“Pāpode 15–21. Katak im Bujen Ko 14–17: ‘Jutak āinwōt juon Rikam̧ool,’” Itok, Ļoor Eō—N̄an Kajjojo Armej im Baam̧le ko: Katak im Bujen Ko 2021 (2020)
“Pāpode 15–21. Katak im Bujen Ko 14–17,” Itok, Ļoor Eō—N̄an Kajjojo Armej im Baam̧le ko: 2021
Pāpode 15–21
Katak im Bujen Ko 14–17
“Jutak āinwōt juon Rikam̧ool”
Baam̧le eo an Josep Smith im ro m̧ōttaer jet iien raar kajjitōk ippān n̄an kappukōt revelesōn kōn ta eo Anij eaar kōņaan bwe ren kōm̧m̧ane. Ilo am̧ riiti revelesōn kein, ļōmņak kōn ta tōl eo ewōr ippān Anij n̄an kwe.
Je En̄jake ko Rej Im̧we Eok
Men̄e jerbal in ukook eo eaar em̧m̧an an kar wōnm̧aanļo̧k, epaakeļo̧k Māe 1829 eo jekjek eo ilo Harmony eaar jino an penļo̧k n̄an Josep, Emma, im Oliver. Jum̧ae jān ro rūturier eaar ļapļo̧k ilo an rejtake jān baam̧le eo an Emma kar aikuj. En̄jake bwe Harmony eaar jako an em̧m̧an n̄an pād, Oliver eaar kajjitōkļo̧k ippān juon m̧ōttan eo eaar kwaļo̧k itok limo eo an ilo jerbal eo an Josep: David Whitmer. David eaar jokwe ippān ro jinen im jemān im ro jein im jatin ilo Fayette, New York, enan̄in 100 m̧aiļ ko rettoļo̧k. Eaar ioon Oliver juon iiō m̧oktaļo̧k, im Oliver eaar jeje n̄an e jet leta ko jān iien eo, kwaļo̧k en̄jake ko an jān jerbal ippān Rikanaan eo. Jim̧or David ak jabdewōt ilo baam̧le eo an renan̄in kar ioon Josep. Bōtaab ke Oliver eaar kajjitōk eļan̄n̄e e im Josep maron̄ in kar em̧m̧akūtļo̧k n̄an m̧weo im̧ōn Whitmer ro n̄an kadedeļo̧k ukook eo an Bok in Mormon, Whitmer ro raar pojak in kōpeļļo̧k kōjām ko aer. Im eaar lōn̄ men ko Irooj eaar kakuņi n̄an Whitmer ro jān baj leļo̧k wōt jikin jokwe n̄an Rikanaan eo. Eaar wōr ippān jet naan in kōmeļeļe ko rejenolo̧k n̄an er wōt, loi ilo Katak im Bujen Ko 14–17, im ilo iien eo ejetjet raar erom juon iaan baam̧le ko raar jino Kabun̄ in im Rikam̧ool ro n̄an kwaļo̧ktok Jepļaaktok eo.
Kōn eļapļo̧k kōn baam̧le eo an Whitmer, lale Saints, 1:68–71.
Ļōm̧ņak ko n̄an Ekkatak Jeje Ko Rekwojarjar Ippam̧ Make
Imaron̄ bōk kuņaō ilo “juon jerbal eļap im kabwilōn̄lōn̄” an Anij.
Ke eaar ioon Josep Smith, David Whitmer eaar juon likao ekūtarre n̄an jerbal ilo jikin kallūb eo an baam̧le eo. Bōtaab ekar wōr juon an Irooj jerbal eoktakļo̧k n̄an David—men̄e ilo jet wāween ko eaar jidik āinwōt kallūb. Ilo am̧ riiti Katak im Bujen Ko 14:1–4, kile ekōjkan an Irooj keidi jerbal eo An n̄an kain jerbal eo David eaar imminene kake. Ta eo kwoj ekkatak kōn jerbal eo an Irooj jān keidi in?
