« ថ្ងៃទី ២១–២៧ ខែ កញ្ញា ។ នីហ្វៃទី ៣ ១២–១៦ ៖ ‹ យើងជាក្រឹត្យវិន័យ ហើយជាពន្លឺ › » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរមរមន ឆ្នាំ ២០២០ ( ឆ្នាំ ២០២០ )
« ថ្ងៃទី ២១–២៧ ខែ កញ្ញា ។ នីហ្វៃទី ៣ ១២–១៦ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២០
នីហ្វៃទីបី ៖ សាវកទាំងដប់ពីរនាក់នេះដែលយើងបានជ្រើសរើស ដោយ ហ្គែរី អិល ខាប
ថ្ងៃទី ២១–២៧ ខែ កញ្ញា
នីហ្វៃទី ៣ ១២–១៦
« យើងជាក្រឹត្យវិន័យ ហើយជាពន្លឺ »
មានគោលការណ៍ជាច្រើនដើម្បីស្វែងរកនៅក្នុង នីហ្វៃទី ៣ ១២–១៦ ។ មានគោលការណ៍មួយចំនួនបានលើកឡើងនៅក្នុងគម្រោងមេរៀននេះ ប៉ុន្តែបងប្អូនអាចរកឃើញគោលការណ៍ផ្សេងៗទៀត ។ សូមឲ្យព្រះវរបិតាសួគ៌ តាមរយៈព្រះវិញ្ញាណរបស់ទ្រង់ បង្រៀនដល់បងប្អូនអំពីអ្វីដែលបងប្អូនត្រូវការក្នុងពេលឥឡូវនេះ ។
កត់ត្រាចំណាប់អារម្មណ៍របស់បងប្អូន
ដូចជាពួកសិស្សរបស់ព្រះយេស៊ូវ ដែលបានប្រមូលផ្ដុំនៅលើភ្នំក្នុងស្រុកកាលីឡេដែរ ប្រជាជនដែលបានប្រមូលផ្ដុំនៅព្រះវិហារបរិសុទ្ធនៅបោនទីហ្វុល បានរស់នៅក្រោមច្បាប់របស់ម៉ូសេ ។ ពួកគេបានធ្វើតាមវា ដោយសារតែវាចង្អុលបង្ហាញដល់ព្រលឹងរបស់ពួកគេឲ្យទៅរកព្រះគ្រីស្ទ ( សូមមើល យ៉ាកុប ៤:៥ ) ហើយឥឡូវព្រះគ្រីស្ទបានគង់នៅពីមុខពួកគេ ប្រកាសអំពីក្រឹត្យវិន័យខ្ពស់ជាង ។ ប៉ុន្តែទោះបីជាពួកយើងពុំធ្លាប់បានរស់នៅតាមក្រឹត្យវិន័យរបស់ម៉ូសេក្ដី ក៏យើងអាចស្គាល់ថា បទដ្ឋានដែលព្រះយេស៊ូវបានដាក់ឡើងសម្រាប់ពួកសិស្សរបស់ទ្រង់គឺជាក្រឹត្យវិន័យកាន់តែខ្ពស់ជាង ។ ទ្រង់បានប្រកាសថា « យើងចង់ឲ្យអ្នករាល់គ្នាបានល្អឥតខ្ចោះ » ( នីហ្វៃទី ៣ ១២:៤៨ ) ។ បើរឿងនេះធ្វើឲ្យបងប្អូនមានអារម្មណ៍ពុំល្អគ្រប់គ្រាន់ សូមចាំថា ព្រះយេស៊ូវក៏បានមានបន្ទូលថា « មានពរហើយអស់អ្នកដែលមានសេចក្ដីកម្សត់ខាងឯវិញ្ញាណ ដែលបានមករកយើង ដ្បិតនគរស្ថានសួគ៌ជារបស់ផងអ្នកទាំងនោះ » ( នីហ្វៃទី ៣ ១២:៣ ) ។ ក្រឹត្យវិន័យនេះគឺជាការអញ្ជើញ— ជារបៀបនិយាយម្យ៉ាងទៀតថា « ចូរមករកយើងចុះ ហើយអ្នករាល់គ្នានឹងបានសង្គ្រោះ » ( នីហ្វៃទី ៣ ១២:២០ ) ។ ដូចជាក្រឹត្យវិន័យរបស់ម៉ូសេ ក្រឹត្យវិន័យនេះនាំយើងទៅរកព្រះគ្រីស្ទ—ជាអង្គតែមួយគត់ដែលអាចសង្គ្រោះ ហើយធ្វើឲ្យយើងបានល្អឥតខ្ចោះ ។ ទ្រង់មានបន្ទូលថា « មើលចុះ យើងជាក្រឹត្យវិន័យ ហើយជាពន្លឺ ។ ចូរផ្ចង់មកយើង ហើយកាន់ខ្ជាប់ដរាបដល់ចុងបំផុត ទើបអ្នករាល់គ្នានឹងរស់ » ( នីហ្វៃទី ៣ ១៥:៩ ) ។
