“Pāpode 22–28. Katak im Bujen Ko 18–19: ‘Aorōk in Jetōb Ko Ekanooj Ļap,’” Itok, Ļoor Eō—N̄an Kajjojo Armej im Baam̧le Ko: Katak im Bujen Ko 2021 (2020)
“Pāpode 22–28. Katak im Bujen Ko 18–19,” Itok, Ļoor Eō—N̄an Kajjojo Armej im Baam̧le Ko: 2021
Jikin Kallip an Martin Harris, jān Al Rounds
Pāpode 22–28
Katak im Bujen Ko 18–19
“Aorōk in Jetōb Ko Ekanooj Ļap”
Revelesōn ko ilo Katak im Bujen Ko kar leļo̧k āinwōt uwaakin jekjek ko ralikkar epaakeļo̧k 200 iiō ko remootļo̧k, ak katak ko rej katakin rej ejjeļo̧k jem̧ļo̧kier. Kappukōt katak ko ilo am̧ riiti, im ļōmņak wāween aer iookļo̧k mour eo am̧.
Je En̄jake ko Rej Im̧we Eok
Martin im Lucy Harris kar aer juon iaan jikin kallip ro rem̧m̧an ilo Palmyra, New York. Ekar bōk elōn̄ iiō ko n̄an er n̄an katōke, ekar kamaron̄ er n̄an ejaak juon baam̧le, im kar leļo̧k n̄an er nōbar ko rem̧m̧an ilo jukjuk in pād eo. Ak ilo 1829 ekar alikkar bwe Bok in Mormon en maron̄ būriin eļan̄n̄e Martin enaaj wia kake jikin kallip eo an bwe en maron̄ kōļļā wōņeen an būriin. Martin ekar wōr an naan in kam̧ool kōn Bok in Mormon, ak Lucy ekar jab. Eļan̄n̄e Martin en kar wōnm̧aanļo̧k wōt kōn an wia kake jikin kallip eo an im Bok in Mormon jab maron̄ ļap tōprakin wiake, enaaj kar luuji jikin kallip eo an im kakkure m̧are eo an. Ilo jet iien ak bar juon iien, jej aolep jelm̧ae ejja kajjitōk ko me Martin ekar jelm̧aeiki: Ta aorōki gospel eo an Jisōs Kraist n̄an n̄a? Ta eo me ikōņaan wijlepļo̧k n̄an jipan̄ kalōk aelōn̄ in kiin̄ eo an Anij? Emaron̄ jipan̄ kōj keememej bwe ejjeļo̧k emaron̄ kōļļā eļap wōņeen n̄an kōjeram̧m̧an ajri ro ijjeļo̧kin Jisōs Kraist, “Eļaptata jān aolep” (Katak im Bujen Ko 19:18).
Martin ekar kōm̧m̧ane jokālōt in n̄an wia kake jikin kallip eo an. Kaarmājet eo an ekar kōļļā wōņāān būriin eo an jinoin kape ko 5,000 an Bok in Mormon. Im kiiō, elōn̄ļo̧k jān 190 milien kape tokālik, milien jetōb ko ipeļaakin laļin rekar jeraam̧m̧an.
N̄an meļeļe ko reļļapļo̧k kōn diwōjtok eo an Bok in Mormon, lale Rekwojarjar, 1:76–84.
Ļōmņak ko n̄an Ekkatak Jeje ko Rekwojarjar Ippam̧ Make
Irooj ej lan̄lōn̄ n̄e jej ukweļo̧k.
Lale jon̄an an ikutkut an naan ko ukweļo̧k im ukweļo̧k rej waļo̧k ilo aolepān Katak im Bujen Ko 18 im 19, im kejōkļo̧kjeņ kōn ta eo kwoj ekkatak jān eoon kein kajjojo iien rej kōjerbali. Ļōm̧ņake eļaptata Katak im Bujen Ko 18:10–16; ewi wāween an eoon kein jelōt en̄jaake eo am̧ kōn ukweļo̧k—ukweļo̧k eo am̧ im eddo eo am̧ n̄an kūr ro jet n̄an ukweļo̧k?
Bar lale Alma 36:18–21; Dale G. Renlund, “Ukweļo̧k: Juon Kālōt eo Ekam̧ōņōņō,” Ensign ak Liaona, Nob. 2016, 121–24.
Imaron̄ ron̄ ainikien Irooj ilo Katak im Bujen Ko
Eļan̄n̄e juon ekar kajjitōkin eok ainikien Irooj ej āinwōt ta, ta eo kwon kar ba? Ļōm̧ņak kōn kajjitōk in ilo am̧ riiti Katak im Bujen Ko 18:34–36. Ta eo kwaar ekkatak kake kōn ainikien Irooj jān am̧ riiti Katak im Bujen Ko? Ta eo komaron̄ kōm̧m̧ane n̄an ron̄ Ainikien ilo an alikkarļo̧k?
Jisōs Kraist ekar en̄taan bwe n̄ain maron̄ ukweļo̧k im itok n̄an E.
Kallim̧ur Ekāāl ej kōmeļeļeik en̄taan eo an Rilo̧mo̧o̧r ilo Gethsemane jān jeļā eo an ro me rekar ekkatak kake. Ilo Katak im Bujen Ko 19:15–20, Jisōs Kraist ekar ba kōn En̄taan eo An ilo naan ko An make. Ilo am̧ riiti bwebwenato in ekwojarjar, kappukōt naan ko me rej kōmeļeļe kōn en̄taan eo an Rilo̧mo̧o̧r. Ļōm̧ņak kōn kajjojo naan ak jentōj ej katakin eok. Etke Rilo̧mo̧o̧r ekar kōņaan bwen en̄taan? Ļōm̧ņak in rekoot e en̄jaake ko am̧ kōn Jisōs Kraist im en̄taan eo An kōn eok.