Ekōjkan am̧ maron̄ “bun̄raake sickle eo [am̧]”? (eoon 4). Kile kallim̧ur ko kar litok ilo aolepān jekjōn in n̄an ro me rej “kappkot n̄an kōjerkak im kajutak … Zaion” (eoon 6).
Naan in Anij ej “em̧ōkaj kanooj kajoor.”
Irooj eaar keidi An in naan n̄an juon “jāje eo eruo mejān” (Katak im Bujen Ko 14:2). Ta eo keidi in ekar elmakote n̄an kwe kōn naan eo an Anij? N̄an waanjon̄ak, ekōjkan An in naan m̧ōkaj, kanooj kajoor, im ekkan̄? Ekōjkan am̧ kar en̄jake kajoor eo an naan eo an Anij?
Ļōmņak kōn wāween ko jet Anij ej kōmeļeļeik An naan. N̄an waanjon̄ak, ta eo kwoj ekkatak kōn an in naan an Anij jān keidi ko ilo eoon kein?
Irooj eaar keidi An in naan n̄an juon jāje.
Mour indeeo ej “mennin letok eo eļaptata ian menin letok ko an Anij.”
Ilo am̧ riiti Katak im Bujen Ko 14:7, kejōkļo̧kjeņ kōn etke mour indeeo ej “mennin letok eo eļaptata ian mennin letok ko an Anij.” Kōļmenļo̧kjeņ in jān Rikanaan Russell M. Nelson emaron̄ jipan̄: “Ium̧win karōk in m̧ōņōņō eo eļap an Anij, baam̧le ko remaron̄ liāp ilo tampeļ ko im m̧aanjabpopo n̄an bar ro̧o̧l n̄an jokwe im̧aan Mejān ekwojajar indeeo. En̄in ej mour indeeo!” (“Kam̧m̧oolol ko Liļo̧k n̄an Anij,” Ensign ak Kweilo̧k eo Eļap, Māe 2012, 77).
Ļōmņak in kobaiktok eoon in jipan̄ ko n̄an eoon 7 me ejipan̄ eok meļeļe eļapļo̧k kōn mour indeeo (lale “Mour Indeeo” ilo Topical Guide ak Unin Tōl Eo N̄an Jeje Ko Rekwojarjar, scriptures.ChurchofJesusChrist.org). Ta eo kwoj ekkatak me ej im̧we eok n̄an kajjieon̄ n̄an mour indeeo?
Bōktok jetōb ko n̄an Kraist ej ļap an aorōk.
Jon im Peter Whitmer jim̧or raar kōņaan jeļā ta eo “en kar aorōk tata” ilo mour ko aer (Katak im Bujen Ko 15:4; 16:4). Em̧ōj ke am̧ ļōmņak kōn menin n̄an kwe make? Ilo am̧ riiti Katak im Bujen Ko 15–16, kejōkļo̧kjeņ etke bōktok jetōb ko n̄an Kraist ej juon ekanooj aorōk. Ekōjkan am̧ maron̄ kūrtok jetōb ko n̄an Kraist?
Lale barāinwōt Katak im Bujen Ko 18:10–16.
Irooj ej kōjerbal rikam̧ool ro n̄an kajutak An in naan.
Ta in rikam̧ool? Ta eo Irooj eaar kōjerbale rikam̧ool ro ilo jerbal eo An? (lale 2 Korint 13:1). Kejōkļo̧kjeņ kōn kajjitōk kein ilo am̧ riiti naan ko an Anij n̄an Rikam̧ool ro Jilu ilo Katak im Bujen Ko 17. Emaron̄ in barāinwōt jipan̄ n̄an bar etale “Naan in Kam̧ool eo an Rikam̧ool ro Jilu” ilo Bok in Mormon. Ekōjkan an rikam̧ool ro jipan̄ bōktok “jibadbad ko rejim̧we”? an Anij (eoon 4).
