« ថ្ងៃទី ៨–១៤ ខែ មីនា ។ គោលលទ្ធិ និង សេចក្ដីសញ្ញា ២៣–២៦ ៖ ‹ ចម្រើនកម្លាំងដល់សាសនាចក្រ › » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរគោលលទ្ធិ និង សេចក្ដីសញ្ញា ឆ្នាំ ២០២១ ( ឆ្នាំ ២០២០ )
« ថ្ងៃទី ៨–១៤ ខែ មីនា ។ គោលលទ្ធិ និង សេចក្ដីសញ្ញា ២៣–២៦ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២១
ថ្ងៃទី ៨–១៤ ខែ មីនា
គោលលទ្ធិ និង សេចក្ដីសញ្ញា ២៣-២៦
« ចម្រើនកម្លាំងដល់សាសនាចក្រ »
នៅពេលបងប្អូនអាន គោលលទ្ធិ និង សេចក្ដីសញ្ញា ២៣–២៦ សូមកត់ត្រាចំណាប់អារម្មណ៍ ដែលបងប្អូនទទួលមកពីព្រះវិញ្ញាណបរិសុទ្ធ ។ តើបងប្អូនអាចអនុវត្តការប្រឹក្សានៅក្នុងវិវរណៈទាំងនេះ ដើម្បីពង្រឹងដល់ភាពជាសិស្សផ្ទាល់ខ្លួនរបស់បងប្អូន និងដល់សាសនាចក្រតាមរបៀបណា ?
កត់ត្រាចំណាប់អារម្មណ៍របស់បងប្អូន
ក្រោយពីសាសនាចក្រត្រូវបានរៀបចំហើយ ពួកបរិសុទ្ធបានប្រឈមមុខនឹងឧបសគ្គថ្មីមួយ—ផ្សាយដំណឹងល្អ និងពង្រឹងអស់អ្នកដែលបានរួបរួមជាមួយសាសនាចក្ររួចហើយ អ្វីទាំងអស់បានធ្វើឡើង ខណៈការបៀតបៀនបន្ដកើនឡើង ។ អិមម៉ា ស្ម៊ីធ បានធ្វើជាសាក្សីនឹងការប្រឆាំងជាលើកដំបូង ។ នៅខែ មិថុនា ឆ្នាំ ១៨៣០ អិមម៉ា និងសមាជិកគ្រួសារណាយចង់ជ្រមុជទឹក ។ ប៉ុន្ដែសត្រូវរបស់សាសនាចក្របានព្យាយាមបង្អាក់អ្វី ដែលគួរតែជាបទពិសោធន៍ដ៏ពិសិដ្ឋ ។ ដំបូង ពួកគេបានបំផ្លាញទំនប់ដែលត្រូវសង់ឡើងដើម្បីផ្ដល់ទឹកជ្រៅល្មមសម្រាប់ពិធីបុណ្យជ្រមុជទឹក ។ ទោះជាក្រោយពីទំនប់ត្រូវបានជួសជុលហើយក្ដី ក៏ពួកបៀតបៀនបានប្រមូលគ្នាមកស្រែកគម្រាម និងសើចចំអកដល់អ្នកដែលបានជ្រមុជទឹកដែរ ។ រួចហើយ កាលយ៉ូសែបហៀបនឹងបញ្ជាក់សមាជិកថ្មី លោកត្រូវបានគេចាប់ ដោយសារបានធ្វើឲ្យសហគមន៍អាក់អន់ចិត្ត តាមរយៈការផ្សាយអំពីព្រះគម្ពីរមរមន ។ វាហាក់ដូចជាការចាប់ផ្ដើមដែលមិនបានសន្យាសម្រាប់សាសនាចក្រ ដែលបានស្ដារឡើងវិញថ្មីរបស់ព្រះអម្ចាស់ឡើយ ។ ប៉ុន្ដែក្នុងចំណោមភាពមិនប្រាកដប្រជា និងចលាចលដ៏ខ្លាំងនេះ ព្រះអម្ចាស់បានផ្ដល់បន្ទូលនៃការប្រឹក្សា និងការលើកទឹកចិត្តដ៏មានតម្លៃ ដែលតំណាងឲ្យ « សំឡេងរបស់ទ្រង់ដល់មនុស្សទាំងពួង » ( គោលលទ្ធិ និង សេចក្ដីសញ្ញា ២៥:១៦ ) ។
សូមមើលផងដែរ Saints ១:៨៩–៩០, ៩៤–៩៧ ។
យោបល់សម្រាប់ការសិក្សាព្រះគម្ពីរផ្ទាល់ខ្លួន
គោលលទ្ធិ និង សេចក្ដីសញ្ញា ២៣–២៦
ខ្ញុំអាចជួយពង្រឹងសាសនាចក្ររបស់ព្រះអម្ចាស់ ។
ថ្ងៃនេះជិត ២០០ ឆ្នាំក្រោយពីសាសនាចក្រដែលបានស្ដារឡើងវិញត្រូវបានរៀបចំ តម្រូវការ « ដើម្បីចម្រើនកម្លាំងដល់សាសនាចក្រ » នេះបន្ដ ( គោលលទ្ធិ និង សេចក្ដីសញ្ញា ២៣:៣–៥ ) ។ ហើយកិច្ចការនេះមិនមែនគ្រាន់តែសម្រាប់ យ៉ូសែប ស៊្មីធ អូលីវើរ ខៅឌើរី ឬថ្នាក់ដឹកនាំសាសនាចក្របច្ចុប្បន្នរបស់យើងនោះឡើយ—វាគឺសម្រាប់យើងទាំងអស់គ្នា ។ ក្នុងការសិក្សាទាំងមូលរបស់បងប្អូនអំពី គោលលទ្ធិ និង សេចក្ដីសញ្ញា ២៣–២៦ សូមសញ្ជឹងគិតដល់ការប្រឹក្សាដែលព្រះអម្ចាស់បានប្រទានដល់សមាជិកសាសនាចក្រពីដើម ដើម្បីជួយពួកគេឲ្យចម្រើនកម្លាំងដល់សាសនាចក្រ ។ តើបងប្អូនមានអារម្មណ៍ថា ព្រះអម្ចាស់សព្វព្រះទ័យឲ្យបងប្អូនធ្វើអ្វីខ្លះដើម្បីចូលរួមក្នុងកិច្ចខិតខំនេះ ?
ព្រះអង្គសង្គ្រោះអាចលើកខ្ញុំ « ឡើងឲ្យរួចពីសេចក្ដីវេទនាទាំងឡាយរបស់ [ ខ្ញុំ ] » ។
ការដឹកនាំសាសនាចក្រអំឡុងពេលនៃការបៀតបៀនដ៏ខ្លាំងបែបនេះ ប្រាកដជាបន្ទុកដ៏ធ្ងន់មួយសម្រាប់យ៉ូសែប ស៊្មីធ ហើយ ។ សូមរកមើលបន្ទូលលើកទឹកចិត្តរបស់ព្រះអម្ចាស់ដល់លោកនៅក្នុង គោលលទ្ធិ និង សេចក្ដីសញ្ញា ២៤ ។
តើខគម្ពីរដូចខាងក្រោមនេះផ្ដល់យោបល់អ្វីខ្លះដល់បងប្អូន អំពីរបៀបដែលព្រះអង្គសង្គ្រោះអាចលើកបងប្អូនឡើងឲ្យផុតពីសេចក្ដីវេទនាទាំងឡាយរបស់បងប្អូន ?
