“Oktoba 18–24. Katak im Bujen Ko 121–123: ‘O Anij, Kwo Pād Ia?’” Itok, Ļoor Eō—N̄an Kajjojo Armej im Baam̧le ko: Katak im Bujen Ko 2021 (2020)
“Oktoba 18–24. Katak im Bujen Ko 121–123,” Itok, Ļoor Eō—N̄an Kajjojo Armej im Baam̧le ko: 2021
Jikin Kalbuuj Liberty ilo iien Jibriin̄, jān Al Rounds
Oktoba 18–24
Katak im Bujen Ko 121–123
“O Anij, Kwo Pād Ia?”
En̄jake ko am̧ ilo am̧ ekkatak jeje ko rekwojarjar naaj em̧m̧anļo̧k eļan̄n̄e kōttōpar eo am̧ ej n̄an jeļā m̧ool eo. Jino kōn jar, ron̄jake Jetōb, im je im̧we ko am̧.
Je En̄jake ko Rej Im̧we Eok
Itulaļ tata ium̧win jikin kalbuuj eo ilo Liberty, Missouri, kar jeļā kake āinwōt jikin kalbuuj ej pād ium̧win laļ. Dipin jikin kalbuuj eo ekar lukkuun mijel, būlo̧o̧r kōm̧m̧an jān dekā eo ekar lukkuun m̧ōļo im ettoon, m̧ōn̄ā—ekar lukkuun dik—re mōn̄, im meram eo wōt ekar itok jān winto ko ruo raidik im kōm̧m̧an jān aen iturin ceiling eo. Jikin kalbuuj in ium̧win laļ ijo Josep Smith im jejjo iaan em̧m̧aan ro m̧ōttan rekar joļo̧k aolepān iien kalbuuj ko aer ie—emen allōn̄ in m̧ōļo ilo iien wintōr ilo 1838–39—kōttar iien ekajet eo eļan̄n̄e ewōr ruōer ņae jikin eo Missouri. Ilo iien in, Josep ekar emakijkij an bōk nuuj ko kōn en̄taan ko an Armej ro Rekwojarjar. Aenōm̧m̧an im kōjatdikdik kōn Turōk tata kar an jejjo wōt iien ilo jejjo allōn̄, im kiiō Armej ro Rekwojarjar kar ejjeļo̧k m̧we er, kar kam̧akūt er n̄an āne jam̧den n̄an kappukot bar juon jikin n̄an aer jino jān jinoin—ilo tōrein ippān Rikanaan eo aer ilo kalbuuj.
Jepo̧re ke Josep Smith ekar jan̄ im lam̧ōj, “O Anij, kwo pād ia?” Uwaak ko ekar bōki, “jeļāļo̧kjeņ jān lan̄” me ekar “lutōklaļtak” ilo jikin kalbuuj in me enana, ej kwaļo̧k ke men̄e emaron̄ jab aolep iien jej en̄jake ke, Anij ejjab ettoļo̧k. Ejjeļo̧k kajoor emaron̄ “dāpij lan̄ ko,” Rikanaan eo ekar ekkatak. Anij enaaj pād ippān [Armej ro an Rekwojarjar me retiljek] indeoo im indeeo.” (Katak im Bujen Ko 121:1, 33; 122:9.)
Lale Saints, 1:323–96; “Within the Walls of Liberty Jail,” Revelations in Context, 256–63.
Ļōmņak ko n̄an Ekkatak Jeje Ko Rekwojarjar Ippam̧ Make
Katak im Bujen Ko 121:1–10, 23–33; 122
Apan̄ ko remaron̄ “naaj n̄an em̧m̧an eo [aō].”
N̄e kōj ak ro jej iakwe er rej jelm̧ae en̄taan, ekkā ad būlōn̄ eļan̄n̄e Anij ejeļā kōn kōj. Ilo am̧ riiti, Katak im Bujen Ko 121:1–6, lōmņak kōn iien ko ekar wōr am̧ kajjitōk ak en̄jake ko me rej āinwōt en̄jake ko an Josep Smith. Ta eo kwoj loe ilo uwaak eo an Irooj me emaron̄ jipan̄ eok n̄e ewōr kain kajjitōk ak en̄jake rōt kein? N̄an waanjon̄ak, ilo eoon ko 7–10, 26–33, kile kōjeraam̧m̧an ko me E ekar kallim̧ur kaki n̄an ro rej “kijejetoiki [en̄taan] em̧m̧an.” Ilo am̧ riiti jekjen 122, ļōmņak kōn wāween an Irooj kōņaan bwe kwon kalimjōk apan̄ ko am̧ make.
