ʻApinetai ʻi he ʻAo ʻo e Tuʻi ko Noá, tā fakatātaaʻi ʻe Andrew Bosley

4–10 Mē

Mōsaia 11–17

“Ko Ha Maama … ʻOku ʻIkai Lava ʻo Tāmateʻi”

Fakalaulauloto mo lotua ke ʻiloʻi e founga te ke lava ai ʻo fakaʻaongaʻi e talanoa ʻo ʻApinetaí mo ʻene ngaahi akonakí ʻi he Mōsaia 11–17 ke tokoniʻi e fānau ʻokú ke akoʻí. Hiki e ngaahi ongo ʻokú ke maʻú.

Lekooti ʻa e Ngaahi Ongo ʻOkú ke Maʻú

Fakaafeʻi Ke Vahevahe

Kole ki he fānaú ke nau vahevahe e meʻa ʻoku nau ʻiloʻi fekauʻaki mo e talanoa ʻo ʻApinetai mo e Tuʻi ko Noá. ʻE lava ke tokoni e fakatātā ʻi he lēsoni ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí.

Akoʻi e Tokāteliné: Fānau Iiki Angé

Mōsaia 11–13; 17

Te u lava ʻo tuʻu maʻu ʻi he moʻoní, ʻo tatau ai pē pe teu tuʻu toko taha.

Naʻe loto-toʻa ʻa ʻAlamā mo ʻApinetai ʻi hono taukaveʻi ʻo e moʻoní. Te ke lava fēfē ʻo fakaʻaongaʻi e talanoa ko ʻení ke fakatupulaki e loto-toʻa ʻa e fānaú ki he ngaahi momeniti ʻe ala fie maʻu ai ke nau taukaveʻi e meʻa ʻoku nau tui ki aí?

Ngaahi ʻEkitivitī ʻe Ala Fakahokó

• Fakamatalaʻi nounou e talanoa ʻo ʻApinetai, Tuʻi ko Noá, mo ʻAlamā ʻa ia ʻoku maʻu ʻi he Mōsaia 11–13 mo e 17. Te ke lava ʻo fakaʻaongaʻi e “Vahe 14: Ko ʻApinetai mo e Tuʻi ko Noá” (Ngaahi Talanoa ʻo e Tohi ʻa Molomoná, 38–42, pe vitiō fakafekauʻakí ʻi he ChurchofJesusChrist.org). Fakaafeʻi e fānaú ke nau fakafaivaʻi e talanoá, ʻo taufetongi ʻi hono ʻeti ha niʻihi kehekehe.

• Laka fakataha holo mo e fānaú ʻi heʻenau hiva ha hiva ʻokú ne ueʻi kinautolu ke nau loto-toʻa hangē ko e “Te U Loto-toʻa” (Tohi Hiva ʻa e Fānaú, 85). Lau fakataha e lea ʻo e foʻi hivá, pea tokoniʻi e fānaú ke nau ʻiloʻi e meʻa ʻoku fai ʻe ha tokotaha loto-toʻa. Fili ha ngaahi veesi ʻe niʻihi mei he Mōsaia 11–13 mo e 17 ke lau ki he fānaú ke fakahaaʻi ʻa e loto-toʻa ʻa ʻApinetai mo ʻAlamaá (hangē ko ʻení, vakai, Mōsaia 13:1–4, 9).

Mōsaia 12:33–36; 13:11–24

ʻOku totonu ke u talangofua ki he Fekau ʻe Hongofulú.

Naʻe ʻiloʻi ʻe he kau taulaʻeiki ʻa e Tuʻi ko Noá e ngaahi fekaú ka naʻe ʻikai ke nau muimui ki ai. ʻE lava e ngaahi lea ʻa ʻApinetaí ʻo tokoni ke mahino ki he fānaú e mahuʻinga ʻo e talangofua ki he ngaahi fekaú.

