« ថ្ងៃទី ២៥–៣១ ខែ មករា ។ គោលលទ្ធិ និង សេចក្ដីសញ្ញា ៦–៩ ៖ ‹ នេះជាវិញ្ញាណនៃវិវរណៈ › » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរគោលលទ្ធិ និង សេចក្ដីសញ្ញា ឆ្នាំ ២០២១ ( ឆ្នាំ ២០២០ )

« ថ្ងៃទី ២៥–៣១ ខែ មករា ។ គោលលទ្ធិ និង សេចក្ដីសញ្ញា ៦–៩ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២១

ថ្ងៃទី ២៥–៣១ ខែ មករា

គោលលទ្ធិ និង សេចក្ដីសញ្ញា ៦–៩

« នេះគឺជាវិញ្ញាណនៃវិវរណៈ »

ព្រះអម្ចាស់បើកសម្ដែងសេចក្ដីពិតដល់យើងនៅក្នុងគំនិត និងដួងចិត្ត ( សូមមើល គោលលទ្ធិ និង សេចក្ដីសញ្ញា ៨:២–៣ ) ។ នៅពេលបងប្អូនអាន គោលលទ្ធិ និង សេចក្ដីសញ្ញា ៦–៩ សូមកត់ត្រាចំណាប់អារម្មណ៍ណាមួយដែលបងប្អូនបានទទួល ។

កត់ត្រាចំណាប់អារម្មណ៍របស់បងប្អូន

នៅរដូវស្លឹកឈើជ្រុះនៃឆ្នាំ ១៨២៨ គ្រូបង្រៀនវ័យក្មេងម្នាក់ឈ្មោះ អូលីវើរ ខៅឌើរី បានទទួលការងារបង្រៀននៅ មេនឆេសធើរ ទីក្រុង នូវយ៉ោក ហើយបានស្នាក់នៅជាមួយគ្រួសាររបស់ លូស៊ី និង យ៉ូសែប ស្ម៊ីធ ស៊ីញ្ញ័រ ។ អូលីវើរ បានឮអំពីកូនប្រុសរបស់ពួកគាត់ឈ្មោះ យ៉ូសែប ដែលពេលនេះរស់នៅក្នុងភូមិ ហាម៉ូនី រដ្ឋ ផេនសិលវេញ៉ា ហើយ អូលីវើរ ដែលចាត់ទុកខ្លួនឯងថាជាអ្នកស្វែងរកសេចក្ដីពិត ចង់ដឹងបន្ថែមទៀត ។ គ្រួសារ ស្ម៊ីធ បានរៀបរាប់ពីការយាងមករបស់ពួកទេវតា កំណត់ត្រាពីបុរាណ និងអំណោយទានដើម្បីបកប្រែដោយព្រះចេស្ដានៃព្រះ ។ អូលីវើរ បានចាប់អារម្មណ៍យ៉ាងខ្លាំង ។ តើវាអាចពិតទេ ? លូស៊ី និង យ៉ូសែប ស៊ីញ្ញ័រ បានផ្ដល់ដំបូន្មានដល់លោកដែលដំបូន្មាននេះអនុវត្តចំពោះមនុស្សគ្រប់គ្នាដែលស្វែងរកសេចក្ដីពិត ៖ អធិស្ឋាន ហើយទូលសូមដល់ព្រះអម្ចាស់ ។

អូលីវើរ បានធ្វើតាម ហើយព្រះអម្ចាស់បានឆ្លើយតប ដោយមានបន្ទូលដោយសេចក្ដីសុខសាន្ដ និងការធានាម្តងទៀតដល់គំនិតរបស់ អូលីវើរ ។ អូលីវើរ បានរកឃើញថា វិវរណៈអាចមានផ្ទាល់ខ្លួន—អ្វីមួយដែលលោកនឹងរៀនកាន់តែច្រើនថែមទៀតក្នុងខែខាងមុខនេះ ។ វិវរណៈ មិនមែនគ្រាន់តែសម្រាប់ព្យាការីប៉ុណ្ណោះទេ វាមានសម្រាប់គ្រប់គ្នា ដែលប្រាថ្នាចង់បាន ហើយស្វែងរកវា ។ អូលីវើរ មិនបានដឹងអ្វីគ្រប់យ៉ាងនៅឡើយទេ ប៉ុន្ដែលោកបានដឹងគ្រប់គ្រាន់ល្មមដើម្បីរៀបវិធានការបន្ទាប់ទៀត ។ ព្រះអម្ចាស់កំពុងធ្វើអ្វីមួយសំខាន់តាមរយៈ យ៉ូសែប ស៊្មីធ ហើយ អូលីវើរ ចង់ក្លាយជាផ្នែកមួយនៃការណ៍នេះ ។

