo hangē ko Sīsuú.

ʻOku fakahaaʻi mai ʻe he fakaului ʻo ʻAlamā ko e Siʻi mo e ngaahi foha ʻo Mōsaiá, ʻe lava ʻe ha taha pē ʻo liliu pea hoko ʻo hangē ko Sīsuú.

Ngaahi ʻEkitivitī ʻe Ala Fakahokó

• Fakamatala nounou fekauʻaki mo e fakaului ʻo ʻAlamā ko e Siʻí mo e ngaahi foha ʻo Mōsaiá, ʻo hangē ko hono fakamatalaʻi ʻi he Mōsaia 27:8–37. Ki ha tokoni, vakai, “Vahe 18: Ko e Fakatomala ʻa ʻAlamā ko e Siʻí” (Ngaahi Talanoa ʻo e Tohi ʻa Molomoná, 51–52, pe vitiō fakafekauʻaki ʻi he ChurchofJesusChrist.org). Toe fai ʻa e talanoá, pea tuku ki he fānaú ke nau vahevahe ʻa e ngaahi fakaikiiki ʻoku nau manatuʻí. Tuku ke nau fakatātaaʻi ʻa e talanoá, mo tokoniʻi kinautolu ke nau sio ki he faikehekehe ʻi he vahaʻa ʻo ʻAlamā mo e ngaahi foha ʻo Mōsaiá kimuʻa mo e hili ʻenau fakatomalá.

• Fakaafeʻi e fānaú ke fakaʻaongaʻi e peesi ʻekitivitī ʻo e uike ní ke tala e talanoa ʻo ʻAlamā mo e ngaahi foha ʻo Mōsaiá. Lau e Mōsaia 27:24, mo tokoni ke mahino ki he fānaú naʻe liliu ʻa ʻAlamā mo e ngaahi foha ʻo Mōsaiá koeʻuhí he naʻa nau fakatomala mei heʻenau ngaahi angahalá mo tali e ongoongolelei ʻo Sīsū Kalaisí.

  

  Naʻe Fiefia ʻEne Tamaí, fai ʻe Walter Rane

Mōsaia 28:1–8

Te u lava ʻo vahevahe ʻa e ongoongoleleí.

Hili ʻenau uluí, naʻe vēkeveke ʻa e ngaahi foha ʻo Mōsaiá ke vahevahe e ongoongoleleí mo e taha kotoa pē, ʻo kau ai honau ngaahi filí, ʻa e kau Leimaná.

Ngaahi ʻEkitivitī ʻe Ala Fakahokó

• Fakaʻaongaʻi ʻa e Mōsaia 28:1–8 ke fakamatala ki he fānaú fekauʻaki mo e fakakaukau ʻa e ngaahi foha ʻo Mōsaiá ke malanga ʻaki e ongoongoleleí ki he kau Leimaná. Ki ha tokoni, vakai “Vahe 19: Ko e Hoko ʻa e Ngaahi Foha ʻo Mōsaiá ko e Kau Faifekaú” (Ngaahi Talanoa ʻo e Tohi ʻa Molomoná 53, pe vitiō fakafekauʻakí ʻi he ChurchofJesusChrist.org). Ko e hā naʻa nau fie maʻu ai ke vahevahe ʻa e ongoongoleleí? (vakai, veesi 3).

• Tokoniʻi e fānaú ke nau fakakaukau ki ha taha ʻoku fie maʻu ke ne ʻilo lahi ange ki he ongoongoleleí. Tokoniʻi e fānaú ke nau palani e meʻa te nau lea ʻaki ki he kakai naʻa nau fakakaukau ki aí.

• Hiva fakataha ha hiva fekauʻaki mo hono vahevahe ʻo e ongoongoleleí, hangē ko e ʻOku Ou Fie Hoko Leva ko ha Faifekau”Tohi Hiva ʻa e Fānaú, 90). Fakamahinoʻi ange ʻa e ngaahi kupuʻi lea ʻi he hivá ʻoku nau fokotuʻu mai e founga ke tau vahevahe ai e ongoongoleleí mo e niʻihi kehé.