Ngaahi ʻEkitivitī ʻe Ala Fakahokó

• Fakaafeʻi e fānaú ke nau lau ki he 10. Pe ʻoange kiate kinautolu ha ʻū laʻipepa fakafikefika ʻe 10 pea tuku ke nau fakahokohoko e ʻū laʻipepá. Fakamatalaʻi ange ʻoku foaki mai ʻe he Tamai Hēvaní ‘a e ngaahi fekau ʻe Hongofulú ke tokoniʻi kitautolu ke tau toe foki hake ʻo nofo mo ia. Tokoni ki he fānaú ke mou lau maʻuloto ha niʻihi ʻo e Fekau ʻe Hongofulú mei he Mōsaia 12:33–36 mo e 13:11–24.

• Fakaʻaliʻali ha fakatātā ʻo Mōsese mo e Fekau ʻe Hongofulú (hangē ko e Tohi Fakatātā ʻo e Ongoongoleleí, fika 14), mo fakamatalaʻi nounou e founga naʻe maʻu ai ʻe Mōsese e ngaahi fekaú mei he ʻOtuá (vakai, ʻEkesōtosi 19–20). Pea fakaʻaliʻali leva ha fakatātā ʻo ʻApinetai (vakai, fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí), pea talaange ki he fānaú naʻe fakamanatu ʻe ʻApinetai ki he Tuʻi ko Noá mo ʻene kau taulaʻeikí ʻa e Fekau ʻe Hongofulú. Fili ha niʻihi ʻo e ngaahi fekaú mei he Mōsaia 12:33–36 mo e 13:11–24 ʻa ia ʻokú ke ongoʻi ʻoku mahuʻinga ki he fānau ʻokú ke akoʻí, pea aleaʻi mo kinautolu ʻa e ngaahi tāpuaki ʻoku haʻu mei he talangofua ki he ngaahi fekau ko iá.

• Hivaʻi fakataha ha hiva fekauʻaki mo e ngaahi fekaú, hangē ko e “Tauhi e Ngaahi Fekaú”Tohi Hiva ʻa e Fānaú, 82). Ko e hā ʻoku tau tauhi ai e ngaahi fekaú?

Mōsaia 14:5; 15:7–9

ʻOku fakamoʻoni loto-toʻa ʻa e kau palōfitá kia Sīsū Kalaisi.

Naʻe akoʻi ʻe ʻApinetai e Tuʻi ko Noá mo ha niʻihi kehe fekauʻaki mo Sīsū Kalaisi, neongo naʻe fakatuʻutāmaki. ʻE fakamālohia fēfē ʻe he talanoa ʻo ʻApinetaí e fakamoʻoni ʻa e fānaú ki he kau palōfitá?

Ngaahi ʻEkitivitī ʻe Ala Fakahokó

• Vahevahe mo e fānaú ha niʻihi ʻo e ngaahi meʻa naʻe akoʻi ʻe ʻApinetai fekauʻaki mo Sīsū Kalaisi ʻi he Mōsaia 14:5 mo e 15:7–9. Tokoni ke mahino ki he fānaú naʻe fie maʻu ʻe ʻApinetai ʻa e Tuʻi ko Noá mo hono kakaí ke nau muimui kia Sīsū Kalaisi koeʻuhí ke nau fiefia. ʻI hotau kuongá, kuo akoʻi kitautolu ʻe he kau palōfita moʻuí fekauʻaki mo e Fakamoʻuí. Lau ha konga lea mei he konifelenisi lahí, pe vahevahe ha foʻi vitiō ʻo ha taha ʻo e kau palōfita moʻuí ʻokú ne vahevahe ʻene fakamoʻoni kia Sīsū Kalaisí (hangē ko e ʻū vitiō “Special Witnesses of Christ” ʻi he ChurchofJesusChrist.org).

