« ថ្ងៃទី ៣១ ខែ សីហា–ថ្ងៃទី ៦ ខែ កញ្ញា ។ ហេលេមិន ១៣–១៦ ៖ ‹ ដំណឹងដ៏រីករាយមួយពីសេចក្ដីអំណរយ៉ាងអស្ចារ្យ › » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរមរមន ឆ្នាំ ២០២០ ( ឆ្នាំ ២០២០ )
« ថ្ងៃទី ៣១ ខែ សីហា–ថ្ងៃទី ៦ ខែ កញ្ញា » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២០
សាំយូអែលជាសាសន៍លេមិនកំពុងបង្រៀននៅលើកំផែង ដោយ អាណុល ហ្វ្រ៊ីប៊ើហ្គ
ថ្ងៃទី ៣១ ខែ សីហា–ថ្ងៃទី ៦ ខែ កញ្ញា
ហេលេមិន ១៣–១៦
« ដំណឹងដ៏រីករាយអំពីសេចក្ដីអំណរយ៉ាងអស្ចារ្យ »
នៅពេលបងប្អូនកត់ត្រាចំណាប់អារម្មណ៍របស់បងប្អូននៅសប្ដាហ៍នេះ សូមគិតអំពីរបៀបដែលគោលការណ៍ទាំងឡាយនៅក្នុង ហេលេមិន ១៣–១៦ ជួយស្ថាបនា និងផ្ដល់ការគាំទ្ររឿងដទៃទៀតដែលបងប្អូនបានរៀននៅក្នុងបទគម្ពីរទាំងឡាយ ។
កត់ត្រាចំណាប់អារម្មណ៍របស់បងប្អូន
នៅគ្រាដំបូងដែលសាំយូអែលជាសាសន៍លេមិនបានព្យាយាមចែកចាយ « ដំណឹងដ៏រីករាយ » នៅទីក្រុងសារ៉ាហិមឡា ( ហេលេមិន ១៣:៧ ) លោកត្រូវបានពួកសាសន៍នីហ្វៃដែលមានចិត្តរឹងរូសបដិសេធ ហើយបណ្ដេញចេញ ។ បងប្អូនក៏អាចនិយាយបានថាវាដូចជាពួកគេសង់ជញ្ជាំងដ៏ក្រាស់មួយហ៊ុំព័ទ្ធដួងចិត្តរបស់ពួកគេ ដែលរារាំងពួកគេមិនឲ្យទទួលយកសារលិខិតរបស់សាំយូអែល ។ សាំយូអែលយល់អំពីសារៈសំខាន់នៃសារលិខិតដែលលោកបានថ្លែង ហើយបានបង្ហាញសេចក្ដីជំនឿដោយការធ្វើតាមបទបញ្ញត្តិរបស់ព្រះ « ថាលោកត្រូវត្រឡប់ទៅវិញ ហើយព្យាករ » ( ហេលេមិន ១៣:៣ ) ។ ដូចជាសាំយូអែលបានធ្វើដែរ យើងទាំងអស់គ្នាប្រទះនឹងជញ្ជាំង នៅពេលយើង « រៀបចំផ្លូវថ្វាយព្រះអម្ចាស់ » ( ហេលេមិន ១៤:៩ ) ហើយព្យាយាមធ្វើតាមពួកព្យាការីរបស់ទ្រង់ ។ ហើយយើងក៏ថ្លែងទីបន្ទាល់អំពីព្រះយេស៊ូវគ្រីស្ទ ដូចជាសាំយូអែលផងដែរថា « វាពិតជានឹងកើតឡើង » ហើយអញ្ជើញមនុស្សទាំងអស់ឲ្យ « ជឿដល់ព្រះនាមទ្រង់ » ( ហេលេមិន ១៣:៦; ១៤:១៣ ) ។ ពុំមែនមនុស្សគ្រប់រូបនឹងស្ដាប់នោះទេ ហើយមនុស្សមួយចំនួនអាចនឹងជំទាស់នឹងយើងដោយខ្លាំងក្លាផងដែរ ។ ប៉ុន្តែអស់អ្នកដែលជឿទៅលើសារលិខិតនេះដោយមានជំនឿទៅលើព្រះគ្រីស្ទ បានរកឃើញថា វាពិតជា « ដំណឹងដ៏រីករាយអំពីសេចក្ដីអំណរយ៉ាងអស្ចារ្យ » ( ហេលេមិន ១៦:១៤ ) ។