សម្រាប់ព័ត៌មានបន្ថែមស្ដីពីប្រវត្តិសាស្ដ្រនៅក្រោយ គោលលទ្ធិ និង សេចក្តីសញ្ញា ៦–៩ សូមមើល Saints ១:៥៨–៦៤; « Days of Harmony » ( វីដេអូ នៅលើគេហទំព័រ ChurchofJesusChrist.org ) ។

គំនិតយោបល់សម្រាប់ការសិក្សាព្រះគម្ពីរផ្ទាល់ខ្លួន

គោលលទ្ធិ និង សេចក្ដីសញ្ញា ៦; ៨–៩

ព្រះវរបិតាសួគ៌មានបន្ទូលមកខ្ញុំតាមរយៈ « ព្រះវិញ្ញាណនៃសេចក្ដីពិត » ។

នៅរដូវផ្ការីកនៃឆ្នាំ ១៨២៩ អូលីវើរ ខៅឌើរី បានធ្វើដំណើរទៅកាន់ភូមិហាម៉ូនី ហើយស្ម័គ្រចិត្តធ្វើជាស្មៀនរបស់ យ៉ូសែប ស្ម៊ីធ នៅពេលលោកបកប្រែព្រះគម្ពីរមរមន ។ ឥឡូវនេះ អូលីវើរ បានឃើញច្បាស់ពីដំណើរការវិវរណៈនៃការបកប្រែ ។ បទពិសោធន៍នេះធ្វើឲ្យលោករំភើប ហើយលោកបានឆ្ងល់ថា តើលោកក៏អាចមានពរឲ្យមានអំណោយទានបកប្រែឬអត់ ។ ព្រះអម្ចាស់បានអនុញ្ញាតឲ្យលោកសាកល្បងបកប្រែ ប៉ុន្ដែការទទួលវិវរណៈគឺថ្មីសម្រាប់ អូលីវើរ ហើយការសាកល្បងរបស់លោកមិនបានសម្រេចឡើយ ។ លោកត្រូវរៀនអ្វីជាច្រើនទៀត ហើយ គោលលទ្ធិ និង សេចក្ដីសញ្ញា ៦, ៨ និង ៩ បង្ហាញថា ព្រះអម្ចាស់សព្វព្រះទ័យបង្រៀនលោក ។

នៅពេលបងប្អូនអានកណ្ឌទាំងនេះ សូមកត់សម្គាល់អ្វីដែលព្រះអម្ចាស់បានបង្រៀនអំពីវិវរណៈផ្ទាល់ខ្លួន ។ តើព្រះបន្ទូលរបស់ទ្រង់ទាក់ទងនឹងបទពិសោធន៍ដែលបងប្អូនបានមាន—ឬចង់មានដោយរបៀបណា ?

ឧទាហរណ៍ តើ គោលលទ្ធិ និង សេចក្តីសញ្ញា ៦:៥–៧, ៨:១, ៩:៧–៨ ផ្ដល់យោបល់អំពីអ្វីខ្លះ ដែលព្រះអម្ចាស់តម្រូវពីបងប្អូន មុនពេលទ្រង់នឹងបើកបង្ហាញព្រះទ័យរបស់ទ្រង់ ?

តើបងប្អូនរៀនបានអ្វីខ្លះមកពី គោលលទ្ធិ និង សេចក្ដីសញ្ញា ៦:១៤–១៧, ២២–២៤, ៨:២–៣; ៩:៧–៩ អំពីរបៀបខុសគ្នាដែលវិវរណៈអាចកើតមាន ?

តើមានអ្វីផ្សេងទៀត ដែលបងប្អូនបានរៀនអំពីវិវរណៈមកពីកណ្ឌទាំងនេះ ?