គោលលទ្ធិ និង សេចក្ដីសញ្ញា ២៤:១–៣
គោលលទ្ធិ និង សេចក្ដីសញ្ញា ២៤:៨
គោលលទ្ធិ និង សេចក្ដីសញ្ញា ១២១:៧–៨
តើព្រះយេស៊ូវគ្រីស្ទបានលើកបងប្អូនឡើងឲ្យផុតពីសេចក្ដីវេទនាទាំងឡាយរបស់បងប្អូនតាមរបៀបណា ? តើបងប្អូនអាចធ្វើអ្វីខ្លះ ដើម្បីបន្តស្វែងរកជំនួយរបស់ទ្រង់អំឡុងពេលពិបាកដូច្នេះ ?
ទ្រង់បានព្យាបាលមនុស្សជាច្រើនដែលមានជំងឺផ្សេងៗ ដោយ ជេ. ខឺត រីឆាត
អិមម៉ា ស៊្មីធគឺជា « ស្ត្រីជម្រើស » ។
នៅពេលអិមម៉ា ហេល បានរៀបការនឹងយ៉ូសែប ស៊្មីធ នាងហាក់បានដឹងថា នាងនឹងធ្វើការលះបង់ជាច្រើន ។ នាងបានប្រឆាំងនឹងបំណងរបស់ឪពុកនាង ហើយប្ដូរជីវិតដ៏សុខស្រួលទៅនឹងជីវិតមិនច្បាស់លាស់មួយ ។ នាងអាចងឿងឆ្ងល់ពីអ្វីដែលព្រះអម្ចាស់បានរំពឹងចង់បានពីនាងក្នុងកិច្ចការនៃការស្ដារឡើងវិញនេះ ។ សូមរកមើលចម្លើយរបស់ព្រះអម្ចាស់ដែលមាននៅក្នុង គោលលទ្ធិ និង សេចក្ដីសញ្ញា ២៥ ។ សូមកត់ត្រាបន្ទូលរបស់ព្រះអម្ចាស់នៅក្នុង ខទី ១៦—តើបងប្អូនរកឃើញអ្វីខ្លះនៅក្នុងកណ្ឌនេះ ដែលបងប្អូនមានអារម្មណ៍ថាជា « សំឡេងរបស់ទ្រង់ដល់ [ បងប្អូន ] » ?
សូមមើលផងដែរ « An Elect Lady » ( វីដេអូនៅលើគេហទំព័រ ChurchofJesusChrist.org ); « Thou Art an Elect Lady » Revelations in Context ទំព័រ ៣៣–៣៩ ។ ចយ ឌី ចូនស៍ « An Especially Noble Calling » EnsignឬLiahona ខែ ឧសភា ឆ្នាំ ២០២០ ទំព័រ ១៥-១៨ ) ។
គោលលទ្ធិ និង សេចក្ដីសញ្ញា ២៦:២
តើអ្វីទៅជាការយល់ព្រមទូទៅ ?
នៅពេលសមាជិកទទួលបានការហៅ ឬការតែងតាំងបព្វជិតភាពនៅក្នុងសាសនាចក្រ យើងមានឱកាសដើម្បីគាំទ្រពួកគេជាផ្លូវការ តាមរយៈការលើកដៃជាការបង្ហាញការគាំទ្រ ។ គោលការណ៍នៃការបង្ហាញការគាំទ្រ និងការយល់ព្រមជាសាធារណៈត្រូវបានហៅថា ការយល់ព្រមទូទៅ ។ ដូចដែលប្រធាន ហ្គរដុន ប៊ី ហ៊ិងគ្លី បានបង្រៀនថា « នីតិវិធីនៃការគាំទ្រគឺលើសពីការលើកដៃគាំទ្រជាទំនៀមទម្លាប់មួយទៅទៀត ។ វាគឺជាការប្ដេជ្ញាចិត្តដើម្បីកាន់ខ្ជាប់ គាំទ្រ ជួយដល់អស់អ្នកដែលត្រូវបានរើសតាំងនោះ » ( « This Work Is Concerned with People » Ensign ខែ ឧសភា ឆ្នាំ ១៩៩៥ ទំព័រ ៥១ ) ។
គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីក្រុមគ្រួសារ
-
គោលលទ្ធិ និង សេចក្ដីសញ្ញា ២៣:៦ ។ហេតុអ្វីព្រះអម្ចាស់សព្វព្រះទ័យឲ្យយើងអធិស្ឋាន « នៅក្នុងគ្រួសាររបស់ [ យើង ] និងនៅក្នុងចំណោមមិត្តភក្ដិរបស់ [ យើង ] និងនៅគ្រប់កន្លែងនានា » ? តើចម្រៀង « យើងនិយាយដោយស្នេហ៍ » ( សៀវភៅចម្រៀងកុមារ ល.រ. ១០២ )—ឬចម្រៀងផ្សេងទៀតអំពីការអធិស្ឋាន—បង្រៀនយើងអ្វីខ្លះអំពីអំណាចនៃការអធិស្ឋាន ?
