Tē fa’aora ra Iesu i te hō’ē ta’ata pirio’i

Healing in His Wings, nā Jon McNaughton

4–10 nō māti

Mataio 8–9 ; Mareko 2–5

« ’Ua ora ’oe i tō fa’aro’o »

’A tai’o ai ’outou i te Mataio 8–9 ’e te Mareko 2–5, e vai ara i te mau mana’o e tae mai nō ’ō mai i te Vārua Maita’i. E ’ōpua i te pāpa’i i te mau muhumuhu e fāri’i ’outou ’e te mau mea tā ’outou e nehenehe e rave mai te au i te reira mau muhumuhu.

Tāpa’opa’o i te mau mana’o e tae mai ia ’outou

E’ita e nehenehe e tai’o i te Faufa’a ’Āpī ma te ’ore e fa’ahiahia i te mau fa’ati’ara’a e rave rahi nō ni’a i te fa’aorara’a te Fa’aora i tei ma’ihia ’e tei ’ati—te mau ta’ata mai te vahine i fīvahia ē tae noa atu i te tamāhine i parauhia ’ua pohe. E aha ra ïa te mau poro’i nō tātou i roto i teie mau semeio fa’aorara’a pae tino ? Pāpū roa ïa hō’ē poro’i, ’oia ho’i, e Tamaiti nā te Atua ’o Iesu Mesia, e mana tōna i ni’a i te mau mea ato’a, ’e tae noa atu i ni’a i te mau māuiui pae tino ’e te mau hapehape pae tino. Tē vai nei rā te tahi fa’ahou aura’a e ’itehia i roto i tāna mau parau i te mau pāpa’i parau ti’aturi ’ore : « ’Ia ’ite… ’outou ē e mana tō te Tamaiti a te ta’ata i te ao nei ’ia fa’a’ore i te hara » (Mareko 2:10). Nō reira ’ia tai’o ’outou nō ni’a i te ta’ata mata pō ’aore rā te lepera i fa’aorahia, e feruri i te fa’aorara’a—pae vārua ’e pae tino—e nehenehe e fāri’i nō ’ō mai i te Fa’aora ma te fa’aro’o iāna i te nā ’ō mai ia ’outou : « ’Ua ora ’oe i tō fa’aro’o » (Mareko 5:34).

tāpa’o tuatāpapara’a a te ta’ata hō’ē

Mau mana’o nō tā ’oe iho tuatāpapara’a pāpa’ira’a mo’a

Mataio 8–9 ; Mareko 2 ; 5

E ti’a i te Fa’aora ’ia fa’aora i te mau paruparu ’e te mau ma’i.

E ’itehia i roto i teie nau pene e rave rahi hi’ora’a nō te fa’aorara’a semeio i ravehia e te Fa’aora. ’A tuatāpapa ai ’oe i teie mau ’ohipa fa’aorara’a, ’a hi’o i te mau poro’i e tano ia ’oe. E ui paha ’oe ia ’oe iho : E aha tā teie ’ā’amu e ha’api’i nei nō ni’a i te fa’aro’o ? E aha tā teie ’ā’amu e ha’api’i nei nō ni’a i te Fa’aora ? E aha tā te Atua e hina’aro nei iā’u ’ia ha’api’i i roto i teie semeio ?

• Hō’ē lepera (Mataio 8:1–4)

• Hō’ē tāvini a te keniturio (Mataio 8:5–13)

• Te metua ho’ovai o Petero (Mataio 8:14–15)

• Nā piti mata pō (Mataio 9:27–31)

• Hō’ē ta’ata huma (Mareko 2:1–12)

• Hō’ē ta’ata tei uruhia e te mau vārua ’ino (Mareko 5:1–20)

• Te tamāhine a Iaeiro (Mareko 5:22–23, 35–43)

• Hō’ē vahine ma’i tapahi (Mareko 5:24–34)

Hi’o ato’a Dallin H. Oaks, « Fa’aorara’a i te feiā ma’i », Ensign ’aore rā Liahona, Mē 2010, 47–50.

’O Iesu e fa’aora nei i te feiā ma’i

Jesus Healing the Sick, nā Joseph Brickey, mai tā Heinrich Hofmann

Mataio 8:5–13 ; Mareko 5:24–34

E nehenehe tā’u e ’imi i te tauturu a te Atua noa atu ā tō’u ti’a ’ore i tā’u iho hi’ora’a.

’Ua mana’o te keniturio, e ’etene, ’aita tōna ti’ara’a e fāri’i i te Fa’aora i tōna fare. ’Ua hi’ohia te vahine tapahi ’ei vahine vi’ivi’i ’e ’ua fa’aāteahia ’oia i te sōtaiete ’āti Iuda. ’Ua ha’amaita’i rā te Fa’aora ia rāua to’opiti. E aha tā ’oe e ha’api’i nei i roto i teie nā fa’ati’ara’a nō ni’a i te ’imira’a i te tauturu a te Fatu ?

Mataio 8:18–22 ; Mareko 3:31–35

Te rirora’a ’ei pipi nā Iesu Mesia, te aura’a ra, e tu’u vau iāna i mua roa i roto i tō’u orara’a.

