hō’ē fa’a’apu i te taime hitira’a mahana

Tuha’a ’oire nō Daviess, Missouri

14–20 nō Tiunu

Te Parau Ha’api’ira’a ’e te mau Parau Fafau 64–66

« Tē tītau nei te Fatu i te ’ā’au ’e te mana’o ’ana’anatae »

’Ua parau te peresideni Henry B. Eyring : « Pinepine au i te tai’o i te mau pāpa’ira’a mo’a ma te ui ē, e aha tā te Atua e hina’aro ’ia rave au ? ’aore rā, e aha tāna e hina’aro ’ia ’ite au ?’ I te mau taime ato’a e ’itehia iā’u te mau mana’o ’e te mau ferurira’a ’āpī ’aita roa atu i fāri’ihia e au nā mua a’e » (« How God Speaks to Me through the Scriptures », 6 nō Fepuare 2019, blog.ChurchofJesusChrist.org).

Pāpa’i i te mau mana’o e tae mai

I roto i te ve’ave’a rahi o te ’āva’e ’Ātete 1831, e rave rahi mau peresibutero tē ho’i ra i Kirtland i muri a’e i tō rātou hi’ohi’ora’a i te fenua o Ziona i Missouri, ’ia au i te mau arata’ira’a a te Fatu. E ’ere i te hō’ē tere au roa. Te feiā rātere—’o Iosepha Semita, ’o Oliver Cowdery, ’o Sidney Rigdon, ’o Ezra Booth ’e ’o vetahi atu—’ua ve’ave’a ’e ’ua rohirohi roa, ’e ’ua riro vave mai te mau ’ume’umera’a ’ei mau tātama’ira’a. ’Ua mana’ohia ē, te patura’a ia Ziona, hō’ē ’oire nō te here, nō te hō’ēra’a ’e nō te hau, e riro ïa i tē vai mai nō te hō’ē tau roa.

’Aua’a a’e rā, te patura’a ia Ziona—i Missouri i te matahiti 1831 ’aore rā, i roto i tō tātou ’ā’au ’e te mau pāroita i teie mahana—’aita ïa e tītauhia ia tātou ’ia maita’i roa. Terā rā, « ia ’outou rā ’ua tītauhia atu ra ’outou ’ia fa’a’ore i te hapa a te ta’ata ato’a », te parau ïa a te Fatu (Te Parau Ha’api’ira’a ʼe te mau Parau Fafau 64:10). Tē tītau nei ’oia « i te ’ā’au ’e te mana’o ’ana’anatae » (’īrava 34). ’E tē tītau nei ’oia i te fa’a’oroma’i ’e te itoito, nō te mea ’ua patuhia o Ziona i ni’a i te niu o « te mau mea iti nei », i ravehia e te feiā tei ’ore « i rohirohi i roto i te ’ohipa maita’i » (’īrava 33).

Hi’o ato’a te Feiā Mo’a, 1:133–34, 136–37.

ītona tuatāpapara’a a te ta’ata hō’ē

Mau mana’o nō te tuatāpapara’a pāpa’ira’a mo’a a te ta’ata hō’ē

Te Parau Ha’api’ira’a ’e te mau Parau Fafau 64:1–11

Tītauhia iā’u ’ia fa’a’ore i te hapa a te mau ta’ata ato’a.

’A tai’o ai ’outou Te Parau Ha’api’ira’a ʼe te mau Parau Fafau 64:1–11, ’a feruri na i te hō’ē taime ’a fa’a’ore ai te Fatu i tā ’outou hapa. E nehenehe ato’a ’outou e feruri i te hō’ē ta’ata tā ’outou e ti’a ’ia fa’a’ore i te hapa. E mea nāhea te aroha o te Fa’aora i te ha’aputapū i tō ’outou mau mana’o nō ni’a ia ’outou iho ’e nō ni’a ia vetahi ’ē ? Nō te aha ’outou i mana’o ai ē, tē fa’aue mai nei te Fatu ia tātou « ’ia fa’a’ore i te hapa a te ta’ata ato’a » ? (’īrava 10). Mai te mea ē, tē fifi ra ’outou ’ia fa’a’ore i te hapa, ’a feruri e aha tā te mau rāve’a tauturu e ha’api’i nei nō ni’a i te huru e nehenehe ai te Fa’aora e tauturu : Jeffrey R. Holland, « Te ’ohipa fa’ahaura’a », Ensign ’aore rā Liahona, Novema 2018, 77–79; Te arata’i nō te mau pāpa’ira’a mo’a, « Fa’a’ore », scriptures.ChurchofJesusChrist.org.

Te Parau Ha’api’ira’a ’e te mau Parau Fafau 64:31–34

Tē tītau nei te Fatu i tō’u ’ā’au ’e te mana’o ’ana’anatae.