Barāinwōt lale Henry B. Eyring, “Where Is the Pavilion?” Ensign ak Liaona, No̧b. 2012, 72–75.
Jemaron̄ tōpar “kajoor ko an lan̄.”
Ilo ta eo me kalimjōke āinwōt juon jekjek eo ejjeļo̧k an kajoor ilo jikin kalbuuj Liberty, Josep kar leļo̧k revelesōn eo kōn kajoor—ejjab kōn kajoor an kien im jarin tariņae eo me kar kam̧akūt Armej ro Rekwojarjar ak kōn “kajoor ko an lan̄.” Ilo am̧ riit Katak im Bujen Ko 121:34–46, ta eo kwoj ekkatak kōn kajoor eo an Anij? Ewi wāween an oktak jān kajoor ko an laļ? N̄an waanjon̄ak, lale naan ko Irooj ej kōjerbali ilo eoon ko 41–43 n̄an kōmeļeļeik “kajoor ak jelōt.” Ta eo rej katakin kōn wāween an Anij dāpij “kajoor ak jelōt” eo An? Bōlen eoon kein remaron̄ im̧we eok n̄an kejo̧kļo̧kjeņ kōn mour eo am̧ im ta eo kwomaron̄ kōm̧m̧ane n̄an im̧we kōn em̧m̧an ilo jem̧jerā eo am̧ ippān ro jet.
Jisōs Kraist eaar wanlaļļo̧k ium̧wier aolep.
Josep Smith eto an kalbuuj ilo jab jejjet ium̧win emān allōn̄ ko ilo an kar ro m̧ōttan im baam̧le eo an kar diwōjļo̧k jān m̧ōko m̧ōer. Jerbal eo me ekar lukkuun wūjlepļo̧k mour eo an n̄ane āinwōt ejjeļo̧k tokjen. Ta eo kwoj ekkatak kōn Jisōs Kraist jān naan ko An n̄an Josep ilo jekjen 122? Ta eo kwoj ekkatak kōn Josep? Ta eo kwoj ekkatak kōn kwe make?
Barāinwōt lale Alma 7:11–13; 36:3; Katak im Bujen Ko 88:6.
Jab Ankil Aō, a Am̧ Wōt, jān Walter Rane.
“Jen kōm̧m̧ani aolep men kein ilo m̧ōņōņō ko im rej pād ilo ad kajoor.”
Ilo M̧aaj 1839, emaron̄ kar ilo kalimjōke bwe ekar jab lukkuun lōn̄ Armej ro Rekwojarjar me remaron̄ ukot jekjek ko reppen repād ie. Ak ilo leta eo an ekar je ilo jikin kalbuuj Liberty, Josep ekar ba n̄an er bwe: remaron̄ “[aiinton] juon jeļā kōn aolep m̧ool ko” im “jutak pen ilo ad kajoor, kōn jeļā ekanooj dim, n̄an lo lo̧mo̧o̧r an Anij” (Katak im Bujen Ko 123:1, 17). Ilo am̧ ļōmņak kōn riab im “m̧oņ an armej” ilo laļ in rainin, ļōmņak kōn ta men ko “repād ilo kajoor eo [am̧]” n̄an kōm̧m̧ane (eoon ko 12, 17). Etke eaorōk n̄an kōm̧m̧ane men kein “ilo m̧ōņōņō”? (eoon 17). Wōn eo kwojeļā eo ej “dāpiji er jān m̧ool eo” (eoon 12), im ewi wāween am̧ maron̄ jipan̄ armej in kappukot e?
Elōn̄ bwebwenato ko me rej kwaļo̧k ke Josep ekar kajjitōk kaki ilo leta in rekar lem̧aanļo̧ki n̄an kien eo im kar publish i āinwōt juon 11-m̧ōttan men ko ilo juon nuujpeba an Nauvoo. Times and Seasons (lale “A History, of the Persecution, of the Church of Jesus Christ, of Latter Day Saints in Missouri, December 1839–October 1840,” [josephsmithpapers.org]).
