jun na’ajej rik’ineb’ li chunleb’aal

9–15 agosto

Tzolʼlebʼ ut Sumwank 88

“Xaqab’omaq … rochoch li Dios”

Li Awa’b’ej Russell M. Nelson kixye, “Ninyeechi’i naq sa’ xyalb’al eeq’e chi anchal eemetz’ew chixchaab’ilob’resinkil eerochoch jo’ jun na’ajej re xtzolb’al li evangelio, … taak’osq lix wankil laj tza sa’ lee yu’am ut sa’ lee rochoch” (“Li ok choq’ jun aj Santil Paab’anel sa’ Roso’jikeb’ li Kutan jwal chaab’il,” Jolomil ch’utub’aj-ib’ re octubre 2018).

Tz’iib’a li nakak’oxla

Chi jo’q’ehaq, li Qaawa’ nokoxkanab’ chirilb’al ka’ch’inaq lix “nimal ru ut xwankilal” (Tzol’leb’ ut Sumwank 88:47) rik’in xk’utb’esinkil xninqal ru na’leb’ chiruheb’ lix profeet. Tzol’leb’ ut Sumwank 88 a’an jun reheb’ li k’utb’esinb’il na’leb’ a’an—li na’aatinak chirix li saqen ut li loq’alil ut eb’ li awa’b’ejihom li neke’xkanab’ chiqak’oxla naq yal ka’ch’in li nachal wi’ qak’a’uxl sa’ li ruchich’och’ a’in. Us ta ink’a’ nokoru chixtawb’al ru chixjunil li naxk’ut li Qaawa’ chiqu, toj naru naqak’e reetal naq k’a’jo’ wi’chik xnimal ru li junelik q’e kutan chiru li naru nokoru chixtawb’al ru anajwan. A’ut, li Qaawa’ ink’a’ ki’aatinak chirixeb’ li xninqal ru muqmuukil na’leb’ a’in re qaxib’esinkil malaj xka’ch’inob’resinkil qach’ool. Relik chi yaal, a’an kixyeechi’i, “Taachalq li kutan naq teetaw xyaalal li Dios ajwi’ ” (raqal 49; tiqb’il xkawil li aatin). Maare re naq te’ruuq chixk’ulb’al li taqenaqil na’leb’ a’an naq li Qaawa’ kirelajiheb’ lix santil paab’anel sa’ Kirtland chixk’uub’ankil lix Tzoleb’aaleb’ li Profeet. “K’uub’ahomaq eerib’,” chan. “Kawresihomaq chixjunil li k’a’ru na’ajman; ut xaqab’omaq … rochoch li Dios” (raqal 119). Xb’aan naq a’an sa’ lix santil ochoch li Dios—ut sa’eb’ li qochoch laa’o—chi mas wi’chik chiru b’araq chik sa’ li ruchich’och’, naq a’an taaruuq chixtaqsinkil li qilob’aal sa’ xb’een chaq li yu’am a’in, “taarisi xtz’apb’al ru li rilob’aal chiqu,” ut tooxkawob’resi “chixkuyb’al jun choxahil loq’alil” (eb’ li raqal 68, 22).

reetalil li tzolok aajunes

Li na’leb’ re xtzolb’aleb’ li loq’laj hu aajunes

Tzolʼlebʼ ut Sumwank 88

Li Qaawa’ naxyeechi’i qe li yo’onink ut li tuqtuukilal.

Yal junjunq kutan chirix xyeeb’al naq “taahoymanq li pleet sa’ xb’eeneb’ chixjunil li tenamit” (Tzol’leb’ ut Sumwank 87:2), li Qaawa’ kixk’utb’esi jun na’leb’ li kixk’e laj Jose Smith choq’ xk’ab’a’ “ “xxaq li olivo” … ch’otb’il chaq sa’ xtoonal li Che’ re li Hilob’aal Na’ajej, li esil re tuqtuukilal naxk’e li Qaawa’ choq’ qe” (Tzol’leb’ ut Sumwank 88, xtiklajik li tasal). Chan ru naq li k’utb’esinb’il na’leb’ a’in chanchan jun xxaq li olivo, jun reetalil li tuqtuukilal? (chi’ilmanq ajwi’ Genesis 8:11). K’a’ruheb’ li yaalil na’leb’ sa’ li tasal a’in li nakate’xtenq’a chireek’ankil li yo’onink ut li tuqtuukilal rik’in li Kristo?

