peij ko ilo Bok in Mormon

Kape in peij ko jinointata an Bok in Mormon.

Pāpode 1–7

Katak im Bujen Ko 10–11

“Bwe Kwōn Maron̄ Rianjo”

Je en̄jaake ko am̧ ilo am̧ riiti eoon ko ej āinwōt katōk ine ko; aaet en̄jaake ko reddik remaron̄ tōl eok n̄an revelesōn eo am̧ make me eļap meļeļein.

Je En̄jake ko Rej Im̧we Eok

Ke ukook eo an Bok in Mormon ekar wōnm̧aanļo̧k wōt, juon kajjitōk ekar make wanlōn̄tak: Ta eo Josep Smith im Oliver Cowdery rej aikuj kōm̧m̧ane kōn peij ko jet em̧ōj ukōti me rekar jako? Ļōmņak eo ewājepdik emaron̄ n̄an bar rool likļo̧k im bar ukōte m̧ōttan ko, ak Irooj ekar lo juon men me rejjab maron̄—armej ro rejerawiwi rekar ikdeelel n̄an ukōti naan ko ilo peij ko n̄an kaberbere jerbal eo eim̧we an Josep. Anij ekar wōr an juon karōk n̄an jum̧ae kijejeto ko an Setan im karoolļōk ta eo ekar jako. Karōk in ekar kōm̧m̧an taujin iiō ko m̧oktaļo̧k ke rikanaan Nipai ekar en̄jake im̧we n̄an ejaake juon rekoot kein karuo me ekar kitbuuj ejja tōre eo wōt. Tokālik, Mormon ekar im̧we n̄an kakobaik rekoot in ilo Bok in Mormon “kōn juon un emālōtlōt” me Irooj ejeļā kake (lale Naan Ko an Mormon 1:3–7).

“Mālōtlōt eo Aō,” Irooj ekar ba n̄an Josep, “eļapļo̧k jān aujiid ko an devil” (Katak im Bujen Ko 10:43). Enaan eo in ealikkar ilo juon raan āinwōt raan kein ad, ke kijejeto ko an rinana eo n̄an kōmōjņo̧ikļo̧k tōmak ko rej ļapļo̧k. Āinwōt Josep, jemaron̄ “niknik im wōnm̧aanļo̧k wōt” ilo jerbal an Anij me ekar kūr kōj n̄an kōm̧m̧ane (eoon 3). Innām jenaaj lo bwe Ekar kadede kōpooj juon iaļ bwe “aor ko an hell rej jamin naaj anjo̧” ņae kōj (eoon 69).

Lale Rikwojarjar, 1:51–61.

pija ej bōk jikin ekkatak ippam̧ make

Ļōmņak ko n̄an Ekkatak Jeje ko Rekwojarjar Ippam̧ Make

Katak im Bujen Ko 10:1–33

Setan ej kappukōt n̄an kakkure jerbal eo an Anij.

Setan ekōņaan bwe jen meļo̧kļo̧k ke ewōr e—ak bwe jej pād ilo ad likjab in kile bwe ej kajjieon̄ kapoik kōj (lale 2 Nipai 28:22–23). Ak naan an Irooj ilo Katak im Bujen Ko 10 ej kwaļo̧k bwe Setan ej pen wōt, im emourur ilo an jum̧ae jerbal eo an Anij. Ilo am̧ riiti eoon ko 1–33, pukōt wāween an Setan kappukōt n̄an kakkure jerbal eo an Anij ilo tore ko an Josep Smith (lale barainwōt ioon ko62–63). Ta ko rej āinwōt ļo̧k me kwoj lo ilo wāween jerbal ko an Setan rainin? Komaron̄ kajjitōk ippān Irooj n̄an jipan̄ eok lo wāween an Setan maron̄ kapoik eok. Ta eo kwoj ekkatak jān jekjen 10 me emaron̄ jipan̄ eok anjo̧ jān kijejeto ko an Setan?

Katak im Bujen Ko 10:34–52

“Mālōtlōt eo [an Irooj] eļapļo̧k jān aujiid ko an devil.”

Elōn̄ļo̧k jān 2,400 iiō ko m̧oktaļo̧k, Irooj ekar kōpooj n̄an karoolļo̧k wōņāān peij ko rejako ilo Bok in Mormon (lale 1 Nipai 9). Ta eo kwōj ekkatak kake kōn Irooj jān Katak im Bujen Ko 10:34–52? Ta kein kam̧ool eo kōn mālōtlōt im jeļāļo̧kjeņ eo an Irooj me em̧ōj am̧ lo ilo mour eo am̧ ?

Rekoot eo me Anij ekar kōpooje n̄an bōk jikin peij ko rekar jako ej kiiō waļo̧k ilo 1 Nipai n̄an Omnai. Ewi wāween an kar bwebwenato ko im katak ko ilo rekoot “[lewaj] wāween lale gospel [eo] ilo jekjek eo edepakpakļo̧k” n̄an kwe? (Katak im Bujen Ko 10:45).

Mormon ej kakobaik pileij gold ko

Mormon ej Kakobaik Pileij Gold ko, jān Tom Lovell

Katak im Bujen Ko 11

Eļan̄n̄e ij kajjitōk ippān Anij, Enaaj letok.

