« ថ្ងៃទី ១២–១៨ ខែ តុលា ។ នីហ្វៃទី ៣ ២០–២៦ ៖ ‹ អ្នករាល់គ្នាជាកូនចៅក្នុងសេចក្ដីសញ្ញា › » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរមរមន ឆ្នាំ ២០២០ ( ឆ្នាំ ២០២០ )
« ថ្ងៃទី ១២–១៨ ខែ តុលា ។ នីហ្វៃទី ៣ ២០–២៦ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២០
រូបភាពអំពីព្រះគ្រីស្ទយាងមកជួបនឹងពួកសាសន៍នីហ្វៃ ដោយអាន់ឌ្រូ បូស្ល៊ី
ថ្ងៃទី ១២–១៨ ខែ តុលា
នីហ្វៃទី ៣ ២០–២៦
« អ្នករាល់គ្នាជាកូនចៅក្នុងសេចក្ដីសញ្ញា »
នៅពេលនិយាយអំពីព្រះគម្ពីរ ព្រះយេស៊ូវជាញឹកញាប់បានប្រើព្រះបន្ទូលថា ពិចារណាមើល ( សូមមើល នីហ្វៃទី ៣ ២០:១១; ២៣:១, ៥ ) ។ នៅពេលបងប្អូនអាន នីហ្វៃទី ៣ ២០–២៦ តើបងប្អូននឹងរុករកមើលអ្វីខ្លះ ?
កត់ត្រាចំណាប់អារម្មណ៍របស់បងប្អូន
នៅពេលបងប្អូនស្ដាប់ឮប្រជាជនប្រើពាក្យដូចជា វង្សអ៊ីស្រាអែល តើបងប្អូនមានអារម្មណ៍ដូចជាពួកគេកំពុងនិយាយអំពីបងប្អូនដែរឬទេ ? ពួកសាសន៍នីហ្វៃ និងពួកសាសន៍លេមិន គឺជាកូនចៅពិតរបស់អ៊ីស្រាអែល—ដំណើររឿងរបស់ពួកគេបានចាប់ផ្ដើមនៅក្នុងទីក្រុងយេរូសាឡិម— ប៉ុន្តែពួកគេមួយចំនួន ទីក្រុងយេរូសាឡិម គឺដូចជា « ដែនដីដែលនៅសែនឆ្ងាយ ជាដែនដីមួយដែលយើងពុំស្គាល់ » ( ហេលេមិន ១៦:២០ ) ។ មែនហើយ ពួកគេគឺជា « មែកមួយនៃដើមអ៊ីស្រាអែល » ប៉ុន្តែពួកគេក៏បាន « វង្វេងចេញពីដើម » ( អាលម៉ា ២៦:៣៦ សូមមើលផងដែរ នីហ្វៃទី ១ ១៥:១២ ) ។ ប៉ុន្តែនៅពេលព្រះអង្គសង្គ្រោះបានបង្ហាញព្រះកាយដល់ពួកគេ ទ្រង់ចង់ឲ្យពួកគេដឹងថា ចំពោះទ្រង់ពួកគេពុំវង្វេងទេ ។ ទ្រង់មានបន្ទូលថា « អ្នករាល់គ្នាគឺជាវង្សអ៊ីស្រាអែល ហើយអ្នករាល់គ្នានៅក្នុងសេចក្ដីសញ្ញា » ( នីហ្វៃទី ៣ ២០:២៥ ) ។ ទ្រង់អាចនឹងមានបន្ទូលអ្វីមួយស្រដៀងគ្នានេះទៅកាន់បងប្អូនសព្វថ្ងៃនេះ ដ្បិតនរណាម្នាក់ដែលបានទទួលបុណ្យជ្រមុជទឹក ហើយចុះសេចក្ដីសញ្ញាជាមួយនឹងទ្រង់ក៏ជាវង្សអ៊ីស្រាអែល « នៅក្នុងសេចក្ដីសញ្ញា » ដែរ មិនថាបងប្អូនជាកូនចៅមកពីណា ឬបងប្អូនរស់នៅកន្លែងណាទេ ។ ម្យ៉ាងទៀត នៅពេលព្រះយេស៊ូវមានបន្ទូលអំពីវង្សអ៊ីស្រាអែល ទ្រង់កំពុងមានបន្ទូលអំពីបងប្អូន ។ ការណែនាំដើម្បីប្រទានពរដល់ « គ្រប់ទាំងពូជមនុស្សនៅផែនដីនឹងបានពរ » គឺសម្រាប់បងប្អូន ( នីហ្វៃទី ៣ ២០:២៧ ) ។ ការអញ្ជើញ « ចូរភ្ញាក់ឡើង ចូរពាក់កម្លាំង» គឺសម្រាប់បងប្អូន ( នីហ្វៃទី ៣ ២០:៣៦ ) ។ ហើយការសន្យាដ៏មានតម្លៃរបស់ទ្រង់ « សេចក្ដីសប្បុរសរបស់យើងនឹងមិនដែលឃ្លាតបាត់ពីអ្នកឡើយ ហើយសេចក្ដីសញ្ញាពីសេចក្ដីមេត្រីរបស់យើងក៏មិនត្រូវរើចេញដែរ » គឺសម្រាប់បងប្អូន ( នីហ្វៃទី ៣ ២២:១០ ) ។
គំនិតយោបល់សម្រាប់ការសិក្សាព្រះគម្ពីរផ្ទាល់ខ្លួន
នៅក្នុងថ្ងៃចុងក្រោយ ព្រះនឹងធ្វើកិច្ចការដ៏មហិមា និងអស្ចារ្យ ។
ព្រះអង្គសង្គ្រោះបានប្រទានការសន្យាដ៏អស្ចារ្យជាច្រើនមួយចំនួន ហើយបានព្យាករអំពីអនាគតនៃរាស្ត្រក្នុងសេចក្ដីសញ្ញារបស់ទ្រង់—ព្រមទាំងបងប្អូនផងដែរ ។ ដូចជាប្រធាន រ័សុល អិម ណិលសុន បានមានប្រសាសន៍ថា ៖ « ពួកយើងស្ថិតនៅក្នុងរាស្ត្រនៃសេចក្ដីសញ្ញារបស់ព្រះអម្ចាស់ ។ ពួកយើងមានឯកសិទ្ធិដើម្បីចូលរួមដោយផ្ទាល់នៅក្នុងការបំពេញតាមការសន្យាទាំងនេះ ។ នេះជាគ្រាដ៏អស្ចារ្យដើម្បីរស់នៅ !» ( «The Gathering of Scattered Israel » Ensign ឬ Liahona ខែ វិច្ឆិកា ឆ្នាំ ២០០៦ ទំព័រ ៧៩ ។
សូមស្វែងរកការព្យាករទាំងឡាយអំពីថ្ងៃចុងក្រោយនៅក្នុងព្រះបន្ទូលរបស់ព្រះអង្គសង្គ្រោះ នៅក្នុង នីហ្វៃទី ៣ ២០–២២ ។ តើការព្យាករណ៍ទាំងនេះណាមួយ ដែលមានអត្ថន័យខ្លាំងចំពោះបងប្អូន ? តើបងប្អូនអាចធ្វើអ្វីខ្លះដើម្បីជួយបំពេញការព្យាករណ៍នៅក្នុងជំពូកទាំងនេះ ?
សូមកត់សម្គាល់ថា នីហ្វៃទី ៣ ២១:១–៧ បង្ហាញអំពីការចេញមកនៃព្រះគម្ពីរមរមន ( « ការណ៍ទាំងនេះ » នៅក្នុង ខ ២ និង ៣ ) គឺជាទីសម្គាល់មួយថាការសន្យារបស់ព្រះបានចាប់ផ្ដើមបំពេញរួចទៅហើយ ។ តើការសន្យាទាំងនេះជាអ្វី ហើយតើព្រះគម្ពីរមរមនជួយបំពេញការសន្យាយ៉ាងដូចម្ដេច ?
សូមមើលផងដែរ រ័សុល អិម ណិលសុន « សង្ឃឹមអ៉ីស្រាអែល » ( ការប្រជុំធម្មនិដ្ឋានទូទាំងពិភពលោកសម្រាប់យុវវ័យ ថ្ងៃទី ៣ ខែ មិថុនា ឆ្នាំ ២០១៨ ) broadcasts.ChurchofJesusChrist.org ។
នីហ្វៃទី ៣ ២០:១០–១២; ២៣; ២៦:១–១២