គំនិតយោបល់សម្រាប់ការសិក្សាព្រះគម្ពីរផ្ទាល់ខ្លួន
ព្រះអម្ចាស់ប្រទានការព្រមានតាមរយៈពួកព្យាការីរបស់ទ្រង់ ។
នៅក្នុងបទគម្ពីរ ពួកព្យាការីពេលខ្លះត្រូវបានប្រៀបធៀបដូចជាអ្នកចាំយាមនៅលើកំផែង ឬប៉ម ដែលព្រមានអំពីគ្រោះថ្នាក់ ( សូមមើល អេសាយ ៦២:៦; អេសេគាល ៣៣:១–៧ ) ។
ប្រធាន អិម. រ័សុល បាឡឺដ បានបង្រៀនថា ៖ « អស់ជាច្រើនសតវត្សរ៍ ព្យាការីបានបំពេញកាតព្វកិច្ចរបស់ពួកលោក ពេលពួកលោកព្រមានមនុស្សពីគ្រោះថ្នាក់ទាំងឡាយមុនវាកើតឡើង ។ ពួកសាវករបស់ព្រះអម្ចាស់ មានកាតព្វកិច្ចដើម្បីមើលថែ ព្រមាន និងឈោងជួយដល់អស់អ្នកដែលកំពុងស្វែងរកចម្លើយចំពោះសំណួរជីវិត » ( « God Is at the Helm » Ensign ឬ លីអាហូណា ខែ វិច្ឆិកា ឆ្នាំ ២០១៥ ទំព័រ ២៥ ) ។
នៅពេលបងប្អូនសិក្សា ហើយពិចារណាអំពី ហេលេមិន ១៣ នោះបងប្អូនអាចគូសចំណាំការព្រមានជាច្រើនដែលសាំយូអែលបានផ្ដល់ឲ្យ ។ ឧទាហរណ៍ តើលោកបានបង្រៀនអ្វីខ្លះអំពីការប្រែចិត្ត ? អំពីភាពរាបសារ និងទ្រព្យសម្បត្តិ ? តើការព្រមានទាំងនេះអាចអនុវត្តចំពោះបងប្អូនយ៉ាងដូចម្ដេច ? តើការព្រមានដែលពួកព្យាការីបច្ចុប្បន្នបានប្រទានឲ្យថ្មីៗនេះមានអ្វីខ្លះ ហើយតើបងប្អូនមានអារម្មណ៍ថា បងប្អូនគួរធ្វើអ្វីខ្លះអំពីការព្រមានទាំងនេះ ?
ព្យាការីនាំយើងទៅរកព្រះយេស៊ូវគ្រីស្ទ ។
ព្រះអម្ចាស់គឺមានសេចក្ដីមេត្តាករុណាដល់អ្នកទាំងឡាយណាដែលប្រែចិត្ត ។
ពីដើមឡើយ សាំយូអែល ត្រូវបានបញ្ជូនឲ្យទៅកាន់សាសន៍នីហ្វៃដើម្បីចែកចាយដំណឹងប្រកបដោយអំណរអំពីការយាងមករបស់ព្រះអង្គសង្គ្រោះ ( សូមមើល ហេលេមិន ១៣:៧ ) ។ ដោយសារតែពួកគេបានបដិសេធលោក នោះលោកបានត្រឡប់ទៅព្រមានយ៉ាងខ្លាំងអំពីការជំនុំជម្រះរបស់ព្រះ ។ ប៉ុន្តែការព្រមានទាំងនេះ ក៏មានដាក់បញ្ចូលនូវការអញ្ជើញឲ្យប្រែចិត្តប្រកបដោយក្ដីមេត្តាករុណាជានិច្ចផងដែរ សូមរកមើលការអញ្ជើញទាំងនោះនៅក្នុង ហេលេមិន ១៣–១៥ ( សូមមើលជាពិសេស ហេលេមិន ១៣:៦, ១១; ១៤:១៥–១៩; ១៥:៧–៨) ។ តើការអញ្ជើញទាំងនេះអនុវត្តចំពោះបងប្អូនយ៉ាងដូចម្ដេច ? តើបងប្អូនរៀនអ្វីខ្លះចេញមកពីខគម្ពីរទាំងនេះអំពីការប្រែចិត្ត ? តើនៅពេលណាដែលបងប្អូនមានបទពិសោធន៍អំពីសេចក្ដីមេត្តាករុណារបស់ព្រះកើតមានមកពីការប្រែចិត្ត ?
