Ko e Tohi ʻa Molonai ʻi he ʻŪ Lauʻi Peleti Koulá, tā ʻe Dale Kilborn

2–8 Nōvema

Molomona 7–9

“‘Oku ou Lea Kiate Kimoutolu ʻo Hangē ʻOku Mou ʻi Hení”

Naʻe tui ʻa Molomona mo Molonai ʻe ueʻi fakalaumālie ʻe heʻena lekōtí ʻa kinautolu ʻe moʻui ʻi he ngaahi ʻaho kimui ní. ʻI hoʻo lau e Molomona 7–9, hiki ha ngaahi ongo ʻokú ke maʻu fekauʻaki mo e founga ke fakaʻaongaʻi ai e ngaahi meʻa ʻokú ke akó.

Lekooti e Ngaahi Ongo ʻOkú ke Maʻú

Naʻe ʻiloʻi ʻe Molomona mo Molonai e faʻahinga ongoʻi tuenoa ʻi ha māmani faiangahalá. ʻOku pau ne tautautefito e ongoʻi tuenoa ʻa Molonaí hili e pekia ʻene tangataʻeikí ʻi he taú pea fakaʻauha e kau Nīfaí. Naʻá ne tohi ʻo pehē, “ʻOku ou toko taha pē. ʻOku ʻikai haku ngaahi kaumeʻa pe potu ke u ʻalu ki ai” (Molomona 8:3, 5). Mahalo ʻe ngali siva e ʻamanakí, ka naʻe maʻu ʻe Molonai e ʻamanaki leleí ʻi heʻene fakamoʻoni ki he Fakamoʻuí mo ʻene ʻilo “ʻe teka atu maʻu ai pē ʻa e ngaahi taumuʻa taʻengata ʻo e ʻEikí” (Molomona 8:22). Pea naʻe ʻiloʻi ʻe Molonai ko ha fatongia tefito ia ʻi he ngaahi taumuʻa taʻengatá ʻe fai ʻe he Tohi ʻa Molomoná—ʻa e lekooti naʻá ne faivelenga ke fakaʻosí, ʻa e lekooti “ʻe ulo atu [ʻi ha ʻaho] mei he fakapoʻulí” pea ʻomi ha kakai tokolahi ki he “ʻiloʻi ʻo Kalaisí” (Molomona 8:16; 9:36). Naʻe hoko e tui ʻa Molonai ki he ngaahi talaʻofa ko ʻení ke ne malava ai ʻo fakahaaʻi ki he kau laukonga ʻo e tohí ni ʻi he kahaʻú, “ʻoku ou lea kiate kimoutolu ʻo hangē ʻoku mou ʻi hení” mo e “ʻoku ou ʻiloʻi te mou maʻu ʻeku ngaahi leá” (Molomona 8:35; 9:30). Ko ʻeni ʻoku tau maʻu ʻene ngaahi leá, pea ʻokuteka atu e ngāue ʻa e ʻEikí, koeʻuhí he naʻe fai pau ʻa Molomona mo Molonai ki hona misioná, neongo naʻá na toko taha.

Ngaahi Fakakaukau ki hono Ako Fakatāutaha ʻo e Folofolá

Molomona 7

Kuo pau ke u tui kia Sīsū Kalaisi pea “puke maʻu” ʻEne ongoongoleleí.

ʻOku fakataumuʻa ʻa e ngaahi lea fakaʻosi ne hiki ʻe Molomona ʻi he Molomona 7, ki he hako ʻo e kau Leimaná ʻi he ngaahi ʻaho kimui ní, ka ʻoku ʻi ai ha ngaahi moʻoni maʻatautolu kotoa. Ko e hā ʻoku akoʻi atu ʻe he pōpoaki ʻa Molomoná fekauʻaki mo Sīsū Kalaisi mo ʻEne ongoongoleleí? Ko e hā ka fili ai ʻe Molomona e pōpoaki ko ʻení ke aofangatuku ʻaki ʻene lekōtí?

Molomona 7:8–10; 8:12–22; 9:31–37

ʻOku mahuʻinga lahi e Tohi ʻa Molomoná.