គំនិតយោបល់សម្រាប់ការសិក្សាព្រះគម្ពីរផ្ទាល់ខ្លួន
ការបង្រៀនរបស់ព្រះអង្គសង្គ្រោះបង្ហាញខ្ញុំអំពីរបៀបដើម្បីធ្វើជាសិស្សពិតម្នាក់ ។
មានសេចក្ដីពិតជាច្រើន ពាក្យទូន្មានជាច្រើន និងការព្រមានជាច្រើននៅក្នុង នីហ្វៃទី ៣ ១២–១៤ ។ នេះជារបៀបមួយដើម្បីសិក្សា ហើយអនុវត្តអ្វីដែលព្រះអង្គសង្គ្រោះបានបង្រៀននៅក្នុងជំពូកទាំងនេះ ៖ សូមរើសខគម្ពីរមួយក្រុម ហើយមើលបើសិនជាបងប្អូនអាចសង្ខេបថាតើខគម្ពីរទាំងនេះណាខ្លះ ដែលបង្រៀន នៅក្នុងមួយប្រយោគ ដោយចាប់ផ្ដើមជាមួយនឹងពាក្យថា « សិស្សស្មោះត្រង់របស់ព្រះយេស៊ូវគ្រីស្ទ … » ឧទាហរណ៍ ការសង្ខេបនៃ នីហ្វៃទី ៣ ១៤:១–៥ អាចនឹងថា « សិស្សស្មោះត្រង់របស់ព្រះយេស៊ូវគ្រីស្ទ មិនធ្វើការវិនិច្ឆ័យអ្នកដទៃ » ។ បងប្អូនអាចនឹងចង់ជ្រើសរើសខគម្ពីរមួយមកពីជំពូកទាំងនេះដែលមានអត្ថន័យជាពិសេសចំពោះបងប្អូន ហើយទន្ទេញវា ឬចម្លងវាទុក ហើយដាក់វានៅកន្លែងដែលបងប្អូនអាចមើលឃើញជាញឹកញាប់ ។ សូមពិចារណាអំពីរបៀបដែលបងប្អូនអាចអនុវត្តអ្វីដែលបងប្អូនបានរៀនមកក្នុងការខិតខំផ្ទាល់ខ្លួនរបស់បងប្អូន ដើម្បីធ្វើជាសិស្សរបស់ព្រះយេស៊ូវគ្រីស្ទកាន់តែល្អប្រសើរ ។
សូមមើលផងដែរ ម៉ាថាយ ៥–៧; លូកា ៦:២០–៤៩ ។
នីហ្វៃទី ៣ ១២:១–២; ១៥:២៣–២៤; ១៦:១–៦
មានពរហើយដល់អស់អ្នកដែលជឿដោយពុំបាច់មើលឃើញ ។
បើប្រៀបធៀបទៅនឹងចំនួនកូនចៅរបស់ព្រះទាំងអស់ នោះមានមនុស្សមួយចំនួនតូចណាស់ ដែលបានមើលឃើញព្រះអង្គសង្គ្រោះ ហើយបានស្ដាប់ឭព្រះសូរសៀងរបស់ទ្រង់ ដូចជាប្រជាជននៅបោនទីហ្វុលបានធ្វើ ។ ពួកយើងភាគច្រើនស្រដៀងគ្នាខ្លាំងទៅនឹងប្រជាជនដែលបានពិពណ៌នានៅក្នុង នីហ្វៃទី ៣ ១២:២; ១៥:២៣ និង ១៦:៤–៦ ។ តើមានការសន្យាអ្វីខ្លះចំពោះប្រជាជនដែលនៅក្នុងខគម្ពីរទាំងនេះ ? តើការសន្យាទាំងនេះត្រូវបានបំពេញនៅក្នុងជីវិតរបស់បងប្អូនដោយរបៀបណា ?
