« ថ្ងៃទី ១៨–២៤ ខែ មករា ។ គោលលទ្ធិ និង សេចក្ដីសញ្ញា ៣–៥ ៖ ‹ កិច្ចការរបស់យើងនឹងចេញទៅ › » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរគោលលទ្ធិ និង សេចក្ដីសញ្ញា ឆ្នាំ ២០២១ ( ឆ្នាំ ២០២០ )

« ថ្ងៃទី ១៨–២៤ ខែ មករា ។ គោលលទ្ធិ និង សេចក្ដីសញ្ញា ៣–៥ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២១

រូបភាព

មនុស្សធ្វើការនៅវាលស្រែ

រដូវកាលច្រូតកាត់នៅប្រទេសបារាំង ដោយ ចេមស៍ ថេលើរ ហាវូឌ

ថ្ងៃទី ១៨–២៤ ខែ មករា

គោលលទ្ធិ និង សេចក្ដីសញ្ញា ៣–៥

« កិច្ចការរបស់យើងនឹងចេញទៅ »

សូមសរសេរនូវអ្វីដែលបងប្អូនបានរៀន និងមានអារម្មណ៍ កាលបងប្អូនសិក្សាព្រះគម្ពីរ ។ ការណ៍នេះនឹងជួយបងប្អូនឲ្យចងចាំចំណាប់អារម្មណ៍ទាំងនោះ ហើយចែកចាយវាជាមួយមនុស្សដទៃ ។

កត់ត្រាចំណាប់អារម្មណ៍របស់បងប្អូន

អំឡុងពីរបីឆ្នាំដំបូងរបស់លោកក្នុងនាមជាព្យាការីរបស់ព្រះអម្ចាស់ យ៉ូសែប ស៊្មីធ មិនបានដឹងអ្វីគ្រប់យ៉ាងអំពី « កិច្ចការដ៏អស្ចារ្យ » ដែលលោកត្រូវបានហៅឲ្យធ្វើនៅឡើយទេ ។ ប៉ុន្ដែបទពិសោធន៍ដំបូងរបស់លោកបានបង្រៀនលោករឿងមួយថា ដើម្បីស័ក្ដិសមនឹងកិច្ចការរបស់ព្រះ នោះភ្នែករបស់លោកត្រូវតែ « ស្មោះត្រង់ទាំងស្រុងចំពោះសិរីល្អនៃព្រះ » ( គោលលទ្ធិ និង សេចក្ដីសញ្ញា ៤:១, ៥ ) ។ ឧទាហរណ៍ ប្រសិនបើព្រះអម្ចាស់ប្រទានការប្រឹក្សាដល់លោក ដែលខុសពីបំណងផ្ទាល់របស់លោក លោកត្រូវធ្វើតាមការប្រឹក្សារបស់ព្រះអម្ចាស់ ។ ហើយទោះបីជាលោកបានមាន « វិវរណៈជាច្រើន ហើយមានអំណាចអាចធ្វើកិច្ចការដ៏អស្ចារ្យជាច្រើនបានក៏ដោយ » តែបើឆន្ទៈផ្ទាល់របស់លោកបានក្លាយទៅជាសំខាន់ជាងព្រះទ័យរបស់ព្រះក្នុងភ្នែករបស់លោក នោះលោក « ត្រូវតែធ្លាក់ចុះ » ( គោលលទ្ធិ និង សេចក្ដីសញ្ញា ៣:៤ ) ។ ប៉ុន្ដែយ៉ូសែបបានរៀនអ្វីមួយផ្សេងទៀត ដែលសំខាន់ស្មើនឹងការធ្វើកិច្ចការរបស់ព្រះដែរ ៖ « ព្រះទ្រង់ប្រកបដោយសេចក្ដីមេត្តាករុណា » ហើយប្រសិនបើយ៉ូសែបប្រែចិត្តដោយស្មោះសរ នោះលោក « នៅជាអ្នកជម្រើសដដែល » ( ខទី ១០ ) ។ សរុបមក កិច្ចការរបស់ព្រះគឺជាកិច្ចការនៃការប្រោសលោះ ។ ហើយកិច្ចការនោះ « ពុំអាចធ្វើឲ្យស្មុគស្មាញ » បានឡើយ ( ខទី ១ ) ។

