“11–17 Mē. Mōsaia 18–24: ‘Kuo [Mau] Fai ha Fuakava mo Ia,’” Haʻu, ʻo Muimui ʻIate Au—Maʻá e Palaimelí: Tohi ʻa Molomoná 2020 (2020)
“11–17 Mē. Mōsaia 18–24,” Haʻu, ʻo Muimui ʻIate Au—Maʻá e Palaimelí: 2020
Minerva K. Teichert (1888–1976), Hola ‘a e Tuʻi ko Limihaí mo Hono Kakaí, 1949–1951, vali lolo ʻi he papa, ʻinisi ʻe 35 7/8 x 48. Mīsiume ʻo e ʻAatí, 1969 ʻUnivēsiti Pilikihami ʻIongí.
11–17 Mē
Mōsaia 18–24
Kuo [Mau] Fai ha Fuakava mo Ia
ʻI hoʻo lau e Mōsaia 18–24, fakakaukau ki he fānau ʻokú ke akoʻí. ‘E lava ke tokoni atu ʻa e Laumālie Mā‘oniʻoní ke ke ʻiloʻi e ngaahi moʻoni ʻe mahuʻingamālie kiate kinautolú.
Lekooti Hoʻo Ngaahi Ongó
Fakaafeʻi Ke Vahevahe
Fakaʻaliʻali ha fakatātā ʻo ha taha ʻoku papitaiso, pea fakaafeʻi e fānaú ke nau vahevahe ha meʻa ʻoku nau ʻilo fekauʻaki mo e papitaisó. Te nau lava ʻo vahevahe ha meʻa naʻa nau ako lolotonga ʻenau lau mo honau fāmilí ʻa e Mōsaia 18–24, ʻi haʻanau kau atu ki ha papitaiso, pe ʻi ha polokalama kehe.
Akoʻi e Tokāteliné: Fānau Iiki Angé
Ko e taimi ʻoku papitaiso ai aú, ʻoku ou fai ha fuakava mo e ʻOtuá.
Ko e taha ʻo e ngaahi founga mahuʻinga taha ke tokoni ki he fānaú ke nau mateuteu ki he papitaisó ko hono akoʻi kiate kinautolu fekauʻaki mo e fuakava te nau fakahoko ʻi hono papitaiso kinautolú.
Ngaahi ʻEkitivitī ʻe Ala Fakahokó
-
Fakamanatu e talanoa ʻo ʻAlamā mo hono kakaí ʻi he Vai ʻo Molomoná ʻo fakaʻaongaʻi e Mōsaia 18:7–16 pe “Vahe 15: Ko e Akonaki mo e Fai Papitaiso ʻa ʻAlamaá” (Ngaahi Talanoa ʻo e Tohi ʻa Molomoná, 43–44, pe vitiō fekauʻakí ʻi he ChurchofJesusChrist.org). Fakaʻaliʻali e fākatātā ʻi he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí, pea tuku ke tala atu ʻe he fānaú e meʻa ʻoku nau ʻilo fekauʻaki mo e talanoá.
-
Fakaʻaongaʻi e Mōsaia 18:8–10 ko ha fakahinohino pea akoʻi e fānaú ʻi hoʻo ngaahi lea pē ʻaʻau ki he ngaahi meʻa ʻe niʻihi te nau palōmesi ke fai ʻi hono papitaiso kinautolú. Hangē ko ʻení, te nau palōmesi ke muimui ki he Tamai Hēvaní mo Sīsū ʻaki hono fakafiemālieʻi e kakai ʻoku nau loto-mamahí. Vahevahe ha talanoa ki he founga naʻá ke tauhi ai, pe ko ha taha ʻokú ke ʻilo, e ngaahi palōmesi ko ení. (Vakai foki, T&F 20: 77, 79; Carole M. Stephens, “ ʻOku ʻi ai Ha ʻUhinga Maʻongoʻonga ke Tau Fiefia Ai,” Ensign pe Liahona, Nōv. 2013, 115–17.)
