“18–24 Oktoba. Doktrin mo Ol Kavenan 121–123:‘O God, ?Yu Yu Stap Wea?’” Kam Folem Mi—Blong Wanwan Man, Woman mo Famli: Doktrin mo Ol Kavenan 2021 (2020)
“18–24 Oktoba. Doktrin mo Ol Kavenan 121–123” Kam Folem Mi—Blong Wanwan Man, Woman mo Famli: 2021
Libeti Kalabus long Springtaem, i kam long Al Rounds
18–24 Oktoba
Doktrin mo Ol Kavenan 121–123
“O God, ?Yu Yu Stap Wea?”
Bae eksperiens blong yu blong stap stadi long ol skripja bae i rij moa sapos gol blong yu i blong faenemaot trutok. Stat wetem wan prea, lisin long Spirit, mo raetemdaon ol filing mo tingting we oli kam long yu.
Raetemdaon Ol Filing mo Tingting blong Yu
Rum andanit long graon insaed long kalabus long Libeti, Misuri, oli bin save long hem tu se hem i wan andanit graon kalabus. Ol wol oli tik, floa blong hem we oli mekem wetem ston, i kolkol mo i doti, kaekae—sapos i gat—i roten, mo wan laet nomo we i kam insaed, i stap kamtru long tu smolsmol windo we aean i blokem, kolosap long siling. Andanit graon kalabus ia, i ples ia we Josef Smit mo sam long ol brata blong hem oli bin spendem plante taem long hem, taem oli bin stap long kalabus—fo manis long wintataem long yia 1838–39—we oli stap wet blong pas long Kot from ol rong olsem fasin blong go agensem stet blong Misuri. Long tetaem ia, Josef i bin stap gohed blong kasem nius abaot ol safaring blong Ol Sent. Pis mo hop blong Fa Wes, i bin stap blong samfala manis nomo, mo naoia, Ol Sent oli nomo gat hom bakegen, mo oli ronem olgeta oli go long wan waelples, oli stap lukaotem wan nara ples blong stat bakegen—be naoia, Profet blong olgeta i stap long kalabus.
Hemia nao Josef Smit i bin singaot: “O God, ?yu yu stap wea?” Ol ansa we hem i bin kasem, “save we i kam long heven” we i kam “i kapsaed” i kam insaed long rabis kalabus ia, i soemaot se, nomata we oli filim olsem, God i neva bin longwe. I no gat paoa we i save “blokem ol heven;” hemia i wan samting we Profet i bin lanem. “God bae i stap wetem [Ol fetful Sent] blong Hem blong oltaem mo oltaem.(Doktrin mo Ol Kavenan 121:1, 33; 122: 9.)
Luk long Saints, 1:323–96; “Within the Walls of Liberty Jail,” Revelations in Context, 256–63.
Sam Aedia blong Skripja Stadi blong Yuwan
Doktrin mo Ol Kavenan 121:1–10, 23–33;122
Wanem i kam agensem mi, i save kam blong “gud blong mi.”
Taem we yumi, o olgeta we yumi lavem, oli stap long medel blong wan taem we oli safa, hem i nomol blong askem yumiwan sapos God i luksave yumi o nogat. Taem yu stap ridim Doktrin mo Ol Kavenan 121:1–6, tingting abaot ol taem we yu bin gat ol kwestin o filing semmak long hemia we Josef Smit i bin gat. ?Wanem nao yu faenem insaed long ansa blong Lod we i save helpem yu taem yu gat ol kwestin o filing ia? Eksampol, long ol ves 7–10, 26–33, luk ol blesing we Hem i bin promesem long olgeta we “oli mekem gud blong stap strong” tru long hadtaem. Taem yu stap ridim seksen 122, tingting long hao nao Lod i wantem yu blong luk long ol samting we oli stap kam agensem yu.
Luk tu long Henry B. Eyring, “Where Is the Pavilion?” Ensign o Liahona, Nov. 2012, 72–75.
Doktrin mo Ol Kavenan 121:34–46
Yumi save gat mo yusum “ol paoa blong heven.”
Long wan taem we i luk se i wan situesen we i no gat paoa long hem insaed long Libeti Kalabus, Josef i bin kasem wan revelesen abaot paoa—i no paoa blong politik, o blong ami we i bin stap ova long Ol Sent, be “ol paoa blong heven.” Taem yu stap ridim Doktrin mo Ol Kavenan 121:34–46, ?wanem nao yu lanem abaot paoa blong God? ?Olsem wanem nao hemia i defren long paoa blong wol ia? Eksampol, luk long ol toktok we Lod i stap yusum insaed long ol ves 41–43 blong tokbaot “paoa o fos.” ?Ol toktok ia oli stap tijim wanem abaot wei we God i stap holemtaet “paoa o fos” blong Hem? Maet ol ves ia oli save givim insperesen long yu blong tingting hevi moa abaot laef blong yu mo wanem yu save mekem blong kam wan fos blong mekem gud samting insaed long ol rilesensip blong yu wetem ol narawan.
Kraes i bin kam daon i bitim evri samting.
