8–14 Jun. Alma 8–12: ‘Bae Jisas Kraes I Kam blong Pemaot Ol Pipol blong Hem,’” Kam Folem Mi—Blong Sandei Skul: Buk blong Momon 2020 (2020)

“8–14 Jun. Alma 8–12,” Kam Folem Mi—Blong Wanwan Man, Woman mo Famli: 2020

Pikja

Alma i stap prij

Stap Tijim Tru Doktrin, i kam long Michael T. Malm

8–14 Jun

Alma 8–12

Bae Jisas Kraes I Kam blong Pemaot Ol Pipol blong Hem

Taem yu stadi olgeta skripja, hem i stap invaetem revelesen i kam. So, taem yu stap ridim Alma 8–12, raetemdaon ol tingting mo filing we oli kam long Spirit taem Hem i stap tijim yu aot long ol mesej blong Alma mo Amulek.

Raetemdaon Ol Filing mo Tingting blong Yu

Wok blong God bambae i no save foldaon. Be ol traehad blong yumi blong help wetem wok blong Hem, samtaem, yumi luk se i foldaon—o, yumi no stap luk kwiktaem ol risal we yumi stap hop long hem. Samtaem, yumi save filim lelebet olsem Alma taem hem i bin prijim gospel long Amonaeha—we oli sakemaot yumi, oli spet long yumi, mo oli sakemaot yumi. Be yet, wan enjel i bin talem long hem blong gobak, mo traem bakegen, mo Alma, wetem strong paoa long tingting, “i gobak kwiktaem” (Alma 8:18), mo God i bin mekem rere wan wei long fored blong hem. Hem i bin givim kaekae mo wan ples blong stap long Alma, be tu, Hem i bin mekem Amulek i rere, we i kam blong strong wokman, mo wan man we i strong blong difendem gospel, mo wan fetful fren. Taem yumi fesem ol taem we yumi stop smol mo tingting i harem nogud taem yumi stap wok long kingdom blong Lod, yumi save tingbaot olsem wanem God i bin sapotem mo lidim Alma, mo yumi save trastem se God bambae i sapotem mo lidim yumi tu, iven long ol situesen we oli had.

Pikja

stadi blong yuwan pikja bokis

Sam Aedia blong Skripja Stadi blong Yuwan

Alma 8

Traehad blong mi blong serem gospel bae i nidim blong mi gat fasin blong stap gohed mo fasin blong gat longfala tingting.

I nomata se sam bae oli sakemaot testemoni blong yu abaot gospel, hemia i no minim se yu mas lusum hop—long en, Lod bae i no givap long man o woman ia, mo bambae Hem i lidim yu long wanem wei nao blong mekem samting. Long kes blong Alma, wan enjel i givim komanmen long hem blong gobak long Amonaeha blong prijim gospel iven we ol pipol long ples ia oli mekem strong long hem mo oli bin sakemaot hem (luk long Alma 8:14–16). ?Wanem nao yu lanem aot long eksampol blong Alma blong stap serem gospel nomata ol jalenj mo ol fasin blong agens? ?Wanem ves long Alma 8 i mekem se yu wantem tumas blong serem gospel?

Luk tu long 3 Nifae 18:30–32; Jeffrey R. Holland, “The Cost—and Blessings—of Discipleship,” Ensign o Liahona, May 2014, 6–9.

Alma 9:18–25; 10:16–23

God i jajem ol pikinini blong Hem folem laet mo save we oli gat.

Taem yu stap rid abaot wei we Ol Man blong Nifae long Amonaeha oli bin mekem long ol wokman blong Lod, hem i isi blong fogetem se, long wan taem, oli bin stap laef folem gospel, mo oli bin “wan pipol we Lod i sapotem olgeta bigwan” (Alma 9:20). Wanem we i stap, i we, pat blong mesej blong Alma i go long ol pipol long Amonaeha, i we, from oli bin mekem hat blong olgeta i kam strong tumas i nomata we oli gat fulap gudfala blesing, ples we oli stap long hem i mowas long hemia blong Ol Man blong Leman, we oli bin mekem sin from se oli no bin save. ?Samting ia we i defren bitwin tufala pipol ia, i tijim yumi wanem long wei we God i stap jajem ol pikinini blong Hem?

Taem yu stap rid abaot ol bigfala blesing we God i givim long ol pipol blong Nifae (speseli luk long Alma 9:19–23), tingting hevi long ol bigfala blesing we Hem i bin givim long yu. ?Wanem nao yu stap mekem blong stap tru long ol blesing ia? ?Wanem jenis nao yumi filim blong mekem?

Luk tu long Doktrin mo Ol Kavenan 82:3.

Alma 11–12

Plan blong God i wan plan blong pemaot man.

