“25–31 Mē. Mōsaia 29–ʻAlamā 4: ‘Naʻa Nau Tuʻu Maʻu mo Tuʻu Taʻe-faʻa-ueʻi,’” Haʻu, ʻo Muimui ʻIate Au—Maʻá e Palaimelí: Tohi ʻa Molomoná 2020 (2020)
“25–31 Mē. Mōsaia 29–ʻAlamā 4,” Haʻu, ʻo Muimui ʻIate Au—Maʻá e Palaimelí: 2020
Malanga ʻa ʻAlamā ko e Siʻí,tā ʻa Gary L. Kapp
25–31 Mē
Mōsaia 29–ʻAlamā 4
“Naʻa Nau Tuʻu Maʻu mo Tuʻu Taʻe-faʻa-ueʻi”
ʻE lava ke ako ʻe he fānau ʻokú ke akoʻí ha meʻa lahi ʻi hoʻo kalasí, ka ʻe lahi ange ʻenau akó ʻo kapau te nau fakatupulaki ha ʻulungaanga ʻo e ako e folofolá ʻi ʻapí. Fakakaukau ki he founga te ke lava ai ʻo fakalotolahiʻi mo poupouʻi hono ako e ongoongoleleí ʻi ʻapí.
Lekooti e Ngaahi Ongo ʻOkú ke Maʻú
Fakaafeʻi Ke Vahevahe
Fakaafeʻi e fānaú ke nau tangutu ʻi ha siakale he falikí, pea tekaʻi ha foʻi pulu ki ha taha ʻiate kinautolu. Kole ki he tokotaha ko iá ke ne vahevahe ha meʻa kuó ne ako kimuí ni mai ʻi ʻapi pe ʻi he Palaimelí fekauʻaki mo e ongoongoleleí. Hili iá pea fakaafeʻi e tokotaha ko iá ke ne tekaʻi e foʻi pulú ki ha taha kehe. Toutou fai pehē pē kae ʻoua kuo maʻu ʻe he tokotaha kotoa ha faingamālie ke ne vahevahe.
Akoʻi e Tokāteliné: Fānau Iiki Angé
ʻI heʻeku hoko ko ha mēmipa ʻo e Siasí, ʻoku totonu ke u ʻofa mo ngāue tokoni ki he niʻihi kehé.
Mahalo he ʻikai te ke fili ke talaange ki he fānaú ha meʻa lahi fekauʻaki mo e ngaahi akonaki ʻa Nēhoá, ka ʻe ʻaonga ke nau ʻiloʻi ʻoku tau ngāue ʻi he Siasí koeʻuhí ʻoku tau ʻofa ʻi he niʻihi kehé, kae ʻikai koeʻuhí ke tau tuʻumālie pe manakoa.
Ngaahi ʻEkitivitī ʻe Ala Fakahokó
-
Vahevahe mo e fānaú, ʻi ha lea mahinongofua, ʻa e talanoa ʻo ʻAlamā mo Nēhoá (vakai, ʻAlamā 1; “Vahe 20: Ko ʻAlamā mo Nēhoa,” Ngaahi Talanoa ʻo e Tohi ʻa Molomoná, 54–55, pe ko e vitiō ʻoku fekauʻaki mo iá ʻi he ChurchofJesusChrist.org). Fakamamafaʻi ange neongo naʻe angakovi e kau muimui ʻo Nēhoá ki he kāingalotu ʻo e Siasí, ka naʻe kei ʻofa pē mo angaʻofa ha tokolahi ʻo e kāingalotu ʻo e Siasí.
-
Lau e ʻAlamā 1:30 ki he fānaú, pea tokoni ke mahino kiate kinautolu naʻe vahevahe ʻe he kakai ʻo e Siasí ʻa e meʻa naʻa nau maʻú mo kinautolu naʻa nau fie maʻu ha tokoní. Tokoni ki he fānaú ke nau fakakaukau ki ha ngaahi meʻa te nau lava ʻo vahevahe mo e kakai te nau lava ʻo vahevahe ki aí. Fakalotolahiʻi e fānaú ke nau tā ha ʻū fakatātā ʻo ʻenau palaní.