ដើម្បីរៀនបន្ថែមទៀតអំពីវិវរណៈ សូមមើល រ័សុល អិម ណិលសុន « Revelation for the Church, Revelation for Our Lives » Ensign ឬ Liahona ខែ ឧសភា ឆ្នាំ ២០១៨ ទំព័រ ៩៣–៩៦, ជូលី ប៊ី ប៊េក « And upon the Handmaids in Those Days Will I Pour Out My Spirit » Ensign ឬ Liahona ខែ ឧសភា ឆ្នាំ ២០១០ ទំព័រ ១០–១២ ។ សម្រាប់ព័ត៌មានបន្ថែមអំពី « អំណោយទាននៃលោកអើរ៉ុន » ដែលបានរៀបរាប់នៅក្នុង កណ្ឌទី ៨ សូមមើល « Oliver Cowdery’s Gift » Revelations in Context ទំព័រ ១៥–១៩ ។

ដើម្បីរៀនបន្ថែមអំពីអ្វីដែលព្យាការី និងពួកសាវកនៅរស់កំពុងបង្រៀនអំពីវិវរណៈ សូមមើលកម្រងវីដេអូ « ស្តាប់ទ្រង់ ! » ។

គោលលទ្ធិ និង សេចក្តីសញ្ញា ៦:១៨–២១, ២៩–៣៧

សូមគិតដល់ព្រះគ្រីស្ទគ្រប់គំនិតទាំងអស់ ។

ទោះបីជា យ៉ូសែប បានដកពិសោធន៍ « កាលៈទេសៈដ៏ពិបាកៗ » ខណៈពេលធ្វើកិច្ចការរបស់ព្រះអម្ចាស់ក្ដី ( គោលលទ្ធិ និង សេចក្ដីសញ្ញា ៦:១៨ ) ក៏លោក និង អូលីវើរ ហាក់មិនដឹងថា កាលៈទេសៈទាំងនោះនឹងពិបាកខ្លាំងប៉ុណ្ណាឡើយ ក្នុងរយៈពេលបីបួនឆ្នាំខាងមុខទៀត ។ ប៉ុន្ដែព្រះអម្ចាស់បានជ្រាប ហើយទ្រង់ជ្រាបពីឧបសគ្គអ្វីដែលនៅក្នុងអនាគតរបស់បងប្អូនផងដែរ ។ ការប្រឹក្សារបស់ទ្រង់ចំពោះ យ៉ូសែប និង អូលីវើរ នៅក្នុង គោលលទ្ធិ និង សេចក្តីសញ្ញា ៦:១៨–២១, ២៩–៣៧ ក៏អាចជួយបងប្អូនបានដែរ ។ តើ យ៉ូសែប និងអូលីវើរ អាចមានអារម្មណ៍យ៉ាងណា ក្រោយពីបានឮពាក្យទាំងនេះ ? តើបងប្អូនរកឃើញអ្វីខ្លះនៅក្នុងខគម្ពីរទាំងនេះ ដែលជួយបងប្អូនឲ្យទុកចិត្តទៅលើព្រះអម្ចាស់ ? តើបងប្អូនអាចគិតដល់ព្រះគ្រីស្ទ កាន់តែខ្លាំងឡើងនៅក្នុងជីវិតរបស់បងប្អូនដោយរបៀបណា ?

គោលលទ្ធិ និង សេចក្តីសញ្ញា ៦–៧; ៩:៣, ៧–១៤

« ដរាបណាអ្នកមានបំណងចង់បានពីយើង នោះនឹងបានសម្រេចដល់អ្នក » ។

សូមកត់ចំណាំចំនួនដងនៃការប្រើពាក្យដូចជា « មានបំណង » ឬ « ប្រាថ្នា » ដែលលេចឡើងនៅក្នុង កណ្ឌទី ៦ និង ៧ ។ តើបងប្អូនរៀនអ្វីខ្លះចេញមកពីកណ្ឌទាំងនេះអំពីសារៈសំខាន់ដែលព្រះដាក់លើបំណងរបស់បងប្អូន ? សូមសួរខ្លួនឯងនូវសំណួររបស់ព្រះអម្ចាស់នៅក្នុង គោលលទ្ធិ និង សេចក្ដីសញ្ញា ៧:១ ៖ « តើអ្នកប្រាថ្នាអ្វី ? »

បំណងដ៏សុចរិតមួយរបស់ អូលីវើរ ខៅឌើរី—គឺការបកប្រែដូចជា យ៉ូសែប ស្ម៊ីធ ដែរ—មិនត្រូវបានបំពេញឡើយ ។ នៅពេលបងប្អូនអាន គោលលទ្ធិ និង សេចក្ដីសញ្ញា ៩:៣, ៧–១៤ តើបងប្អូនទទួលបានចំណាប់អារម្មណ៍អ្វីខ្លះ ដែលអាចជួយបងប្អូន នៅពេលបំណងសុចរិតរបស់បងប្អូនមិនត្រូវបានបំពេញនោះ ?