Josef Smit, hem oli no bin mekem i stret long hem, mo oli bin sarem hem long kalabus blong ova long fo manis long semtaem we ol man oli bin stap ronem ol fren mo famli oli aot long ol hom blong olgeta. Wok ia, we hem i bin givim laef blong hem blong mekem, i luk olsem se i stap go nating nomo nao. ?Wanem nao yu lanem abaot Jisas Kraes aot long ol toktok we Hem i bin talem long Josef insaed long seksen 122? ?Wanem nao yu lanem abaot Josef? ?Wanem nao yu lanem abaot yuwan?
Luk tu long Alma 7:11–13; 36:3; Doktrin mo Ol Kavenan 88:6.
I No Olsem Tingting blong Mi, be Olsem Tingting blong Yu i kam long Walter Rane
“Bae yumi mekem wetem glad hat, evri samting we i stap long paoa blong yumi.”
Long Maj 1839, i luk olsem se i no gat tumas samting we Ol Sent oli save mekem blong jenisim nogud situesen blong olgeta. Long ol leta blong hem, we hem i bin raetem insaed long Libeti Kalabus, Josef i bin talem long olgeta wanem oli save mekem: “putum tugeta ol save long saed blong evri samting we i bin hapen,” mo “stanap kwaet, wetem bigfala tras evriwan, blong luk fasin blong God blong sevem man” (Doktrin mo Ol Kavenan 123:1, 17). Taem yu stap tingting long giaman mo “giaman wok blong ol man” insaed long wol tedei, tingting abaot wanem samting “i stap long paoa blong [yu],” blong yu mekem? (ol ves 12, 17). ?From wanem hem i impoten blong mekem olgeta samting ia “wetem glad hat”? (ves 17). ?Huia yu save, we “i no save trutok” (ves 12), mo olsem wanem nao bae yu helpem hem blong faenem trutok ia?
Plante long ol samting we Josef i bin askem long leta ia, oli bin sendem i go long gavman, mo oli pablisim olgeta long 11 namba blong wan niuspepa long Nauvu, we oli singaotem Times and Seasons (luk long “A History, of the Persecution, of the Church of Jesus Christ, of Latter Day Saints in Missouri, December 1839–October 1840,” [josephsmithpapers.org]).
Sam Aedia blong Famli Skripja Stadi mo Famli Haos Naet
-
Doktrin mo Ol Kavenan 121:1–10.“Kalabus andanit graon” long Libeti Kalabus, hem i 4.2 mita long sot saed mo 4.4 mita long longfala saed. ?Olsem wanem nao yu save helpem famli blong yu i pikjarem se bae i olsem wanem blong stap insaed long wan spes we i saes olsem blong fofala kolkol manis? Yu save faenem ol nara ditel abaot kondisen insaed long long Libeti Kalabus insaed longJapta 46: Josef Smit long Libeti Kalabus(Ol Doktrin mo Kavenan Stori, 155–74). Mo tu, yu save ridim: “Ol Voes blong Restoresen: Libeti Kalabus” we i stap long en blong aotlaen ia, o yu save wajem wan vidio we i soemaot taem ia blong Josef insaed long Libeti Kalabus; vidio ia, hem i Joseph Smith: Prophet of the Restoration (ChurchofJesusChrist.org, we i stat long 43:00). ?Olsem wanem infomesen ia i tajem yumi long wei we yumi filim abaot ol prinsipol insaed long Doktrin mo Ol Kavenan 121:1–10?
-
Doktrin mo Ol Kavenan 121:34-36, 41-45.Maet, sapos yu komperem sam samting, bae i helpem famli blong yu blong andastanem “ol paoa blong heven.” Eksampol: yu save komperem paoa blong God long lektrik paoa; ?wanem i save stopem wan lektrik samting blong i no kasem paoa? ?Wanem nao, taem yu komperem hemia wetem ol ves ia 34–36, 41–45, i tijim yu abaot wei blong mekem se yu gat moa paoa long saed blong spirit? Mebi ol memba blong famli oli save serem sam stori aot long laef blong Sevya i soemaot eksampol blong ol fasin ia.
-
Doktrin mo Ol Kavenan 122:7–9Maet ol memba blong famli bae oli laekem blong mekem ol smol saen we oli gat ol sentens we oli stap long ol ves ia, we i givim insperesen long olgeta. Ol saen ia, yufala i save hangem insaed long hom blong yufala. ?From wanem hem i impoten blong save se “Pikinini blong Man i bin kam daon” i bitim evri samting?
-
Doktrin mo Ol Kavenan 123:12.?Olsem wanem yumi save helpem ol pipol blong “save weaples blong faenem” trutok?
Blong gat moa aedia blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “Where Can I Turn for Peace?” Hymns, no. 129.
Ol Voes blong Restoresen
Libeti Kalabus
Taem hem i bin stap long kalabus long Libeti, Misuri, Josef Smit i bin kasem sam leta we oli talemaot long hem abaot prapa nogud situesen blong ol Lata-dei Sent we oli bin stap ronemaot olgeta long stet, hemia folem wan oda blong gavna. Wan leta we i kasem hat blong hem, i kam long waef blong hem, Ema. Ol toktok blong hem, mo ol leta blong Josef we i ansa long ol leta ia, oli talemaot stret ol safaring mo fet blong olgeta long bigfala hadtaem ia long histri blong Jos.