-
Fakamatalaʻi ange, ʻi he taimi ʻoku papitaiso ai kitautolú, ʻoku toe fakahoko mai foki ʻe he Tamai Hēvaní ha ngaahi talaʻofa kiate kitautolu. Vahevahe ʻa e ngaahi talaʻofa ko ʻení ʻo hangē ko ia ʻoku fakamatalaʻi ʻi he Mōsaia 18:9–10.
Ko e taimi ʻoku papitaiso ai aú, ʻoku ou hoko ko ha mēmipa ʻo e Siasi ʻo Sīsū Kalaisí.
Tokoniʻi e fānaú ke mahino e ʻuhinga ʻo e hoko ko ha kau mēmipa ʻo e Siasí ʻi he papitaisó mo e hilifakinimá.
Ngaahi ʻEkitivitī ʻe Ala Fakahokó
-
Fakaafeʻi ha tokotaha ne toki papitaiso ke vahevahe ʻene aʻusiá. Lau ʻa e Mōsaia 18:17, pea fakamatalaʻi ange ko e taimi ʻoku tau papitaiso aí ʻoku tau hoko ko ha kau mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní pea ʻoku tau palōmesi ke muimui kia Sīsū Kalaisi.
-
Fakaʻaliʻali ki he fānaú e ʻū fakatātā ʻoku nau fakafofongaʻi e ngaahi meʻa ʻoku fakamatalaʻi ʻi he Mōsaia 18:17–28. Hangē ko ʻení, ʻe lava ke fakafofongaʻi ʻe he fakatātā Fakanofo ki he Lakanga Fakataulaʻeikí (Tohi Fakatātā ʻo e Ongoongoleleí, fika 106) ʻa e veesi 18, pea fakafofongaʻi ʻe he fakatātā Totongi Vahehongofulú (Tohi Fakatātā ʻo e Ongoongoleleí, fika 113) ʻa e veesi 27–28. Tuku ke fakamatalaʻi ʻe he fānaú e meʻa ʻoku nau sio ki ai ʻi he ʻū fakatātaá, pea fakaʻaongaʻi e fakatātaá mo e ʻū vēsí ke tokoni ke nau ʻiloʻi e ʻuhinga ʻo e hoko ko ha mēmipa ʻo e Siasí.
ʻOku tau fakahoko ha fuakava mo e ʻOtuá ʻi he taimi ʻoku tau papitaiso aí.
ʻE lava ke fakamaʻamaʻa ʻe he ʻOtuá ʻeku ngaahi kavengá.
Ko e fē ha taimi kuo ʻai ai ʻe he ʻOtuá ke ke ongoʻi ʻoku maʻamaʻa hoʻo ngaahi kavengá? Fakakaukau ki ha ngaahi founga te ke lava ai ʻo vahevahe hoʻo ngaahi aʻusiá mo e fakamoʻoní mo e fānaú.
Ngaahi ʻEkitivitī ʻe Ala Fakahokó
-
Tokoni ki he fānaú ke nau fakakaukau ki he ngaahi ngāue maʻamaʻa te nau lava ʻo fai ke tala atu e meʻa naʻe hoko ki he kakai ʻo ʻAlamaá ʻi he Mōsaia 24:8–17. Fakamahinoʻi ange koeʻuhí naʻe fili ʻe ʻAlamā ke muimui ki he ngaahi akonaki ʻa ʻApinetai fekauʻaki mo Sīsuú, naʻe ngaohikovia ai ia mo hono kakaí, ka naʻe ʻikai taʻofi ai ʻenau tui kia Sīsuú.
-
Lau e Mōsaia 24:14–15 ki he fānaú. Fakafonu ha kato ʻaki ha ngaahi meʻa ʻoku mamafa (ke fakafofongaʻi ʻa e ngaahi kavengá), pea fakaafeʻi ha tamasiʻi ke ne toʻo ʻa e kató. Fakamatalaʻi ange ko e taimi ʻoku tau loto-mamahi, puke, pe faingataʻaʻia aí, te tau ongoʻi ʻoku hangē pē ʻoku tau fata ha meʻa ʻoku mamafá. Fakaafeʻi e fānaú ke nau taufetongi ʻi he tokoni ki he tamasiʻí ki hono fata e kató koeʻuhí ke maʻamaʻa ange. Fakamatalaʻi ange ʻe lava ʻe he Tamai Hēvaní ʻo ngaohi ke maʻamaʻa ange ʻetau kavengá ʻi heʻetau fekumi ki Heʻene tokoní ʻi he lotu, ngāue tokoni ki he niʻihi kehé, mo e alā meʻa pehē.