សូមមើលផងដែរ នីហ្វៃទី ២ ៣២:៨–៩; នីហ្វៃទី៣ ១៨:១៨–២៣ ។
-
គោលលទ្ធិ និង សេចក្ដីសញ្ញា ២៤:៨ ។តើវាមានប្រយោជន៍សម្រាប់គ្រួសារបងប្អូនដើម្បីជជែកអំពីអត្ថន័យនៃការ « មានចិត្តអត់ធន់ក្នុងការឈឺចាប់ » ដែរឬទេ ? ប្រសិនបើបងប្អូនមានកូនតូច វាអាចសប្បាយរីករាយដើម្បីធ្វើការដកពិសោធន៍ពីអ្វីដែលប្រធាន ឌៀថើរ អេហ្វ អុជដូហ្វ បានរៀបរាប់នៅក្នុង « Continue in Patience » ( Ensign ឬ Liahona ខែ ឧសភា ឆ្នាំ ២០១០ ទំព័រ ៥៦; សូមមើលផងដែរវីដេអូនៅលើគេហទំព័រ ChurchofJesusChrist.org ) ។ តើ គោលលទ្ធិ និងសេចក្ដីសញ្ញា ២៤:៨ បង្រៀនយើងអ្វីខ្លះអំពីការអត់ធ្មត់ ? តើព្រះអម្ចាស់ជួយយើងឲ្យមានចិត្តអត់ធ្មត់ក្នុងការឈឺចាប់របស់យើងតាមរបៀបណា ?
-
គោលលទ្ធិ និង សេចក្ដីសញ្ញា ២៥:១១–១២ ។ប្រហែលបងប្អូនអាចច្រៀងទំនុកតម្កើងដែលសមាជិកគ្រួសារម្នាក់ៗចូលចិត្ត ឬបទចម្រៀងមួយ ហើយជជែកពីមូលហេតុដែលវាជា « បទចម្រៀងចេញពីចិត្ត » របស់គេ ។ តើចម្រៀងទាំងនេះដូចជា « បទអធិស្ឋានដល់ [ ព្រះ ] » យ៉ាងដូចម្ដេច ?
-
គោលលទ្ធិ និង សេចក្ដីសញ្ញា ២៦:២ ។វាអាចមានប្រយោជន៍ដើម្បីរកមើលពាក្យ « ការយល់ព្រមទូទៅ » នៅក្នុងសេចក្ដីណែនាំដល់បទគម្ពីរទាំងឡាយ ( scriptures.ChurchofJesusChrist.org ) ។ តើយើងបង្ហាញការគាំទ្ររបស់យើងចំពោះថ្នាក់ដឹកនាំយើងដោយរបៀបណា ?
