Makita ni Joseph iti parmata ti ama, ina, ken kabsatna a lalaki iti celestial a pagarian (Parmata ni Joseph Smith maipapan iti Celestial Kingdom, Robert Barrett).

Nobiembre 29–Disiembre 5

Doktrina ken Katulagan 137–138

“Ti Parmata maipapan iti Pannakasubbot dagiti Natay”

Insuro ni Presidente M. Russell Ballard: “Awisenkayo a basaenyo a nasayaat ken napanunotan ti [Doktrina ken Katulagan 138]. No basaenyo, mabendisionannakayo ti Apo iti naan-anay a pannakaawat ken panagyaman iti ayat ti Dios ken ti planona ti pannakaisalakan ken panagragsak para kadagiti annakna” (“The Vision of the Redemption of the Dead,” Ensign wenno Liahona, Nob. 2018, 73).

Isuratmo dagiti Impresionmo

Nagsisina dagiti paltiing a naisurat iti Doktrina ken Katulagan 137 ken 138 iti nasursurok ngem 80 a tawen ken 1,500 a milia. Naawat ni Propeta Joseph Smith ti benneg 137 idi 1836 iti saan pay a nalpas a Templo iti Kirtland, ken ti benneg 138 ket naawat ni Joseph F. Smith, maikanem a Presidente ti Simbaan, idi 1918 iti Salt Lake City. Ngem no mainaig iti doktrina, adda pakainaigan dagitoy dua a parmata. Sungbatanda nga agpada dagiti saludsod maipanggep ti pagbanagan dagiti annak ti Dios iti sumaruno a biag. Ken agpada nga adda nainayon a nauneg a kaipapanan no ibilangtayo dagiti padas ti biag dagiti propeta a nakaawat kadagitoy.

Ti parmata ni Joseph Smith ti nangtulong kenkuana a maawatan ti agnanayon a pagtungpalan ti ay-ayatenna a kabsat a ni Alvin, a natay innem a tawen sakbay a naipasubli ti turay a mangbuniag. Nagtalinaed iti panunot ni Joseph dagiti saludsod maipapan iti agnanayon a pannakaisalakan ni Alvin manipud pay idi natay. Impalgak ti parmata ni Joseph F. Smith dagiti nadayag a kinapudno maipapan iti lubong ti espiritu—awan duadua a makaliwliwa a paltiing iti maysa a tao a nagladladingit kadagiti ipapatay ti adu a nasinged a miembro ti pamilia. Napukaw ni Joseph F. Smith ti amana, ni Hyrum Smith, idi agtawen iti 5 ken ti inana, ni Mary Fielding Smith, idi agtawen iti 13. Idi panawen ti parmatana iti 1918, nagladladingit idi iti ipupusay ti 13 nga annakna.

Adu dagiti saludsod iti tattao ti nasungbatan dagitoy a paltiing maipanggep iti biag kalpasan ti ipapatay. Ti benneg 137 nangted iti sumagmamano a nalawag a pannakaammo ken pannakaawat kadagiti kasta a saludsod, ken ti benneg 138 mangted pay iti nain-indaklan a nalawag a pannakaammo ken pannakaawat. Agpadpada, nga ipaneknekda iti “naindaklan ken nakaskasdaaw nga ayat nga impakita ti Ama ken ti Anak” (Doktrina ken Katulagan 138:3).

Dagiti Kapanunotan para iti Bukod a Panagadal iti Nasantuan a Kasuratan

Doktrina ken Katulagan 137

Addanto gundaway a pilien ti tunggal kararua ti celestial a dayag.

Ti gagangay a pannakaawat kadagiti Kristiano idi 1836 isu ti no matay ti maysa a tao a saan a nabuniagan—a kas iti kabsat ni Joseph Smith a ni Alvin—dayta a tao ket dinto makapan sadi langit. Nakita pay ni Joseph ni Alvin iti maysa a parmata iti celestial a pagarian. Bayat ti panangbasam ti benneg 137, utobem no ania ti nasursurom maipanggep iti Nailangitan nga Ama, ti planona iti pannakaisalakan, ken ti celestial a pagarian.

Kitaen met iti Saints, 1:232–35.

Doktrina ken Katulagan 138:1–11, 25–30

Ti panangbasbasa ken panangut-utob kadagiti nasantuan a kasuratan ti mangisagana kaniak nga umawat iti paltiing.

No dadduma sumangbay ti paltiing uray no saantayo a sapulen daytoy. Ngem ad-adda a masansan, sumangbay daytoy gapu ta sipapasnektayo nga agsukisok ken agsagana para ti daytoy. Bayat ti panangbasam iti Doktrina ken Katulagan 138:1–11, 25–30, kitaem no ania ti ar-aramiden ni Presidente Joseph F. Smith idi “naglukat dagiti mata ti panagawat[na]” tapno nasaysayaat ti pannakaawatmo iti pangsubbot a mision ti Mangisalakan. Kalpasanna ibilangmo no kasano a masurotmo ti pagwadan ni Presidente Smith. Kas pagarigan, ania dagiti panagbalbaliw nga aramidem iti panagadalmo kadagiti nasantuan a kasuratan a mangpalugod iti ad-adu pay a “panangutob kadagiti nasantuan a kasuratan” ken ad-adda pay a “panangutob iti naindaklan a panangsubbot a sakripisio ti [Mangisalakan]?” (dagiti bersikulo 1–2).

