“EyeDwarha 25–31. IMfundiso neMinqophiso 124–125: ‘INdlu Egameni Lam,’”Uze, Undilandele—Eyabantu Ngabanye kunye neeNtsapho: IMfundiso neMinqophiso 20212020)
“EyeDwarha 25–31. IMfundiso neMinqophiso 124-125,” Uze, Undilandele—Yabantu Ngabanye kunye Neentsapho: 2021
Nauvoo the Beautiful, by Larry Winborg
EyeDwarha 25–31
IMfundiso neMinqophiso 124–125
“INdlu Egameni Lam”
Njengoko ufunda IMfundiso neMinqophiso 124–25, cinga ngokunzulu ngeentsikelelo iNkosi eyathi yamemela abaNgcwele eNauvoo ukuba bazifumane kwakunye neentsikelelo Yona enikela ngazo kuwe.
Bhala Iimvakalelo Zakho
Njengoko yayinzima loo minyaka imithandathu eyayigqithileyo kwabo baNgcwele, izinto zaziqalisa ukulunga kwintwasahlobo ka-1839: AbaNgcwele ababeziimbacu babefumene imfesane ngaphakathi kubemi baseQuincy, Illinois. Abalindi baye bavumela uMprofeti Joseph Smith kunye nezinye iinkokheli zeBandla ukuba baqhweshe ekuthinjweni kwabo eMissouri. Kwaye iBandla lalisandalʼ ukuthenga umhlaba e-Illinois apho abaNgcwele babengahlanganela khona kwakhona. Ewe, yayingumhlaba owawungumgxobhozo, ugcwele iingcongconi, kodwa xa wawuthelekiswa nemingeni abaNgcwele ababesele bejongene nayo, mhlawumbi oku kwakubonakala ngathi kungalawuleka. Baye bakhupha amanzi emiseleni womgxobhozo kwaye baceba isivumelwano sesixeko esitsha, abathi basithiya ukuba yiNauvoo. Lona lithetha “ubuhle” ngesiHebhere, nangona laliyimvakaliso yokholo ngakumbi kunenkcazelo echanekileyo, ngobuncinane ekuqaleni. Kwangeloo xesha, iNkosi yayichukumisa uMprofeti waYo ngengqondo yongxamiseko. Yona yayiseneenyaniso kunye nemimiselo emininzi ekwakumele iyibuyise, kwaye Yona yayidinga itempile engcwele apho abaNgcwele babengazifumana khona. Ngeendlela ezininzi, ezi mvakalelo zifanayo zokholo kunye nezongxamiseko zibalulekile emsebenzini weNkosi namhlanje.
Xeshikweni iNauvoo yaye yaba sisixeko esihle esinetempile entle, zombini ekugqibeleni zaye zashiywa. Kodwa umsebenzi weNkosi omhle nokwenene, lonke elo xesha, yayiku “kuthwesa ngembeko, ukungafi, nobomi obungunaphakade” (IMfundiso neMinqophiso 124:55), kwaye loo msebenzi awusoze uphele.
Bona Saints, 1:399–427; “Organizing the Church in Nauvoo,” Revelations in Context, 264–71.
Iingcebiso Zokuzifundela Izibhalo Wedwa
IMfundiso neMinqophiso 124:12–21
Ndingaba ngumfundi othenjwa yiNkosi.
Nangona iinkokheli ezibekikeleyo eziliqela zaye zalishiya iBandla ngoo-1830, uninzi lwamalungu lwaye lwasala lunyanisekile. Aba baNgcwele banyanisekileyo babequka abo babenyamezele iimvavanyo eMissouri kwakunye nabo babesandulʼ ukuzibandakanya neBandla. KwiMfundiso neMinqophiso 124:12–21, iNkosi yayithetha kakuhle kakhulu ngabambalwa babo. Zeziphi iingqiqo ngobufundi ozifumanayo emazwini waYo? Ingaba ikhona into ethile ngaba baNgcwele abanyanisekileyo ekuphembelela ukuba ufane nabo? Usenokucinga ngokunzulu ngendlela iNkosi evakalisa ngayo uthando lwaYo kuwe.
IMfundiso neMinqophiso 124:22–24, 60–61
INkosi ifuna ndamkele abanye.
Xa ucingisisa ngoko abaNgcwele babehlutshwa kuko eMissouri, babenokuhendeka ukuba baziqelelanise kwaye batyhafise iindwendwe eNauvoo. Gcina oko engqondweni yakho njengoko ufunda IMfundiso neMinqophiso 124:22–24, 60–61. Yintoni ekonwabisayo ngemiyalelo yeNkosi yokwakha “indlu yokuhlalisa”? (umqolo 23). Yintoni amazwi waYo akufundisa yona malunga nomsebenzi weBandla laYo? Cinga ngokunzulu ngendlela le miyalelo ibinokusebenza kuwe nasekhayeni lakho.
IMfundiso neMinqophiso 124:25–45, 55
INkosi isiyalela ukuba sokhe iitempile ukuze sifumane imimiselo engcwele.