Tzol’leb’ ut Sumwank 88:6–67

Li saqen ut li chaq’rab’ neke’chal rik’in li Jesukristo.

Li aatin saqen ut li aatin chaq’rab’ k’iilasutinb’ileb’ sa’ li tasal 88. Neke’oksiman li aatin a’in sa’ jalaneb’ chik raqal reheb’ li loq’laj hu re aatinak chirix li Jesukristo ut lix evangelio (jo’ eetalil, chi’ilmanq Isaias 60:19; Jwan 1:1–9; 3 Nefi 15:9). Juch’eb’ malaj eetaliheb’ li raqal b’ar wi’ nakataweb’ li aatin a’in sa’ Tzol’leb’ ut Sumwank 88:6–67, ut tz’iib’a li nakatzol chirix li Kolonel, li saqen, ut li chaq’rab’. Maare eb’ li raqal a’in tate’xmusiq’a chixjalb’al laa yu’am re naq chi tiik wi’chik laa paab’aal taak’ul li saqen ut taayu’ami “lix chaq’rab’ li Kristo” (raqal 21).

Chi’ilmanq ajwi’ Sharon Eubank, “Li Kristo: Li saqen li nalemtz’un sa’ q’ojyin,” Jolomil ch’utub’aj-ib’ re abril 2019.

junkab’al li yookeb’ chirilb’aleb’ ru li loq’laj hu

Wan lix chaq’rab’ li Kristo sa’eb’ li loq’laj hu.

Tzol’leb’ ut Sumwank 88:62–126

Kawresihomaq chixjunil li kʼaʼru naʼajman.

Laa’o wanko sa’ jun kutan naq, jo’ kixch’olob’ li Qaawa’, “chixjunil li k’a’aq re ru taawanq chi choqinb’il; ut ch’olch’o naq eb’ li winq te’lajq xch’ooleb’ ” (Tzol’leb’ ut Sumwank 88:91). Naq yooqat chirilb’aleb’ ru li raqal 62–126, k’oxlan chirix chan ru naq lix na’leb’ li Qaawa’ naru tatxtenq’a chixkawresinkil aawib’ choq’ re xkab’ xk’ulunik li Kolonel. Wahe’ junjunq li patz’om re xk’oxlankil:

Eb’ li raqal 62–76.Naq yooqat chixk’oxlankileb’ li raqal a’in, k’a’ru musiq’anb’ilat chixb’aanunkil re “jilonk rik’in” li Dios? (raqal 63). K’oxlan chirix k’a’ru naraj naxye choq’ aawe lix taqlahom li Qaawa’, “santob’resihomaq eerib’ ” (raqal 68).

Eb’ li raqal 77–80, 118–26.K’a’ut naq “na’ajman ru naq taataw ru” li tzol’leb’ re li evangelio jo’ ajwi’ li ruchich’och’il na’leb’? (raqal 78). K’a’ru yookat chixb’aanunkil re xtaaqenkil li na’leb’ naq “taasik’ xk’ulb’al aanawom”? (raqal 118). K’a’ru naraj naxye xk’ulb’al aanawom “rik’in li tzolok ut rik’in ajwi’ li paab’aal”?

Eb’ li raqal 81–116.K’oxla xjuch’b’aleb’ li profeetil aatin chirix li xkab’ xk’ulunik li Kolonel sa’eb’ li raqal a’in. K’a’ut nakak’oxla naq li Qaawa’ taaraj naq taanaweb’ li k’a’aq re ru a’in?

Ebʼ li raqal 117–26.K’oxla rilb’aleb’ ru li raqal a’in chi wan li santil ochoch sa’ laa k’a’uxl; k’a’ru nakataw arin li taaruuq tatxtenq’a chixkawresinkil aawib’ chi ok sa’ rochoch li Qaawa’?