Akoʻi e Tokāteliné: Fānau Lalahi Angé

Mōsaia 26:22–23, 29–30; 27:8–37

ʻOku fakamolemoleʻi ʻe he ʻOtuá ʻa kinautolu ʻoku fakatomalá.

Kapau ʻoku fifili ha taha ʻi hoʻo kalasí pe ʻe lava ke fakamolemoleʻi moʻoni ia, ʻe lava ke tokoni e folofola ʻa e ʻOtuá kia ʻAlamā ko e Lahí mo e aʻusia ʻa ʻAlamā ko e Siʻí.

Ngaahi ʻEkitivitī ʻe Ala Fakahokó

• Kole ki he fānaú ke nau pehē pē ʻoku nau talanoa ki ha taha ʻoku ʻikai ke fakakaukau ʻe fakamolemoleʻi ia ʻe he ʻOtuá. Fakaafeʻi kinautolu ke fakamanatu e folofola ʻa e ʻOtuá kia ʻAlamā ko e Lahí ʻi he Mōsaia 26:22–23, 29–30. Ko e hā ʻoku nau ʻilo ʻe tokoni ki he tokotaha ko iá?

• Kimuʻa ʻi he kalasí, kole ki ha taha ʻo e fānaú ke lau fekauʻaki mo e fakaului ʻo ʻAlamā ko e Siʻí, ʻoku hā ʻi he Mōsaia 27:8–37, pea haʻu mateuteu ke fakamatalaʻi e talanoá ki he kalasí ʻo hangē pē ko ʻAlamā ko e Siʻí ia. (ʻO ka fie maʻu, fokotuʻu ange ke ne kole ki ha taha ʻo ʻene mātuʻá ke tokoni ange.) Lolotonga ʻene fai e talanoá, ʻeke ange ha ngaahi fehuʻi hangē ko e “Naʻá ke ongoʻi fēfē ʻi he taimi … ?” pe “Pea hā leva?”

• Fakaafeʻi e fānaú ke nau faʻu ha lisi ʻo e ngaahi foʻi lea mei he Mōsaia 27:8–10 ʻoku nau fakamatala pe naʻe fēfē ʻa ʻAlamā mo e ngaahi foha ʻo Mōsaiá kimuʻa pea nau toki uluí. Hili iá pea kole ange ke nau faʻu ha lisi ʻe taha mei he Mōsaia 27:32–37 ʻokú ne fakamatala pe naʻa nau fēfē hili ʻenau uluí. Fakatatau ki he veesi 24–29, ko e hā naʻá ne fakatupunga e fuʻu liliu lahi ko ʻeni ʻia ʻAlamaá?

Mōsaia 26:29–31

Ke fakamolemoleʻí, kuo pau ke u faʻa fakamolemole

Tokoniʻi e fānaú ke nau sio ki he fehokotaki ʻi he vahaʻa ʻo e fakamolemole ʻoku nau fai ki he niʻihi kehé mo e fakamolemole ʻoku nau ʻamanaki ke maʻu maʻanautolú.

Ngaahi ʻEkitivitī ʻe Ala Fakahokó

• Fakaafeʻi e fānaú ke nau lau e Mōsaia 26:29–31 pea lau pe naʻe tuʻo fiha e ʻasi ʻa e foʻi lea “fakamolemolé.” Ko e hā ‘oku akoʻi mai ʻe he ngaahi veesí ni fekauʻaki mo hono fakamolemoleʻi ʻo e niʻihi kehé? ‘Oku tokoni fēfē ʻa e fakamolemolé ki he tokotaha naʻá ne fai e fehalākí mo e tokotaha ʻokú ne fai ʻa e fakamolemolé?