Lale Jon 15:13; Mosaia 3:7; Alma 7:11–12; Katak im Bujen Ko 18:10–13.
Aorōk in juon Jetōb, jān Liz Lemon Swindle
Katak im Bujen Ko 19:26–27, 34–41
Kōjeraam̧m̧an ko an Anij reļļapļo̧k jān m̧weie ko an laļ.
Bok in Mormon ekar jab lukkun ļap wiaki ilo Palmyra, āinwōt juon tōprak, Martin Harris āliktata ekar wia kake m̧ōttan eo ekilep ilo jikin kallip eo an n̄an kōļļā mūri eo (lale “The Contributions of Martin Harris,” Revelations in Context, 7–8). Kejōkļo̧kjeņ kake kaarmājet in—im kōjeram̧m̧an ko me kwaar bōki kōn menin —ilo am̧ riiti eoon kein. Komaron̄ bar ļōmņak kōn ta eo Irooj ekar kajjitōk ippam̧ n̄an kaarmejete. Ta eo kwōj loe ilo eoon kein me rej im̧we eok n̄an kōm̧m̧ane kaarmājete kein kōn “lan̄lōn̄” im “m̧ōņōņō”? (bar lale eoon ko 15–20).
Aenem̧m̧an ej itok jān ekkatak kōn Jisōs Kraist im ļoor E.
Ļōm̧ņak kōn kūr in an Rilo̧mo̧o̧r “Ekkatak kōn eō.” Ta eo kwōj ekkatak kōn Jisōs Kraist ilo Katak im Bujen Ko 19? Je ļōm̧ņak ko am̧, im kejōkļo̧kjeņ kake ewi wāween an m̧ool kein kōn an Rilo̧mo̧o̧r jipan̄ eok lo aenōm̧m̧an. Ta meļeļein n̄an eok n̄an “etetal ilo ettā in Jetōb eo [An]”?
Ļōm̧ņak ko n̄an Ekkatak Jeje ko Rekwojarjar an Baam̧le im Nokon in Jota eo an Baam̧le
-
Katak im Bujen Ko 18:1–5.Bōlen ro uwaan baam̧le eo remaron̄ kwaļo̧k jet iaan “elōn̄ wāween ko” (eoon 2) me Jetōb ekar kwaļo̧k n̄an er bwe eoon kein rem̧ool, āinwōt An kar kōm̧m̧ane n̄an Oliver Cowdery. Ewi wāween an baam̧le eo am̧ maron̄ “pedped ioon men ko em̧ōj aer jeje (eoon 3) ilo jeje ko rekwojarjar? Ewi wāween am̧ kalōk pedped eo an baam̧le eo am̧ ioon “ejm̧aan” (eoon 4) eo an gospel?
-
Katak im Bujen Ko 18:10–13; 19:16–19.Kajjojo uwaan baam̧le eo emaron̄ riiti Katak im Bujen Ko 18:10–13 im likūt etan ilo jikin naan in “jetōb,” “jetōb ko”im “aolep armej.” Innām komaron̄ kōnono kōn wāween an eoon kein jipan̄ kōj meļeļe kōn aorōk in Jemān n̄an Nejin (lale Katak im Bujen Ko 19:16–19).
-
Katak im Bujen Ko 18:21–25.Ewōr ke meļeļein etan ro uwaan baam̧le eo am̧? Bolen kwomaron̄ kōnono kake etke et ko etad raorōk im ta meļeļein n̄an bōk iood etan Jisōs Kraist (lale Mosaia 5:7). Menin emaron̄ juon iien em̧m̧an n̄an jipan̄ ro uwaan baam̧le eo kōpooj n̄an bōk iooer etan Kraist n̄e rej peptaij.
-
Katak im Bujen Ko 19:15–20.N̄an jipan̄ baam̧le eo am̧ bōk juon en̄jaake eļap meļeļein kōn eoon kein, bolen kwomaron̄ riiti ilo am̧ kwaļo̧k juon pijaan Jisōs Kraist (juon pija m̧ōttanļo̧k unin tōl eo). Ro uwaan baam̧le eo emaron̄ kwaļo̧k en̄jaake ko aer kōn Rilo̧mo̧o̧r. Juon al em̧m̧antata kōn Rilo̧mo̧o̧r eo emaron̄ karuwaineneik Jetōb eo.
N̄an ļōm̧ņak ko reļļapļo̧k n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.
Al eo kar kāālōte: “Ij Ļo̧kjeņ Aō,” Hymns, no. 193.
Kōkōm̧anm̧anļo̧k Am̧ Ekkatak Ippam̧ Make
Kajjitōk kajjitōk ko. Katak im Bujen Ko ej juon menin kam̧ool bwe kajjitōk ko rej tōl n̄an revelesōn. Ilo am̧ ekkatak jeje ko rekwojarjar, je kajjitōk ko me rej iook waj n̄an eok. Innām kejōkļo̧kjeņ im jar n̄an kappukōt uwaak ko.
Kraist ej Jar ilo Jikin Kallib Gethsemane, jān Hermann Clementz