Ngokuqinisekileyo oko akuzange kufike njengesimangaliso kwabaNgcwele beMihla yokuGqibela emveni kokuba bezinzile eNauvoo, iNkosi yaye yabanika imiyalelo malunga nokwakhiwa kwetempile—ngokufanayo nje noko Yona yayikwenze e-Ohio naseMissouri. Yintoni oyifumana kwiMfundiso neMinqophiso 124:25–45, 55 ekunceda uqonde ukuba kutheni iNkosi yathi, “Abantu bam abasoloko beyalelwa ekuyakheleni [iitempile] egameni lam elingcwele”? (umqolo 39).
Kusukela oko kwakhiwa iTempile yaseNauvoo, ngaphezu kweetempile ezi-200 zaye zokhiwa okanye zaye zabhengezwa. UMongameli u-Russell M. Nelson wafundisa oku: “Siyazi ukuba ixesha lethu etempileni libalulekile kusindiso lwethu nokuphakanyiswa kwethu nakoko kweentsapho zethu. Uhlaselo lotshaba luyakhula kakhulu ngokucacileyo, ngobunzulu kunye nangeentlobo ngeentlobo ezahlukeneyo. Imfuno yethu yokuba sibe setempileni rhoqo ayizange ibenkulu ngakumbi” (“Becoming Exemplary Latter-day Saints,” Ensign okanye Liahona, EyeNkanga 2018, 114). Ingaba itempile ikuncede kanjani ukuba umelane “nohlaselo lotshaba”? Yintoni oyiva ikuchukumisa ukuba uyenze ukulandela ingcebiso kaMongameli Nelson?
Joseph Smith at the Nauvoo Temple, by Gary E. Smith
IMfundiso neMinqophiso 124:84–118
INkosi inqwenela ukundinika ingcebiso ethile ngobomi bam.
Imiqolo 84–118 izele yingcebiso yabantu abathile, kwaye enye yayo ayikhangeleki ngathi ifanele ubomi bakho. Kodwa usenokufumana into ethile odinga ukuyiva. Cingisisa ngokubuza iNkosi malunga nokuba ngowuphi umyalezo Yona ekuphathele wona kule miqolo, kwaye ufune isikhokelo soMoya ukuwufumana. Ngoko ke uthathe isigqibo soko uzo kwenza ngawo. Umzekelo, ingaba ukuthobeka ngakumbi kungakunceda kanjani ufumane uMoya? (bona umqolo 97).
Usenokucinga ngokunzulu ngenye ingcebiso iNkosi ekunike yona. Uyisebenzisa kanjani?
Iingcebiso Zofundo Lwezibhalo Zosapho kunye Nomhlangano Wangorhatya Wosapho
-
IMfundiso neMinqophiso 124:2–11.Ukuba iNkosi ibixelele usapho lwakho “lwenze isibhengezo esindilisekileyo sevangeli” yam“ kookumkani behlabathi” (imiqolo 2–3), ingaba isibhengezo sakho besiya kuthini? Cingisisa ngokwenza umanyano olunye, kwaye umeme amalungu osapho ukuba anike iingcebiso zeenyaniso zevangeli awafuna ukuba ziqukwe.
-
IMfundiso neMinqophiso 124:15.Kuthetha ukuthini ukubanemfezeko? Kutheni iNkosi ixabisa imfezeko? Mizekelo yini yemfezeko othe usapho lwakho lwayibona?
-
IMfundiso neMinqophiso 124:28–29, 40–41, 55.Yintoni esiyifunda kule miqolo emalunga nokuba kutheni iNkosi isiyalela ukuba sokhe iitempile? Usapho lwakho lusenokonwabela ukuzoba umfanekiso wetempile okanye luyokhe ngezitena okanye ngezinye izixhobo zokwakha. Njengoko nisenza oko, nisenokuxoxa ngokuba kutheni ninombulelo ngeetempile esinazo namhlanje kwaye nokokuba kutheni sinqula kuzo rhoqo.
-
IMfundiso neMinqophiso 124:91–92.Ingaba usapho lwakho belungaxhamla na kwingxoxo emalunga neentsikelelo zikasolusapho? Amalungu osapho awathe afumana intsikelelo yawo kasolusapho angabelana ngokuba kunjani ukuzifumanela yona kwaye nokokuba iwancede kanjani.
Ngeengcebiso ezithe vetshe malunga nokufundisa abantwana, bona isishwankathelo saleveki kwi- Come, Follow Me—For Primary.
