« ថ្ងៃទី ១៥–២១ ខែ មីនា ។ គោលលទ្ធិ និង សេចក្ដីសញ្ញា ២៧–២៨ ៖ ‹ គ្រប់ការណ៍ទាំងអស់ត្រូវធ្វើឡើងតាមរបៀបរៀបរយ › » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរគោលលទ្ធិ និង សេចក្ដីសញ្ញា ឆ្នាំ ២០២១ ( ឆ្នាំ ២០២០ )
« ថ្ងៃទី ១៥–២១ ខែ មីនា ។ គោលលទ្ធិ និង សេចក្ដីសញ្ញា ២៧–២៨ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២១
ថ្ងៃទី ១៥–២១ ខែ មីនា
គោលលទ្ធិ និង សេចក្តីសញ្ញា ២៧–២៨
« គ្រប់ការណ៍ទាំងអស់ត្រូវធ្វើឡើងតាមរបៀបរៀបរយ »
អែលឌើរ ឌី ថត គ្រីស្ទូហ្វើសិន បានមានប្រសាសន៍ថា ពេលអ្នកសិក្សាព្រះគម្ពីរ ហើយកត់ត្រាចំណាប់អារម្មណ៍ នោះ « អ្នកនឹងទុកកន្លែងមួយសម្រាប់ព្រះបន្ទូលនៃព្រះនៅក្នុងដួងចិត្តរបស់អ្នក ហើយទ្រង់នឹងមានព្រះបន្ទូលមកកាន់អ្នក » ( « When Thou Art Converted » Ensign ឬ Liahona ខែ ឧសភា ឆ្នាំ ២០០៤ ទំព័រ ១១ ) ។
កត់ត្រាចំណាប់អារម្មណ៍របស់បងប្អូន
វិវរណៈនៅតែជាគោលគំនិតដែលនៅថ្មីមួយសម្រាប់ពួកបរិសុទ្ធ នៅពេលការស្ដារឡើងវិញបានបន្ដបើកបង្ហាញ ។ សមាជិកសាសនាចក្រពីដើមបានដឹងថា ព្យាការី យ៉ូសែប ស៊្មីធ អាចទទួលបានវិវរណៈសម្រាប់សាសនាចក្រ ប៉ុន្ដែតើអ្នកផ្សេងទៀតអាចទេ ? សំណួរដូចនេះកាន់តែមានភាពតឹងតែងឡើង នៅពេលហៃរាំ ភេច ជាសាក្សីម្នាក់ក្នុងចំណោមសាក្សីប្រាំបីនាក់នៃផ្ទាំងចំណារមាស បានជឿថា គាត់បានទទួលវិវរណៈសម្រាប់សាសនាចក្រ ។ ពួកបរិសុទ្ធដ៏ស្មោះត្រង់ជាច្រើនបានជឿថា វិវរណៈទាំងនេះគឺមកពីព្រះ ។ ព្រះអម្ចាស់មានបន្ទូលតបតាមរយៈការបង្រៀនថា នៅក្នុងសាសនាចក្ររបស់ទ្រង់ « គ្រប់ការណ៍ទាំងអស់ត្រូវធ្វើឡើងតាមរបៀបរៀបរយ » ( គោលលទ្ធិ និង សេចក្តីសញ្ញា ២៨:១៣ ) ដែលមានន័យថា មានតែម្នាក់ « ត្រូវបានតាំងឡើង ដើម្បីទទួលបញ្ញត្តិទាំងឡាយ និងវិវរណៈទាំងឡាយ » សម្រាប់សាសនាចក្រទាំងមូល ( គោលលទ្ធិ និង សេចក្ដីសញ្ញា ២៨:២ ) ។ បើទោះជាដូច្នោះក្ដី ក៏មនុស្សដទៃទៀតអាចទទួលបានវិវរណៈផ្ទាល់ខ្លួនសម្រាប់ផ្នែករបស់ពួកគេនៅក្នុងកិច្ចការរបស់ព្រះអម្ចាស់ដែរ ។ តាមពិតទៅ បន្ទូលរបស់ព្រះអម្ចាស់ទៅកាន់ អូលីវើរ ខៅឌើរីគឺជាការរំឭកមួយដល់យើងទាំងអស់គ្នា ៖ « នឹងបានប្រទានដល់អ្នកនូវអ្វីៗដែលអ្នកត្រូវធ្វើ » ( គោលលទ្ធិ និង សេចក្ដីសញ្ញា ២៨:១៥ ) ។