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota
-
Katak im Bujen Ko 121:1–10.Jikin “kalbuuj eo ium̧win la” ilo Jikin Kalbuuj Liberty kar tarin wōt 14 kōn 14.5 ne (4.2 kōn 4.4 mita). Ewi wāween am̧ maron̄ jipan̄ baam̧le eo am̧ pijaikļo̧k, enkar āinwōt ta n̄e kwon kar koobob ilo juon jikin jidikdik ium̧win allōn̄ ko emen rem̧ōļo? Kwomaron̄ lo meļeļe ko jet kōn jekjek ko ilo Jikin Kalbuuj Liberty ilo “Chapter 46: Joseph Smith in Liberty Jail” (Doctrine and Covenants Stories, 172–74). Kwomaron̄ bar riiti “Voices of the Restoration: Liberty Jail” ilo jem̧lo̧kin laajrak in ak alooje juon bitio kōn iien eo an Josep ilo Jikin Kalbuuj Liberty ilo bitio eo Joseph Smith: Prophet of the Restoration (ChurchofJesusChrist.org, beginning at 43:00). Ewi wāween an meļeļe in jelōt wāween ad en̄jake kōn pedped in katak ko ilo Katak im Bujen Ko 121:1–10?
-
Katak im Bujen Ko 121:34–36, 41–45.Bōlen juon waanjon̄ak enaaj jipan̄ baam̧le eo am̧ meļeļe “kajoor ko an lan̄.” N̄an waanjon̄ak, kwomaron̄ keidi kajoor eo an Anij n̄an kajoor in jarom, ta eo emaron̄ bōbrae an device eo ej aikuj jarom bōk kajoor? Ta eo waanjon̄ak in, ippān ļo̧k eoon ko 34–36, 41–45, ej katakin kōj wāween n̄an kōļapļo̧k kajoor eo ad ilo jetōb? Bōlen ro uwaan baam̧le eo emaron̄ kwaļo̧k bwebwenato ko jān mour eo an Rilo̧m̧o̧o̧r me ej kwaļo̧k waanjon̄ak kōn m̧wil kein.
-
Katak im Bujen Ko 122:7–9Bōlen ro uwaan baam̧le eo remaron̄ m̧ōņōņō in kōm̧m̧an kōkaļļe jidik ko me rej kōjeņoļo̧k naan ko jān eoon ko me rej im̧we er. Kōkaļļe kein remaron̄ kwaļo̧ki ilo m̧weo im̧ōm̧. Etke eaorōk n̄an jeļā bwe “Nejin Armej eaar wanlaļļo̧k ium̧win” aolep men ko?
-
Katak im Bujen Ko 123:12.Ewi wāween ad maron̄ jipan̄ “jeļā … ia eo ren pukot” m̧ool eo?
N̄an ļōmņak ko reļļapļo̧k n̄an katakin ajri, lale laajrak eo an wiik in ilo Itok, Ļoor Eō—N̄an Būraimere.
Al eo kar elmakote: “Where Can I Turn for Peace?” Hymns, no. 129.
Ainikien ko an Jepļaaktok eo
Jikin Kalbuuj Liberty
Ilo iien eo ke ekar pād ilo Liberty, Missouri, Josep Smith ekar bōk leta ko rej kōjeļļāiki kōn jekjek ko rekauwōtata n̄an Armej ro Rekwojarjar ilo Raan Ko Āliktata ro kar kadiwōjļo̧k er jān jikin eo kōn kappe eo an kabna eo. Juon leta ekaburom̧ōjm̧ōj jān kōrā eo pāleen etan Emma. Naan ko an, im leta eo an Josep n̄an ukotļo̧k, ekar kwaļo̧k jim̧or en̄taan ko an im tōmak ko aer ilo iien in epen ilo bwebwenatoon Kabun̄ in.
Leta eo jān Emma Smith n̄an Josep Smith, M̧aaj 7, 1839
“Ļeo Pāleeō Jitōn Bōro
“Ij kajjieon̄ jeje n̄an kwe kōnke ewōr aō iien em̧m̧an n̄an jilkinwaj leta in ippān juon m̧ōtta, ak iban kajjieon̄ kōmeļeļe aolepān en̄jake ko aō, kōnke reban lukkuun likio im meļeļe, kōn men ko me rej kōjepelļo̧k kōjro: dipin (kalbuuj), ribaar (in winto ko), ļak ko (ilo kōjem̧ ko an m̧ōn kalbuuj), barāinwōt reba ko, toļ jidik ko, kom̧laļ ko, meļan ko rekkilep (ko rej pād ikōtaam̧ im ikōtaaō). Barāinwōt en̄jake ko jab maron̄ kōmeļeļeiki kōn tōprak in likjab in jerbal an kien im en̄ ne unin am̧ pād ilo kalbuuj im naaj dāpij eok wōt ijene.
“Ekar ke jab kōn ejjeļo̧k bōd, im tūriam̧o an juon, ij lukkuun tōmak bwe inkar jab maron̄ niknik ilo jekjek in en̄taan kein bwe em̧ōj aō deplo̧ki … ; ak ij mour wōt im ij m̧ōņōņō n̄an en̄taan eļapļo̧k eļan̄n̄e ej ankilaan Aelōn̄ in Anij bwe in en̄taan n̄an eok.