សូមមើលផងដែរ យ៉ូហាន ២០:២៦–២៩; នីហ្វៃទី ២ ២៦:១២–១៣; អាលម៉ា ៣២:១៦–១៨ ។
នីហ្វៃទី ៣ ១២:២១–៣០; ១៣:១–៨, ១៦–១៨; ១៤:២១–២៣
ទង្វើសុចរិតពុំគ្រប់គ្រាន់ទេ ដួងចិត្តរបស់ខ្ញុំត្រូវតែបរិសុទ្ធផងដែរ ។
បាវចនាដែលបងប្អូនអាចកត់សម្គាល់នៅក្នុងជំពូកទាំងនេះគឺ ការអញ្ជើញរបស់ព្រះអង្គសង្គ្រោះឲ្យរស់នៅតាមក្រឹត្យវិន័យដែលកាន់តែខ្ពស់— ដើម្បីសុចរិត ពុំគ្រាន់តែសកម្មភាពខាងក្រៅរបស់យើងប៉ុណ្ណោះទេ ប៉ុន្តែនៅក្នុងដួងចិត្តរបស់យើងផងដែរ ។ សូមរកមើលបាវចនានេះនៅពេលព្រះអង្គសង្គ្រោះមានបន្ទូលអំពីការទាស់ទែងគ្នា ( នីហ្វៃទី ៣ ១២:២១–២៦) អសីលធម៌ ( នីហ្វៃទី ៣ ១២:២៧–៣០ ) ការអធិស្ឋាន ( នីហ្វៃទី ៣ ១៣:៥–៨ ) និងការតមអាហារ ( នីហ្វៃទី ៣ ១៣:១៦–១៨ ) ។ តើបងប្អូនអាចរកឃើញគំរូផ្សេងទៀតអ្វីខ្លះ ? តើបងប្អូនអាចធ្វើអ្វីខ្លះដើម្បីធ្វើឲ្យបំណងប្រាថ្នាក្នុងដួងចិត្តរបស់បងប្អូនបានបរិសុទ្ធ ជាជាងផ្ដោតទៅលើសកម្មភាពខាងក្រៅតែមួយម្យ៉ាង ?