Jejjo ro uwaan baam̧le eo an Josep Smith im ro m̧ōttan rekar kajjitōk n̄an kappukōt ankilaan Irooj ilo etaer. Josep ekar m̧ōņōņō n̄an kōm̧m̧ane āindein, ak Irooj ekar bar kōņaan leļo̧k n̄an er revelesōn ko aer make. Ilo Katak im Bujen Ko 11, juon revelesōn me Josep ekar bōke kōn ļaddik eo jein erūtto Hyrum, Irooj ekar ba, “Inaaj ajejewaj n̄an eok Jetōb eo Aō, … im kwo naaj jeļā … aolep men ko otemjeļo̧k kwōj kōņaan jān Eō” (Katak im Bujen Ko 11:13–14).

Irooj ekar ba naan ko An rej n̄an “aolep ro ewōr aer kōņaan ko rem̧m̧an, im rekar bun̄raake sickle ko aer n̄an m̧adm̧ōd” (eoon 27). Ilo Katak im Bujen Ko 11, ta eo Irooj ej kajjieon̄ ba n̄an eok kōn revelesōn eo am̧ make? kōn am̧ bōk koņaam̧ ilo jerbal eo an Anij? Ta ennaan ko jet me Ekar kōpooji n̄an eok?

Katak im Bujen Ko 11:15–26

Ilo aō kappukōt n̄an “bōk naan eo [an Anij],” Inaaj bōk Jetōb eo An im kajoor.

Men̄e m̧okta jān an kar Bok in Mormon kar ukook, Hyrum Smith ekar kijoroor n̄an kajedeed gospel eo. Ilo am̧ riiti uwaak eo an Iroj n̄an ikdeleel eo an, ļōmņak kōn ta meļeļein n̄an eok n̄an “bōk naan eo [an Anij]” (eoon 21). Ewi wāween n̄e jej mour kōn naan ko an Anij jipan̄ eok jerbal ilo Kabun̄ in? Ewi wāween an bōktok kajoor eo an Anij ilo mour eo am̧?

pija eo ej bōk jikin ekkatak an baam̧le

Ļōm̧ņak ko n̄an Ekkatak Jeje ko Rekwojarjar an Baam̧le im Nokon in Jota eo an Baam̧le

Katak im Bujen Ko 10:5.Ta eo jej ekkatak jān eoon kein kōn kajoor in jar? Ewi wāween ad “jar aolep iien”? (N̄an bar ļōmņak ko jet, lale David A. Bednar, “Pray Always,” Ensign ak Liaona, Nob. 2008, 41–44.)

Katak im Bujen Ko 10:38–46.N̄an jipan̄ baam̧le eo am̧ kōnono kōn wāween an Irooj kar karoolļo̧k wōneen an kar jako peij ko em̧ōj ukōti ilo Bok in Mormon, bolen ro uwaan baam̧le eo remaron̄ kōnono kōn juon men ejako ekar pād ippāer. Ewi wāween aer en̄jake ke rekar lo bwe ejako? Ewi wāwee aer en̄jaake ke rekar bar loi? Men̄e peij ko rejako an Bok in Mormon rekar jab bar waļo̧k, ewi wāween an kar Irooj kōļļā wōņeen aer kar jako, ekkar n̄an Katak im Bujen Ko 10:38–46?

Katak im Bujen Ko 10:55–70.Karuwaineneik ro uwaan baam̧le eo n̄an kappukōt ak kōkaļļeiki naan ko rej jino kōn “N̄a ij” ak “Inaaj.” Ta eo jej ekkatak jān “N̄a ij” naan ko kōn wōn Jisōs Kraist ej im ta E ej āinwōt? Ta eo jej ekkatak kake jān naan in “N̄a inaaj” naan ko kōn ta eo Ej kōm̧m̧ane? Rōjan̄ ro uwaan baam̧le eo n̄an kwaļo̧k ewi wāween an m̧ool kein kakajoorļo̧k tōmak ko aer ilo Jisōs Kraist.

Katak im Bujen Ko 11:12–14.Riiti eoon kein emaron̄ jipan̄ ro uwaan baam̧le eo kile n̄e Jetōb eo ej kōnono n̄an er. Kwomaron̄ kōmeramram kōn juon tōma ioon būļoor eo im karuwaineneik juon uwaan baam̧le eo n̄an em̧m̧akūt n̄an ijo meram eo ej romaak ie. Ewi wāwein an menin āinwōt ļoor tōl eo an Jetōb Kwojarjar? Ta en̄jake ko ippam̧ make kwomaron̄ kwaļo̧ki?

Katak im Bujen Ko 11:15–30.Ļōmņak n̄an kōm̧m̧an juon laajrak in men ko me Irooj ekar ba n̄an Hyrum Smith n̄an kōm̧m̧ane bwen pojak n̄an kwaļo̧k gospel eo. Ta eo jej aikuj kōm̧m̧ane āinwōt juon baam̧le?

N̄an ļōmņak ko reļļapļo̧k n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Al eo kar kāālōte: “Search, Ponder, and Pray,” Children’s Songbook, 109; lale “Ļōmņak Ko n̄an Ekkatak Jeje ko Rekwojarjar an Baam̧le Eo Am̧.”

Kōkōm̧anm̧anļo̧k Ad Katakin

Kōjerbale Jeje ko Rekwojarjar n̄an Mour eo Am̧. Ālkin riiti juon eoon in jeje ko rekwojarjar, kajjitōk ippān ro uwaan baam̧le eo n̄an kwaļo̧k wāween ko eoon eo ej jerbal n̄an mour ko aer. N̄an waanjon̄ak, remaron̄ kwaļo̧k wāween an Jetōb eo im̧we er ilo wāween ko kar kōmeļeļe kake ilo Katak im Bujen Ko 11:12–13.

Josep im Hyrum Smith

Josep im Hyrum Smith, jān Ken Corbett