សូមមើលផងដែរ គោលលទ្ធិ និង សេចក្ដីសញ្ញា ១១:៨; ដាល្លិន អេក អូក « Desire » Ensign ឬ Liahona ខែ ឧសភា ឆ្នាំ ២០១១ ទំព័រ ៤២–៤៥ ។

គោលលទ្ធិ និង សេចក្តីសញ្ញា បដាធនធានប្រវត្តិសាស្រ្ត — មើលឥឡូវនេះ

គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្រុមគ្រួសារ

គោលលទ្ធិ និង សេចក្តីសញ្ញា ៦:៧, ១៣ ។តើបងប្អូនអាចជួយដល់គ្រួសាររបស់បងប្អូនឲ្យយល់ថា « ទ្រព្យសម្បត្តិ » ពិត គឺរកបាននៅក្នុងជីវិតដ៏នៅអស់កល្បជានិច្ច ដោយរបៀបណា ? ( ខទី ៧ ) ។ បងប្អូនអាចអញ្ជើញសមាជិកគ្រួសារឲ្យធ្វើលុយលេងៗ ហើយសរសេរ ឬគូរនៅលើលុយពីពរជ័យជាច្រើន ដែលគ្រួសារបងប្អូនបានទទួលដោយសារតែដំណឹងល្អដែលបានស្ដារឡើងវិញនេះ ។

គោលលទ្ធិ និង សេចក្តីសញ្ញា ៦:១៥, ២២–២៣; ៨:២–៣; ៩:៧–៩ ។ការអានខគម្ពីរទាំងនេះអំពីរបៀបដែលព្រះមានបន្ទូលទៅកាន់បុត្រាបុត្រីរបស់ទ្រង់ អាចជាឱកាសដ៏អស្ចារ្យមួយដើម្បីចែកចាយជាមួយគ្រួសារបងប្អូនអំពីរបៀប ដែលទ្រង់បានមានបន្ទូលមកកាន់បងប្អូន ។

គោលលទ្ធិ និង សេចក្តីសញ្ញា ៦:៣៣–៣៧ ។សមាជិកគ្រួសារអាចចែកចាយរបៀបនានា ដែលពួកគេអាច « ធ្វើល្អ » ទោះជាពេលពួកគេមានអារម្មណ៍ថាខ្លាចក្ដី ។ វាក៏អាចជួយបាន ពេលមើលសារលិខិតខ្លះ ឬទាំងអស់មកពីអែលឌើរ រ៉ូណល អេ រ៉ាសបាន « Be Not Troubled » ( Ensign ឬ Liahona ខែ វិច្ឆិកា ឆ្នាំ ២០១៨ ទំព័រ ១៨–២១ ) ។ តើការ « មើលមកឯ [ ព្រះគ្រីស្ទ ] ដោយនូវគ្រប់ទាំងគំនិត » ( ខទី ៣៦ ) មានន័យដូចម្ដេច ? តើមានគំរូផ្សេងទៀតណាខ្លះពីមនុស្សដែលបានងាកទៅរកព្រះអម្ចាស់ ដើម្បីយកឈ្នះលើការសង្ស័យ និងការភ័យខ្លាច ? ( ឧទាហរណ៍ សូមមើល អេសធើរ ៤, អាលម៉ា ២៦:២៣–៣១ ) ។

គោលលទ្ធិ និង សេចក្ដីសញ្ញា ៨:១០ ។នេះអាចជាឱកាសដ៏អស្ចារ្យមួយដើម្បីចែកចាយពីរបៀប ដែលសេចក្ដីជំនឿលើព្រះយេស៊ូវគ្រីស្ទ បានពង្រឹងបងប្អូន និងគ្រួសាររបស់បងប្អូន ។ ហេតុអ្វីវាសំខាន់ដែលយើងត្រូវ « សុំដោយនូវសេចក្ដីជំនឿ » ? តើបងប្អូនបានឃើញពរជ័យអ្វីខ្លះ មកពីការស្វែងរកចម្លើយ ឬជំនួយដោយនូវសេចក្ដីជំនឿ ?