Leta we i kam long Ema Smit i go long Josef Smit, 7 Maj 1839:
“Dia Hasban
“Mi gat wan janis blong sendem leta, tru long wan fren, mekem se mi traem blong raet, be bae mi traem blong no raetem evri filing blong mi, from situesen we yu stap long hem, ol wol, ol aean, mo ol bigfala lok ia, ol reva we oli ron, ol smol wota we oli fulap mo oli ron, ol hil we oli girap, ol vale we oli kam flat mo from ol bigfala stret ples we oli stap seperetem yumi, mo from rabis nogud jastis ia we, faswan, i sakem yu long kalabus mo i stap holemtaet yu longwe yet, mo from plante nara samting blong tingting long hem, we oli mekem se ol filing blong mi oli stap long wan ples we i no gat toktok blong raetemdaon olgeta.
“Sapos mi no save se yumi no gat rong, mo sapos i no from help mo sore we i kam stret long heven, mi sua se bae mi neva save mekem, blong stap strong tru long ol bigfala safaring we mi bin gotru long ol …; be mi laef yet i stap, mo mi rere blong safa i go moa sapos hem i tingting blong Heven ia we i gat kaen fasin, se bae mi mas gotru long moa bitim hemia, blong gud blong yu.
“Mifala evriwan i oraet i stap naoia, be Fredrick nomo we i sik bigwan.
“Smol Alexander we i stap long han blong mi naoia, i wan spesel smolwan we yu bin luk long laef blong yu. Hem i strong tumas, mekem se, wetem help blong wan jea, bae i save ron raon long rum. …
“I no gat wan i save, be God nomo i save, ol tingting we oli stap long maen blong mi, mo ol filing we oli stap long hat blong mi taem mi aot long haos mo hom blong yumi, mo kolosap evri samting we yumi bin gat, be ol smol pikinini blong yumitu nomo, mo mi aot, long Stet blong Misuri, mi lego yu we oli sarem yu long kalabus ia we yu filim yuwan. Be, blong stap tingbaot ol samting ia, i moa bitim wanem we bodi mo maen blong mi i save tekem. …
“ … Mi hop se i gat ol gudfala dei we bae oli stap kam yet. … Mi mi blong yu oltaem, wetem lav.
“Ema Smit”1
Leta we i kam long Ema Smit i go long Josef Smit, 4 Epril 1839
“Dia Waef blong Mi we Mi Lavem.
“Long Tosdei naet, mi sidaon taem we san i stap go daon, mo mifala i stap traem luk tru long ol smol hol blong nogud kalabus ia, blong raet long yu, mo mi save talem long yu se mi olsem wanem. Mi biliv se naoia, i faef manis mo sikis dei2 stat long taem we mi stap fesem rabis smael blong wan bodigad ia, naet mo dei, mo fesem ol wol, ol aean, mo aean doa blong wan kalabus we i nogud, i tudak mo i doti. Wetem ol filing se God nomo i save, mi raetem leta ia. Ol samting we maen i tingting long hem long ol situesen olsem, pen i no save raetem, o tang o enjel i no save talemaot, o pentem, ol samting ia long man we i neva fesem wanem we mifala i stap gotru long hem. … Mifala i lei long han blong Jehova, mo i no wan narawan moa, blong mifala i kam fri, mo sapos Hem i no mekem hemia, bae i no hapen, yu mas save hemia, from se i gat fulap oli wantem dring blad blong mifala insaed long stet ia; i no from se mifala i rong long wan samting. … Dia Ema. Mi tingting long yu mo ol pikinini oltaem. Mi wantem luk smol Frederick, Joseph, Julia, Alexander, Joana, mo olfala meja [famli dog]. … Bae mi glad nomo blong wokbaot draeleg, stat long ples ia kasem yu, we i no gat samting i blokem hed blong mi, we bae mi haf neked, blong luk yu mo mi ting se bae i wan bigfala glad mo bae mi no kaontem olsem wan hadwok. Mi tekem long miwan, wetem strong paoa, evri samting we oli hevi we oli putum mi daon; mi mekem olsem wetem olgeta we oli stap wetem mi; i no gat wan long mifala we i givap. Mi wantem yu blong yu no letem ol pikinini blong yumitu oli fogetem mi. Talem long olgeta se Papa i lavem olgeta wetem wan lav we i stret evriwan, mo hem i stap mekem evri samting blong kamaot long ol rabis man blong kam luk olgeta. … Talem long olgeta se Papa i talem se oli mas stap olsem ol gudfala pikinini, mo oli mas gat tingting long mama blong olgeta. …
“Mi blong yu,
“Josef Smit, Junia”3
Taem we Josef Smit i bin safa insaed long Libeti Kalabus, Lod i bin givim kamfot long hem mo i bin talemaot ol bigfala trutok long hem tru long revelesen.