ទីសម្គាល់ និងសញ្ញាទាំងឡាយ អាចពង្រឹងដល់សេចក្ដីជំនឿនៃអស់អ្នកដែលពុំធ្វើចិត្តពួកគេរឹងរូស ។
នៅក្នុង ហេលេមិន ១៤ សាំយូអែល បានពន្យល់អំពីមូលហេតុដែលព្រះអម្ចាស់បានផ្ដល់ទីសម្គាល់អំពីការប្រសូត និងការសុគតរបស់ព្រះអង្គសង្គ្រោះ ៖ « ក្នុងគោលបំណងដើម្បីឲ្យអ្នករាល់គ្នាអាចជឿដល់ព្រះនាមទ្រង់ » ( ហេលេមិន ១៤:១២ ) ។ នៅពេលបងប្អូនសិក្សា ហេលេមិន ១៤ សូមកត់ចំណាំទីសម្គាល់អំពីការប្រសូតរបស់ព្រះអង្គសង្គ្រោះនៅក្នុង ខទី ១–៨ និងទីសម្គាល់អំពីការសុគតរបស់ទ្រង់នៅក្នុង ខទី ២០–២៨ ។ ហេតុអ្វីក៏បងប្អូនគិតថា ទីសម្គាល់ទាំងនេះនឹងជារបៀបដ៏មានប្រសិទ្ធភាពដើម្បីបង្ហាញពីការប្រសូត និងការសុគតរបស់ព្រះយេស៊ូវគ្រីស្ទដូច្នេះ ?
តើបងប្អូនគិតថាមានទីសម្គាល់អ្វីផ្សេងទៀត ដែលព្រះអម្ចាស់បានប្រទានឲ្យដើម្បីជួយបងប្អូនជឿទៅលើទ្រង់ឬទេ ? ឧទាហរណ៍ ពួកព្យាការីបានព្យាករអំពីទីសម្គាល់ដែលនឹងកើតមានពីមុនការយាងមកជាលើកទីពីររបស់ព្រះអង្គសង្គ្រោះ ( សូមមើល « ទីសម្គាល់អំពីពេលវេលា » ក្នុងសេចក្ដីណែនាំដល់បទគម្ពីរទាំងឡាយ, scriptures.ChurchofJesusChrist.org ) ។ តើទីសម្គាល់ទាំងនេះត្រូវបានបំពេញនៅក្នុងសម័យរបស់យើងឬទេ ? ទីសម្គាល់ដទៃទៀតដែលដឹកនាំឲ្យមានជំនឿទៅលើព្រះយេស៊ូវគ្រីស្ទ អាចនឹងមានលក្ខណៈផ្ទាល់ខ្លួន ហើយមិនសូវរំភើបខ្លាំង ។ សូមចំណាយពេលមួយសន្ទុះដើម្បីពិចារណាអំពីរបៀបដែលបងប្អូនមានសាក្សីអំពីព្រះហស្តរបស់ទ្រង់នៅក្នុងជីវិតរបស់បងប្អូន ។
តើមានការព្រមានឲ្យប្រុងប្រយ័ត្នអ្វីខ្លះអំពីទីសម្គាល់នៅក្នុង ហេលេមិន ១៦:១៣–២៣ ? តើបងប្អូនអាចចៀសវាងពីអាកប្បកិរិយារបស់មនុស្សដែលបានពិពណ៌នានៅក្នុងខគម្ពីរទាំងនេះដោយរបៀបណា ?