បើសិនជាខ្ញុំស្វែងរក « អ្វីល្អៗ » មកពីព្រះវរបិតាសួគ៌ ខ្ញុំនឹងបានទទួល ។
ប្រធាន រ័សុល អិម ណិលសុន បានមានប្រសាសន៍ថា « តើព្រះពិតជា សព្វព្រះទ័យចង់ មានបន្ទូលមកកាន់បងប្អូនឬ ? ពិតណាស់ !… អូ៎ មានអ្វីជាច្រើនណាស់ ដែលព្រះវរបិតាសួគ៌របស់បងប្អូនចង់ឲ្យបងប្អូនដឹង » ( « Revelation for the Church, Revelation for Our Lives » Ensign ឬ លីអាហូណា ខែ ឧសភា ឆ្នាំ ២០១៨ ទំព័រ ៩៥ ) ។ នៅពេលដែលបងប្អូនអានការអញ្ជើញរបស់ព្រះអម្ចាស់នៅក្នុង នីហ្វៃទី ៣ ១៤:៧–១១ ដើម្បីសួរ ស្វែងរក និងគោះ សូមពិចារណាអំពី « អ្វីល្អៗ » ដែលទ្រង់ចង់ឲ្យបងប្អូនទូលសូម ។ បទគម្ពីរបន្ថែមដូចខាងក្រោមនេះ អាចជួយបងប្អូនយល់អំពីរបៀបសួរ ស្វែងរក និងគោះ ។ បទគម្ពីរទាំងនេះក៏អាចជួយពន្យល់អំពីមូលហេតុដែលការអធិស្ឋានមួយចំនួនពុំទទួលបានចម្លើយតាមរបៀបដែលបងប្អូនរំពឹងទុកផងដែរ ៖ អេសាយ ៥៥:៨–៩; ហេលេមិន ១០:៥; មរ៉ូណៃ ៧:២៦–២៧, ៣៣, ៣៧ និង គោលលទ្ធិ និងសេចក្ដីសញ្ញា ៩:៧–៩ ។
គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្រុមគ្រួសារ
នៅពេលបងប្អូនអានគម្ពីរជាមួយនឹងគ្រួសាររបស់បងប្អូន នោះព្រះវិញ្ញាណអាចជួយបងប្អូនឲ្យស្គាល់ថាគោលការណ៍អ្វីដែលត្រូវគូសបញ្ជាក់ និងពិភាក្សាដើម្បីបំពេញតាមតម្រូវការរបស់គ្រួសារបងប្អូន ។ ទាំងនេះគឺជាគំនិតយោបល់មួយចំនួន ។
នីហ្វៃទី៣ ១២:៤៨
តើសារលិខិតរបស់អែលឌើរ ជែហ្វ្រី អ័រ ហូឡិន « ចូរឲ្យអ្នករាល់គ្នាបានគ្រប់លក្ខណ៍—នៅទីបញ្ចប់ » ( Ensign ឬ លីអាហូណា ខែ វិច្ឆិកា ឆ្នាំ ២០១៧ ទំព័រ ៤០–៤២ ) ជួយយើងឲ្យយល់អំពីព្រះបន្ទូលរបស់ព្រះអង្គសង្គ្រោះនៅក្នុងខគម្ពីរនេះដោយរបៀបណា ? បងប្អូនក៏អាចស្វែងរកជំនួយនៅក្នុង មរ៉ូណៃ ១០:៣២–៣៣ ។
នីហ្វៃទី ៣ ១២:៩, ៣៨–៤២; ១៤:៣–៥, ១២
តើខគម្ពីរទាំងនេះអនុវត្តនៅក្នុងការប្រាស្រ័យទាក់ទងក្នុងសមាជិកគ្រួសារយ៉ាងដូចម្ដេច ? ប្រហែលជាគ្រួសាររបស់បងប្អូនអាចដាក់គោលដៅមួយចំនួនជាមួយគ្នាដើម្បីរស់នៅតាមគោលការណ៍ទាំងនេះឲ្យកាន់តែស្មោះត្រង់ ។
នីហ្វៃទី៣ ១៣:១៩–២១