“Em̧m̧an am aolep mour ilo tōre in, ijeļo̧kin wōt Fredrick enanin̄mej jidik.
“Nin̄nin̄ Alexander eo ij kiiō jibūrlepe ilo peiū ej juon iaan ajri em̧anm̧ōn tata kwaar lo ilo mour eo am̧. Elukkun kajoor bwe jon̄an kōn jipan̄ an juon jea enaaj ettōr to ettōr tak ilowaan ruum̧ eo. …
“Ejjeļo̧k juon ak Anij wōt ejeļā ļōmņak ko ilo kōļmenļo̧kjeņ eo aō im en̄jake ko an buruō ke ikar etal jān m̧weo im em̧ eo im̧m̧ōrro, im eiten aolepān men ko m̧weier bōk kōtmene bwe ajri ro nejierro im em̧akūt ļo̧k n̄an Missouri, etal jān kwe ilo am̧ make ilo kalbuuj. Ļōmņak eo kōn aō etal jān kwe im m̧weo im̧ōd eļapļo̧k an pen jān jabdewōt armej ej jelm̧ae en̄jake in. …
“… Ij kōjatdikdik bwe elōn̄ļo̧k raan ko rem̧m̧an rej itok wōt n̄an kōjro. … [N̄a] am̧ riiakwe n̄an indeeo.
“Emma Smith”1
Leta eo jān Josep Smith n̄an Emma Smith, Eprōļ 4, 1839
“Kōrā eo Pāleeō—Ejitenbōro im—jouj.
“Bon̄nin Taije eo ikar jijjet laļ ke aļ ej tulaļļo̧k, ke kōm ej emmō jān tartar ko ilo wintō eo ilo jikin kalbuuj in ejan̄nuwaad, n̄an jeje n̄an kwe, bwe in kwaļo̧k jekjek in mour eo aō n̄an kwe. Ij tōmak bwe kiiō ļalem allōn̄ im jiljino raan ko2 jān iien eo ikar pād ium̧win riwaj in bon̄ in raan me rejememe, im ilowaan wōt dipin jikin kalbuuj e, tartar ko ilo wintō ko, kōjem kauwaron̄ron̄ ko an jikin kalbuuj eo me ejan̄nuwaad, emarok, im ettonoon. Kōn en̄jake ko me Anij wōt ejeļā ij je leta in. Kōļmenļo̧kjeņ ko me ij kōļmenļo̧kjeņ kaki me reppen kōmeļeļeiki ilo jeje im kōnono, ak n̄an an enjeļ ro n̄an kōmeļeļeik n̄an juon eo ejjan̄in kar jelm̧ae kain jekjek rōt in. Jej kōjatdikdik ioon pein Jeova, im ejjeļo̧k bar juon, n̄an anemkwoj eo ad, im eļan̄n̄e ejjab kōm̧m̧ane menin, eban dedeļo̧k, kwomaron̄ jeļā, kōnke elōn̄ armej ilo jikin in rekōņaan m̧an kōj, ejjab kōnke elōn̄ ruōer kōn jabdewōt men. … Eo Karejara Jitōn Bōro Emma ejjab jem̧ļo̧k aō ļōmņak kōn eok im ajri ro nejirro. … Ikōņaan lo nin̄nin̄ Frederick, Josep, Julia, Alexander, Joana, im [kidu eo nejin baam̧le in]. … Inaaj m̧ōņōņō in etetal jān ijin n̄an ippam̧ jintōb, jab atat, im jab jiln̄ūj, bwe in lo eok im jeļā bwe aolep men ilo kalimjōki rejjab pen ak reaiboojoj. … Ij kijenmej kōn peran in en̄taan kōn aolep inepata ko aō, kōn menin ro me repād ippa; ejjeļo̧k juon iaam ej ebweer. Ikōņaan bwe [kwon] jab kōtļo̧k [ajri ro nejirro] bwe ren meļo̧kļo̧k eō. Ba n̄an er bwe Jemāer ej iakwe er kōn iakwe ewāppen, im e ej kōm̧m̧an aolep men ko emaron̄ bwe en katoļo̧k e jān rinana ro bwe en jepļaak n̄an er. … Ba n̄an er bwe Jemāer ej ba rej jet ajri ro rem̧m̧an, im ļōmņak kōn jineer.
“Riakwe eo am̧,
“Josep Smith Jr.”3
Ke Josep Smith ekar en̄taan ilo Jikin Kalbuuj Liberty, Irooj ekar kaenōm̧m̧an e im kar kwaļo̧k eļap m̧ool ko.