Pāpode 8–14

Katak im Bujen ko 12–13; Josep Smith—Bwebwenato 1:66–75

“Ioomiro ro Rikarejera”

Josep Smith im Oliver Cowdery rekar bōk eļapļo̧k jeļāļo̧kjeņ ke rekar jar kōn m̧ool ko me rekar ekkatak ilo jeje ko rekwojarjar (lale Josep Smith—Bwebwenato 1:68). Ewi wāween am̧ ļoor waanjon̄ak ko aer?

Je En̄jake ko Rej Im̧we Eok

Eiten aolep armej ioon laļ in rejjan̄in ron̄ kōn juon jikin etan Harmony, Pennsylvania. Ak Irooj ekkā an kāālōt jikin ko jab jeļa kaki n̄an elōn̄ iaan m̧akūtkūt ko raorōk ilo aelōn̄ in kiin̄ eo An. Ilo juon jikin emarmare iturin Harmony ilo Māe 15, 1829, Jon Ripeptaij ekar waļo̧k āinwōt juon armej eo em̧ōj an jerkakpeje n̄an Josep Smith im Oliver Cowdery. Ekar likūt pā ko pein ioon bōraer im leļo̧k n̄an er Priesthood eo an Aron, ņa etaer “ro karejera” (Katak im Bujen ko 13:1).

N̄an erōm̧ juon rikarejar ippān Jon Ripeptaij, eo me ekar peptaiji Rilo̧mo̧o̧r im kōpooj iaļ eo n̄an itok eo An (lale Matu 3:1–6, 13–17), juon iien eļap an ettā, bōlen obrak kōn en̄jaake n̄an likao rein ruo ro me ron̄oul jimma aer iiō. Ilo iien eo, Josep im Oliver rekar jab lukkun bun̄bun̄, āinwōt an armej jab jeļā kōn Harmony. Ak jerbal ilo jerbal eo an Anij elakkar wōt kōn wāween ad jerbal, ejjab kōn wōn ejeļā kake. Mekarta dik ak jab jeļā kake jon̄an ijo koņaam̧ ilo kalimjōke jet iien, kwe kwoj barāinwōt juon karejeran ilo jerbal in eļap an Irooj.

Ļōmņak ko n̄an Ekkatak Jeje ko Rekwojarjar Ippam̧ Make

Katak im Bujen ko 12

Irooj ej kōņaan bwe in jipan̄ kajutak jibadbad eo an Zaion.

Josep Knight Sr. im kōrā eo pāleen, Polly, rekar ioon Josep Smith ke, ej 20 iiō dettan, ekar jino jerbal ilo jikin kallip eo aer ilo Colesville, New York. Josep Knight ekar kōmeļeļeik Josep Smithe āinwōt juon rijerbal em̧m̧an tata. Ekar tōmak naan in kam̧ool eo an Josep Smith kōn pileij gold ko im kar bōk Polly bwe en loļo̧k Josep Smith ke ekar ukōte Bok in Mormon ilo m̧weo im̧ōn ilo Harmony, Pennsylvania. Ekar mōkaj an tōmake. Ilo Aolepān mour ko aer, Josep im Polly rekar dāpdep wōt ilo gospel in me em̧ōj an jepļaaktok. Elōn̄ļo̧k jān 60 ro uwaan baam̧le eo an Knight me rekar kobatok im jipan̄ kaļōk Kabun̄ in ilo New York, Ohio, Missouri, Nauvoo, im āliktata Salt Lake City.

Josep Knight ekar kōņaan bwe en jeļā wāween an maron̄ jipan̄ ilo jerbal eo an Irooj. Uwaak eo an Irooj (kiiō Katak im Bujen ko 12) ej iookļo̧k “aolep ro ewōr aer ikdeelel n̄an kōjerkak tok im kajutak jerbal in” (eoon 7)—ekoba kwe. Ta meļeļen n̄an kwe “n̄an kōjerkak im kajutak jibadbad eo an Zaion”? (eoon 6). Ewi wāween an katak ko im m̧wil ko ilo eoon ko 7–9 jipan̄ eok kōm̧m̧ane menin?

Bar lale “The Knight and Whitmer Families,” Revelations in Context, 20–24.

Katak im Bujen ko 13

Priesthood eo an Aron ekar jepļaaktok jān ippān Jon Ripeptaij.

Ilo juon wōt jentōj, Jon Ripeptaij ekar kwaļo̧k elōn̄ m̧ool ko kōn Priesthood eo an Aron. Ļōmņak n̄an laajrake aolep men ko kwoj ekkatak jān jekjen in (ekoba jān kōmeļeļe eo an jekjen in). Komaron̄ lo bwe ejipan̄ n̄an ekkatak jet iaan naan ko kwoj loi. Erkein rej jet ļōmņak ko komaron̄ jino kaki:

• “Kii ko an lotok an enjeļ raņ”: 2 Nipai 32:2–3; Moronai 7:29–32; Jeffrey R. Holland, “Lotok Eo An Enjeļ raņ”,” Ensign ak Liaona, Nob. 2008, 29–31; Tōl n̄an Jeje ko Rekwojarjar, “Angels,” scriptures.ChurchofJesusChrist.org

• “Kii ko … an gospel eo kōn ukweļo̧k”: 3 Nipai 27:16–22; Katak im Bujen ko 84:26–27; Dale G. Renlund, “Priesthood eo im Kajoor in Lo̧mo̧o̧r an Rilo̧mo̧o̧r eo,” Ensign ak Liaona, Nob. 2017, 64–67

• “Bwijjin Livai”: Bōnbōn 3:5–13; Katak im Bujen ko 84:31–34; Tōl n̄an Jeje ko Rekwojarjar, “Aaronic Priesthood,” “Livai,” scriptures.ChurchofJesusChrist.org

Ta kōjeraam̧m̧an ko me kwaar bōki itok jān kain̄i ko an Priesthood eo an Aron?