រូបភាព

រូបសញ្ញាការសិក្សាផ្ទាល់ខ្លួន

គំនិតយោបល់សម្រាប់ការសិក្សាព្រះគម្ពីរផ្ទាល់ខ្លួន

គោលលទ្ធិ និង សេចក្ដីសញ្ញា ៣:១–១៥

ខ្ញុំគួរតែទុកចិត្តលើព្រះ ជាជាងខ្លាចមនុស្ស ។

នៅការបម្រើដំបូងរបស់យ៉ូសែប ស៊្មីធ មិត្តល្អៗកម្រនឹងរកបានណាស់—ជាពិសេសមិត្តដូចជាម៉ាទិន ហារីស ជាបុរសគួរឲ្យគោរព និងស្ដុកស្ដម្ភម្នាក់ ដែលបានផ្ដល់ការគាំទ្រដ៏មានតម្លៃ ។ ហើយម៉ាទិនស្ម័គ្រចិត្តគាំទ្រយ៉ូសែប ទោះបីជាវាធ្វើឲ្យមិត្តគាត់លែងគោរពគាត់ ហើយតម្រូវឲ្យលះបង់ផ្នែកហិរញ្ញវត្ថុក្ដី ។

ដូច្នេះវាងាយនឹងឃើញពីមូលហេតុដែលយ៉ូសែបចង់គោរពតាមសំណើរបស់ម៉ាទិន ក្នុងការយកចំណែកទីមួយនៃការបកប្រែព្រះគម្ពីរមរមនឲ្យភរិយាគាត់ឃើញ ព្រោះនាងសង្ស័យពីសេចក្ដីពិតនៃព្រះគម្ពីរមរមន ។ យ៉ូសែបបានបន្ដសូមដល់ព្រះអម្ចាស់អំពីសំណើនេះ ទោះជាពេលទ្រង់បានហាមឃាត់ក្ដី រហូតដល់ទីបញ្ចប់ក្រោយពីយ៉ូសែបបានទូលសូមជាលើកទីបី នោះព្រះអម្ចាស់បានអនុញ្ញាត ។ គួរឲ្យសោកស្ដាយ សំណៅដើមបានបាត់ កាលនៅក្នុងដៃរបស់ម៉ាទិន ហើយយ៉ូសែប និងម៉ាទិនត្រូវបានវាយផ្ចាលដោយព្រះអម្ចាស់យ៉ាងខ្លាំង ( សូមមើល Saints ១:៥១–៥៣ ) ។

នៅពេលបងប្អូនអាន គោលលទ្ធិ និង សេចក្តីសញ្ញា ៣:១–១៥ សូមពិចារណាពីរបៀបដែលយោបល់របស់មនុស្សដទៃអាចជះឥទ្ធិពលលើបងប្អូន ។ បងប្អូនក៏អាចសម្គាល់ឃើញថា បន្ថែមលើការស្ដីបន្ទោសឲ្យយ៉ូសែប ស្ម៊ីធ ព្រះអម្ចាស់ក៏បានមានបន្ទូលអំពីសេចក្ដីមេត្តាករុណាផងដែរ ។ តើបងប្អូនបានរៀនអ្វីខ្លះតាមរយៈរបៀបដែលព្រះអម្ចាស់បានកែតម្រូវផង និងលើកទឹកចិត្តយ៉ូសែបផង ? តើបងប្អូនរកឃើញការប្រឹក្សាអ្វីខ្លះ ដែលអាចជួយដល់បងប្អូន នៅពេលបងប្អូនត្រូវបានល្បួងឲ្យខ្លាចមនុស្សដទៃជាងខ្លាចព្រះ ?

សូមមើលផងដែរ « The Contributions of Martin Harris » Revelations in Context ទំព័រ ១–៩ នៅលើគេហទំព័រ history.ChurchofJesusChrist.org ។

គោលលទ្ធិ និង សេចក្តីសញ្ញា ៤

ព្រះអម្ចាស់សុំឲ្យខ្ញុំបម្រើទ្រង់ឲ្យអស់ពីដួងចិត្តខ្ញុំ ។

ជាញឹកញាប់ កណ្ឌទី ៤ អនុវត្តចំពោះអ្នកផ្សព្វផ្សាយសាសនាពេញម៉ោង ។ ប៉ុន្ដែ វាគួរឲ្យចាប់អារម្មណ៍ដើម្បីសម្គាល់ថា វិវរណៈនេះត្រូវបានប្រទានឲ្យ យ៉ូសែប ស្ម៊ីធ ស៊ីញ្ញ័រ ទេពីដំបូងមក ដែលមិនត្រូវបានហៅក្នុងបេសកកម្ម ប៉ុន្ដែនៅតែមាន « បំណងចង់បម្រើព្រះ » ( ខទី ៣ ) ។