• Fakaʻaliʻali pe tā ha ngaahi fakatātā ʻo ha sēini, fale fakapōpula, mo ha afi. Akoʻi e fānaú naʻe loto fiemālie ʻa ʻApinetai ke haʻi ia, tuku pōpula, pea naʻa mo hono tutu iá, kae lava ke vahevahe ʻene fakamoʻoni kia Sīsū Kalaisí. Neongo mahalo he ʻikai te tau fehangahangi mo e ngaahi fakatamaki ko ʻení, ka ʻe anga fēfē haʻatau loto-toʻa hangē ko ʻApinetaí ʻi hono vahevahe ʻetau fakamoʻoní ʻi heʻetau leá mo ʻetau ngaahi filí fakatouʻosi?

Akoʻi e Tokāteliné: Fānau Lalahi Angé

Mōsaia 11–13; 17

Te u lava ʻo tuʻu maʻu ʻi he totonú, ʻo tatau ai pē pe teu tuʻu toko taha.

Te ke tokoniʻi fēfē e fānau ʻokú ke akoʻí ke nau tuʻu maʻu loto-toʻa ʻi he totonú, ʻo tatau ai pē ʻo ka nau fai toko taha ia?

Ngaahi ʻEkitivitī ʻe Ala Fakahokó

• Fakaafeʻi e fānaú ke nau tā ha fakatātā ʻo ha ngaahi kongokonga kehekehe ʻo e talanoa ʻo ʻApinetaí, Tuʻi ko Noá, mo ʻAlamā ʻa ia ʻoku maʻu ʻi he Mōsaia 11–13 mo e 17. Te ke lava ʻo fakaʻaongaʻi e “Vahe 14: Ko ʻApinetai mo e Tuʻi ko Noá” ke toe fai e talanoá (Ngaahi Talanoa ʻo e Tohi ʻa Molomoná, 38–42, pe vitiō fakafekauʻakí ʻi he ChurchofJesusChrist.org). Naʻe founga fēfē e tuʻu maʻu ʻa ʻApinetai ʻi he totonú? Ko e hā naʻe ʻikai tuʻu maʻu ai ʻa e Tuʻi ko Noá ʻi he totonú? (vakai, Mōsaia 17:11–12). Tokoniʻi e fānaú ke nau fakakaukau ki ha taimi naʻa nau tuʻu maʻu ai ʻi he totonú.

• Tokoniʻi e fānaú ke nau fakakaukau ki ha ngaahi tūkunga ʻe lava ke nau tuʻu maʻu ai ʻi he totonú, mo fakaafeʻi kinautolu ke nau fakafaivaʻi e ngaahi tūkunga ko ʻení. Hangē ko ʻení, ko e hā te nau fai ʻo ka feinga ha taha ke tohoakiʻi kinautolu ke nau mamata ʻi ha vitiō taʻefeʻunga pe ʻikai fie maʻu ʻe honau ngaahi kaungāmeʻá ke fakakau ha taha ʻi haʻanau vaʻinga?

• Huluʻi e foʻi vitiō “Dare to Stand Alone” (ChurchofJesusChrist.org). Naʻe faitatau fēfē ʻa Palesiteni Tōmasi S. Monsisoni mo ʻApinetaí?

Mōsaia 12:33–36; 13:11–24

ʻOku totonu ke u talangofua ki he Fekau ʻe Hongofulú.

Naʻe akoʻi ʻe ʻApinetai e Tuʻi ko Noá mo ʻene kau taulaʻeikí fekauʻaki mo e Ngaahi Fekau ʻe Hongofulú. ʻOku mahino nai ki he fānau ʻokú ke akoʻí e ʻuhinga ʻoku totonu ke tau ʻofa mo talangofua ai ki he ngaahi fekau ʻa e ʻOtuá?