សម្រាប់គំនិតបន្ថែមសម្រាប់ការបង្រៀនដល់កុមារ សូមមើល គម្រោងមេរៀនសប្ដាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់ថ្នាក់បឋមសិក្សា ។

ចម្រៀងស្នើ ៖ « ហ៊ាននឹងធ្វើត្រូវ » សៀវភៅចម្រៀងកុមារ ទំព័រ ៨០ ។

សំឡេងនៃការស្តារឡើងវិញ

ការបកប្រែព្រះគម្ពីរមរមន

នៅខែ មេសា ឆ្នាំ ១៨២៩ ជាខែដែល កណ្ឌទី ៦–៩ នៃគម្ពីរគោលលទ្ធិ និង សេចក្តីសញ្ញាត្រូវបានទទួល នោះកិច្ចការចម្បងរបស់ យ៉ូសែប ស្ម៊ីធ គឺការបកប្រែព្រះគម្ពីរមរមន ។ នៅពេលសួរក្រោយមកអំពីរបៀបដែលកំណត់ត្រានេះត្រូវបានបកប្រែ យ៉ូសែបបានពោលថា « ការណ៍នោះមិនមានបំណងប្រាប់ដល់ពិភពលោកនេះនូវការជាក់លាក់ទាំងអស់នោះទេ » ។^១ ជាញឹកញាប់ លោកគ្រាន់តែនិយាយថា វាត្រូវបានបកប្រែ « ដោយអំណោយទាន និងព្រះចេស្ដានៃព្រះ » ។^២

យើងពុំដឹងអំពីរឿងលម្អិតច្រើនអំពីដំណើរការ នៃការបកប្រែប្រកបដោយអព្ភូតហេតុនេះទេ ប៉ុន្តែយើងបានដឹងថា យ៉ូសែប ស៊្មីធ គឺជាអ្នកមើលឆុត ត្រូវបានជួយដោយឧបករណ៍ទាំងឡាយដែលព្រះបានរៀបចំទុក ៖ ត្បូងថ្លាពីរដុំ ដែលហៅថា យ៉ូរីម និងធូមីម ហើយត្បូងមួយផ្សេងទៀតដែលហៅថា ត្បូងអ្នកមើលឆុត ។^៣

សេចក្ដីថ្លែងការណ៍ដូចខាងក្រោមនេះ មកពីសាក្សីផ្ទាល់ភ្នែកចំពោះដំណើរការបកប្រែនោះ គាំទ្រដល់សាក្សីរបស់ យ៉ូសែប ។

ប្រអប់ឈើរបស់ហៃរ៉ុម ស្ម៊ីធ ដែលដាក់ផ្ទាំងចំណារមាស — គេជឿថា ប្រអប់នេះ ដែលជារបស់ហៃរ៉ុម ស្ម៊ីធ ត្រូវបានប្រើដើម្បីលាក់ផ្ទាំងចំណារមាសបណ្ដោះអាសន្ន ។

អិមម៉ា ស្ម៊ីធ

« នៅពេលស្វាមីខ្ញុំកំពុងបកប្រែព្រះគម្ពីរមរមន ខ្ញុំបានជួយសរសេរគម្ពីរនេះបានមួយផ្នែក កាលគាត់បានហៅប្រយោគនីមួយៗ មួយពាក្យម្ដងៗ ហើយនៅពេលគាត់បានឃើញឈ្មោះខ្លះដែលគាត់មិនអាចបញ្ចេញសំឡេងបាន ឬពាក្យវែងៗ គាត់បានប្រកបវា ហើយខណៈខ្ញុំកំពុងសរសេរវា ប្រសិនបើខ្ញុំសរសេរអក្សរខុស នោះគាត់នឹងបញ្ឈប់ខ្ញុំ ហើយកែតម្រូវការប្រកបរបស់ខ្ញុំ ទោះបីជាវាមិនអាចទៅរួចក្ដី ដែលគាត់ត្រូវមើលរបៀបខ្ញុំសរសេរក្នុងពេលនោះ ។ សូម្បីពាក្យ សារ៉ា ជាដំបូងគាត់មិនអាចអានវាបានទេ ប៉ុន្ដែគាត់បានប្រកបពាក្យនេះ ហើយខ្ញុំបានអានឲ្យគាត់ស្ដាប់ » ។^៤