Akoʻi e Tokāteliné: Fānau Lalahi Angé
ʻI he taimi ʻoku papitaiso ai aú, ʻoku ou fai ha fuakava mo e ʻOtuá.
Te ke tokoniʻi fēfē e fānau ʻokú ke akoʻí ke mahino e fuakava ʻoku tau fakahoko ʻi he papitaisó?
Ngaahi ʻEkitivitī ʻe Ala Fakahokó
-
ʻOange ki he fānau takitaha ha laʻipepa. Lau fakataha e Mōsaia 18:8–10, pea fakaafeʻi e fānaú ke nau tohi pe tā he tafaʻaki ʻe taha ʻo ʻenau laʻipepá ha ngaahi palōmesi ʻoku tau fai ʻi he papitaisó, pea ʻi he tafaʻaki ʻe tahá, ʻa e ngaahi tāpuaki ʻoku talaʻofa mai ʻe he Tamai Hēvaní kiate kitautolu. Tuku ke nau vahevahe mo e kalasí ʻa e meʻa naʻa nau akó. ʻI heʻenau vahevahé, ʻeke ha ngaahi fehuʻi hangē ko ʻení: ʻE founga fēfē haʻatau “tangi fakataha mo kinautolu ʻoku tangí”? ʻOku ʻuhinga ki he hā ʻa e hoko ko ha fakamoʻoni ʻa e ʻOtuá ʻi he “feituʻu kotoa pē”? (veesi 9). Ko e hā te tau lava ʻo fai ke tauhi ʻetau ngaahi fuakavá?
-
Fakaafeʻi ha fānau ʻe niʻihi kuo nau ʻosi papitaiso ke vahevahe e meʻa ʻoku nau manatuʻi fekauʻaki mo ʻenau aʻusiá. Ko e hā naʻe makehe ai e ʻaho ko iá? Ne nau ongoʻi fēfē nai? Fakamatalaʻi ange ʻoku nau fakafoʻou he Sāpate takitaha ʻa ʻenau fuakava ʻi he papitaisó ʻi he taimi ʻoku nau maʻu ai e sākalamēnití. Tokoni ki he fānaú ke fakafehoanaki e fuakava ʻo e papitaisó ʻoku fakamatalaʻi ʻi he Mōsaia 18:8–10 mo e lotu tāpuakiʻi ʻo e sākalamēnití (vakai T&F 20:77, 79). ʻE founga fēfē haʻatau ʻai e sākalamēnití ko ha taimi makehe mo ʻapasia, ʻo hangē ko ʻetau papitaisó?
-
Kole ki ha tokotaha ne toki papi ului ke ne vahevahe e founga naʻá ne ʻilo ai fekauʻaki mo e Siasí pea mo ʻene ongo ʻi he taimi ne papitaiso ai iá. Tuku ke ʻeke ʻe he fānaú ha ngaahi fehuʻi, hangē ko e meʻa naʻá ne tokoniʻi e taha ko iá ke ne fie fakahoko e ngaahi palōmesi ʻi he Mōsaia 18:7–16.
ʻOku ou kau ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
Te ke poupouʻi fēfē ʻa e fānaú ke nau houngaʻia ʻi he ngaahi tāpuaki ʻo ʻenau hoko ko e kau mēmipa ʻo e Siasí?
