“16–22 agosto. Tzolʼlebʼ ut Sumwank 89–92: “Jun na’leb’ li wan xyeechi’ihom,” ” Kim, Taaqehin—Choq’ reheb’ li komon ut li junkab’al: Li Tzol’leb’ ut Sumwank 2021 (2020)
“16–22 agosto. Tzolʼlebʼ ut Sumwank 89–92,” Kim, Taaqehin—Choq’ reheb’ li komon ut li junkab’al: 2021
16–22 agosto
Tzolʼlebʼ ut Sumwank 89–92
“Jun na’leb’ li wan xyeechi’ihom”
Tzol rik’in tijok Tzol’leb’ ut Sumwank 89–92, ut tz’iib’a li musiq’ejil na’leb’ nakak’ul. Chatwanq chixk’eeb’al reetal chan ru naq “li Musiq’ej naxk’utb’esi li yaal” chawu naq yooqat chi tzolok (Tzol’leb’ ut Sumwank 91:4).
Tz’iib’a li nakak’oxla
Sa’ lix Tzoleb’aaleb’ li Profeet, li Profeet aj Jose Smith kixtzoleb’ li xb’eenil aj Israel chirix xkab’lankil li rawa’b’ejihom li Dios sa’ ruchich’och’. Ke’aatinak chirixeb’ musiq’ejil yaal, ke’tijok sa’ komonil, ke’xkuy xsa’, ut ke’xkawresi rib’ re xjultikankil li evangelio. A’b’an kiwan ajwi’ li yookeb’ chaq chixb’aanunkil li ink’a’ raj taqab’aanu sa’ li kutan a’in, ut li xEmma Smith kireek’a ajwi’ naq moko us ta xb’aanunkil. Naq ch’utch’uukeb’, eb’ li winq ke’mayib’k, jo’ rajlal nab’aanuman sa’ li kutankil a’an, a’b’an xmaak a’an xkana chi tz’ajninb’il xche’il li kab’l, ut wan xchuhil li sib’. Li xEmma kixwotz xk’a’uxl rik’in laj Jose, ut laj Jose kipatz’ok chiru li Qaawa’. Xb’aan a’in naq kik’utb’esiman jun na’leb’ li nimaq wi’chik xwankil chiru yal xtuqub’ankil ru li tz’ajniik xb’aan sib’ ut may. Kixk’e reheb’ laj santil paab’anel, chiru k’iila tasal tenamit li toj te’chalq, “jun na’leb’ li wan xyeechi’ihom”—yeechi’ihom re kawilal sa’ tib’elej, “xchaab’ilal li na’leb’,” ut “ninqi b’ihomal re nawom” (Tzol’leb’ ut Sumwank 89:3, 19).
Chi’ilmanq ajwi’ Santos, 1:169–171.
Li na’leb’ re xtzolb’aleb’ li loq’laj hu aajunes
Li Aatin re Chaab’il Na’leb’ a’an “jun na’leb’ li wan xyeechi’ihom.”
Naq eb’ li xb’eenil sa’ lix Tzoleb’aaleb’ li Profeet ke’rab’i laj Jose Smith chixyaab’asinkil xb’een wa li Aatin re Chaab’il Na’leb’, sa’ junpaat “ke’xkuteb’ lix mayleb’ ut lix may sa’ li xam” (Santos, 1:171). Sa’ li kutan a’an, li Aatin re Chaab’il Na’leb’ kik’eeman jo’ tijom, ink’a’ chaq’rab’, a’b’an ke’raj xk’utb’al rajomeb’ xch’ool chi ab’ink. Maare laa’at ak xawisi chaq sa’ aayu’am li k’a’ru yeeb’il naq ink’a’ taa’oksimanq sa’ li Aatin re Chaab’il Na’leb’, a’b’an k’a’ chik ru naru taatzol rik’in li k’utb’esinb’il na’leb’ a’in? K’oxlaheb’ li na’leb’ a’in:
-
Sik’eb’ li ch’ol aatin maare maajun wa xak’e reetal—malaj maajun wa aak’oxlahom. K’a’ru nakatzol rik’ineb’?
-
Sa’ Tzol’leb’ ut Sumwank 89 wankeb’ junjunq li yeechi’ihom (che’ilmanq li raqal 18–21). K’a’ru xyaalalileb’ li yeechi’ihom a’in jo’ nakak’oxla?
-
K’a’ru naxk’ut li k’utb’esinb’il na’leb’ a’in chawu chirix li Qaawa’?
