“19–25 ʻOkatopa. 3 Nīfai 27–4 Nephi: ‘ʻOku ʻIkai Lava Ke ʻI Ai ha Kakai ʻoku Lahi Ha Kakai ʻoku Lahi Hake ʻEnau Fiefiá,’” Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: Tohi ʻa Molomoná 2020 (2020)
“19–25 ʻOkatopa. 3 Nīfai 27–4 Nīfai,” Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: 2020
Lotu ʻa Kalaisí, tā ʻe Derek Hegsted
19–25 ʻOkatopa
3 Nīfai 27–4 Nīfai
“ʻOku ʻIkai Lava Ke ʻI Ai Ha Kakai ʻOku Lahi Hake ʻEnau Fiefiá”
Naʻe fekau ʻe he ʻEikí ʻEne kau ākongá ke nau tohi e ngaahi meʻa naʻa nau aʻusiá (vakai, 3 Nīfai 27:23–24). ‘I hoʻo akó, hiki ha ngaahi aʻusia fakalaumālie ʻokú ke maʻu.
Lekooti e Ngaahi Ongo ʻOkú ke Maʻú
Ko e ngaahi akonaki ʻa Sīsū Kalaisí ʻoku ʻikai ko ha ngaahi fakakaukau fakaʻofoʻofa pē ke fakalaulauloto ki ai. ʻOku nau mahuʻinga ange ai—he ʻoku fakataumuʻa kinautolu ke liliu ʻetau moʻuí. ʻOku ʻomi ʻe he tohi 4 Nīfaí ha sīpinga tuʻukimuʻa ʻo e meʻá ni, ʻo fakatātaaʻi e founga ʻe lava ai ʻe he ongoongolelei ʻa e Fakamoʻuí ʻo liliu fakaʻaufuli e kakaí. Hili e ngāue fakafaifekau taimi nounou ʻa Sīsuú, ne ngata e lauisenituli ʻo e fakakikihí ʻi he vahaʻa ʻo e kau Nīfaí mo e kau Leimaná. Naʻe hoko ha ongo puleʻanga kuo ʻiloa ʻi he māvahevahé mo e hīkisiá ʻo “nau taha pē, ko e fānau ʻa Kalaisi” (4 Nīfai 1:17), pea naʻe kamata ke nau “meʻa taha ʻaki ʻenau ngaahi meʻa kotoa pē” (4 Nīfai 1:3). Ko e “ʻofa ʻa e ʻOtuá … naʻe ʻi he loto ʻo e kakaí,” pea “ʻikai lava ke ʻi ai ha kakai ʻoku lahi hake ʻenau fiefiá ʻi he kakai kotoa pē kuo fakatupu ʻe he toʻukupu ʻo e ʻOtuá” (4 Nīfai 1:15–16). Ko e founga eni naʻe liliu ai ʻe he ngaahi akonaki ʻa e Fakamoʻuí e kau Nīfaí mo e kau Leimaná. ʻOku nau liliu fēfē nai koe?
Ngaahi Fakakaukau ki hono Ako Fakatāutaha ʻo e Folofolá
ʻOku ui ʻa e Siasi ʻo Sīsū Kalaisí ʻi Hono huafá.
ʻI he kamata ke fokotuʻu ʻe he kau ākonga ʻa e Fakamoʻuí Hono Siasí ʻi he fonuá kotoa, naʻe ʻohake ha fehuʻi, ki ha niʻihi ʻe ngali hangē ha meʻa siʻí—ko e hā ʻa e hingoa totonu ki he Siasí? (vakai, 3 Nīfai 27:1–3). Ko e hā ʻokú ke ako fekauʻaki mo e mahuʻinga ʻo e hingoa ko ʻení mei he tali ʻa e Fakamoʻuí ʻi he 3 Nīfai 27:4–12? ʻI he 1838, naʻe fakahā ai ʻe he ʻEikí e hingoa ʻo Hono Siasí he ʻaho ní (vakai, TF 115:4). Fakalaulauloto ki he foʻi lea taki taha ʻi he hingoa ko iá. ʻOku tokoniʻi fēfē kitautolu ʻe he ngaahi leá ni ke tau ʻilo ko hai kitautolu, ko e hā ʻoku tau tui ki aí, pea mo e founga ʻoku totonu ke tau fakafeangai aí?
Vakai foki, Russell. M. Nelson, “Ko e Hingoa Totonu ʻo e Siasí,” Ensign pe Liahona, Nōvema 2018, 87–80; M. Russell Ballard, “Ko e Mahuʻinga ʻo ha Hingoa,” Ensign pe Liahona, Nōvema 2011, 79–82.
ʻI heʻeku fakahaohaoaʻi ʻeku ngaahi holí, ʻoku ou hoko ai ko ha ākonga faivelenga ange.