សម្រាប់គំនិតបន្ថែមសម្រាប់ការបង្រៀនដល់កុមារ សូមមើល គម្រោងមេរៀនសប្ដាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់ថ្នាក់បឋមសិក្សា ។
ចម្រៀងដែលបានផ្តល់យោបល់ ៖ « ចូរបន្លឺសំឡេងច្រៀង » សៀវភៅចម្រៀងកុមារ ល.រ ១២៤, ( សូមមើល « យោបល់ដើម្បីកែលម្អការសិក្សាព្រះគម្ពីរជាគ្រួសាររបស់អ្នក » ) ។
សំឡេងនៃការស្តារឡើងវិញ
អែមម៉ា ហេល ស្ម៊ីធ
ព្រះបន្ទូលរបស់ព្រះអម្ចាស់ទៅកាន់អិមម៉ា ស្ម៊ីធ ដែលបានកត់ត្រានៅក្នុង គោលលទ្ធិ និង សេចក្តីសញ្ញា ២៥ បង្ហាញពីព្រះទ័យរបស់ទ្រង់អំពីនាង និងការរួមចំណែកដែលនាងអាចធ្វើបានចំពោះកិច្ចការរបស់ទ្រង់ ។ ប៉ុន្ដែតើអិមម៉ាយ៉ាងណាទៅវិញ ? តើយើងដឹងអ្វីខ្លះអំពីអត្តចរិតរបស់នាង ទំនាក់ទំនង និងកម្លាំងរបស់នាង ? របៀបមួយដើម្បីដឹងពី « ស្ត្រីរើសតាំង » ( គោលលទ្ធិ និង សេចក្ដីសញ្ញា ២៥:៣ ) គឺត្រូវអានពីពាក្យសម្ដីរបស់មនុស្សដែលស្គាល់នាងផ្ទាល់ ។
អិមម៉ា ស៊្មីធ ដោយ លី ហ្គ្រីន រីឆាដ
យ៉ូសែប ស្ម៊ីធ ជុញ្ញ័រ ស្វាមីរបស់នាង
« ជាមួយនឹងការអររីករាយដែលមិនអាចថ្លែងបាន និងអ្វីដែលនាំឲ្យមានអំណរពេញក្នុងខ្លួនខ្ញុំ នៅពេលខ្ញុំបានចាប់ដៃនាងនៅយប់នោះ អិមម៉ាសំណប់ចិត្តរបស់ខ្ញុំ—នាងដែលជាភរិយារបស់ខ្ញុំ ជាភរិយាពីយុវវ័យរបស់ខ្ញុំ និងជាជម្រើសនៃដួងចិត្តខ្ញុំ ។ គំនិតខ្ញុំមានរលកអារម្មណ៍រំឭកជាថ្មីជាច្រើន នៅពេលខ្ញុំគិតពីគ្រាមួយដែលមានស្ថានភាពជាច្រើន ដែលយើងត្រូវបានហៅឲ្យឆ្លងកាត់ ។ ការហត់នឿយ និងការវេទនា ទុក្ខសោក និងការរងទុក្ខ ហើយអំណរ និងការលួងលោមចិត្តពីគ្រាមួយទៅគ្រាមួយបានរាយពេញផ្លូវយើង ហើយបានកើតក្នុងជីវិតយើង ។ ឱ! វាជាគំនិតលាយឡំគ្នាមួយ បន្លឺពេញក្នុងចិត្តខ្ញុំមួយរយៈ ជាថ្មីម្ដងទៀតនាងនៅទីនេះ គឺក្នុងបញ្ហាទីប្រាំពីរ គឺអិមម៉ាដ៏មិនរុញរា រឹងមាំ និងមិនខ្លាច មិនផ្លាស់ប្ដូរ និងគួរឲ្យស្រឡាញ់ » ។១
លូស៊ី ម៉ាក ស្ម៊ីធ ម្ដាយក្មេករបស់នាង