« ជារឿយៗផ្ទាំងចំណារដាក់នៅលើតុដោយគ្មានការលាក់លៀម ដោយខ្ចប់ក្នុងក្រណាត់តូចមួយ ដែលខ្ញុំបានឲ្យគាត់សម្រាប់រុំផ្ទាំងនោះ ។ មានម្ដងនោះខ្ញុំបានប៉ះផ្ទាំងចំណារនោះ ដោយសារវានៅលើតុ ធ្វើឲ្យខ្ញុំដឹងពីរាង និងទម្រង់របស់វា ។ វាមើលទៅអាចបត់បែនបានដូចជាក្រដាសក្រាស់ ហើយឮសូរសំឡេងដែកក្រិកៗ ពេលជ្រុងវាត្រូវបើកដោយមេដៃ ដូចដែលមនុស្សម្នាក់នឹងបើកទំព័រសៀវភៅដោយមេដៃពេលខ្លះ ។ …

« ជំនឿខ្ញុំគឺថា ព្រះគម្ពីរមរមនគឺជាការសម្ដែងពិតមកពីព្រះ—ខ្ញុំមិនមានការសង្ស័យសូម្បីតែបន្ដិចសោះឡើយ ។ ខ្ញុំពេញចិត្តព្រោះ គ្មានមនុស្សណាម្នាក់អាចសូត្រអក្សរនៅលើចំណារនោះបានឡើយ លើកលែងតែគាត់បានទទួលការបំផុសគំនិត ពីព្រោះថាពេលខ្ញុំធ្វើជាជំនួយការរបស់គាត់ [ យ៉ូសែប ] នឹងហៅឲ្យខ្ញុំស្ដាប់ជាច្រើនម៉ោង ហើយពេលត្រឡប់មកពីទទួលទានអាហារ ឬក្រោយពីការរំខាន គាត់នឹងចាប់ផ្ដើមនៅត្រង់កន្លែងដែលគាត់បានបញ្ចប់ពីមុន ដោយពុំចាំបាច់មើលសៀវភៅសរសេរនោះ ឬឲ្យគេអានផ្នែកណាមួយនៃការសរសេរនោះឲ្យគាត់ស្ដាប់នោះឡើយ ។ នេះគឺជារឿងសាមញ្ញមួយដែលគាត់ធ្វើ ។ វាគួរឲ្យជឿបើសិន មនុស្សបានរៀនសូត្រម្នាក់អាចធ្វើការណ៍នេះបាន ប៉ុន្តែសម្រាប់មនុស្សម្នាក់ដែលមិនចេះដឹង និងមិនបានរៀនសូត្រដូចគាត់ វាពិតជាមិនអាចទៅរួចទេ » ។^៥

អិមម៉ា ស្ម៊ីធ ជួយក្នុងការបកប្រែ — រចនារូបភាពរបស់អិមម៉ា និងយ៉ូសែប ស្ម៊ីធ ដោយ ម៉ៃឃើល ធីម៉លម៍

អូលីវើរ ខៅឌើរី

« ខ្ញុំបានសរសេរដោយស្លាបប៉ាកកាខ្ញុំផ្ទាល់ គឺព្រះគម្ពីរមរមនទាំងស្រុង ( លើកលែងតែពីរបីទំព័រ ) ដែលត្រូវបានថ្លែងចេញពីមាត់របស់ព្យាការី យ៉ូសែប ស៊្មីធ ហើយលោកបានបកប្រែវាដោយអំណោយទាន និងព្រះចេស្ដានៃព្រះ ដោយប្រើយូរីម និងធូមីម ឬតាមរបៀបដែលព្រះគម្ពីរនោះបានហៅថាជាអ្នកបកប្រែដ៏បរិសុទ្ធ ។ ខ្ញុំបានឃើញដោយភ្នែករបស់ខ្ញុំផ្ទាល់ ហើយបានកាន់ដោយដៃខ្ញុំផ្ទាល់ ជាផ្ទាំងចំណារមាសដែលវាបានដកស្រង់ចេញ ។ ខ្ញុំក៏បានឃើញអ្នកបកប្រែផងដែរ » ។^៦

យ៉ូសែប ស៊្មីធ និង អូលីវើរ ខៅឌើរី កំពុងបកប្រែផ្ទាំងចំណារមាស — យ៉ូសែប ស៊្មីធ និង អូលីវើរ ខៅឌើរី បានរៀនយ៉ាងច្រើនតាមរយៈដំណើរការនៃការបកប្រែផ្ទាំងចំណារមាស ។