Ol profet blong Buk blong Momon oli bin yusum ol defren kaen nem blong tokbaot plan we God i gat long ol pikinini blong Hem, olsem plan blong fasin blong sevem man, o plan blong stap glad. Long Alma 11–12, Alma mo Amulek oli tokbaot plan ia, se hem i plan blong pemaot man. Taem yu stap ridim olgeta japta ia, tingting hevi se from wanem, toktok ia, “fasin blong pemaot man,” oli yusum blong tokbaot plan ia. Yu save raetem tu wan sot toktok long wanem Alma mo Amulek i bin tijim abaot ol defren saed blong plan ia.

Foldaon:

Ridima:

Fasin blong Sakem Sin:

Ded:

Laef Bakegen long Ded:

Jajmen:

Luk wanem nao ol toktok blong Amulek i mekem long tingting blong ol pipol (luk long Alma 11:46). ?Yu ting se from wanem nao ol prinsipol ia oli bin gat strong paoa blong lidim man? ?Olsem wanem oli bin lidim yu long laef blong yu?

Luk tu long D. Todd Christofferson, “The Resurrection of Jesus Christ,” Ensign o Liahona, May 2014, 111–14.

Alma 12:8–18

Bae mi no stap mekem hat blong mi i strong tumas, bae mi save kasem moa aot long toktok blong God.

Sam pipol oli save askem olgetawan from wanem Papa long Heven i no talemaot evri samting long yumi. Long Alma 12:9–14, Alma i eksplenem wan long ol risen from wanem God i stap holemtaet ol sikret blong Hem, oli haed long yumi. Olgeta kwestin ia oli save helpem yu blong tingting hevi long wanem hem i bin tijim:

?Long yu, hem i minim wanem blong mekem hat i kam strong? ?Yu yu luksave kaen fasin ia long yuwan?
?From wanem Lod i stap holemtaet toktok blong Hem, i haedem long olgeta we oli mekem hat blong olgeta i kam strong tumas?
?Yu yu gat eksperiens finis long promes ia blong kasem “bigfala pat blong trutok”? (Alma 12:10). ?Eksperiens ia, i olsem wanem?
?Wanem nao yu save mekem blong meksua se toktok o trutok blong God, oli save faenem insaed long yu? (Alma 12:13). Sapos yu bin gat toktok blong God insaed long yu, ?wanem nao bae toktok blong God i mekem long ol “toktok, “wok,” mo “tingting” blong yu? (Alma 12:14).

Blong luk wan eksampol blong ol prinsipol ia, komperem Amulek long ol nara pipol blong Amonaeha. ?Olsem wanem nao eksperiens blong Amulek (speseli luk long Alma 10:1–11) i soemaot wanem we Alma i stap tijim long ol ves ia?

Pikja

famli stadi pikja bokis

Sam Aedia blong Famli Skripja Stadi mo Famli Haos Naet

Taem yu stap ridim ol skripja wetem famli blong yu, Spirit i save helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting:

Alma 8:10–18

?Wanem nao yumi save lanem aot long Alma abaot fasin blong stap obei long Lod “kwiktaem” (ves 18) iven taem we bae i had? Blong sapotem prinsipol ia wetem ol smol pikinini, yu save plei wan gem we yu givim instraksen blong mekem wan wok mo luk sapos ol memba blong famli oli mekem kwiktaem. Eksampol, yu save luk huia i save foldem wan klos kwiktaem.

Alma 10:1–12

?Wanem nao yumi save lanem aot long eksperiens blong Amulek long ol ves ia? ?Wanem risal nao testemoni blong hem i mekem long olgeta we oli bin stap lisin? Invaetem ol memba blong famli blong yu blong mekem wan plan blong mekem wan samting long wik ia folem wanem oli bin lanem aot long eksampol blong Amulek.

Alma 10:22–23

?Wanem nao yumi stap lanem aot long ol ves ia abaot hao wan grup blong ol stret mo gud pipol i save lidim tingting long wan siti we i gat fasin nogud?

Alma 11:34–37

?Wanem nao i defren bitwin fasin blong Jisas Kraes i sevem yumi wetem ol sin blong yumi, mo i sevem yumi long ol sin blong yumi? (luk long Hileman 5:10; luk tu long 1 Jon 1:9–10). Blong soem wanem we Amulek i tijim, yu save serem stori long stat blong mesej blong Elda Allen D. Haynie’s message “Stap Tingbaot Huia Yumi Bin Trastem” (Ensign o https://www.ChurchofJesusChrist.org/general-conference/2015/10/remembering-in-whom-we-have-trusted?lang=bis, Okt 2015). ?Olsem wanem nao Jisas Kraes i sevem yumi long ol sin blong yumi?

Blong gat moa aedia blong stap tijim ol pikinini, luk long aotlaen blong wik ia insaed long Kam Folem Mi—Blong Praemeri.

Stap Kam Antap long Stadi blong Yuwan

Stadi long ol toktok blong ol lata-dei profet mo aposol. Ridim wanem ol lata-dei profet mo aposol oli bin tijim abaot ol trutok we yu faenem insaed long ol skripja. Eksampol, yu save faenem wan topik insaed long Alma 8–12 mo lukluk long topik ia long las jeneral konfrens (luk long Teaching in the Savior’s Way, 21).