Naʻe fehuʻi ʻe Palesiteni Russell M. Nelson ʻo pehē: “Kapau ʻe foaki atu kiate koe ha taiamoni, makakoloa peTohi ʻa Molomoná, ko e fē meʻa te ke filí? Ko hono moʻoní, ko e fē ʻoku mahuʻinga ange kiate koé?” (“Ko e Tohi ʻa Molomoná: Ne Mei Fēfē Hoʻo Moʻuí Ka Ne ʻIkai Ia?” Ensign pe Liahona, Nōvema 2017, 61).

Naʻe ʻiloʻi ʻe Molomona mo Molonai ʻe mahuʻinga lahi e lekooti naʻá na tauhí ʻi hotau kuongá, ko ia ai naʻá na fai ha ngaahi feilaulau lahi ke teuteuʻi mo maluʻi ia. ʻI hoʻo lau e Molomona 7:8–10; 8:12–22; mo e 9:31–37, fakakaukau pe ko e hā ʻoku fuʻu mahuʻinga ai e lekōtí ʻi hotau kuongá. Mahalo te ke maʻu ha toe ngaahi fakakaukau ʻi he 1 Nīfai 13:38–41; 2 Nīfai 3:11–12; mo e Tokāteline mo e Ngaahi Fuakava 33:16; 42:12–13. Ko e hā ha ngaahi aʻusia kuo nau tokoniʻi koe ke ke ʻilo ʻoku mahuʻinga lahi ʻa e Tohi ʻa Molomoná?

ʻOku ʻaonga e ngaahi meʻa naʻe tohi ʻe he kau palōfita ʻo e Tohi ʻa Molomoná kiate kitautolu.

Molomona 8:26–41; 9:1–30

Naʻe tohi e Tohi ʻa Molomoná maʻa hotau kuongá.

Naʻe fakahā ʻe Sīsū Kalaisi kia Molonai e ngaahi meʻa ʻe hoko ʻi hono ʻomi e Tohi ʻa Molomoná (vakai, Molomona 8:34–35), pea naʻe tataki ʻa Molonai ʻe he meʻa naʻe mamata ki aí ke ne fai ha ngaahi fakatokanga mamafa ki hotau kuongá. ʻI hoʻo lau e Molomona 8:26–41 mo e 9:1–30, fakalaulauloto pe ʻoku ʻi ai ha ngaahi fakaʻilonga ʻo e ngaahi ʻulungaanga mo e tōʻonga ko ení ʻi hoʻo moʻuí. Ko e hā ha meʻa te ke fakahoko ʻi ha founga kehe?

Hangē ko ení, ʻoku kau ʻi he Molomona 9:1–30 e pōpoaki ʻa Molonai ʻo tali ki he mafola ʻa e taʻetui kia Sīsū Kalaisi ʻi hotau kuongá naʻá ne tomuʻa ʻiloʻí. Fakakaukau ke hiki e meʻa ʻokú ke ako mei heʻene ngaahi leá fekauʻaki mo e ngaahi meʻá ni:

• Ko e ngaahi nunuʻa ʻo e ʻikai tui kia Kalaisí (veesi 1–6, 26)

• Ko e mahuʻinga ʻo e tui ki ha ʻOtua ʻo e fakahaá mo e ngaahi maná (veesi 7–20)

• Ko e faleʻi ʻa Molonai maʻatautolú (veesi 21–30)

Ko e hā ʻokú ke ako meia Molonai ʻe lava ke tokoni atu ke ke ʻomi e niʻihi kehé ke nau ofi ange ki he Tamai Hēvaní mo Sīsū Kalaisí?

Ngaahi Fakakaukau ki he Ako Fakafāmili e Folofolá mo e Efiafi Fakafāmili ʻi ʻApí

ʻI hoʻo lau e folofolá mo ho fāmilí, ʻe lava ke tokoni atu ʻa e Laumālié ke mou ʻiloʻi ʻa e ngaahi tefitoʻi moʻoni ke fakamamafaʻi mo aleaʻí kae lava ke feau e ngaahi fie maʻu homou fāmilí. Ko ha ngaahi fakakaukau ʻeni ʻe niʻihi.

Molomona 7:5–7, 10; 9:11–14

Ko e hā ʻoku akoʻi mai ʻe he ngaahi veesi ko ʻení fekauʻaki mo e palani ʻa e Tamai Hēvaní mo e ʻuhinga ʻoku tau fie maʻu ai ha Fakamoʻuí?