សូមមើលផងដែរ « All Things Must Be Done in Order » Revelations in Context ទំព័រ ៥០–៥៣ ។
គំនិតយោបល់សម្រាប់ការសិក្សាព្រះគម្ពីរផ្ទាល់ខ្លួន
គោលលទ្ធិ និង សេចក្ដីសញ្ញា ២៧:១–៤
ខ្ញុំគួរតែទទួលទានសាក្រាម៉ង់ដោយភ្នែកស្មោះត្រង់ទាំងស្រុងចំពោះសិរីល្អរបស់ព្រះ ។
សាលី ណៃត និង អិមម៉ា ស៊្មីធ បានទទួលបុណ្យជ្រមុជទឹកនៅខែ មិថុនា ឆ្នាំ ១៨៣០ ប៉ុន្តែពិធីបញ្ជាក់ត្រូវបានបង្អាក់ដោយមនុស្សអាក្រក់ ។ ពីរខែក្រោយមក សាលី និងស្វាមីរបស់នាង ញូវែល បានមកលេងអិមម៉ា និងយ៉ូសែប ហើយវាត្រូវបានសម្រេចថា ពិធីបញ្ជាក់គួរតែធ្វើនៅពេលនេះ ហើយថាក្រុមនោះនឹងទទួលសាក្រាម៉ង់រួមគ្នា ។ ខណៈនៅតាមផ្លូវទៅរកស្រាសម្រាប់ពិធីសាក្រាម៉ង់ យ៉ូសែបត្រូវបានបញ្ឈប់ដោយទេវតា ។ តើទេវតានោះបានបង្រៀនលោកអ្វីខ្លះអំពីពិធីសាក្រាម៉ង់ ? ( សូមមើល គោលលទ្ធិ និង សេចក្ដីសញ្ញា ២៧:១–៤ ) ។
តើខគម្ពីរទាំងនេះបង្រៀនបងប្អូនអ្វីខ្លះ អំពីរបៀបដែលព្រះអង្គសង្គ្រោះសព្វព្រះទ័យឲ្យបងប្អូនមកកាន់ពិធីសាក្រាម៉ង់ ? តើបងប្អូនមានអារម្មណ៍បំផុសគំនិតឲ្យធ្វើអ្វីខ្លះ ដោយសារតែអ្វីដែលបងប្អូនកំពុងរៀន ?
ពិធីសាក្រាម៉ង់រំឭកយើងឲ្យចងចាំពីពលិកម្មរបស់ព្រះអង្គសង្គ្រោះ ។
គោលលទ្ធិ និង សេចក្ដីសញ្ញា ២៧:១៥-១៨
គ្រឿងសឹកនៃព្រះនឹងជួយការពារខ្ញុំឲ្យឈរតតាំងនឹងអំពើអាក្រក់ ។
ប្រធាន អិម រ័សុល បាឡឺត បានមានប្រសាសន៍ ៖ « គ្មានអ្វីមួយដែលធំ ហើយអស្ចារ្យ ដែលយើងអាចធ្វើដើម្បីបំពាក់ខ្លួនយើងខាងវិញ្ញាណនោះឡើយ ។ អំណាចខាងវិញ្ញាណពិតពឹងលើទង្វើតូចៗជាច្រើនវេញបញ្ចូលគ្នានៅក្នុងសាច់ក្រណាត់នៃការការពារខាងវិញ្ញាណ ដែលការពារ និងជាខែលទាស់នឹងរាល់សេចក្ដីអាក្រក់ » ( « Be Strong in the Lord »Ensign ខែ កក្កដា ឆ្នាំ ២០០៤ ទំព័រ ៨ ) ។
នៅពេលបងប្អូនអាន គោលលទ្ធិ និង សេចសេចក្ដីសញ្ញា ២៧:១៥–១៨ បងប្អូនអាចបង្កើតតារាងមួយដូចខាងក្រោមនេះ ។ តើបងប្អូនអាចធ្វើអ្វីខ្លះដើម្បីពាក់គ្រប់បំណែកនីមួយៗនៃគ្រឿងសឹករបស់ព្រះ ?