-
K’a’ruheb’ li eetalil aawilom chirix “li maa’usilal ut li k’uub’anb’il k’a’uxl li wan … sa’ xch’ooleb’ li winq aj takchi’ihom rib’ ”? (raqal 4).
-
K’oxla li k’utb’esinb’il na’leb’ jo’ “jun na’leb’ li wan xyeechi’ihom” (raqal 3)—jo’ jun xk’utunik li yaal li natenq’an sa’ li sik’ok-u—ink’a’ ka’ajwi’ jun xtusulal li k’a’ru us ut k’a’ru ink’a’ us. K’a’ru li na’leb’ nakataw li tixk’am aab’e sa’ xsik’b’al ru li k’a’ru taab’aanu?
Eb’ li profeet sa’ li qakutan nokohe’xtij ajwi’ chirix xkomon chik li k’a’ru ink’a’ us roksinkil ut xb’aanunkil li moko wankeb’ ta sa’ li Aatin re Chaab’il Na’leb’ (chi’ilmanq “Li kawilal sa’ tib’elej ut sa’ musiq’ej,” Choq’ re Xkawilaleb’ li Saaj, 25–27). K’a’ru musiq’anb’ilat chixb’aanunkil re rilb’al chi us laa k’a’uxleb’aal ut laa junxaqalil?
Chi’ilmanq ajwi’ Daniel 1; 1 Korintios 6:19–20; Temas del Evangelio, “Palabra de Sabiduría,” topics.ChurchofJesusChrist.org; “La Palabra de Sabiduría,” Revelaciones en contexto, 195–204; addictionrecovery.ChurchofJesusChrist.org.
Li Aatin re Chaab’il Na’leb’ naxk’ut chiqu chan ru rilb’al chi us li qajunxaqalil.
“Lix laawil li awa’b’ejihom” wan sa’ ruq’ li Xb’eenil Awa’b’ejil.
Sa’ li tasal 90, li Qaawa’ kixk’e li na’leb’ chirix “li k’anjel ut awa’b’ejil” (raqal 12) re laj Jose Smith, laj Sidney Rigdon, ut laj Frederick G. Williams—komoneb’ sa’ li Xb’eenil Awa’b’ejil jo’ naqaye re anajwan. K’a’ru nakatzol chirix li Xb’eenil Awa’b’ejil sa’eb’ li raqal 1–17? Ileb’ ru junjunq reheb’ li esil li toje’ xe’xk’e li ani wankeb’ sa’ li Xb’eenil Awa’b’ejil. Chan ru naq li raatineb’ “neke’xte ru li muqmuukil na’leb’ re li awa’b’ejihom” chawu? (raqal 14). Chan ru naq “neke’xk’e xtuqub’ankil ru chixjunil li na’leb’ re li iglees ut awa’b’ejihom a’in”? (raqal 16).
Chi’ilmanq ajwi’ Henry B. Eyring, “Lix wankilal li paab’aal aj xaqab’anel,” Jolomil ch’utub’aj-ib’ re abril 2019.
“Chixjunil li k’a’aq re ru taak’anjelaq sa’ junajil choq’ re lin chaab’ilal.”
K’oxlan chirix k’a’ruhaq xak’ul laa’at li naxk’ut xyaalal lix yeechi’ihom li Qaawa’ wan sa’ Tzol’leb’ ut Sumwank 90:24. K’oxla xtz’iib’ankil resil laa numsihom ut xwotzb’al rik’in jun komon sa’ laa junkab’al malaj anihaq chik raaro aab’aan—maare anihaq li naraj ru xk’ojob’ankil ut xwaklesinkil xch’ool. Wi wankeb’ li osob’tesink toj yookat chiroyb’eninkil, k’oxlan chirix k’a’ru naru taab’aanu re kanaak chi tiik aapaab’aal sa’ royb’eninkil rilb’al chan ru “chixjunil li k’a’aq re ru taak’anjelaq sa’ junajil choq’ re laa chaab’ilal.”
Ani li xVienna Jaques?
Li xVienna Jaques kiyo’la sa’ 10 junio, 1787, sa’ li estado Massachusetts. A’an chaq jun ixq wan xpaab’aal ut xb’ihomal, ut kixnaweb’ ru li misioneer xb’een sut sa’ 1831. Chirix xk’ulb’al jun musiq’ejil xnawom naq yaaleb’ li raatin, xko’o sa’ Kirtland, Ohio re xnawb’al ru li Profeet, ut kikub’e xha’ aran.