Molomona 7:8–10

Ko e hā kuo tau ako he taʻú ni mei heʻetau ako ʻa e Tohi ʻa Molomoná kuó ne tokoni ke fakamālohia ʻetau tui ki he Tohi Tapú? Ke kamataʻi ha fealeaʻaki, te mou lava ʻo lau fakataha ha niʻihi ʻo e ngaahi folofola mei he Tohi ʻa Molomoná mo e Tohi Tapú ʻoku nau akoʻi ha ngaahi moʻoni faitatau, hangē ko e ʻAlamā 7:11–13 mo e ʻĪsaia 53:3–5 pe 3 Nīfai 15:16–24 mo e Sione 10:16.

Molomona 8:1–9

Naʻe mei ongoʻi fēfē nai ke toko taha pē hangē ko Molonaí? Ko e hā ʻoku tau mahuʻingaʻia ai fekauʻaki mo e ngāue naʻá ne fakahokó?

Molomona 8:12, 17–21; 9:31

Fakakaukau ke lau fakafāmili e ngaahi veesi ko ení, hili iá pea lau e lea ko eni naʻe fai ʻe ʻEletā Sefilī R. Hōlani: “Naʻe ngāue ʻa e ʻOtuá mo ha kakai taʻehaohaoa, talu mei he kamataʻanga ʻo taimí, tuku kehe pē Hono ʻAlo haohaoa ʻe Taha naʻe Fakatupú . … Ko e taimi te ke fakatokangaʻi ai ha tōnounoú, manatuʻi ʻoku ʻikai ko e fakalangi ʻo e ngāué ʻoku fakangatangatá” (“ ʻEiki, ʻOku ou Tui,” Ensign pe Liahona, Mē 2013, 94). Ko e hā ʻoku fakatuʻutāmaki ai ke tukutaha ʻetau tokangá ki he ngaahi tōnounou ʻa e niʻihi kehé, ʻo kau ai kinautolu naʻa nau hiki e Tohi ʻa Molomoná?

Molomona 8:36–38

ʻOku ʻuhinga ki he hā ke toʻo kiate kitautolu e huafa ʻo Sīsū Kalaisí? Ko e hā nai ka mā ai ha taha ke toʻo kiate ia e huafa ʻo Sīsū Kalaisí? Te tau lava fēfē ʻo loto-toʻa ʻi heʻetau fakamoʻoni ki he Fakamoʻuí?

Molomona 9:16–24

ʻOku fie maʻu ha ngaahi meʻa pau ke ola lelei ha fakatotolo fakasaienisi pe founga feimeʻatokoni. Fakakaukau ke fai ha kiʻi fakatotolo pe ngaohi ha meʻatokoni ʻoku saiʻia ai e fāmilí kimuʻa pea lau e Molomona 9:16–24. ʻI hoʻomou lau e ngaahi vēsí (tautautefito ki he veesi 20–21), fekumi ki he ngaahi “naunau” ʻoku nau ʻai ke malava e ngaahi maná. Ko e hā ha ngaahi mana ʻoku tau lava ʻo sio ki ai ʻi he māmaní pea ʻi hotau fāmilí?

Ke maʻu ha ngaahi fakakaukau lahi ange ki hono akoʻi ʻo e fānaú, vakai ki he fokotuʻutuʻu ʻo e uike ní ʻi he Haʻu, ʻo Muimui ʻIate Au—Maʻá e Palaimelí.

Ko Hono Fakatupulaki e Ako Fakatāutahá

Vakai ki he maʻuʻanga tokoni totonu ʻa e Siasí. Ko e folofolá, ngaahi lea ʻa e kau palōfita moʻuí mo e ngaahi tohi fakaʻofisiale kuo paaki ʻe he Siasí, ʻa e maʻuʻanga tali lelei taha ki he ngaahi fehuʻi faingataʻa ʻo e ongoongoleleí (vakai, Faiako ‘i he founga ‘a e Fakamo‘uí, 17–18, 23–24).

Ko hono Fakanounouʻi ʻe Molomona ʻa e ʻŪ Lauʻi Peletí, tā ʻe Jon McNaughton