« ពេលនោះគាត់នៅក្មេង ហើយដោយមានចំណង់ចង់បានពីធម្មជាតិ ដួងចិត្តទាំងស្រុងរបស់គាត់គឺនៅក្នុងកិច្ចការរបស់ព្រះអម្ចាស់ ហើយគាត់មិនមានចំណង់ចង់បានអ្វីក្រៅពីសម្រាប់សាសនាចក្រ និងបុព្វហេតុនៃសេចក្ដីពិតឡើយ ។ មិនថាអ្វីដែលដៃគាត់ដាក់ធ្វើនោះទេ គឺគាត់ធ្វើវាដោយអស់ពីកម្លាំងគាត់ ហើយមិនសួរសំណួរអាត្មានិយមថា ‹ តើខ្ញុំអាចទទួលបានប្រយោជន៍ច្រើនជាងនរណាផ្សេងទៀតទេ ? › នោះទេ ។ ប្រសិនបើមនុស្សមានអាយុចំណាស់ត្រូវបញ្ជូនឲ្យចេញទៅផ្សាយសាសនា គាត់គឺជាបុគ្គលទីមួយដែលស្ម័គ្រចិត្តផ្ដល់ការបម្រើគាត់ជួយស្លៀកពាក់ឲ្យពួកគេសម្រាប់ដំណើររបស់គេ ដោយមិនខ្វល់ពីទុក្ខលំបាករបស់ខ្លួនឡើយ » ។២
« ខ្ញុំពុំដែលធ្លាប់ជួបនឹងស្រ្តីណាម្នាក់ក្នុងជីវិតខ្ញុំ ដែលនឹងតស៊ូគ្រប់ការលំបាក និងសេចក្ដីវេទនា ពីមួយខែទៅមួយខែ ពីមួយឆ្នាំទៅមួយឆ្នាំ ដោយភាពក្លាហានដ៏មុតមាំ ភាពក្លៀវក្លា និងភាពអត់ធន់ ដូចដែលគាត់បានធ្វើទេ ដ្បិតខ្ញុំដឹងថា គាត់បានស៊ូទ្រាំមែន គាត់ត្រូវបានបោះបោកនៅលើសមុទ្រនៃភាពពុំពិតប្រាកដ គាត់បានទ្រាំទ្រនឹងព្យុះភ្លៀងនៃការបៀតបៀន ប៉ុន្តែបានច្បាំងនឹងកំហឹងរបស់មនុស្ស និងអារក្ស ហើយបានយកឈ្នះលើស្ទើរតែគ្រប់ស្ត្រីដទៃទៀត » ។៣
យ៉ូសែប ស្ម៊ីធ ស៊ីញ្ញ័រ ឪពុកក្មេករបស់នាង
ពរជ័យលោកអយ្យកោរបស់អិមម៉ា ត្រូវបានប្រកាសដោយ យ៉ូសែប ស្ម៊ីធ ស៊ីញ្ញ័រ ដែលបានបម្រើជាលោកអយ្យកោនៃសាសនាចក្រ ៖
« អិមម៉ា កូនប្រសារស្រីឪពុកអើយ កូនគឺជាពរជ័យមកពីព្រះអម្ចាស់ ដោយសារសេចក្ដីស្មោះត្រង់ និងសេចក្ដីពិតរបស់កូន ៖ កូននឹងត្រូវមានពរជាមួយស្វាមីកូន ហើយអររីករាយក្នុងសិរីល្អដែលនឹងកើតមានដល់គាត់ ៖ ព្រលឹងកូនបានរងទុក្ខដោយសារតែអំពើទុច្ចរិតរបស់មនុស្សដែលស្វែងរកការបំផ្លាញដៃគូរបស់កូន ហើយព្រលឹងទាំងមូលរបស់កូនបានចេញទៅក្នុងការអធិស្ឋានសម្រាប់ការរំដោះគាត់ ៖ ចូរអររីករាយ ដោយសារព្រះអម្ចាស់ជាព្រះនៃកូនបានស្ដាប់ឮការអង្វរកររបស់កូន ។