-
Hivaʻi fakataha ha foʻi hiva fekauʻaki mo e ʻofá mo e ngāue tokoní, hangē ko e “Ko e Anga-ʻofá ʻe Kamata ʻIate Au” (Tohi Hiva ʻa e Fānaú, 83), pea tokoni ki he fānaú ke nau fakakaukau ke fakatātaaʻi e lea ʻo e hivá.
ʻE tali ʻe he ʻOtuá ʻeku ngaahi lotú.
ʻI he ongoʻi ʻe ʻAlamā mo e kau Nīfaí ha “fuʻu manavahē lahí” ( ʻAlamā 2:23), naʻa nau lotua ha tokoni pea naʻe fakamālohia kinautolu. Tokoniʻi e fānaú ke nau ako mei heʻenau tā sīpingá.
Ngaahi ʻEkitivitī ʻe Ala Fakahokó
-
ʻI hoʻo fakaʻaongaʻi e ʻū fakatātā ʻi he fokotuʻutuʻu ʻo e uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí pe ʻi he “Vahe 21: Ko e Kau ʻAmelikaí” (Ngaahi Talanoa ʻo e Tohi ʻa Molomoná, 56–57, pe vitiō ʻoku fekauʻaki mo ia ʻi he ChurchofJesusChrist.org), tala ki he fānaú ʻa e founga naʻe maʻu ai ʻe he kau Nīfaí e mālohi ke ikunaʻi e kau ʻAmalekaí. ʻEke ki he fānaú fekauʻaki mo e ngaahi meʻa ʻoku fakailifia pe faingataʻa kiate kinautolú, pea fakamoʻoni ange te nau lava ʻo lotu ki he Tamai Hēvaní ki ha tokoni ʻi he ngaahi meʻa ko ʻení.
-
Vahevahe haʻo aʻusia ki ha taimi naʻe tokoniʻi ai koe ʻe he ʻOtuá hili hoʻo lotu kiate Iá. Fakaafeʻi e fānaú ke nau vahevahe e ngaahi aʻusia kuo nau maʻu ʻi heʻenau lotú.
ʻE lava ke fakamālohia heʻeku fakamoʻoní ʻa e niʻihi kehé.
ʻOku faʻa malava ʻe he “fakamoʻoni ʻoku haohaoa” ( ʻAlamā 4:19) ʻa ha kiʻi leka ʻo maʻu ha ivi tākiekina mālohi ʻi he niʻihi kehé. Te ke lava fēfē ke tokoniʻi e fānaú ke nau ʻilo ha ngaahi founga ke vahevahe ai ʻenau fakamoʻoní?
Ngaahi ʻEkitivitī ʻe Ala Fakahokó
-
Fakaava e folofolá ki he ʻAlamā 4:19, pea fakamatalaʻi ange naʻe mamata ʻa ʻAlamā ki he faiangahala ʻa e kakaí, peá ne fakakaukau ai ko e founga lelei taha ke tokoniʻi kinautolú ko hano fakahoko e “fakamoʻoni ʻoku haohaoá” kiate kinautolu. Fakaʻaongaʻi e peesi ʻekitivitī ʻo e uike ní ke akoʻi ki he fānaú ke nau ʻiloʻi ʻa e fakamoʻoni haohaoá pea mo e meʻa ʻoku kau ki aí. Poupouʻi kinautolu ke nau vahevahe ʻenau ngaahi fakamoʻoní.
-
Lingi ha vai maʻa ki ha ipu sioʻata, pea fakamatalaʻi ange ʻoku hangē ʻa e vaí ko ʻetau fakamoʻoní he ʻe lava ke tau vahevahe ia mo e niʻihi kehé. Lingi ʻa e ipu vaí ki ha kiʻi ipu siʻisiʻi maʻá e tokotaha kotoa, pea talaange ki he fānaú ko e taimi ʻoku tau vahevahe ai ʻetau fakamoʻoní, ʻoku tau tokoni ai ki he niʻihi kehé ke toe mālohi ange foki mo ʻenau fakamoʻoní.