’Ua ’ite a’ena ānei ’outou i te « rohirohi » i te tā’āto’ara’a o te « ’ohipa maita’i » tā ’outou e tāmata nei i te fa’aoti ? ’A ’imi i te parau poro’i a te Fatu ia ’outou i roto i Te Parau Ha’api’ira’a ʼe te mau Parau Fafau 64:31–34. E aha te aura’a e hōro’a i tō ’outou « ’ā’au ’e te mana’o ’ana’anatae » i te Atua ra ? (’īrava 34).

Te Parau Ha’api’ira’a ’e te mau Parau Fafau 64:41–43

E riro Ziona ’ei « reva tāpa’o i te mau ta’ata ».

Te reva tāpa’o « ’o te hō’ē ïa reva i reira te ta’ata e ha’aputuputu hā’ati ai, i roto i te ’ōpuara’a hō’ē ’aore rā, te ti’ara’a ta’ata hō’ē » (Arata’i nō te pāpa’ira’a mo’a « Reva », scriptures.ChurchofJesusChrist.org). Nāhea Ziona—’aore rā, te ’Ēkālesia a te Fatu—e riro ai ’ei reva tāpa’o nō ’outou ? ’A feruri i teie atu mau hi’ora’a o te mau mea tei fa’ateiteihia i ni’a, mai te hō’ē reva tāpa’o, nō te ha’amaita’i i te ta’ata : Numera 21:6–9 ; Mataio 5:14–16 ; Alama 46:11–20. E aha tā teie mau ’īrava e ha’api’i nei ia ’outou nō ni’a i te huru e nehenehe ai ’outou e tauturu i te ’Ēkālesia ’ia riro ’ei reva tāpa’o i te vāhi tā ’outou e noho ra ? ’A ’imi i te tahi atu mau rāve’a tā te Fatu e fa’ata’a nei ia Ziona i roto i Te Parau Ha’api’ira’a ʼe te mau Parau Fafau 64:41–43.

Tāpena Moroni

Te tāpena Moroni i te amora’a i te tāpa’o nō te ti’amāra’a, nā Gary E. Smith

Te Parau Ha’api’ira’a ’e te mau Parau Fafau 65

« E haʼamaitaʼi ’outou i te ’ēʼa ʼo te Fatu »

Tē fa’a’ite nei Mataio i te parau nō Ioane Bāpetizo tei ti’aoro, « e ha’amaita’i ’outou i te ’ē’a o te Fatu » (Mataio 3:3 ; hi’o ato’a Isaia 40:3). I roto i Te Parau Ha’api’ira’a ʼe te mau Parau Fafau 65, ’ua fa’a’ohipa te Fatu i teie huru reo nō te fa’ata’a i tāna ’ohipa i te mau mahana hope’a nei. E aha te mau tū’atira’a tā ’outou e ’ite nei i rotopū i te ’ohipa tā Ioane Bapetizo i rave (hi’o Mataio 3:1–12) ’e i te mea tā te Fatu e hina’aro nei ’ia rave tātou i teie mahana ? E aha tā ’outou i ’ite mai i roto i teie heheura’a ’o tē fa’auru nei ia ’outou ’ia tauturu i te fa’atupura’a i te mau parau tohu e vai nei i roto ? ’A feruri i te mau rāve’a e nehenehe ai ia ’outou ’ia « fa’a’ite atu i te mau ’ohipa māere [a te Atua] i rotopū i te mau ta’ata » (’īrava 4).

Te Parau Ha’api’ira’a ’e te mau Parau Fafau 66

’Ua ’ite te Fatu i te mau mana’o o tō’u ’ā’au.

’Aita i maoro tōna tomora’a mai i roto i te ’Ēkālesia, ’ua ani o William E. McLellin ia Iosepha Semita ’ia heheu mai i te hina’aro ’o te Atua nōna. ’Aita o Iosepha i ’ite i te reira, terā rā, e pae uira’a tā William tāna e ti’aturi ra ē, e pāhono mai te Fatu nā roto i tāna peropheta. ’Aita tātou i ’ite e aha te mau uira’a a William, ’ua ’ite rā tātou ē, te heheura’a tei fa’ataehia mai iāna, Te Parau Ha’api’ira’a ʼe te mau Parau Fafau 66, i teienei, ’ua pāhono ïa i te uira’a tāta’itahi, i te « ’oa’oa rahi hope roa » ’o William (« Nā uira’a e pae a William MacLellin », Te mau heheura’a i roto i taua taime ra, 138).

’Ia tai’o ’outou i te tuha’a 66, ’a feruri i te mea tā te Fatu i ’ite nō ni’a ia William McLellin ’e te mau māna’ona’ora’a ’e te mau hina’aro o tōna ’ā’au. Nāhea tō te Fatu heheura’a mai ē, ’ua ’ite ’oia ia ’outou ? Mai te mea e ha’amaita’ira’a pātereāreha tō ’outou, ’a feruri ’ia tuatāpapa i te reira. ’Ia nā reira ’outou, e aha tā te Vārua Maita’i e tauturu ia ’outou ’ia hāro’aro’a nō ni’a i te hina’aro o te Atua nō ’outou ?