Ko e hā te ke lea ʻaki kapau ʻe fehuʻi atu ʻe he Fakamoʻuí, ʻo hangē ko ʻEne fehuʻi ki Heʻene kau ākongá, “Ko e hā ʻa e meʻa ʻoku mou fie maʻu meiate aú?” (3 Nīfai 28:1). Fakakaukau ki heni ʻi hoʻo lau fekauʻaki mo e aʻusia ʻa e kau ākonga ʻa e Fakamoʻuí ʻi he 3 Nīfai 28:1–11. Ko e hā ʻokú ke ako fekauʻaki mo e ngaahi holi ʻo e loto ʻo e kau ākongá mei heʻenau ngaahi tali ki Heʻene fehuʻí? Naʻe akoʻi ʻe Palesiteni Tāleni H. ʻOakesi ʻo pehē: “Ke aʻusia hotau ikuʻanga taʻengatá, te tau holi mo ngāue ke maʻu e ngaahi ʻulungaanga ʻoku fie maʻu ka tau hoko ko ha tokotaha taʻengatá. … Te tau holi ke hoko ʻo hangē ko [Sīsū Kalaisí]” (“Holi,” Ensign pe Liahona, Mē 2011, 44–45). Ko e hā te ke lava ʻo fai ke māʻoniʻoni ange e ngaahi holi ʻo ho lotó? (Ki ha fakamatala lahi ange fekauʻaki mo e “liliu ki [he] sino” ʻo e kau ākonga ʻe toko tolú, vakai, 3 Nīfai 28:37 mo e “Ko e Kakai Sino Liliú,” Fakahinohino ki he Ngaahi Folofolá, scriptures.ChurchofJesusChrist.org.)
‘Oku iku e fakaului kia Sīsū Kalaisi mo ʻEne ongoongoleleí ki he uouangataha mo e fiefia.
Te ke lava ʻo fakakaukau nai pe naʻe mei fēfē ke moʻui ʻi he ngaahi taʻu hili e ʻaʻahi ʻa e Fakamoʻuí? Naʻe tauhi fēfē nai ʻe he kakaí e melino fakalangi ko ʻení ʻi ha taimi lōloá—ʻo mei aʻu ki ha taʻu ʻe 200? ʻI hoʻo ako e 4 Nīfai 1:1–18, fakakaukau ke fakaʻilongaʻi pe hiki e ngaahi fili naʻe fai ʻe he kakaí kae lava ke nau aʻusia e moʻui faitāpuekina ko ení.
Fakalaulauloto ki he meʻa te ke lava ʻo fai ke tokoni ki ho fāmilí, uōtí, pe komiunitií ke nau nofo ai ʻi he uouongataha mo e fiefia lahi ange, ʻo hangē ko e kakai ʻi he 4 Nīfai. Ko e hā ha ngaahi akonaki ʻa Sīsū Kalaisi te ke lava ʻo moʻui kakato ange ʻaki kae lava ke ke aʻusia e taumuʻa ko ení? Ko e hā te ke lava ʻo fai ke tokoni ke mahino ki he niʻihi kehé mo nau moʻui ʻaki e ngaahi akonaki ko ení?
ʻOku iku ʻa e fai angahalá ki he movetevete mo e mamahi.
Ko e meʻa fakamamahí, he ko e sosaieti ʻoku fakamatalaʻi ʻi he 4 Nīfaí (vakai foki, Mōsese 7:18) ne faifai pē pea movetevete. ʻI hoʻo lau e 4 Nīfai 1:19–49, fekumi ki he ngaahi ʻulungaanga mo e tōʻonga naʻá ne fakatupu e movetevete ʻa e kakai ko ení. ‘Okú ke sio nai ki ha ngaahi fakaʻilonga ʻo e ngaahi ʻulungaanga mo e tōʻonga ko ʻení ʻiate koe?
Vakai foki, “Vahe 18: Tokanga telia ʻa e HīkisiáNgaahi Akonaki ʻa e Kau Palesiteni ʻo e Siasí: ʻĒsela Tafu Penisoni (2014), 229–40.
Ngaahi Fakakaukau ki he Ako Fakafāmili e Folofolá mo e Efiafi Fakafāmili ʻi ʻApí
ʻI hoʻo lau e folofolá mo ho fāmilí, ʻe lava ke tokoni atu ʻa e Laumālié ke mou ʻiloʻi ʻa e ngaahi tefitoʻi moʻoni ke fakamamafaʻi mo aleaʻí kae lava ke feau e ngaahi fie maʻu homou fāmilí. Ko ha ngaahi fakakaukau ʻeni ʻe niʻihi.