Amazwi weMbuyiselo
UMbutho waManina
Painting of the Relief Society organization by Paul Mann
Ngo-1842, emva kokuba uMbutho waManina wawusekiwe eNauvoo, Illinois, uMprofeti Joseph Smith wathi, “IBandla lalingekasekwa ngokugqibeleleyo kude kube abafazi nabo balungelanisiwe.”1 Ngokufanayo, isifundo seMbuyiselo yeBandla leNkosi kunye nobubingeleli baYo (bona IMfundiso neMinqophiso 107) asiphelelanga kude kube siquka isifundo soMbutho waManina, owona ngokunokwawo “uyimbuyiselo yocwangco lwamandulo” yabafundi abangamabhinqa bakaYesu Krestu.2
UEliza R. Snow waye wadlala eyona ndima ibalulekileyo kwimbuyiselo. Yena wayekhona xa uMbutho waManina wawusekwa okokuqala kwaye, njengonobhala wombutho, wayebhala amanqaku ngelixa lomhlangano wawo. Yena wazibonela ngeliso lakhe okokuba uMbutho waManina wawusekelwe “emva kwendlela yobubingeleli.” 3 Ngezantsi kunamazwi wakhe, awabhalwa xa wayencedisa njengoMongameli waJikelele woMbutho waManina, ukunceda oodade baqonde umsebenzi wobuthixo owawuyalezwe kwiintombi zikaThixo zomnqophiso.
UEliza R. Snow
“Nangona igama [uMbutho waManina] lisenokuba lelanamhlanje, eli ziko lelakudala. Saye saxelelwa [nguJoseph Smith], ukuba lo mbutho ufanayo wawukhona kwibandla lamandulo, owawumane ukhankanywa kwezinye zeencwadi ezishicilelwe kwiTestamente eNtsha, zisebenzisa isihloko, ‘inkosikazi enyuliweyo’ [bona 2 Yohane 1:1; IMfundiso neMinqophiso 25:3].
“Lo ngumbutho ongenako ukuphila ngaphandle koBubingeleli, okuphuma kwinyaniso yokuba ufumana igunya lawo kunye nempembelelo yawo kuloo mnombo. Xa uBubingeleli babuthathiwe emhlabeni, eli ziko nalo ngokunjalo kwakunye naso nasiphi na isihlomelo socwangco lokwenene lwebandla likaYesu Krestu emhlabeni, nalo laye laphela. …
“Njengoko ndandikhona ekusekweni ‘koMbutho waManina aseNauvoo,’ … kwaye njengoko sasinamava abhadlileyo ngaloo mbutho, mhlawumbi ndisenokuthetha ngeengcebiso ezimbalwa ezinokuncedisa oodade baseZiyon abanyathelela phambili kwesi sikhundla sibaluleke kakhulu, esigcwele luxanduva olutsha kunye noluphindaphindeneyo. Ukuba nabani na kwiintombi kunye noomama bakaSirayeli baziva becinezelwe bembambekile emanqanabeni wabo abakuwo ngoku, ngoku baya kufumana ithuba lawo onke amandla kwaye nokukwazi ukuba namandla okwenza okulungileyo amandla abawaphathisiweyo ngenkululeko. …
UMbutho waManina wawusekelwe kwigumbi eliphezulu kule Venkile Yezitena Ezibomvu.
“Ukuba umbuzo uyavela engqondweni, nawuphi na, Yintoni injongo yoMbutho waManina? Bendiya kuphendula—kukwenza okulungileyo—ukuzisa ngokusesikweni konke ukukwazi esinako kokwenza okulungileyo, hayi qha ekuhlanguleni amahlwempu kodwa nasekusindiseni imiphefumlo. Inzame emanyeneyo iya kuphumeza okungenakubalwa ngaphezulu koko kunokuphunyezwa ngawona mandla asebenzayo womntu ngamnye. …
“Ekuncedeni amahlwempu, uMbutho waManina uneminye imisebenzi ekumelwe yenziwe kunokuhlangula nje iimfuno zemizimba. Indlala yengqondo kunye nokugula kwentliziyo, nazo zifuna ukuthathelwa ingqalelo; kwaye ngamaxesha amaninzi imvakaliso enobubele—amazwi ambalwa wengcebiso, okanye nkqu nenkxawulo yesandla efudumeleyo nenothando iya kwenza okulungileyo ngakumbi kwaye ithandwe ngokungcono okwegqitha isipaji segolide. …
“Xa abaNgcwele behlangana bevela phesheya, bengaziwa nangumntu wonke, kwaye bexhomekeke ekubeni baphambukiswe ngabo balindele ukukhohlisa, [uMbutho waManina] kumele ukhawulezise ekubancedeni [bona], kwaye ubazise eluntwini oluya kuthi lubacokise lubaphakamise, kwaye ngaphezu kwako konke lubomeleze elukholweni leVangeli, kwaye ekwenzeni njalo, lube luncedo ekusindiseni abaninzi.
“Oko kuya kufuna imiqulu eya kuthi ibalule imisebenzi, amalungelo awawodwa kunye noxanduva eziza kunye nefuthe loLuntu. … Yiya kuyo (phantsi kwesikhokelo sikabhishophu wakho) ngokupholileyo, ngabom, ngamandla, ngomanyano, nangomthandazo, kwaye uThixo uya kuthwesa iinzame zakho ngempumelelo.”4
The Nauvoo Temple by George D. Durrant