របៀបមួយដើម្បីអានកណ្ឌនេះគឺ ត្រូវស្រមៃថាវាជាលក្ខខណ្ឌការងារសម្រាប់នរណាម្នាក់ដែលចង់ធ្វើកិច្ចការរបស់ព្រះអម្ចាស់ ។ តើអ្វីជាលក្ខណៈសម្បត្តិ ? ហេតុអ្វីបានជាជំនាញ ឬលក្ខណៈទាំងនេះចាំបាច់ ? ប្រហែលបងប្អូនអាចជ្រើសរើសប្រកបដោយការអធិស្ឋាន យកអ្វីមួយដែលបងប្អូនអាចធ្វើបានដើម្បី « ធ្វើឲ្យ [ បងប្អូន ] សមនឹងកិច្ចការ » ( ខទី ៥ ) ។

គោលលទ្ធិ និង សេចក្តីសញ្ញា ៥

ខ្ញុំអាចទទួលបានសាក្សីផ្ទាល់ខ្លួនខ្ញុំអំពីព្រះគម្ពីរមរមន ។

ប្រសិនបើបងប្អូនត្រូវបានហៅឲ្យធ្វើជាសាក្សីនៅក្នុងតុលាការអំពីសេចក្ដីពិតពេញលេញនៃព្រះគម្ពីរមរមន តើបងប្អូននឹងផ្ដល់ភស្ដុតាងអ្វី ? សំណួរស្រដៀងគ្នាមួយដែលម៉ាទិន ហារីស មានក្នុងចិត្តគឺនៅពេលដែលភរិយាគាត់ លូស៊ី បានដាក់បណ្តឹងថា យ៉ូសែប ស៊្មីធ កំពុងបោកប្រាសប្រជាជនតាមរយៈការធ្វើជាបកប្រែផ្ទាំងចំណារមាស ( សូមមើល Saints ១:៥៦–៥៨ ) ។ ដូច្នេះម៉ាទិនបានសូមឲ្យយ៉ូសែបផ្ដល់ភស្ដុតាងបន្ថែមទៀតថា ផ្ទាំងចំណារមាសគឺពិត ។គោលលទ្ធិ និង សេចក្ដីសញ្ញា ៥ គឺជាវិវរណៈមួយដែលឆ្លើយតបនឹងសំណើរបស់ម៉ាទិន ។

តើបងប្អូនរៀនអ្វីខ្លះចេញពី គោលលទ្ធិ និង សេចក្តីសញ្ញា ៥ អំពីអ្វីដូចតទៅនេះ ៖

តើព្រះអម្ចាស់មានព្រះទ័យដូចម្ដេច អំពីអ្នកទាំងឡាយណាដែលមិនជឿលើសេចក្ដីពិតខាងវិញ្ញាណ លុះត្រាតែពួកគេមានភស្ដុតាងនោះ ( សូមមើល ខទី ៥–៨, សូមមើលផងដែរ យ៉ូហាន ២០:២៤–២៩ ) ។
តួនាទីនៃសាក្សីនៅក្នុងកិច្ចការរបស់ព្រះអម្ចាស់ ( សូមមើល ខទី ១១–១៥, សូមមើលផងដែរ កូរិនថូស ទី២ ១៣:១ ) ។
របៀបទទួលបានទីបន្ទាល់អំពីព្រះគម្ពីរមរមនដោយខ្លួនឯង ( សូមមើល ខទី ១៦, សូមមើលផងដែរ មរ៉ូណៃ ១០:៣–៥ ) ។

គោលលទ្ធិ និង សេចក្ដីសញ្ញា ៥:១–១០

ជំនាន់នេះគួរតែទទួលបានបន្ទូលរបស់ព្រះតាមរយៈយ៉ូសែប ស្ម៊ីធ ។

តើ គោលលទ្ធិ និងសេចក្ដីសញ្ញា ៥:១–១០ បង្រៀនបងប្អូនអ្វីខ្លះ អំពីតួនាទីដ៏សំខាន់របស់យ៉ូសែប ស្ម៊ីធ នៅក្នុងគ្រាកាន់កាប់ត្រួតត្រារបស់យើង—និងនៅក្នុងជីវិតរបស់បងប្អូន ? សូមសញ្ជឹងគិតពីរបៀបដែលបងប្អូនបានទទួលបន្ទូលរបស់ព្រះតាមរយៈព្យាការី យ៉ូសែប ស្ម៊ីធ ។ សូមគិតដល់ការកត់ត្រាក្នុងកំណត់ហេតុ ឬចែកចាយជាមួយនរណាម្នាក់អំពីអំណរគុណរបស់បងប្អូនចំពោះសេចក្ដីពិត ដែលត្រូវបានស្ដារឡើងវិញ ឬបញ្ជាក់តាមរយៈលោក ។