• Kole ki ha taha ʻo e fānaú ke ne tā ha hala fakakavakava ʻi he palakipoé, pea vahevahe e fakamatala ko ʻeni naʻe lea ʻaki ʻe Palesiteni Tōmasi S. Monisoni: “Ko ia he ʻikai lava ʻo fakamolemoleʻi ʻa e niʻihi kehé, ʻokú ne maumauʻi e hala fakakavakava ʻa ia kuo pau ke ne foua ʻo ka faifai peá ne aʻu ki he langí, he ʻoku fie maʻu ʻe he taha kotoa pē ʻa e fakamolemolé” (George Herbert, quoted in “Hidden Wedges,” Ensign, May 2002, 19). Tamateʻi ha konga ʻo e hala fakakavakavá, pea kole ki he fānaú ke nau tokoni atu hono toe langa iá, ʻo fakakongokonga, ʻi heʻenau vahevahe atu e ngaahi founga te nau lava ai ʻo fakahaaʻi ʻenau fakamolemoleʻi e niʻihi kehé. Fakaafeʻi ke nau fakakaukau ki ha taha ʻoku fie maʻu ke nau fakamolemoleʻi.

Mōsaia 27:8–24

ʻE lava ke u lotu mo ʻaukai ke tāpuekina ʻe he ʻOtuá ʻa kinautolu ʻoku ou ʻofa aí.

Fakakaukau ki he founga te ke lava ai ʻo tokoni ki he fānaú ke mahino hono fakamālohia ʻe he ʻaukaí ʻenau tuí ʻi heʻenau lotua e kakai ʻoku nau ʻofa aí.

Ngaahi ʻEkitivitī ʻe Ala Fakahokó

• Lau fakataha e Mōsaia 27:8–24, pea kole ange ki he fānaú ke nau kumi e meʻa naʻe fai ʻe ʻAlamā mo hono kakaí ke tokoni kia ʻAlamā ko e Siʻí. Vahevahe ha aʻusia ʻa ia naʻá ke ʻaukai ai mo lotua ha taha, pea fakalotolahiʻi e fānaú ke vahevahe ʻenau ngaahi aʻusiá.

• Fakaafeʻi e fānaú ke nau fakakaukau ki ha taha ʻoku nau ʻiloʻi ʻokú ne fie maʻu e tokoni ʻa e ʻOtuá ʻi heʻene moʻuí. Fai hoʻo fakamoʻoní ʻe lava ʻe he fānaú ʻo lotu mo ʻaukai ʻi he tui ki he ʻOtuá ke faitāpuekina e tokotahá ni. Fakaafeʻi e fānaú ke nau lotua e tokotaha naʻa nau fakakaukau ki aí, pea kapau ʻe lava, ke nau ʻaukai foki maʻanautolu.

Poupouʻi e Akó ʻi ʻApi

Kole ki he fānaú ke nau fili ha meʻa ʻe taha naʻa nau ako mei he aʻusia ʻa ʻAlamā ko e Siʻí mo e ngaahi foha ʻo Mōsaiá ʻa ia ʻoku nau fie vahevahe mo honau fāmilí.

Fakatupulaki ʻo ʻEtau Founga Akoʻí

Poupouʻi e Mātuʻá “Ko e ngaahi mātuʻá ko e kau faiako mahuʻinga taha kinautolu ʻo e ongoongoleleí ki heʻenau fānaú—ʻokú na fakatou maʻu e tefitoʻi fatongia mo e mālohi lahi taha ke tākiekina ʻenau fānaú (vakai, Teutalōnome 6:6–7 ʻI hoʻo akoʻi e fānaú ʻi he lotú, fekumi ʻi he faʻa lotu ki he ngaahi founga ke poupou ai ki heʻenau mātuʻá ʻi honau fatongia mahuʻingá” (Ko e Faiako ʻi he Founga ʻa e Fakamoʻuí, 25).