Iti mensahena a “The Vision of the Redemption of the Dead” (Ensign wenno Liahona, Nob. 2018, 71–74), insingasing ni Presidente M. Russell Ballard dagiti dadduma pay a wagas a nakapagsaganaan ni Presidente Smith nga umawat iti daytoy a paltiing. Ibilangmo no kasano a nakapagsaganaka para kadagiti padas a mapaspasaram wenno mapasaramto iti masakbayan.

Kitaen met iti “Ministry of Joseph F. Smith: A Vision of the Redemption of the Dead,” video, ChurchofJesusChrist.org.

Joseph F. Smith, ni Albert E. Salzbrenner

Doktrina ken Katulagan 138:25–60

Mapaspasamak ti aramid ti pannakaisalakan iti agsumbangir ti belo.

Insuro ni Presidente Russell M. Nelson, “Simple ken napudno ti mensahetayo iti lubong: awisenmi ti amin nga annak ti Dios iti agsumbangir ti belo nga umasideg iti Mangisalakanda, umawat kadagiti bendision ti nasantuan a templo, maaddaan iti manayon a rag-o, ken maikari para iti agnanayon a biag” (“Let Us All Press On,” Ensign wenno Liahona, Mayo 2018, 118–19). Utobem daytoy a palawag bayat ti panangbasam iti Doktrina ken Katulagan 138:25–60. Mabalinmo pay a panunoten maipapan kadagitoy a saludsod:

• Ania ti masursurom manipud kadagitoy a bersikulo maipanggep no kasano a maipatungpal ti aramid ti pannakaisalakan iti lubong ti espiritu? Apay a nasken a maammuam a mapaspasamaken daytoy nga aramid? Kasano a mapatibker dagitoy a bersikulo ti pammatim iti Pannubbot ti Mangisalakan?

• Ania ti isuro dagitoy a bersikulo maipanggep kadagiti makiramraman iti aramid ti pannakaisalakan iti lubong ti espiritu? Apay a napateg a maawatan a maar-aramid ti aramid ti pannakaisalakan iti agsumbangir ti belo?

Kitaen met iti Dallin H. Oaks, “Trust in the Lord,” Ensign wenno Liahona, Nob. 2019, 26–29; “Susa Young Gates and the Vision of the Redemption of the Dead,” Revelations in Context 315–22.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Doktrina ken Katulagan 137:1–5.Awisem ti pamiliam nga agdrowing iti no ania iti panagkunada a mabalin a langa ti celestial a pagarian a maibatay kadagitoy a bersikulo. Ania ti masarakam kadagitoy a bersikulo a makatulong kenka a mangpadpadaan iti panagnaedmo sadiay? Ania ti ar-aramidentayo itan nga agsagana a makipagnaed iti Nailangitan nga Ama ken ni Jesucristo iti celestial a pagarian?

Doktrina ken Katulagan 137:5–10.Tapno masursurom maipapan iti no ania ti kayat a sawen idi ni Joseph Smith a makitana ti sumagmamano a miembro ti pamiliana nga agkakadua iti celestial a pagarian, mabalin a buyaen ti pamiliam ti video a “Ministry of Joseph Smith: Temples” (ChurchofJesusChrist.org). Nalabit a mabalinmo met ti agsarita maipanggep iti maysa a tao nga am-ammom a natay nga awanan iti gundaway a nabuniagan. Ania ti isuro kadatayo ti Doktrina ken Katulagan 137:5–10 maipapan iti dayta a tao?

Doktrina ken Katulagan 138:12–24.Ania ti isuro ti Doktrina ken Katulagan138:12–24 maipapan kadagiti tao a sinarungkaran ti Mangisalakan iti lubong ti espiritu? Ania dagiti bendision a naawatda? Ania ti masursurotayo manipud iti pagwadanda?

Doktrina ken Katulagan 138:38–55.Iladawan dagitoy a bersikulo dagita a nakita ni Presidente Joseph F. Smith iti lubong ti espiritu ken dagiti ababa a detalye maipapan kadakuada. Nalabit a makaaramid ti pamiliam iti maysa a listaan dagiti kapuonam nga adda iti lubong ti espiritu, a karagpin dagiti detalye maipapan iti biagda.

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “Search, Ponder, and Pray,“ Children’s Songbook,109.

Panangpadur-as iti Panagsursurotayo

Panangutob kadagiti nasantuan a kasuratan. Inawagan ni Presidente David O. McKay ti panagutob kas “maysa kadagiti … kasagraduan a dalan a pagnaan nga agturong iti sidong ti Apo” (Teachings of Presidents of the Church: David O. McKay [2003], 32).

Dagiti Nabilin, ni Harold I. Hopkinson. Binilin ni Jesucristo dagiti nalinteg nga espiritu a mangikasaba iti ebanghelio iti lubong ti espiritu.