-
Kapau ʻe fie fakahoko ʻe he fānaú, tuku ke nau ʻahiʻahi vahevahe ʻenau fakamoʻoní. Fokotuʻu ange ha ngaahi founga kehekehe ʻe lava ke nau fakahaaʻi ai ʻoku nau ʻiloʻi ʻoku moʻoni e ongoongoleleí, kae pehē foki ki hono fakahaaʻi ʻo fakafou ʻi heʻenau tōʻongá.
Akoʻi e Tokāteliné: Fānau Lalahi Angé
Te u lava ʻo ako ke u ʻiloʻi e ngaahi akonaki halá.
ʻE ʻi ai ha taimi ʻi heʻetau moʻuí kuo pau ke tau fehangahangai ai mo ha kakai hangē ko Nēhoá—ʻa kinautolu ʻoku nau feinga ke kākaaʻi kitautolu ʻaki ha ngaahi pōpoaki ʻoku fakamānako ka ʻoku loi mo fakatuʻutāmaki. ʻE lava ke tokoni ʻa hono vahevahe e talanoa ʻi he ʻAlamā 1:2–9 ke teuteuʻi e fānaú ki ha ngaahi meʻa pehē ʻi heʻenau moʻuí.
Ngaahi ʻEkitivitī ʻe Ala Fakahokó
-
Tokoniʻi e fānaú ke nau lau e ʻAlamā 1:2–4 ke fakamanatu ha niʻihi ʻo e ngaahi meʻa naʻe akoʻi ʻe Nēhoá, ko ha faiako naʻe loi. Tokoni ke nau faʻu ha kiʻi sivi moʻoni-pe-hala ʻo fakaʻaongaʻi e fakamatala mei he ngaahi veesi ko ʻení. Ko e hā ʻoku faʻa fakatahaʻi ai ʻe Sētane ʻa e moʻoní mo e loí? Tokoniʻi e fānaú ke nau fakakaukau ki ha ngaahi sīpinga.
-
Hili homou fakamanatu fakataha e ʻAlamā 1:2–9 kole ki he fānaú ke nau takitaha lau ha taha ʻo e ngaahi folofola ko ʻení: Mātiu 7:21–23; 2 Nīfai 26:29–31; Mōsaia 18:24–26; mo e Hilamani 12:23–26. ʻOku fakahalaki fēfē ʻe he ngaahi folofola ko ʻení ʻa e ngaahi akonaki ʻa Nēhoá? Te tau fakaʻaongaʻi fēfē ʻa e folofolá ke fakamālohia ʻetau fakamoʻoni ki he ongoongoleleí?
ʻI heʻeku hoko ko e mēmipa ʻo e Siasí, ʻoku totonu ke u ʻofa mo ngāue tokoni ki he niʻihi kehé.
Ko e taimi ʻe niʻihi naʻe angaʻofa mo faʻa foaki e kāingalotu ʻo e Siasí ʻi he kuonga ʻo ʻAlamaá, pea ko e taimi ʻe niʻihi ne nau faʻa taʻeʻofa mo loto hīkisia. Tokoniʻi e fānau ʻokú ke akoʻí ke nau ako mei heʻenau ngaahi aʻusiá.
Ngaahi ʻEkitivitī ʻe Ala Fakahokó
-
Tokoniʻi e fānaú ke nau lau e ʻAlamā 4:6–13 pea fakamatalaʻi e ʻuhinga ʻo e ngaahi foʻi lea hangē ko e “femanukiʻaki,” “fakatangaʻi,” mo e “fehiʻa” (fakaʻaongaʻi ha tikisinale ʻo ka fie maʻu). Ko e hā e ongo ʻoku tau maʻu ʻi he taimi ʻoku fai mai ai ʻe he kakaí e ngaahi tōʻonga ko ʻení kiate kitautolú? Fakaafeʻi e fānaú ke nau fekumi ʻi he ʻAlamā 1:26–30 ki he ngaahi foʻi lea ʻokú ne fakamatalaʻi e finangalo ʻo e Tamai Hēvaní ki heʻetau tōʻonga ki he niʻihi kehé.