Ngaahi ʻEkitivitī ʻe Ala Fakahokó

• Vahe ki he tamasiʻi takitaha ke lau ha taha ʻo e ngaahi fekau ʻi he Mōsaia 12:35 mo e 13:11–24. Tokoniʻi e fānaú ke nau poto ʻi hono fakakaukauʻi ha ngaahi founga ke nau fetokoniʻaki ai ke manatuʻi e fekau takitaha (hangē ko ha kupuʻi lea ʻoku fakaʻosi tatau, ko hano fakatātaaʻi, pe ko ha fakalōloa ʻo ha ngaahi mataʻi tohi). ʻE lava foki ke tokoni e foʻi hiva “The Commandments” (Children’s Songbook, 112). Tufa ki he fānaú e ngaahi laʻipepa hātí, pea fakaafeʻi kinautolu ke nau tohi ʻi honau lotó ha taha ʻo e Ngaahi Fekau ʻe Hongofulú pe lahi ange (vakai, Mōsaia 13:11)—ʻe lava ke hoko ia ko ha meʻa ʻoku nau ongoʻi ʻoku totonu ke nau feinga mālohi ange ke talangofua ki ai.

• Hiva fakataha ha hiva fekauʻaki mo e ngaahi fekaú, hangē ko e Tauhi ʻa e Ngaahi Fekaú”Tohi Hiva ʻa e Fānaú,  68). Ko e hā ha ngaahi tāpuaki kuo maʻu mei hono tauhi e ngaahi fekaú?

ʻOku akoʻi kitautolu ʻe he folofolá fekauʻaki mo e ngaahi fekau ʻa e ʻOtuá.

Mōsaia 14:6; 16:4–9

ʻI heʻeku faiangahalá, ʻoku ou ongoʻi hē; ka koeʻuhí ko Sīsū Kalaisi, ʻe lava ke maʻu au.

Naʻe fakaʻaongaʻi ʻe ʻApinetai e ngaahi lea ʻa e palōfita ko ʻĪsaiá, ʻa ia naʻá ne fakafehoanaki kitautolu ki ha sipi hē, ke akoʻi fekauʻaki mo Sīsū Kalaisi. Te ke fakaʻaongaʻi fēfē e fakafehoanaki ko ʻení ke akoʻi e fānaú fekauʻaki mo e Fakamoʻuí?

Ngaahi ʻEkitivitī ʻe Ala Fakahokó

• Fakaafeʻi e fānaú ke nau vahevahe ʻenau ngaahi aʻusia ʻi he taimi ne mole ai haʻanau meʻa, pe ko haʻanau hē. Ne nau ongoʻi fēfē nai? Ko e hā naʻa nau faí? Lau fakataha ʻa e Mōsaia 14:6 mo e 16:4–9. ʻOku founga fēfē ʻetau faʻa “hē” mei he ʻOtuá? ʻOku tokoni fēfē ʻa Sīsū Kalaisi ke tau toe foki maí?

• Fakaafeʻi e fānaú ke nau fakakaukauloto ki ha fanga sipi. Ko e hā ha ngaahi ʻuhinga ʻe lava ke mole ai ha sipi? Hiki ʻenau talí he palakipoé. ʻOku tau tatau fēfē mo ha fanga sipi ʻoku hē? ʻE ongoʻi fēfē nai e Tamai Hēvaní ʻi he taimi ʻoku “maʻu” ai kitautolu ʻo fakafou ʻi he fakatomalá mo e Fakalelei ʻa Sīsū Kalaisí? (vakai, TF 18:10–13). Vahevahe hoʻo fakamoʻoni ki he Fakamoʻuí mo e fakatomalá.

Poupouʻi e Akó ʻi ʻApi

Fakaafeʻi e fānaú ke nau kole ki he kau mēmipa ʻo honau fāmilí ke vahevahe e ngaahi aʻusia ʻa ia ne nau tuʻu maʻu ai ʻi he moʻoní, pe poupouʻi e fānaú ke vahevahe ʻenau ngaahi aʻusiá.

Fakatupulaki ʻo ʻEtau Founga Akoʻí

Ko hono toutou fakahokó ʻa e kī ki he akó. ʻOku lelei ki he fānaú ʻa hono fanongoa ha tefitoʻi moʻoni ʻo e ongoongoleleí pe fai ʻo ha ʻekitivitī ʻo laka hake he tuʻo tahá. Feinga ke toutou fakahoko angé ʻa e ngaahi ʻekitivitií ʻi ha ngaahi founga kehekehe.