Kwar jeļā ke bwe Mary Whitmer eaar barāinwōt bōk juon kam̧ool kōn pileij kooļ ko? Enjeļ Moronai eaar kwaļo̧ki n̄an liin ānwōt juon kile kaarmejete ko an kar kōm̧m̧ani ke Josep, Emma, im Oliver raar jokwe ilo m̧weo im̧ōn (lale Saints, 1:70–71). Ta eo kwoj ekkatak jān en̄jake eo an liin kōn bōk juon kam̧ool?
Barāinwōt lale Saints, 1:73–75; Ulisses Soares, “Waļo̧ktok eo an Bok in Mormon,” Ensign ak Liaona, Māe 2020, 32–35.
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota
-
Katak im Bujen Ko 14:1–4.Ļōmņak in kūr baam̧le eo am̧ n̄an kappukōt eoon ko reiookļo̧k kōm̧m̧an jikin kallūb ilo eoon kein. Etke Irooj emaron̄ in keidi jerbal eo An n̄an juon m̧adm̧ōd? Ta eo jemaron̄ kōm̧m̧ane n̄an jipan̄ ilo jerbal eo An?
-
Katak im Bujen Ko 14:2.Makūtkūt eo n̄an eoon in ilo “Ļōmņak ko n̄an Ekkatak Jeje Ko Rekwojarjar an Juon Make” ej kōllaajrak jet eoon ko ilo jeje ko rekwojarjar kōn naan eo an Anij. Bōlen ro uwaan baam̧le eo remaron̄ riit kaki im kwaļo̧k ta eo rej ekkatak. Ekōjkan an eoon in jeje kein rekwojarjar im̧we eok n̄an “eo̧ron̄” naan eo an Anij?
-
Katak im Bujen Ko 15:6; 16:6.Eoon kein remaron̄ im̧we juon iien bwebwenato kōn men ko me rej lukkuun aorōk n̄an baam̧le eo am̧ (lale barāinwōt Katak im Bujen Ko 18:10).
-
Katak im Bujen Ko 17.Baam̧le eo am̧ emaron̄ itok limoier in jin̄aik pija ko kōn kajjojo men ko Rikam̧ool ro Jilu raar loi (lale eoon 1). Ilo am̧ riiti jekjōn 17, pukōt eoon ko me rej katakin kōn aorōk eo an Bok in Mormon. Ekōjkan ad maron̄ erom juon rikam̧ool kōn Bok in Mormon? Baam̧le eo am̧ emaron̄ barāinwōt alooje pija in alooj eo “A Day for the Eternities” (ChurchofJesusChrist.org).
Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.
Al eo kar elmakote: “Emaron̄ Jab Ion Tol Eutiej,” Al Ko Al In Ajri, nō. 36.
Ainikien ko an Jepļaaktok eo
Lucy Mack Smith im Rikam̧ool ro Jilu im Ruwalitōk
Enjeļ Moronai eaar kwaļo̧k pileij kooļ ko n̄an Josep Smith, Oliver Cowdery, David Whitmer, im Martin Harris ilo wōjke ko epaake m̧weo im̧ōn Whitmer ro ilo Fayette, New York. Ro jinen im jemen Josep raar loļo̧k Whitmer ro ilo iien eo. Lucy Mack Smith, jinen Josep, eaar kōmeļeļeik kilaan eo en̄jake in ekabwilōn̄lōn̄ eaar ilo rikam̧ool ro:
“Ekar ikōtaan jilu im emān awa. Mrs. Whitmer im Mr. Smith im n̄a kar jijet ilo juon ruum̧ in kiki. Iaar jijet turin jikin kiki eo. Ke Josep eaar deļo̧n̄tok, eaar oļo̧kļo̧k iturū. ‘Baba! Mama!’ eaar ba. ‘Kom̧ro ejjab jeļā ewi jon̄an aō m̧ōņōņō. Irooj eaar kōm̧m̧an bwe pileij ko ren kwaļo̧ki n̄an bar jilu ijello̧kū, ro raar barāinwōt lo juon enjeļ im naaj aikuj in kam̧ool n̄an m̧ool eo kōn ta eo iaar ba. Bwe rejeļā kōn er make bwe iaar jab kajjieon̄ m̧oņe armej ro. Im ij en̄jake āinwōt men̄e iaar deoor jān juon eddo ekamijak, eo eaar enan̄in kar kanooj ļap n̄an eō n̄an niknik kake. Bōtaab renaaj kiiō aikuj in bōk jidik in, im ej kam̧ōņōņōik aō bwe ejako aō make iaō ilo laļ in.’ Innām̧ Martin Harris eaar deļo̧n̄tok. Eaar āinwōt enan̄in lutōkļo̧k kōn tōrjān jon̄an lan̄lōn̄. Innām eaar kam̧ool n̄an ta eo eaar loe im ron̄, āinwōt bar ro jet raar, Oliver im David. Naan in kam̧ool eo aer eaar juon wōt meļeļe in me epād ie ilo Bok in Mormon. …
“Eļap tata Martin Harris eaar āinwōt elukkuun in maron̄ jab kōmeļeļeik en̄jake ko an ilo naan ko. Eaar ba, ‘Em̧ōj kiiō aō lo juon enjeļ jān Lan̄ eo eaar ilo m̧ool kam̧ool kōn m̧ool eo an aolep men ko iaar ron̄ ikkijien ļo̧o̧k eo, im māj ko meja raar lo e. Iaar barāinwōt lo pileij ko im kar jibwi kōn pā ko peiū im maron̄ kam̧ool kōn ejja kōn wōt n̄an aolepān laļ in. Bōtaab em̧ōj aō kar bōk kōn n̄a make juon kam̧ool bwe naan ko rejjab maron̄ kwaļo̧ki, bwe ejjeļo̧k lo emaron̄ kōmeļeļeik, im ij m̧ōņōņō Anij ilo m̧ool eo an jetōb eo aō bwe eaar kōn jouj kāālet n̄an kōm̧m̧an bwe in, em̧ool n̄a, juon rikam̧ool an jerbal eo an eļap im ej karōke [ilo] etan ajri ro nejin armej.’ Oliver im David raar barāinwōt kobaļo̧k ippān ilo kōkwojarjar nōbar Anij kōn em̧m̧an im tūriam̧o eo an. Kōm kar bar jepļakļo̧k n̄an ijo jikim [n̄an Palmyra, New York,] raan tok juon kōn ippān juon kumi em̧ōņōņō, elan̄lōn̄.”1
Pija ko an Oliver Cowdery, David Whitmer, im Martin Harris jān Lewis A. Ramsey
Lucy Mack Smith eaar barāinwōt pād ke Rikam̧ool ro Ruwalitōk raar bar ro̧o̧lļo̧k jān en̄jake eo aer:
“Ālkin an rikam̧ool rein kar ro̧o̧ltok n̄an m̧weo, enjeļ eo eaar bar juon alen kwaļo̧k e n̄an Josep; ilo iien eo Josep eaar kōro̧o̧lļo̧k pileij ko n̄an pein. Ilo joteen eo kōm kar kōm̧m̧ane juon kweilo̧k, ilo eo aolep rikam̧ool ro raar kwaļo̧k naan in kam̧ool eo n̄an m̧ool ko āinwōt kar kwaļo̧k itulōn̄; im aolepān baam̧le eo am, em̧ool n̄an Don Carlos [Smith], eo eaar 14 wōt iiō dettan, kar kam̧ool kōn m̧ool eo an tōre in iien bōk eddo eo ilo raan ko āliktata—bwe eaar ilo iien eo lukkuun in bōk jikin.”2
Annan̄in Josep Smith im Rikam̧ool ro Ruwalitōk jān Gary Ernest Smith
Enjeļ Moronai ej Kwaļo̧k Pilije Kooļ ko n̄an Josep Smith, Oliver Cowdery, im David Whitmer, jān Gary B. Smith