3 Nīfai 27:13–21
‘E lava ke tokoni e ngaahi veesi ko ení ke mahino ange ki he kau mēmipa ʻo e fāmilí e ʻuhinga ʻa e Fakamoʻuí ʻi Heʻene pehē “ko ʻeku ongoongoleleí ʻeni.” Hili hono lau mo aleaʻi e ngaahi veesi ko ení, te ke lava ʻo kole ki he mēmipa takitaha ʻo e fāmilí ke nau fakamatalaʻi fakanounou pe ko e hā ʻa e ongoongoleleí ʻi ha sētesi pē ʻe taha.
3 Nīfai 27:23–26
ʻOku fēfē nai ʻetau lekooti e ngaahi meʻa kuo tau “mamata mo fanongo”— fakafoʻituitui pe fakafāmili ki aí? Ko e hā ʻoku mahuʻinga ai ke tauhi ha lekooti ʻo e ngaahi meʻa fakalaumālié?
3 Nīfai 27:30–31
Ke tokoni ke mahino ki he kau mēmipa ʻo e fāmilí e fiefia naʻe fakamatalaʻi ʻe he Fakamoʻuí ʻi he ngaahi veesi ko ení, te ke lava ʻo fai ha kiʻi vaʻinga ʻa ia ʻoku toitoi ai e kau mēmipa ʻo e fāmilí kae kumi kinautolu ʻe ha mēmipa ʻe taha. ʻE lava ke tataki eni ki ha fepōtalanoaʻaki fekauʻaki mo hono mahuʻinga ke ʻilo e mēmipa kotoa ʻo e fāmilí koeʻuhi ke “ʻikai ke mole hanau toko taha.” Te tau lava fēfē ʻo tokoniʻi e kau mēmipa hotau fāmilí ke nau kei mālohi ʻi he ongoongoleleí pe foki mai kapau kuo nau mavahe?
3 Nīfai 28:17–18, 36–40
Ko e hā te tau lava ‘o ako mei he sīpinga ʻa Molomona ʻi he ʻikai ke mahino kiate ia e meʻa kotoa pē fekauʻaki mo e liliu naʻe hoko ki he kau ākonga Nīfai ʻe toko tolú? Ko e hā te tau lava ʻo fai ʻo ka ʻikai mahino kiate kitautolu e meʻa kotoa pē fekauʻaki mo ha tefitoʻi moʻoni ʻo e ongoongoleleí? Na’e akoʻi ʻe Palesiteni Tieta F. ʻUkitofa ʻo pehē: “ʻOku tokanga mai e ʻOtuá kiate koe. Te Ne fakafanongo pea tali mai hoʻo ngaahi fehuʻi fakatāutahá. ʻE fakahoko mai e tali hoʻo lotú ʻi Heʻene founga mo e taimi pē ʻAʻaná, ko ia ai, ʻoku fie maʻu ke ke ako ke fakafanongo ki Hono leʻó.” (“Ko Hono Maʻu ha Fakamoʻoni ʻo e Māmá mo e Moʻoní,” Ensign pe Liahona, Nōvema 2014, 21).
4 Nīfai 1:15
Ke holoki e fekeʻikeʻí ʻi homou ʻapí, mahalo naʻa lava ke fokotuʻu ʻe he kau mēmipa ʻo e fāmilí ha taumuʻa ke feʻofaʻaki lahi ange he uiké ni. ʻI he ʻosi ʻa e uiké, toe vakaiʻi fakataha hoʻomou fakalakalaká pea aleaʻi pe naʻe tokoniʻi fēfē ʻe hono fakahaaʻi e ʻofa lahi angé homou fāmilí.
Ke maʻu ha ngaahi fakakaukau lahi ange ki hono akoʻi ʻo e fānaú, vakai ki he fokotuʻutuʻu ʻo e uike ní ʻi he Haʻu, ʻo Muimui ʻIate Au—Maʻá e Palaimelí.
Ko Hono Fakatupulaki e Ako Fakatāutahá
Fekumi fakaʻaho ki he fakahaá ʻOku faʻa hoko mai e fakahaá ko e “ʻotu lea ki he ʻotu lea” (2 Nīfai 28:30). ‘I hoʻo fakalaulauloto ki he ngaahi veesi ʻokú ke akó, ʻe lava ke haʻu ha ngaahi fakakaukau pe ngaahi ueʻi fakalaumālie kiate koe he lolotonga ʻo e ʻahó. ʻOua naʻá ke fakakaukau ko e ako ʻo e ongoongoleleí ko ha meʻa ʻokú ke “tuku taimi ki ai” ka ko ha meʻa ʻokú ke fai maʻu pē (vakai, Ko e Faiako ‘i he founga ‘a e Fakamo‘uí, 12).
Kalaisi mo e Kau Ākonga Nīfai ʻe Toko Tolú, tā ʻe Gary L. Kapp