ព្រះអង្គសង្គ្រោះចង់ឲ្យខ្ញុំពិចារណាមើលពាក្យសម្ដីរបស់ពួកព្យាការី ។
ព្រះបន្ទូល និងសកម្មភាពរបស់ព្រះយេស៊ូវនៅក្នុងជំពូកទាំងនេះ បានបើកសម្ដែងអំពីរបៀបដែលទ្រង់មានព្រះទ័យអំពីព្រះគម្ពីរ ។ តើបងប្អូនរៀនអ្វីខ្លះអំពីបទគម្ពីរនៅក្នុង នីហ្វៃទី ៣ ២០:១០–១២; ២៣; និង ២៦:១–១២ ? តើបងប្អូនរកឃើញអ្វីខ្លះនៅក្នុងខគម្ពីរទាំងនេះ ដែលបំផុសគំនិតបងប្អូនឲ្យ « ពិចារណាមើលការណ៍ទាំងនេះដោយព្យាយាម »? ( នីហ្វៃទី នីហ្វៃទី ៣ ២៣:១ ) ។
ព្រះប្រកបដោយសេចក្ដីមេត្តាករុណាចំពោះអ្នកទាំងឡាយណាដែលត្រឡប់មករកទ្រង់ ។
នៅក្នុង នីហ្វៃទី ៣ ២២ និង ២៤ ព្រះអង្គសង្គ្រោះដកស្រង់ពាក្យរបស់អេសាយ និងម៉ាឡាគី ដែលមានរូបភាព និងការប្រៀបប្រដូចច្បាស់លាស់ពេញលេញដូចជា—ថ្មគ្រឹះគ្រប់ពណ៌ រងើកភ្លើង ដេញប្រាក់ បង្អួចនៃស្ថានសួគ៌ ។ វាអាចនឹងគួរឲ្យចាប់អារម្មណ៍ដើម្បីធ្វើជាបញ្ជីមួយ ។ តើវត្ថុនីមួយៗបង្រៀនដល់បងប្អូនអំពីទំនាក់ទំនងរបស់ព្រះជាមួយនឹងរាស្ត្ររបស់ទ្រង់យ៉ាងណា ? ឧទាហរណ៍ នីហ្វៃទី ៣ ២២:៤–៨ ប្រៀបធៀបព្រះទៅនឹងស្វាមី ហើយរាស្ត្ររបស់ទ្រង់ទៅនឹងភរិយា ។ ការអានអំពីរូបភាពទាំងឡាយអាចបំផុសគំនិតបងប្អូនឲ្យគិតអំពីទំនាក់ទំនងផ្ទាល់ខ្លួនរបស់បងប្អូនជាមួយនឹងព្រះអម្ចាស់ ។ តើការសន្យាទាំងឡាយនៅក្នុងជំពូកទាំងនេះត្រូវបានបំពេញនៅក្នុងជីវិតរបស់បងប្អូនយ៉ាងដូចម្ដេច ? ( សូមមើលជាពិសេស នីហ្វៃទី ៣ ២២:៧–៨, ១០–១៧; ២៤:១០–១២, ១៧–១៨ ) ។
ដួងចិត្តរបស់ខ្ញុំគួរតែងាកទៅរកជីដូនជីតារបស់ខ្ញុំ ។
ការសន្យាអំពីការត្រឡប់មកវិញរបស់អេលីយ៉ាត្រូវបានពួកយូដានៅជុំវិញពិភពលោកសង្ឃឹមទុកជាមុនអស់ជាច្រើនសតវត្សរ៍ ។ ពួកបរិសុទ្ធថ្ងៃចុងក្រោយដឹងថា អេលីយ៉ាបានត្រឡប់មកវិញ ហើយបានបង្ហាញអង្គឲ្យយ៉ូសែប ស្ម៊ីធ ឃើញនៅក្នុងព្រះវិហារបរិសុទ្ធខឺតឡង់ នៅក្នុងឆ្នាំ ១៨៣៦ ( សូមមើល គ. និង ស. ១១០:១៣–១៦ ) ។ កិច្ចការនៃការបង្វែរចិត្តទៅរកឪពុក—ព្រះវិហារបរិសុទ្ធ និង ពង្សប្រវត្តិ— គឺកំពុងតែដំណើរការយ៉ាងល្អ ។ តើបងប្អូនធ្លាប់មានបទពិសោធន៍អ្វីខ្លះ ដែលបានជួយបង្វែរដួងចិត្តរបស់បងប្អូនមករកជីដូនជីតារបស់បងប្អូន ?
គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្រុមគ្រួសារ
នៅពេលបងប្អូនអានគម្ពីរជាមួយនឹងគ្រួសាររបស់បងប្អូន នោះព្រះវិញ្ញាណអាចជួយបងប្អូនឲ្យស្គាល់ថាគោលការណ៍អ្វីដែលត្រូវគូសបញ្ជាក់ និងពិភាក្សាដើម្បីបំពេញតាមតម្រូវការរបស់គ្រួសារបងប្អូន ។ ទាំងនេះគឺជាគំនិតយោបល់មួយចំនួន ។
នីហ្វៃទី ៣ ២២:២
បន្ទាប់ពីការអានខគម្ពីរនេះ បងប្អូនប្រហែលជាអាចធ្វើត្រសាលមួយ ហើយនិយាយអំពីរបៀបដែលសាសនាចក្រគឺដូចជាត្រសាលមួយនៅក្នុងទីរហោស្ថាន ។ តើវាមានន័យយ៉ាងណា ពាក្យថា « បន្ដខ្សែឲ្យវែង » និង « បោះចម្រឹងឲ្យមាំឡើង » ? តើយើងអញ្ជើញអ្នកដទៃឲ្យស្វែងរក « ជម្រក » នៅក្នុងសាសនាចក្រដោយរបៀបណា ? ( សូមមើលវីដេអូ « ស្វាគមន៍ » នៅគេហទំព័រ ComeUntoChrist.org ) ។
នីហ្វៃទី ៣ ២៣:៦–១៣
បើសិនជាព្រះអង្គសង្គ្រោះនឹងមកពិនិត្យមើលកំណត់ត្រាគ្រួសាររបស់យើងដែលយើងបានរក្សាទុក តើទ្រង់នឹងអាចសួរសំណួរយើងអ្វីខ្លះ ? តើមានព្រឹត្តិការណ៍សំខាន់ ឬបទពិសោធន៍ខាងវិញ្ញាណអ្វីខ្លះ ដែលយើងគួរកត់ត្រា ? ឥឡូវអាចជាពេលល្អដើម្បីបង្កើត ឬបន្ថែមកំណត់ត្រា និងប្រឹក្សាជាមួយគ្នាអំពីអ្វីដែលត្រូវដាក់បញ្ចូល ។ សមាជិកគ្រួសារវ័យក្មេងអាចនឹងចូលចិត្តក្នុងការតុបតែងកំណត់ត្រាដោយរូបភាព ឬគំនូរជាច្រើន ។ ហេតុអ្វីបានជាវាសំខាន់ដើម្បីកត់ត្រាអំពីបទពិសោធន៍ខាងវិញ្ញាណរបស់គ្រួសារយើង ?
នីហ្វៃទី ៣ ២៤:៧–១៨
តើយើងមានបទពិសោធន៍ពរជ័យនៃការថ្វាយដង្វាយមួយភាគដប់ដូចដែលបានសន្យានៅក្នុងខគម្ពីរទាំងនេះយ៉ាងដូចម្ដេច ? សារលិខិតរបស់អែលឌើរ ដេវីឌ អេ បែដណា « The Windows of Heaven » ( Ensign ឬ លីអាហូណា ខែ វិច្ឆិកា ឆ្នាំ ២០១៣ ទំព័រ ១៧–២០ ) អាចជួយសមាជិកគ្រួសារឲ្យកំណត់ស្គាល់ពរជ័យទាំងនេះ ។
នីហ្វៃទី ៣ ២៥:៥–៦
តើបងប្អូននឹងជួយសមាជិកគ្រួសាររបស់បងប្អូនឲ្យបង្វែរដួងចិត្តមករកជីដូនជីតារបស់ពួកគេយ៉ាងដូចម្ដេច ? ប្រហែលជាបងប្អូនអាចចាត់ឲ្យសមាជិកគ្រួសាររៀនអំពីជីដូនជីតាម្នាក់របស់បងប្អូន ហើយចែកចាយជាមួយសមាជិកផ្សេងទៀតអំពីអ្វីដែលពួកគេបានរៀន ( សូមមើល FamilySearch.org ) ។ ឬបងប្អូនអាចធ្វើការជាមួយគ្នាដើម្បីស្វែងរកជីដូនជីតាម្នាក់ ដែលត្រូវការពិធីបរិសុទ្ធក្នុងព្រះវិហារបរិសុទ្ធ ហើយរៀបចំការធ្វើដំណើរទៅព្រះវិហារបរិសុទ្ធដើម្បីធ្វើពិធីបរិសុទ្ធទាំងឡាយនោះ ។
សម្រាប់គំនិតបន្ថែមសម្រាប់ការបង្រៀនដល់កុមារ សូមមើល គម្រោងមេរៀនសប្ដាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់ថ្នាក់បឋមសិក្សា ។
ការកែលម្អការបង្រៀនរបស់យើង
សូមរស់នៅតាមទីបន្ទាល់របស់បងប្អូន ។ អែលឌើរ នែល អេ ម៉ាក់ស្វែល បានបង្រៀនថា « អ្នកបង្រៀនអ្វីដែលជាខ្លួនអ្នក » ។ « លក្ខណៈរបស់អ្នក នឹងត្រូវបានចងចាំច្រើនជាង… សេចក្តីពិតមួយនៅក្នុងមេរៀនជាក់លាក់មួយ » (« But a Few Days » [ address to Church Educational System religious educators, ថ្ងៃទី ១០ ខែ កញ្ញា ឆ្នាំ ១៩៨២ ] ទំព័រ ២ ) ។ ប្រសិនបើបងប្អូនចង់បង្រៀនគោលការណ៍ដំណឹងល្អមួយ សូមខិតខំឲ្យអស់ពីសមត្ថភាពដើម្បីរស់នៅតាមគោលការណ៍នោះ ។
នាំកំណត់ត្រាចេញមក ដោយ ហ្គែរី អិល. ខាប