Ngaahi ʻEkitivitī ʻe Ala Fakahokó
-
Fakaafeʻi e fānaú ke nau lau e Mōsaia 18:17–28, ʻo fekumi ki he ngaahi akonaki ʻa e Siasi ʻo Kalaisí ʻi he kuonga ʻo ʻAlamaá ʻoku faitatau mo hotau kuongá. Hiki ʻenau talí ʻi ha ʻū kongokonga papa pe ipu, pea tuku ki he fānaú ke nau fakaʻaongaʻi ia ke langa ha meʻa ʻokú ne fakafofongaʻi e Siasi ʻo Sīsū Kalaisí.
-
Hiva mo e fānaú pe lau e lea ki he “Ko e Siasi ʻo Sīsū Kalaisí” (Tohi Hiva ʻa e Fānaú, 48), pea fakaafeʻi kinautolu ke nau fanongo ki he ngaahi meʻa ʻoku tau palōmesi ke fai ko e kau mēmipa ʻo e Siasí. Tokoniʻi ke nau fakakaukau ki he ngaahi founga te nau lava ai ʻo tauhi e ngaahi palōmesi ko ʻení.
Mōsaia 21:1–5, 13–16; 22:1–11; 24:8–22
ʻE lava ke fakamaʻamaʻa ʻe he ʻOtuá ʻeku ngaahi kavengá.
ʻE lava ʻe he talanoa ki he kakai ʻo ʻAlamaá ʻo fakahaaʻi ki he fānaú ko e taimi ʻe niʻihi ʻoku tokoniʻi kitautolu ʻe he ʻOtuá ʻaki ʻEne fakamālohia kitautolu ke tau kātakiʻi hotau ngaahi faingataʻá kae ʻoua ʻe toʻo ʻaupito ia. Te ke lava fēfē ʻo tokoniʻi kinautolu ke nau ako mei he talanoa ko ʻení?
Ngaahi ʻEkitivitī ʻe Ala Fakahokó
-
Tokoni ki he fānaú ke nau ʻilo e ngaahi meʻa lalahi mei he talanoa ʻo e kakai ʻo Limihaí ʻi he Mōsaia 21:1–5, 13–16; mo e 22:1–11 mo e kakai ʻo ʻAlamaá ʻi he Mōsaia 24:8–22. Kole leva ki he fānaú ke nau tā ha taha ʻo e ngaahi meʻa ko ʻeni naʻe hokó. Fakaafeʻi e fānaú ke nau fokotuʻutuʻu ʻa e ʻū laʻipepá ʻi hono hokohoko totonú ke nau tala e talanoá. ʻI heʻenau fai iá, fakamamafaʻi ange naʻe tokoniʻi ʻe he ʻOtuá ʻa e kakaí ke nau fua ʻenau ngaahi kavengá.
-
Fakaafeʻi e fānaú ke nau lau e Mōsaia 21:14–15 mo e 24:13–14. Naʻe tali fēfē ʻe he ʻEikí ʻa e ngaahi lotu ʻa e kakai ʻo Limihaí mo e kakai ʻo ʻAlamaá? Kole ki he fānaú ke nau vahevahe e ngaahi taimi naʻa nau lotua ai ha tokoni ki ha faingataʻa pea tokoniʻi kinautolu ʻe he Tamai Hēvaní, pe vahevahe haʻo aʻusia pē ʻaʻau.
Poupouʻi e Ako ʻi ʻApí
Fakaafeʻi e fānaú ke nau fakamatalaʻi ki ha taha kehe ʻa e meʻa te nau palōmesi pe kuo nau palōmesi ke fai ko ha konga ʻo ʻenau fuakava ʻi he papitaisó.
Fakatupulaki ʻEtau Akoʻí
Tokanga ki he fānaú. Kapau ʻoku hangē ʻoku ʻikai lava ʻo tangutu maʻu e fānaú, mahalo pē naʻa kuo taimi ke fai ha ʻekitivitī ʻe taha pe fai ha kiʻi lue nounou mo loto-ʻapasia. ʻI he tafaʻaki ʻe tahá, kapau ʻoku nau kau mai mo ako, ʻoua naʻá ke hohaʻa ke hoko atu koeʻuhí pē ke akoʻi kotoa e lēsoni mei he nāunaú.