កូនបានទួញសោកដោយសារភាពរឹងទទឹងនៃដួងចិត្តនៃផ្ទះឪពុកកូន ហើយកូនទន្ទឹងចង់ឲ្យពួកគេទទួលបានសេចក្ដីសង្គ្រោះ ។ ព្រះអម្ចាស់នឹងមានការគោរពដល់ការទួញយំរបស់កូន ហើយតាមរយៈការកាត់សេចក្ដីរបស់ទ្រង់ ទ្រង់នឹងបណ្ដាលឲ្យពួកគេមួយចំនួនឃើញកំហុសខ្លួន ហើយប្រែចិត្តពីអំពើបាបគេ ប៉ុន្ដែវានឹងដោយសេចក្ដីវេទនា ដែលពួកគេនឹងត្រូវបានសង្គ្រោះ ។ កូននឹងឃើញថ្ងៃជាច្រើន មែនហើយ ព្រះអម្ចាស់នឹងទុកជីវិតឲ្យកូនរហូតដល់កូនពេញចិត្ត ដោយសារកូននឹងឃើញព្រះប្រោសលោះរបស់កូន ។ ដួងចិត្តកូននឹងរីករាយក្នុងកិច្ចការដ៏អស្ចារ្យរបស់ព្រះអម្ចាស់ ហើយគ្មាននរណាម្នាក់នឹងយកអំណរកូនចេញពីកូនបានឡើយ ។
កូននឹងចងចាំជានិច្ចដល់ការអនុញ្ញាតដ៏អស្ចារ្យពីព្រះរបស់កូន ក្នុងការឲ្យកូននៅជាមួយកូនប្រុសកូន នៅពេលទេវតានឹងប្រគល់កំណត់ត្រានៃសាសន៍នីហ្វៃឲ្យគេថែរក្សា ។ កូនបានឃើញទុក្ខសោកជាច្រើនហើយ ដោយសារព្រះអម្ចាស់បានយកកូនចំនួនបីចេញពីកូន ៖ នៅក្នុងការណ៍នេះ កូនមិនខុសឡើយ ដោយសារទ្រង់ជ្រាបពីបំណងដ៏បរិសុទ្ធរបស់កូនដែលចង់បីបាច់គ្រួសារមួយ ដើម្បីឲ្យឈ្មោះកូនប្រុសរបស់ឪពុកអាចទទួលបានពរ ។ ហើយឥឡូវនេះ មើលចុះ ឪពុកនិយាយទៅកាន់កូនថា ហេតុដូច្នេះព្រះអម្ចាស់មានព្រះបន្ទូលថា ប្រសិនបើកូននឹងជឿ កូននឹងទទួលពរជ័យនៅក្នុងការណ៍នេះ ហើយកូននឹងមានកូនចៅផ្សេងទៀត គឺដល់អំណរ និងការពេញចិត្តនៃព្រលឹងកូន ហើយដល់ការរីករាយនៃមិត្តកូន ។
« កូននឹងមានពរឲ្យយល់ដឹង ហើយមានអំណាចដើម្បីបង្រៀនកូនចៅរបស់កូន ។ បង្រៀនគ្រួសារកូនអំពីសុចរិតភាព និងកូនតូចៗរបស់កូនអំពីផ្លូវជីវិត ហើយទេវតាដ៏បរិសុទ្ធនឹងតាមឃុំគ្រងថែកូន ៖ ហើយកូននឹងត្រូវបានសង្គ្រោះនៅក្នុងនគររបស់ព្រះ គឺពិតដូច្នោះមែន ។ អាម៉ែន » ។៤
អិមម៉ា ស្ម៊ីធ ជាមួយនឹងកូនៗនាង ។ ពេលត្រូវសើច ដោយ លីស លេម៉ុន ស្វិនដល
ទំនុកតម្កើងរបស់អិមម៉ា ដោយ លីស ឡេមិន ស្វីនដល