Chi’ilmanq ajwi’ D. Todd Christofferson, “Xkawresinkil qib’ choq’ re lix sutq’ijik li Qaawa’,” Jolomil ch’utub’aj-ib’ re abril 2019, 81–84; David A. Bednar, “Buscar conocimiento por la fe,” Liahona, septiembre 2007, 17–24; Santos, 1:167–169; “Una escuela y una investidura,” Revelaciones en contexto, 186–194.

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Tzolʼlebʼ ut Sumwank 88:14–33, 95–101.K’a’ru naqatzol chirix li Kolonel sa’eb’ li raqal a’in? Chan ru naq taajalaaq li naqasik’ ru xb’aanunkil xb’aaneb’ li yaalil na’leb’ a’in?

Tzol’leb’ ut Sumwank 88:33.Taaruuq taatikib’ aatinak chirix li raqal a’in rik’in xpatz’b’al reheb’ li komon sa’ li junkab’al naq te’aatinaq chirixeb’ maatan k’eeb’ileb’ reheb’—eb’ li xe’xk’ul chi saheb’ xch’ool ut eb’ li ink’a’. Chan ru naru taqak’ut chiru li Qaawa’ naq nasaho’ qach’ool xb’aan li maatan re choxahil loq’alil li naxyeechi’i qe? Chan ru taasaho’q qach’ool rik’in “li ani kik’ehok re li maatan”?

Tzolʼlebʼ ut Sumwank 88:63, 68.Wankeb’ junjunq aatin sa’eb’ li raqal a’in li maare te’xwaklesi aach’ool chixk’oxlankil chan ru naru taak’ut chi chaab’il li esil wankeb’ sa’eb’ li raqal a’in chiruheb’ laa kok’al. Qayehaq, maare teeb’aanu jun b’atz’unk re muquk-ib’ re aatinak chirix li ch’ol aatin “sik’omaqin chi yalb’il eeq’e ut tineetaw” (raqal 63; tiqb’il xkawil li aatin).

Tzol’leb’ ut Sumwank 88:81.Jo’ junkab’al, aatinanqex chirixeb’ li tijleb’ eetalil wankeb’ chi sa’ ut chirix lee rochoch, jo’eb’ li eetalil tz’iib’anb’ileb’ chiruheb’ li b’an malaj li eetalil choq’ reheb’ li neke’ch’e’ok b’eleb’aal ch’iich’. Chan ru nokohe’xtenq’a li tijleb’ eetalil a’in? K’a’ru chi aj-ix naraj li qaChoxahil Yuwa’ naq “taqatij li qas qiitz’in”?

Tzol’leb’ ut Sumwank 88:119.Re xwaklesinkil xch’ool laa junkab’al re taawanq lee rochoch jo’ ch’olob’anb’il sa’ li raqal 119, yal xb’aanunkil k’a’ruhaq jo’ a’in: Tz’iib’aheb’ li ch’ol aatin wankeb’ sa’ li raqal a’in chiru kok’ setel hu, ut oksiheb’ re xtz’apb’al ru jun xjalam-uuch li santil ochoch. Ilomaq ru Tzol’leb’ ut Sumwank 88:119 sa’ komonil, ut kanab’eb’ li komon sa’ li junkab’al chirisinkil li junjunq setel hu naq te’rab’i li ch’ol aatin sa’ li raqal. K’a’ru naru taqab’aanu re naq li qochoch a’anaq jun “rochoch li Dios”? (raqal 119).

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Nach’ aawik’in, Qaawa’,” Eb’ li B’ich, 54.

Xchaab’ilob’resinkil li qak’utum

Kanab’eb’ li kok’al chi yiib’ank. Naq nakab’oqeb’ laa kok’al chixyiib’ankil k’a’ruhaq re xk’utb’al jun na’leb’ re li evangelio, nakatenq’aheb’ chixtawb’al ru chi mas wi’chik li na’leb’ a’an, ut nakatenq’aheb’ chixjultikankil li k’a’ru xe’xtzol (chi’ilmanq Li k’utuk jo’ li Kolonel, 25).

li Jesus rik’ineb’ li tzolom

Li Jesukristo naxyeechi’i li tuqtuukilal qe. Li tuqtuukil usilal ninkanab’ eerik’in, xb’aan laj Walter Rane