-
Kole ki he fānaú ke nau lau e ʻAlamā 1:27, 30 pea lisi e faʻahinga kakai naʻe tokoniʻi ʻe he kāingalotu ʻo e Siasí. Tokoniʻi e fānaú ke nau fakakaukau ki ha kakai ʻi honau ngaahi kaungāʻapí pe ʻapiakó ʻoku “masiva” ( ʻAlamā 1:30) pea fie maʻu ʻenau ʻofá mo e tokoní. Ke toe fakamamafaʻi e tefitoʻi moʻoni ko ʻení, hivaʻi fakataha ha foʻi hiva fekauʻaki mo e angaʻofá, hangē ko e “Te u ʻAʻeva Pea mo Koe” (Tohi Hiva ʻa e Fānaú, 78).
ʻE lava ke fakamālohia heʻeku fakamoʻoní ʻa e niʻihi kehé.
Naʻe fakafisi ʻa ʻAlamā mei hono lakanga ko e fakamaau lahí kae lava ke tuku hano taimi lahi ange ke vahevahe ʻene fakamoʻoní mo tokoniʻi e kakaí ke nau fakatomala. ʻE lava ke ueʻi heʻene tā sīpingá e fānaú ke tā tuʻo lahi ange ʻenau vahevahe ʻenau fakamoʻoní.
Ngaahi ʻEkitivitī ʻe Ala Fakahokó
-
Lau mo e fānaú e ʻAlamā 4:8–12, 15, pea kole ange ke nau kumi ee ngaahi palopalema naʻe hoko ʻi he Siasí, ʻo hangē ko ia ʻoku fakamatalaʻi ʻi he ngaahi veesi ko ʻení. Fakaafeʻi e fānaú ke nau fokotuʻu ha ngaahi meʻa ʻe lava ke fai ʻe ʻAlamā ke solova e ngaahi palopalema ko ʻení. Tokoniʻi ke nau fekumi ʻi he ʻAlamā 4:16–20 ki he meʻa naʻe fakakaukau ʻe ʻAlamā ke ne faí. Ko e hā ʻoku fuʻu mālohi ai e fakamoʻoní?
-
Ke tokoni ke mahino ki he fānaú pe ko e hā ʻa e fakamoʻoni pea mo e meʻa ʻoku kau ki aí, huluʻi e vitiō, “Apostle Testimony Montage” (ChurchofJesusChrist.org); hivaʻi fakataha ha foʻi hiva fekauʻaki mo e tefitó, hangē ko e “Ko e Fakamoʻoní” (Ngaahi Himi, fika 69); pe fakaʻaongaʻi e peesi ʻekitivitī ʻo e uike ní. Kole ki he fānaú ke nau vahevahe e meʻa naʻa nau ako fekauʻaki mo e fakamoʻoní mei he ngaahi maʻuʻanga tokoni ko ʻení.
Poupouʻi e Ako ʻi ʻApí
Tokoniʻi e fānaú ke nau fakakaukau ki ha taha te nau lava ʻo vahevahe ki ai ʻenau fakamoʻoní he uike kahaʻú. Poupouʻi ke nau tohi ha palani ke nau aʻusia ai ʻenau taumuʻá.
Fakatupulaki ʻEtau Founga Akoʻí
ʻEke ha ngaahi fehuʻi ʻokú ne fakaafeʻi ʻa e fakamoʻoní. “ʻE lava ʻe hono fai ha ngaahi fehuʻi ʻoku poupouʻi ai e kau akó ke fai ʻenau fakamoʻoni ki he ngaahi tefitoʻi moʻoni ʻoku akoʻí, ke hoko ia ko ha founga mālohi fau ke fakaafeʻi ʻaki e Laumālié” (Faiako ʻi he Founga ʻa e Fakamoʻuí, 33). Ke fakaafeʻi e fānaú ke vahevahe ʻenau fakamoʻoní, ʻeke ha ngaahi fehuʻi ʻokú ne ueʻi kinautolu ke nau fakakaukau mo vahevahe e meʻa ʻoku nau ongoʻi fekauʻaki mo e Fakamoʻuí pe ko ʻEne ongoongoleleí. Te ke lava foki ʻo ʻeke fekauʻaki mo e ngaahi aʻusia kuo nau maʻu ʻi he lotú, ngāue tokoní, ngaahi ouau hangē ko e papitaisó, pe ongoʻi e ivi tākiekina ʻo e Laumālie Māʻoniʻoní.