Hi’o ato’a Feiā Mo’a, 1:138–40 ; Mau tumu parau o te ’evanelia, « Mau ha’amaita’ira’a patereareha », topics.ChurchofJesusChrist.org.

ītona tuatāpapara’a a te ’utuāfare

Mau mana’o nō te tuatāpapara’a pāpa’ira’a mo’a a te ’utuāfare ’e te purera’a pō ’utuāfare

Te Parau Ha’api’ira’a ’e te mau Parau Fafau 64:8–10.E hōro’a mai te mau aura’a ’utuāfare e rave rahi mau rāve’a nō te ha’api’i mai i te fa’a’ore i te hapa. E nehenehe paha te mau melo o te ’utuāfare e paraparau e nāhea te fa’a’ore i te hapa a te tahi ’e te tahi i te ha’amaita’ira’a i tō ’outou ’utuāfare. Nāhea te Fa’aora i te tauturura’a ia tātou ’ia fa’a’ore i te hapa a te tahi ’e te tahi ? Nāhea tātou e « ro’ohia ai i te ’ati » (’īrava 8) ’ia ’ore tātou e fa’a’ore i te hapa a vetahi ’ē ?

Te Parau Ha’api’ira’a ’e Te mau Parau Fafau 64:33.E aha tā te Metua i te Ao ra e hina’aro nei i tō ’outou ’utuāfare ’ia rave nō te fa’atupu i tāna « ’ohipa rahi ». Te haerera’a paha i te hiero, tē fa’a’itera’a paha i te ’evanelia i te ta’ata tupu, ’aore rā, te ha’avīra’a i te mārōra’a. E nehenehe paha te melo tāta’itahi o te ’utuāfare e ’ohi mai i te mau tao’a ri’i na’ina’i, mai te ’ōfa’i ’aore rā, te mau pitopito ’aore rā, te mau tuha’a o te piriapu, ’e ’ia fa’a’ohipa i te reira ’ei fa’ahōho’ara’a i « te mau mea iti » tā tātou e nehenehe e rave i te mau mahana ato’a nō te « [ha’amau] i te niu » nō te ’ohipa rahi a te Atua. ’Ei ’utuāfare, ’a mā’iti i te hō’ē o teie mau mea iti nō te rave i teie hepetoma.

Te Parau Ha’api’ira’a ’e te mau Parau Fafau 66:3.Nāhea ’outou i te ha’api’i i te faufa’a o te tātarahapa ? E nehenehe ’outou e tu’u i te tahi mā’a i roto i te mereti e ’ere i te mea mā roa, ’e ’a tai’o i te mau parau a te Fatu nō ni’a ia William McLellin : « ’Ua mā atura ’oe, ’eiaha rā te tā’āto’ara’a ». I muri iho e nehenehe ’outou e tāmā i te mereti ’e e ’ōpere i te mā’a ’a paraparau ai ē, e mea nāhea tō Iesu Mesia fa’ati’ara’a ’ia mā tātou i te pae vārua.

Te Parau Ha’api’ira’a ’e te mau Parau Fafau 66:10.Nāhea e nehenehe ai i tō ’outou ’utuāfare ’ia pe’e i te a’o a te Fatu « ’eiaha ho’i e tītau ’ia fa’ateiahahia ra », ’aore rā, ’ia teimaha i te mau mea e rave rahi ’ia rave ? E nehenehe ’outou e paraparau nō ni’a i te ’ā’amu o Maria ’e o Mareta (hi’o Luka 10:38–42), ’e ’a ’āparau e mea nāhea e nehenehe ai i tō ’outou ’utuāfare ’ia ’ore ’ia teimaha i te mau mea ’aore e faufa’a mure ’ore tō te reira.

Nō te tahi atu mau mana’o nō te ha’api’ira’a i te mau tamari’i, hi’o te arata’i nō teie hepetoma i roto Mai, pe’e mai—nō te Paraimere.

Hīmene tei mana’ohia : « Aide moi, Père », Chants pour les enfants, 52

Ha’amaita’ira’a i tā tātou ha’api’ira’a

Vai vata noa ’e vai matara noa. E ha’amata te tahi o te mau taime maita’i roa a’e nō te ha’api’i nā roto i te mau uira’a ’aore rā te mau māna’ona’ora’a e vai ra i roto i te ’ā’au o te mau melo o te ’utuāfare. ’Ia ’ite te mau melo o te ’utuāfare nā roto i tā ’outou iho mau parau ’e mau ’ohipa ē, e hina’aro rahi tō ’outou ’ia fa’aro’o ia rātou. (Hi’o Ha’api’ira’a mai tā te Fa’aora, 16.)

Tē tūturi nei hō’ē vahine i pīha’i iho ia Iesu

Fa’a’orera’a hara, nā Greg K. Olsen Fa’a’ohipahia ma te parau fa’ati’a. www.GregOlsen.com