សូមមើល នីហ្វៃទី២ ៣:៦–២៤ ។

រូបភាព

រូបសញ្ញាការសិក្សាជាគ្រួសារ

គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្រុមគ្រួសារ

គោលលទ្ធិ និង សេចក្ដីសញ្ញា ៣:១–៤ ។សូមឲ្យសមាជិកគ្រួសារម្នាក់ដើរលើខ្សែ « ក្ងិកក្ងក់ » រួចហើយលើខ្សែ « ត្រង់ » ។ តើវាមានន័យយ៉ាងណាចំពោះគ្រួសាររបស់យើងដែលដឹងថា « ផ្លូវទាំងឡាយរបស់ [ ព្រះ ] ត្រង់ » ?

គោលលទ្ធិ និង សេចក្ដីសញ្ញា ៣:៧–១០ ។នៅពេលនរណាម្នាក់ជម្រុញឲ្យយើងមិនគោរពតាមព្រះ តើសេចក្ដីពិតអ្វីខ្លះនៅក្នុងខគម្ពីរទាំងនេះដែលអាចជួយយើងឲ្យបន្ដស្មោះត្រង់ ? ប្រហែលសមាជិកគ្រួសារអាចដើរតួសម្ដែងពីស្ថានភាពមួយ ដែលនរណាម្នាក់នៅបន្ដស្មោះត្រង់ ថ្វីបើមានសម្ពាធមិនឲ្យគោរពតាមព្រះក្ដី ។

គោលលទ្ធិ និង សេចក្តីសញ្ញា ៤ ។នៅពេលគ្រួសាររបស់បងប្អូនពិភាក្សាពីអត្ថន័យនៃការធ្វើការក្នុងវាលស្រែរបស់ព្រះ នោះពួកគេអាចធ្វើកិច្ចការខ្លះៗនៅក្នុងសួនច្បារ ( ឬធ្វើជាធ្វើ ) ។ តើត្រូវការឧបករណ៍អ្វីខ្លះសម្រាប់កិច្ចការក្នុងសួនច្បារ ? តើព្រះរៀបរាប់ពីអ្វីខ្លះនៅក្នុង កណ្ឌទី ៤ ដែលអាចចាត់ទុកថាជាឧបករណ៍ចាំបាច់ដើម្បីធ្វើកិច្ចការរបស់ទ្រង់ ? គ្រួសាររបស់បងប្អូនអាចពិភាក្សាពីមូលហេតុ ដែលឧបករណ៍នីមួយៗសំខាន់ក្នុងការធ្វើកិច្ចការរបស់ព្រះ ។

គោលលទ្ធិ និង សេចក្តីសញ្ញា ៥:៧ ។តើមានគំរូណាខ្លះអំពីសេចក្ដីពិត ដែលយើងជឿ ប៉ុន្ដែមិនអាចមើលឃើញបាន ? តើយើងអាចឆ្លើយតបនឹងមិត្តម្នាក់ ដែលចង់បានភស្ដុតាងថា ព្រះគម្ពីរមរមនគឺពិតដោយរបៀបណា ?

សម្រាប់គំនិតបន្ថែមសម្រាប់ការបង្រៀនដល់កុមារ សូមមើល គម្រោងមេរៀនសប្ដាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់ថ្នាក់បឋមសិក្សា ។

ចម្រៀងស្នើ ៖ « ខ្ញុំនឹងធ្វើជាអ្នកក្លាហាន » សៀវភៅចម្រៀងកុមារ ទំព័រ ៨៥ ។

ការកែលម្អដល់ការសិក្សាផ្ទាល់ខ្លួន

ទន្ទេញខគម្ពីរ ។ « ការទន្ទេញចាំបទគម្ពីរមួយគឺជាការបង្កើតមិត្តភាពមួយថ្មី ។ វាគឺដូចជាការរកឃើញនូវបុគ្គលថ្មីម្នាក់ ដែលអាចពឹងពាក់បាននៅពេលត្រូវការ វាផ្ដល់នូវការបំផុស និងការលួងលោម ព្រមទាំងជាប្រភពនៃការជំរុញទឹកចិត្តដើម្បីធ្វើការផ្លាស់ប្ដូរដែលចាំបាច់ » ( រីឆាដ ជី ស្កត « The Power of Scripture » Ensign ឬ Liahona ខែ វិច្ឆិកា ឆ្នាំ ២០១១ ទំព័រ ៦ ) ។