Josep Smith ej Peptaiji Oliver Cowdery, jān Del Parson

Josep Smith—Bwebwenato 1:66–75

Kain̄i ko me rej kamaron̄ ad tōpar kajoor an Anij.

Sister Carole M. Stephens, kar rikakpilōklōk eo ilo Būreejtōnji eo Eutiej an Kōrā ro, ekar katakin: “ Kain̄i ko an priesthood im bujen ko rej kōppeļļo̧k iaļ n̄an obrak in jeram̧m̧an ko kalim̧uur kaki n̄an kōj jān Anij, ko raar kapidodoik kōn Pinmuur eo an Rilo̧mo̧o̧r. Rej kaliboboik likao im jiron̄ ro nejin Anij kōn kajoor, Kajoor an Anij, im letok n̄an kōj iien ko rem̧m̧an n̄an bōk mour indeeo” (“Jej Ke Jeļā Ta Ewōr Ippād?” Ensign ak Liaona, Nob. 2013, 12).

Ilo am̧ riiti Josep Smith—Bwebwenato 1:66–75, ekoba no̧o̧t eo ilo jem̧ļo̧kin eoon 71, ļōmņak kōn ta eo ekar im̧we Joseph im Oliver n̄an kajjitōk ikkijeen peptaij, im je kōjeraam̧m̧an ko me rekar bōki ālikin aer bōk koņaer ilo kain̄i ko an priesthood. Ļōmņak in riiti jōōnōļ eo kwaar maron̄ je ālkin am̧ bōk kain̄i ko ak rekoote emeemļo̧kjeņ ko am̧ kōn m̧akūtkūt ko. Ta kōjeraam̧m̧an ko me kwaar bōki itok jān kain̄i ko an priesthood?

Bar lale Katak im Bujen ko 84:20–22; Saints, 1:65–68.

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota eo an Baam̧le

Katak im Bujen ko 12:8.Etke m̧wil ko kar kōlaajraki ilo eoon in remenin aikuj n̄e jej kōm̧m̧ane jerbal in an Irooj?

Katak im Bujen ko 13.Ta eo emaron̄ kalōk tōmak an baam̧le eo am̧ ilo jepļaaktok eo an Priesthood eo an Aron? Pija in alooj eo “Restoration of the Aaronic Priesthood (ChurchofJesusChrist.org) ak jin̄n̄a ko me rej iookļo̧k laajrak in emaron̄ jipan̄ baam̧le eo am̧ pijaikļo̧k jepļaaktok eo an Priesthood eo an Aron. Rej ke kōņaan jin̄n̄aik juon pija kōn m̧akūtkūt eo, pedped ioon ta eo rej riiti ilo Josep Smith—Bwebwenato 1:68-74? Remaron̄ bar kwaļo̧k naan in kam̧ool ko aer kōn kajoor eo an priesthood ilo mour ko aer.

Bar lale “Priesthood Restoration Site” ilo history.ChurchofJesusChrist.org.

Josep Smith—Bwebwenato 1:68.Ewi wāween ad maron̄ ļoor waanjon̄ak eo an Josep Smith im Oliver Cowdery n̄an kappukōt uwaak ko n̄an kajjitōk ko ad? Bōlen ilo am̧ riiti ippān doon, komaron̄ kōm̧m̧an juon imminene n̄an bōjrak jidik im kajjitōk eļan̄n̄e jabdewōt ewōr an kajjitōk kōn ta eo rej riiti.

Josep Smith—Bwebwenato 1:71, jeTa eo ej kabwilōn̄ ro uwaan baam̧le eo am̧ kōn naan ko an Oliver Cowdery? Ta jet iaan “raan ko me kwoban meļo̧kļo̧ki” an baam̧le eo am̧?

Josep Smith—Bwebwenato 1:73–74.Ta oktak eo Jetōb Kwojarjar ekar un̄ur Josep im Oliver kake? N̄āāt eo Jetōb ekar jipan̄ baam̧le eo am̧ meļeļe jeje ko rekwojarjar im lan̄lōn̄ ilo Irooj?

N̄an ļōmņak ko reļļapļo̧k n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Al eo kar kāālōte: “The Priesthood Is Restored,” Children’s Songbook, 89.

Kōkōm̧anm̧anļo̧k Ad Katakin

Ekkatak juon unin kōnono. Āinwōt juon baam̧le, kāālōt juon unin kōnono kwokōņaan ekkatak kake ilo lukkuun dipdikin. N̄an waanjon̄ak, wiik in komaron̄ kōjerbal Topical Guide ak Unin Tōl n̄an Jeje ko Rekwojarjar (scriptures.ChurchofJesusChrist.org) n̄an kappukōt eoon ko kōn Priesthood eo an Aron.

Ioomiro ro Rikarejera, jān Linda Curley Christensen