សូមមើលផងដែរ អាលម៉ា ៣០:៤៣–៥២, រ៉ូណលអេ រ៉ាសបាន « By Divine Design » Ensign ឬ លីអាហូណា ខែ វិច្ឆិកា ឆ្នាំ ២០១៧ ទំព័រ ៥៥–៥៧ ។
ការធ្វើតាមពាក្យទូន្មានរបស់ព្យាការីនាំឲ្យខ្ញុំខិតទៅកាន់តែជិតព្រះអម្ចាស់ ។
អែលឌើរ នែល អិល អាន់ឌើរសិន បានបង្រៀនថា ៖ « នៅក្នុងជីវិតខ្ញុំផ្ទាល់ ខ្ញុំបានឃើញថា នៅពេលខ្ញុំសិក្សាប្រសាសន៍របស់ព្យាការីនៃព្រះប្រកបដោយការអធិស្ឋាន និងដោយយកចិត្តទុកដាក់ ដោយតម្រង់ឆន្ទៈខាងវិញ្ញាណរបស់ខ្ញុំទៅនឹងការបង្រៀនដ៏បំផុសគំនិតរបស់លោកដោយអត់ធ្មត់ នោះសេចក្ដីជំនឿរបស់ខ្ញុំលើព្រះអម្ចាស់យេស៊ូវគ្រីស្ទកើនឡើងជានិច្ច ។ បើយើងជ្រើសរើសដើម្បីដាក់ដំបូន្មានរបស់ពួកលោកនៅមួយអន្លើរ ហើយកំណត់ថាខ្លួនយើងដឹងល្អប្រសើរជាង នោះជំនឿរបស់យើង និងទស្សនវិស័យដ៏អស់កល្បជានិច្ចរបស់យើង គឺត្រូវបានគ្របបាំងហើយ » ( « The Prophet of God » Ensign ឬ លីអាហូណា ខែ ឧសភា ឆ្នាំ ២០១៨ ទំព័រ ២៦–២៧ ) ។ តើពាក្យសម្ដី និងសកម្មភាពរបស់ពួកសាសន៍នីហ្វៃនៅក្នុង ហេលេមិន ១៦ បញ្ជាក់អំពីអ្វីដែលអែលឌើរ អាន់ឌើរសិនបង្រៀនយ៉ាងដូចម្ដេច ? តើបងប្អូនមានអារម្មណ៍ថាបងប្អូននឹងត្រូវធ្វើការតាំងចិត្តផ្ទាល់ខ្លួនអ្វីខ្លះ ទាក់ទងនឹងពួកព្យាការីរបស់ព្រះអម្ចាស់ និងសារលិខិតរបស់ពួកលោក ?
គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្រុមគ្រួសារ
នៅពេលបងប្អូនអានគម្ពីរជាមួយនឹងគ្រួសាររបស់បងប្អូន នោះព្រះវិញ្ញាណអាចជួយបងប្អូនឲ្យស្គាល់ថាគោលការណ៍អ្វីដែលត្រូវគូសបញ្ជាក់ និងពិភាក្សាដើម្បីបំពេញតាមតម្រូវការរបស់គ្រួសារបងប្អូន ។ ទាំងនេះគឺជាគំនិតយោបល់មួយចំនួន ។
ហេលេមិន ១៣:៣–៤
តើមានអ្វីខ្លះដែលបំផុសគំនិតគ្រួសាររបស់បងប្អូនអំពីការឆ្លើយតបរបស់សាំយូអែលចំពោះការត្រាស់បង្គាប់របស់ព្រះអម្ចាស់នៅក្នុង ហេលេមិន ១៣:៣–៤ ? អំឡុងការសិក្សាជាគ្រួសាររបស់បងប្អូននាសប្ដាហ៍នេះ បងប្អូនអាចនឹងលើកទឹកចិត្តគ្រួសារឲ្យចែកចាយចំណាប់អារម្មណ៍ដែល « កើតមាននៅក្នុងដួងចិត្ត [ របស់ពួកគាត់ ] » ។
ហេលេមិន ១៣:៣៨
គំនិតយោបល់ដែលថាសុភមង្គលអាចរកបាន « ដោយធ្វើអំពើទុច្ចរិត » គឺជារឿងធម្មតានៅក្នុងសម័យបច្ចុប្បន្ន ។ តើការរស់នៅតាមដំណឹងល្អនាំឲ្យយើងរកបានសុភមង្គលពិតតាមរបៀបណា ?