|
បំណែកនៃគ្រឿងសឹក |
ផ្នែកនៃរាងកាយដែលបានការពារ |
អ្វីដែលផ្នែករាងកាយនោះអាចតំណាងឲ្យ |
|---|---|---|
|
ប្រដាប់បាំងទ្រូងនៃសេចក្តីសុចរិត |
ចិត្ត |
បំណងប្រាថ្នា និងក្ដីស្រឡាញ់របស់យើង |
|
មួកនៃសេចក្តីសង្គ្រោះ |
ក្បាល ឬគំនិត |
សូមមើលផងដែរ អេភេសូរ ៦:១១–១៨, នីហ្វៃទី២ ១:២៣ ។
ព្យាការីដែលនៅរស់គឺជាអណ្ដាតរបស់ព្រះសម្រាប់សាសនាចក្ររបស់ទ្រង់ ។
សូមស្រមៃថា តើវានឹងមានស្ថានភាពបែបណា ប្រសិនបើនរណាម្នាក់អាចទទួលបានបទបញ្ញត្តិ និងវិវរណៈសម្រាប់សាសនាចក្រទាំងមូលនោះ ។ នៅពេលហៃរាំ ភេច បានអះអាងថាបានទទួលវិវរណៈបែបនោះ មានការយល់ច្រឡំក្នុងចំណោមសមាជិកសាសនាចក្រ ។ នៅក្នុង គោលលទ្ធិ និង សេចក្តីសញ្ញា ២៨ ព្រះអម្ចាស់បានបើកសម្ដែងរបៀបរៀបរយមួយសម្រាប់វិវរណៈក្នុងសាសនាចក្ររបស់ទ្រង់ ។ តើបងប្អូនរៀនអ្វីខ្លះចេញមកពីកណ្ឌនេះអំពីតួនាទីជាក់លាក់របស់ប្រធាននៃសាសនាចក្រ ? តើអ្នកបងប្អូនរៀនអ្វីខ្លះមកពីបន្ទូលរបស់ព្រះអម្ចាស់ទៅកាន់ អូលីវើរ ខៅឌើរីនៅក្នុង ខទី ៣ ? តើបងប្អូនរៀនបានអ្វីខ្លះមកពីកណ្ឌនេះអំពីរបៀបដែលព្រះអាចដឹកនាំបងប្អូន ?
សូមមើលផងដែរ ដាល្លិនអេក អូក « Two Lines of Communication » Ensign ឬ Liahona ខែ វិច្ឆិកា ឆ្នាំ ២០១០ ទំព័រ ៨៣–៨៦ ។
គោលលទ្ធិ និង សេចក្ដីសញ្ញា ២៨:៨–៩
ហេតុអ្វីបេសកកម្មរបស់ អូលីវើរ ខៅឌើរីទៅកាន់ពួកសាសន៍លេមិនសំខាន់ម្ល៉េះ ?
គោលបំណងមួយនៃព្រះគម្ពីរមរមនគឺ « ដើម្បីឲ្យកពួកសាសន៍លេមិន អាចបានដឹងអំពីពួកឪពុករបស់ពួកគេ ហើយដើម្បីឲ្យពួកគេអាចដឹងអំពីសេចក្ដីសន្យាទាំងឡាយនៃព្រះអម្ចាស់ » ( គោលលទ្ធិ និង សេចក្ដីសញ្ញា ៣:២០ ) ។ ការណ៍នេះស្របគ្នានឹងសេចក្ដីសន្យាដែលព្រះអម្ចាស់បានធ្វើដល់ព្យាការីក្នុងព្រះគម្ពីរមរមនជាច្រើន ( ឧទាហរណ៍សូមមើល នីហ្វៃទី១ ១៣:៣៤–៤១; អេណុស ១:១១–១៨; ហេលេមិន ១៥:១២–១៣ ) ។ សមាជិកសាសនាចក្រពីមុនបានចាត់ទុកពួកឥណ្ឌាអាមេរិកកាំងដើមថា ជាកូនចៅនៃប្រជាជនក្នុងព្រះគម្ពីរមរមន ។ ( គោលជំហរផ្លូវការនៃសាសនាចក្រសព្វថ្ងៃនេះគឺថា ពួកសាសន៍លេមិន « គឺជាពួកដូនតាសំខាន់របស់ពួកឥណ្ឌាអាមេរិកកាំងដើម » [ បុព្វកថានៃព្រះគម្ពីរមរមន ] ) ។
ដើម្បីអានបន្ថែមអំពីបេសកកម្មរបស់អូលីវើរទៅក្បែរកុលសម្ព័ន្ធឥណ្ឌាអាមេរិកកាំងដើម សូមមើល « A Mission to the Lamanites » ( Revelations in Context ទំព័រ ៤៥–៤៩ ) ។ តើបេសកកម្មនេះបង្រៀនបងប្អូនអ្វីខ្លះអំពីព្រះអម្ចាស់ និងកិច្ចការរបស់ទ្រង់ ?
គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្រុមគ្រួសារ
-
គោលលទ្ធិ និង សេចក្ដីសញ្ញា ២៧:១–២ ។តើយើងអាចចងចាំកាន់តែច្បាស់ដល់ពលិកម្មរបស់ព្រះអង្គសង្គ្រោះសម្រាប់យើងដោយរបៀបណា នៅពេលយើងទទួលទានសាក្រាម៉ង់ ?
-
គោលលទ្ធិ និង សេចក្តីសញ្ញា ២៧:៥–១៤ ។តើយើងដឹងអ្វីខ្លះអំពីព្យាការីពីក្នុងខគម្ពីរទាំងនេះ ? បងប្អូនអាចស្រាវជ្រាវព័ត៌មានបន្ថែមអំពីការណ៍នេះនៅក្នុងសេចក្ដីណែនាំដល់បទគម្ពីរទាំងឡាយ ( scriptures.ChurchofJesusChrist.org ) ។ តើមានពរជ័យអ្វីខ្លះដែលកើតដល់ពួកយើងតាមរយៈកូនសោដែលពួកលោកកាន់ ? សម្រាប់ព័ត៌មានបន្ថែមទៀតអំពីកូនសោទាំងនេះមួយចំនួន សូមមើល ម៉ាថាយ ១៦:១៦–១៩, គោលលទ្ធិ និងសេចក្ដីសញ្ញា ១១០:១១–១៦ ។
-
គោលលទ្ធិ និង សេចក្ដីសញ្ញា ២៧:១៥–១៨ ។ប្រហែលគ្រួសាររបស់បងប្អូននឹងរីករាយធ្វើជាស្លៀកពាក់ខោអាវបន្ថែមដើម្បីតំណាងឲ្យគ្រឿងសឹករបស់ព្រះ ដូចជាមួក ខ្សែក្រវ៉ាត់ អាវ ឬស្បែកជើង ។ តើគ្រឿងសឹកជួយការពារយើងក្នុងចម្បាំងតាមរបៀបណា ? សូមពិភាក្សាពីឥទ្ធិពលអាក្រក់មួយចំនួនដែលគ្រួសាររបស់បងប្អូនប្រឈមមុខ និងរឿងដែលបងប្អូនអាចធ្វើដើម្បីពាក់គ្រឿងសឹកខាងវិញ្ញាណ ។ សូមពិចារណាបង្ហាញវីដេអូ « Put on the Whole Armor of God » ( ChurchofJesusChrist.org ) ។
-
គោលលទ្ធិ និង សេចក្តីសញ្ញា ២៨:២–៧ ។តើយើងរៀនអ្វីខ្លះ អំពីការហៅរបស់ព្យាការីមកពីខគម្ពីរទាំងនេះ ? ប្រហែលសមាជិកគ្រួសារអាចរំឭកដល់សារលិខិតក្នុងអតីតកាល មកពីព្យាការីដែលនៅរស់របស់យើង ហើយចែកចាយពីរបៀបដែលការប្រឹក្សារបស់លោកជួយយើងឲ្យធ្វើតាមព្រះយេស៊ូវគ្រីស្ទ ។
-
គោលលទ្ធិ និង សេចក្ដីសញ្ញា ២៨:១១ ។នៅពេលយើងចង់កែតម្រូវនរណាម្នាក់ ហេតុអ្វីវាសំខាន់ដើម្បីដោះស្រាយវា « ដោយមានតែអ្នក និងគាត់ » ?
សម្រាប់គំនិតបន្ថែមសម្រាប់ការបង្រៀនដល់កុមារ សូមមើល គម្រោងមេរៀនសប្ដាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់ថ្នាក់បឋមសិក្សា ។
ចម្រៀងស្នើ ៖ « ចូរមកស្តាប់សំឡេងព្យាការី » ទំនុកតម្កើង ល.រ. ២១ ។
ការកែលម្អដល់ការសិក្សាផ្ទាល់ខ្លួន
សិក្សាពាក្យសម្ដីរបស់ពួកព្យាការី និង សាវកជំនាន់ចុងក្រោយនេះ ។ សូមអានអ្វីដែលពួកព្យាការី និងពួកសាវកថ្ងៃចុងក្រោយបានបង្រៀនអំពីគោលការណ៍ ដែលបងប្អូនរកឃើញនៅក្នុងបទគម្ពីរ ។ សូមគិតដល់ការរំឭកសន្និសីទទូទៅតាមលិបិក្រមប្រធានបទនៅ conference.ChurchofJesusChrist.org ឬ នៅលើកម្មវិធីបណ្ណាល័យដំណឹងល្អ ។