ខគម្ពីរទាំងនេះអាចបំផុសឲ្យមានការពិភាក្សាមួយអំពីអ្វីដែលជារតនៈសម្បត្តិគ្រួសាររបស់បងប្អូន ។ តើរតនៈសម្បត្តិមួយចំនួននៅលើផែនដីដែលកំពុងរារាំងបងប្អូនមិនឲ្យរក្សាទុករតនៈសម្បត្តិនៅលើស្ថានសួគ៌មានអ្វីខ្លះ ? បងប្អូនអាចពង្រឹងចំនុចនេះដោយការដឹកនាំគ្រួសារស្វែងរករតនៈសម្បត្តិ រកមើលអ្វីៗនៅក្នុងគេហដ្ឋានរបស់បងប្អូន ដែលរំឭកដល់សមាជិកគ្រួសាររបស់បងប្អូនអំពីរតនៈសម្បត្តិដែលមានតម្លៃអស់កល្បជានិច្ច ។
នីហ្វៃទី៣ ១៤:៧–១១
កូនតូចៗក៏អាចរីករាយនឹងការលេងល្បែងកម្សាន្ដមួយ ដែលបំផុតគំនិត តាមរយៈ នីហ្វៃទី ៣ ១៤:៨–៩ ដែលពួកគេអាចសុំអ្វីមួយ ហើយទទួលបានអ្វីមួយផ្សេងទៅវិញ ។ តើព្រះអង្គសង្គ្រោះសព្វព្រះទ័យចង់ឲ្យយើងដឹងអំពីព្រះវរបិតាសួគ៌របស់យើងអ្វីខ្លះ នៅពេលទ្រង់ចែកចាយអំពីឧទាហរណ៍នេះ ?
នីហ្វៃទី ៣ ១៤:១៥–២០
តើ « ផលល្អ » អ្វី ដែលជួយយើងឲ្យដឹងថា យ៉ូសែប ស៊្មីធ ឬប្រធានសាសនាចក្របច្ចុប្បន្ន គឺជាព្យាការីពិត ?
នីហ្វៃទី ៣ ១៤:២៤–២៧
ចូរគិតអំពីវិធីជាច្រើនដែលបងប្អូនអាចជួយគ្រួសារបងប្អូនមើលឃើញរឿងប្រៀបធៀបនៅក្នុងខគម្ពីរទាំងនេះ ។ ប្រហែលជាសមាជិកគ្រួសារអាចគូររូបភាព បញ្ចេញសកម្មភាព ឬសង់អ្វីមួយនៅលើគ្រឹះថ្ម ហើយនឹងនៅលើគ្រឹះដីខ្សាច់ ។
សម្រាប់គំនិតបន្ថែមសម្រាប់ការបង្រៀនដល់កុមារ សូមមើល គម្រោងមេរៀនសប្ដាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់ថ្នាក់បឋមសិក្សា ។
ការកែលម្អការបង្រៀនរបស់យើង
សូមបង្រៀនមេរៀនដោយប្រើវត្ថុ ។ ព្រះអង្គសង្គ្រោះបានបង្រៀនអំពីសេចក្ដីពិតដ៏អស្ចារ្យដោយការយោងទៅលើវត្ថុស្រដៀងគ្នានេះ ។ បងប្អូនអាចធ្វើស្រដៀងគ្នានេះ នៅពេលគ្រួសាររបស់បងប្អូនអាន នីហ្វៃទី ៣ ១២–១៦ ។ ឧទាហរណ៍ នៅពេលបងប្អូនអាន ជំពូក ១២ បងប្អូនអាចបង្ហាញអំបិល ទៀន និងអាវរងារ ។ រឿងនេះក៏អាចនាំឲ្យមានការធ្វើសកម្មភាពដ៏ល្អមួយផងដែរ ។ បន្ទាប់ពីបងប្អូនអានជំពូកទាំងនេះរួចហើយ សូមដាក់បង្ហាញវត្ថុទាំងនេះម្ដងទៀត ហើយសួរដល់សមាជិកគ្រួសារថាតើព្រះអង្គសង្គ្រោះបានបង្រៀនអ្វីខ្លះអំពីរបស់នីមួយៗទាំងនេះ ។
ការយាងទៅជួបប្រជាជននៅទ្វីបអាមេរិករបស់ព្រះអង្គសង្គ្រោះ ដោយ គ្លីន អេស ហបគីនសុន