ហេលេមិន ១៥:៣
តើការកែតម្រូវរបស់ព្រះ បង្ហាញពីសេចក្ដីស្រឡាញ់របស់ទ្រង់ចំពោះយើងយ៉ាងដូចម្ដេច ? សូមអញ្ជើញសមាជិកគ្រួសារឲ្យទូលសូមដោយរាបសារសួរព្រះអម្ចាស់អំពីអ្វីដែលពួកគេអាចធ្វើដើម្បីកែលម្អ ។
ហេលេមិន ១៥:៥–៨
តើយើងរៀនអ្វីខ្លះអំពីការផ្លាស់ប្រែចិត្តជឿមកពីពួកសាសន៍លេមិន ដែលបានពិពណ៌នានៅក្នុងខគម្ពីរទាំងនេះ ? តើយើងអាចធ្វើតាមគំរូរបស់ពួកគាត់ដោយរបៀបណា?
ហេលេមិន ១៦:១–៣
តើគ្រួសាររបស់បងប្អូនចូលចិត្តសម្ដែងរឿងសាំយូអែលជាសាសន៍លេមិនឬទេ ? បន្ទាប់ពីអានដំណើររឿងនោះ សមាជិកគ្រួសារអាចនឹងផ្លាស់វេណគ្នាឈរនៅលើកៅអីមួយ ហើយអានអំពីការព្យាករណ៍របស់សាំយូអែលមួយចំនួន ខណៈដែលសមាជិកគ្រួសារដទៃទៀតធ្វើពុតជាបាញ់ព្រួញ ឬចោលដុំថ្មទៅលើសាំយូអែល ។ រឿងនេះអាចនឹងជួយគ្រួសាររបស់បងប្អូនយល់ថាសាំយូអែល និងពួកសាសន៍នីហ្វៃមានអារម្មណ៍យ៉ាងណា ។ កូនៗរបស់បងប្អូនក៏អាចចូលចិត្តក្នុងការគូររូបអំពីរឿងនោះផងដែរ ។ តើយើងអាចធ្វើដូចជាសាំយូអែល ហើយចែកចាយដំណឹងល្អជាមួយអ្នកដទៃ ទោះជាយើងភ័យខ្លាចក្ដីតាមរបៀបណា ?
សម្រាប់គំនិតបន្ថែមសម្រាប់ការបង្រៀនដល់កុមារ សូមមើល គម្រោងមេរៀនសប្ដាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់ថ្នាក់បឋមសិក្សា ។
ការកែលម្អដល់ការសិក្សាផ្ទាល់ខ្លួន
សូមរកមើលលំនាំ ។ លំនាំ គឺជាផែនការ ឬគំរូមួយ ដែលអាចប្រើជាការណែនាំសម្រាប់សម្រេចការងារមួយ ។ នៅក្នុងបទគម្ពីរទាំងឡាយ យើងរកឃើញលំនាំដែលបង្ហាញអំពីរបៀបដែលព្រះអម្ចាស់សម្រេចកិច្ចការរបស់ទ្រង់ ដូចជាការបញ្ជូនពួកអ្នកបម្រើរបស់ទ្រង់ឲ្យទៅព្រមានប្រជាជន ។
© The Book of Mormon for Young Readers, សាំយូអែលជាសាសន៍លេមិន ដោយប្រ៊ីអាណា សូក្រូហ្វ