Li xVienna ki’ab’in chiru lix na’leb’ li Qaawa’ choq’ re sa’ Tzol’leb’ ut Sumwank 90:28–31. Lix q’axtesinkil rib’ chiru li Qaawa’, jo’ ajwi’ li tumin kixk’e naq wan chaq Kirtland, kichal sa’ jun aajel ruhil hoonal choq’ re li Iglees, naq eb’ laj jolominel yookeb’ chaq chixyalb’al xloq’b’al li ch’och’ taakab’lamanq wi’ li Santil Ochoch re Kirtland. Li xVienna a’an chaq “tiik chi paab’ank, ut moko aj q’emaq ta” chiru xnajtil lix yu’am ut moqon kiru “chixtawb’al xna’aj sa’ tuqtuukilal” (raqal 31) sa’ li ru taq’a Lago Salado, b’ar kikam naq 96 chihab’ wan chaq re.
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
-
Tzolʼlebʼ ut Sumwank 89.Maare taawulaq chiruheb’ li komon sa’ laa junkab’al xyiib’ankil malaj xtawb’aleb’ xjalam-uuch li tzakemq ut xkomon chik li yeeb’il resil sa’ Tzol’leb’ ut Sumwank 89. Chirix a’an taaruuq teeb’aanu jun b’atz’unk—eb’ li komon sa’ li junkab’al taaruuq te’xk’e xhoonaleb’ chirib’ileb’ rib’ chixxokb’aleb’ li jalam-uuch chi junjunqil, ut te’xk’e xjalam-uuch li ink’a’ us roksinkil sa’ mul ut xjalam-uuch li us roksinkil sa’ xb’een jun li plaat. Chan ru naq ak tz’aqob’resinb’il ru sa’ li qayu’am li k’a’ru yeechi’inb’il sa’eb’ li raqal 18–21?
Rilb’al ru “Li kawilal sa’ tib’elej ut sa’ musiq’ej,” sa’ Choq’ re Xkawilaleb’ li Saaj (25–27) taaruuq texxtenq’a chi aatinak chirix chan chik ru rilb’al chi us lix kawilal li qatib’el ut chirixeb’ li osob’tesink naxyeechi’i li Dios.
-
Tzol’leb’ ut Sumwank 90:5.Aatinan chirix chan ru “nakak’ul lix k’utb’esihom li Dios” (eb’ lix k’utb’esinb’il na’leb’ malaj eb’ lix profeet). Chan ru naru taqak’ut naq maawa’eb’ “yal jo’maajo’ ” choq’ qe’?
-
Tzolʼlebʼ ut Sumwank 91.Taaruuq tex’aatinaq chirix chan ru naq lix na’leb’ li Qaawa’ chirix li Hu Dewterokanoniko (che’ilmanq li raqal 1–2) wan rilom rik’in li neke’ril laa junkab’al sa’ television malaj internet sa’ li kutan a’in (chi’ilmanq ajwi’ K’utul Raqal reheb’ li Loq’laj Hu, “Hu Dewterokanoniko”). Taaruuq ajwi’ taawotz chan ru xattenq’aak chixtz’ilb’al rix b’ar wan li us ut b’ar wan li ink’a’ us naq “xatkutanob’resiik xb’aan li Musiq’ej” (raqal 5).
-
Tzol’leb’ ut Sumwank 92:2.K’a’ru naraj naxye wank chi “k’eeb’ilaq qach’ool jo’ komon” sa’ li Iglees?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Jun b’ich naru xb’ichankil: “Jun santil ochoch k’eeb’il we,” B’ichleb’aal choq’ reheb’ li Kok’al, 73.
Xchaab’ilob’resinkil li qak’utum
Jal chan ru nakatk’utuk. Sik’ chan ru xtenq’ankil laa junkab’al re naq k’eek’ooqeb’ xch’ool chixtzolb’aleb’ li loq’laj hu jo’ junkab’al. Qayehaq, eb’ li komon sa’ li junkab’al taaruuq te’xb’icha jun li b’ich sa’ Eb’ li B’ich malaj sa’ li B’ichleb’aal choq’ reheb’ li Kok’al li wan rilom rik’in jun raqal sa’eb’ li loq’laj hu, taaruuq te’xyiib’ xjalam-uuch li xe’ril ru, malaj taaruuq te’xk’os ru jun raqal rik’in tz’aqal raatineb’ a’an.
“Chixjunileb’ laj santil paab’anel li … neke’xb’aanu li yehom a’in, rik’in b’eek sa’ ab’ink chiruheb’ li taqlahom, te’xk’ul kawilal sa’ xch’up ut sulutz sa’ xb’aqeleb’ ” (Tzol’leb’ ut Sumwank 89:18).