«Բժշկվել Նրա ձեռքերում», Ջոն ՄաքՆոթըն

Մարտի 4-10-ը

Մատթեոս 8–9, Մարկոս 2–5

«Քո հաւատքն ազատեց քեզ, քո տանջանքիցն առողջ եղիր»

Երբ կարդաք Մատթեոս 8-9-ը և Մարկոս 2-5-ը, արձագանքեք այն տպավորություններին, որոնք ստանում եք Սուրբ Հոգուց: Գրի առեք ձեր ստացած հուշումները և թե ինչպես եք գործելու ըստ այդ հուշումների:

Գրի առեք տպավորությունները

Դժվար է կարդալ Նոր Կտակարանը և չտպավորվել այն բազմաթիվ պատմություններով, թե Փրկիչն ինչպես է բժշկում հիվանդներին ու տառապյալներին՝ տենդի մեջ գտնվող կնոջից մինչև աղջիկը, ում հայտարարել էին մահացած: Ի՞նչ ուղերձ կա մեզ համար այս հրաշքների ու ֆիզիկական բժշկումների մեջ: Անշուշտ, ակնհայտ ուղերձներից մեկն այն է, որ Հիսուս Քրիստոսը Աստծո Որդին է, բոլոր բաների՝ ներառյալ մեր ֆիզիկական ցավերի ու անկատարությունների վրա ունեցած իր զորությամբ: Բայց մի ուրիշ իմաստ է թաքնված թերահավատ դպիրներին ուղղված Նրա խոսքերում. «Բայց որ իմանաք, թէ Որդին մարդոյ իշխանութիւն ունի երկրի վերայ մեղքեր թողելու» (Մարկոս 2.10): Ուստի երբ կարդում եք, թե ինչպես են բժշկվում կույրն ու բորոտը, կարող եք մտածել թե՛ հոգևոր, թե՛ ֆիզիկական բժշկման մասին, որոնք դուք կարող եք ստանալ Փրկիչից և լսել, թե Նա ինչպես է ասում ձեզ. «Քո հաւատքն ազատեց քեզ, քո տանջանքիցն առողջ եղիր» (Մարկոս 5.34):

Գաղափարներ սուրբ գրությունների անհատական ուսումնասիրության համար

Մատթեոս 8–9, Մարկոս 2, 5

Փրկիչը կարող է բժշկել թուլություններն ու հիվանդությունները:

Այս մի քանի գլուխները հիշատակում են Փրկիչի կողմից կատարված բազմաթիվ հրաշագործ բժշկումների օրինակներ: Երբ ուսումնասիրում եք այս բժշկումները, փնտրեք ձեզ համար հնարավոր ուղերձները: Հարցրեք ինքներդ ձեզ՝ այս պատմությունն ի՞նչ է ուսուցանում հավատի մասին: Այս պատմությունն ի՞նչ է ուսուցանում Փրկիչի մասին: Աստված ի՞նչ է կամենում ինձ սովորեցնել այս հրաշքից:

• Բորոտը (Մատթեոս 8.1–4)

• Հարյուրապետի ծառան (Մատթեոս 8.5–13)

• Պետրոսի զոքանչը (Մատթեոս 8.14–15)

• Երկու կույրերը (Մատթեոս 9.27–31)

• Կաթվածահար մարդը (Մարկոս 2.1–12)

• Մարդը, ում տիրել էին պիղծ ոգիները (Մարկոս 5.1–20)

• Հայրոսի դուստրը (Մարկոս 5.22–23, 35–43)

• Կինը, ով արյան խնդիր ուներ (Մարկոս 5.24–34)

Տես նաև Դալլին Հ. Օուքս, «Հիվանդների բժշկումը» Ensign or Լիահոնա, մայիս 2010, 47–50:

Հիսուսը բժշկում է հիվանդներին, Ջոզեֆ Բրիքի, Հենրիխ Հոֆման

Մատթեոս 8.5-13, Մարկոս 5.24-34

Ես կարող եմ փնտրել Աստծո օգնությունը, նույնիսկ, եթե զգում եմ, որ արժանավոր չեմ:

Հեթանոս հարյուրապետն իրեն անարժան էր համարում, որ Փրկիչն իր տունը գար: Արյան հետ խնդիր ունեցող կինը համարվում էր անմաքուր և արտաքսվել էր հրեական համայնքից: Սակայն Փրկիչն օրհնեց նրանց երկուսին: Այս երկու պատմություններից՝ Տիրոջից օգնություն խնդրելու մասին ի՞նչ ենք սովորում:

Մատթեոս 8.18–22, Մարկ 3.31–35

Լինել Հիսուս Քրիստոսի աշակերտ, նշանակում է, որ ես Նրան իմ կյանքում դնում եմ առաջին տեղում:

Այս հատվածներում Հիսուսն ուսուցանում է, որ Իր աշակերտներից պահանջվում է իրեն դնել առաջին տեղում մեր կյանքում, նույնիսկ եթե դա երբեմն նշանակում է, որ մենք պետք է զոհաբերենք մեզ համար արժեքավոր բաներ։ Երբ ուսումնասիրեք այս հատվածները, խորհեք ձեր աշակերտության մասին: Աշակերտներն ինչո՞ւ պիտի պատրաստ լինեն Փրկիչին դնել առաջին տեղում: Ինչի՞ց պիտի հրաժարվեք, որպեսզի Հիսուսին դնեք առաջին տեղում: (Տես նաև Ղուկաս 9.57–62:)

Մատթեոս 8.23–27, Մարկոս 4.35–41

Հիսուս Քրիստոսը զորություն ունի խաղաղություն բերել կյանքի փոթորիկներին:

Երբևէ ունեցե՞լ եք այն զգացողությունը, որ Փրկիչի աշակերտներն ունեցան փոթորկալից ծովում, տեսնելով, թե ջրի ալիքներն ինչպես էին լցվում նավակի մեջ և հարցրին. «Վարդապետ, հոգդ չէ՞ որ կորչում ենք»:

Մարկոս 4.35–41-ում դուք կգտնեք չորս հարց: Թվարկեք յուրաքանչյուրը և հարցրեք, թե այն ինչ է ուսուցանում ձեզ կյանքի դժվարություններին բախվելու մասին, երբ հավատ ունեք Հիսուս Քրիստոսի հանդեպ: Փրկիչն ինչպե՞ս է խաղաղություն բերում ձեր կյանքի փոթորիկներին:

Մատթեոս 9.1-13, Մարկոս 2.15-17

Ես կարող եմ պաշտպանել իմ համոզմունքները՝ ուսուցանելով ճշմարիտ սկզբունքներ:

Երբեմն դժվար է իմանալ, թե ինչպես արձագանքել մարդկանց, ովքեր քննադատում են մեր կրոնական համոզմունքներն ու գործելակերպը: Երբ կարդում եք Մատթեոս 9.1–13-ը և Մարկոս 2.15–17-ը, փնտրեք մեղադրողների քննադատությունը և Փրկիչի պատասխանները: Քննադատությունը և պատասխանները նշեք տարբեր գույներով կամ գրի առեք դրանք: Ի՞նչ եք նկատում Փրկիչի ուսուցման ձևի մեջ: Նրա օրինակին հետևելն ինչպե՞ս կօգնի ձեզ, եթե ստիպված եք պաշտպանել ավետարանի որևէ սկզբունք կամ Եկեղեցու գործելակերպը:

Տես նաև «Ամենօրյա օրինակ. երբ համոզմունքները կասկածի տակ են դրվում» տեսանյութը (LDS.org):

Մատթեոս 9․1-8

Ապաշխարության շնորհիվ ես կարող եմ լավատես լինել:

Երբ անդամալույծին բերեցին Փրկիչի մոտ, ամբոխի համար ակնհայտ էր, որ նա պիտի բուժվեր ֆիզիկապես: Բայց Հիսուսը նախ անդրադարձավ մարդու ավելի մեծ կարիքին՝ նրա մեղքերի ներմանը: Նույնիսկ, եթե մարդը ֆիզիկապես չբուժվեց, նա այնուամենայնիվ կարող էր հետևել Հիսուսի խորհրդին՝ «քաջացիր» (Մատթեոս 9.2): Ե՞րբ եք ուրախություն զգացել ներված լինելու արդյունքում: (Տես նաև ՎևՈւ 36․18-24։)

Գաղափարներ սուրբ գրությունների ընտանեկան ուսումնասիրության և ընտանեկան երեկոյի համար

Երբ շարունակում եք սովորել Փրկիչի ծառայության մասին ընտանիքով, Հոգին կարող է օգնել ձեզ իմանալ, թե որ սկզբունքները շեշտել ու քննարկել, որպեսզի դրանք համապատասխանեն ձեր ընտանիքի կարիքներին: Ահա մի քանի առաջարկներ․

Մատթեոս 8–9, Մարկոս 2, 5

Կազմեք այս գլուխներում նկարագրված հրաշքների ցուցակը և գտեք դրանցից մի քանիսի նկարները (տես Ավետարանի պատկերագիրք կամ LDS.org): Ընտանիքի յուրաքանչյուր անդամի խնդրեք պատմել որևէ հրաշքի մասին (օգտագործելով նկարներ, եթե առկա են) և կիսվել դրանցից իրենց սովորածով: Կարող եք կիսվել հրաշքների մի քանի օրինակներով, որոնց ներկա եք եղել կամ կարդալ Եկեղեցու ժամանակակից պատմության մասին:

Մատթեոս 9.10-13

Ի՞նչ ենք սովորում այն ձևից, որով Փրկիչը վերաբերվում էր մաքսավորներին ու մեղավորներին, որոնցից խուսափում էին ուրիշները: Ինչպե՞ս կարող ենք հետևել Նրա օրինակին, երբ շփվում ենք ուրիշ մարդկանց հետ:

Մատթեոս 9.36-38

Ինչպե՞ս կարող եք օգնել ձեր ընտանիքին հասկանալ Փրկիչի խնդրանքն այն մասին, որ ավելի շատ մշակներ են հարկավոր ավետարանով կիսվելու համար: Դուք կարող եք միասին որևէ պարզ բան անել, ինչպես օրինակ՝ հավաքել խոհանոցը ճաշից հետո, ինչը մեկից շատ ավելի երկար ժամանակ կխլեր: Մենք ի՞նչ կարող ենք անել, որպեսզի կիսվենք ավետարանի ուղերձով:

Մարկոս 4.35–41

Այս պատմությունը կարո՞ղ է օգնել ընտանիքի անդամներին, երբ նրանք վախենում են ինչ-որ բանից: Հավանաբար նրանք կարող են կարդալ հատված 39-ը և կիսվել փորձառություններով, երբ Փրկիչն օգնեց նրանց խաղաղություն զգալ խուճապի և վախի ժամանակ:

Երեխաներին ուսուցանելու լրացուցիչ գաղափարների համար տես այս շաբաթվա համառոտ շարադրանքը, Եկ հետևիր ինձ․ Երեխաների Միության համար:

Բարելավել մեր ուսուցումը

Եղեք մատչելի և հասանելի: Ուսուցողական լավագույն պահերից մի քանիսը ծագում են որպես հարց կամ մտահոգություն ընտանիքի անդամների սրտում: Ձեր խոսքերի և գործողությունների միջոցով ընտանիքի անդամները թող իմանան, որ դուք հետաքրքրությամբ լսում եք նրանց (տես «Ուսուցանել Փրկիչի ձևով», 16)

Քրիստոսը և անդամալույծը, Ջ. Քըրք Ռիչարդս