I roto i teie mau ’īrava, ’ua ha’api’i Iesu ē, e tītau te rirora’a ’ei pipi nāna i te tu’ura’a iāna i mua roa i roto i tō tātou orara’a, noa atu i te tahi taime e ti’a roa ’ia fa’atusia i te tahi atu mau mea faufa’a nā tātou. ’A tuatāpapa ai ’oe i teie mau ’īrava, ’a feruri i tō ’oe iho ti’ara’a pipi. Nō te aha e ti’a roa i te mau pipi ’ia hina’aro ’ia tu’u i te Fa’aora i mua roa ? E aha te ti’a ia ’oe ’ia fa’aru’e nō te tu’u ia Iesu i mua roa ? (Hi’o ato’a Luka 9:57–62.)

Mataio 8:23–27 ; Mareko 4:35–41

E mana tō Iesu Mesia nō te fa’atae i te hau i roto i te mau vero o te orara’a.

’Ua tae a’ena mai ānei tō ’oe mana’o mai tō te mau pipi a Iesu i ni’a i te moana i roto i te vero—i te hi’ora’a i te mau ’are miti tē fa’a’ī ra i te poti ’a pi’i ai : « E te Fatu, fa’aora ia tātou, ’ua pohe tātou ! »

I roto i te Mareko 4:35–41, e ’ite ’oe e maha uira’a. E ’āpapa i te mau uira’a ato’a ’e e feruri i te mea tā te reira e ha’api’i ra nō ni’a i te fa’arurura’a i te mau tāmatara’a o te orara’a ma te fa’aro’o ia Iesu Mesia. Nāhea te Fa’aora i te fa’atae mai i te hau i roto i te mau vero o tō ’oe orara’a ?

Mataio 9:1–13 ; Mareko 2:15–17

E nehenehe e pāruru i tō’u mau ti’aturira’a nā roto i te ha’api’ira’a i te ta’ata i te mau parau tumu mau.

I te tahi taime, e mea fifi ’ia ’ite nāhea i te pāhono atu ’ia fa’ahapa mai te ta’ata i tō tātou mau ti’aturira’a pae fa’aro’o ’e tā tātou mau peu. ’A tai’o ai ’oe i te Mataio 9:1–13 ’e te Mareko 2:15–17, ’a imi i te mau fa’ahapara’a a te feiā fa’ahapa ’e te mau pāhonora’a a te Fa’aora. E ’ōpua i te fa’a’ū i te mau fa’ahapara’a i te hō’ē ’ū ’e te mau pāhonora’a i te tahi atu ’ū ’ē ’aore rā e pāpa’i i te reira. E aha tā ’oe e ’ite ra nō ni’a i te huru e ha’api’i te Fa’aora i te ta’ata ? Nāhea te pe’era’a i tōna hi’ora’a i te tauturu ia ’oe i te taime e ti’a ia ’oe ’ia pāruru i te hō’ē parau tumu o te ’evanelia ’aore rā te hō’ē peu nā te ’Ēkālesia.

Mataio 9:1–8

Maoti te tātarahapara’a, e nehenehe au e fa’aitoito.

I te ’āfa’ira’ahia mai te hō’ē hāpepa i te Fa’aora, ’ua ta’a maita’i i te ta’ata ē, e fa’aorara’a pae tino tāna i hina’aro. ’Ua rapa’au nā mua rā Iesu i te fifi rahi a’e o terā ta’ata—te fa’aorera’a i tāna hara. ’Āhani noa atu ’aita te ta’ata i ora i tōna ma’i, e nehenehe noa tāna e pe’e i te parau a’o a Iesu e « fa’aitoito » (Mataio 9:2). Ahea tō ’oe ’oa’oara’a i te mea ’ua fa’aorehia tā ’oe mau hara ? (Hi’o ato’a Alama 36:18–24.)

tāpa’o tuatāpapara’a a te ’utuāfare

Mau mana’o nō tā te ’utuāfare tuatāpapara’a pāpa’ira’a mo’a ’e nō te purera’a pō ’utuāfare

’Ia tāmau noa ’outou te ’utuāfare i te ha’api’i nō ni’a i te tāvinira’a a te Fa’aora, e nehenehe te Vārua e tauturu mai ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o :

Mataio 8–9 ; Mareko 2 ; 5

E ’ōpua i te hāmani i te hō’ē tāpura nō te mau semeio i fa’ata’ahia i roto i teie mau pene ma te ’imi i te hōho’a nō te tahi o rātou (hi’o i te Buka hōho’a nō te ’evanelia ’aore rā te LDS.org). E nehenehe tā ’outou e ui i te mau melo tāta’itahi o te ’utuāfare e fa’ati’a mai i te hō’ē o te mau semeio (ma te fa’a’ohipa i te hō’ē hōho’a) ’e ma te fa’a’ite mai i tā rātou i ha’api’i i roto i te reira. E nehenehe tā ’outou e fa’a’ite i te tahi mau semeio tā ’outou i ’ite ’aore rā i tai’o i roto i te ’ā’amu o te ’Ēkālesia i tō tātou nei anotau.

Mataio 9:10–13

E aha tā tātou e ha’api’i nei i roto i te huru ravera’a a te Fa’aora i te mau telona ’e te feiā hara, tei ’apehia e verā mā ? Nāhea tā tātou e nehenehe ai e pe’e i tōna hi’ora’a i roto i tā tātou mau ’ohipara’a e te ta’ata ?

Mataio 9:36–38

Nāhea ’outou i te tauturu i tō ’outou ’utuāfare ’ia māramarama i te tāparura’a a te Fa’aora ’ia rahi atu ā te rave ’ohipa e tauturu i te fa’a’ite i te ’evanelia ? E nehenehe tā ’outou e rave i te hō’ē ’ohipa ’ōhie mai te rave-’āmui-ra’a i te hō’ē ’ohipa e maoro roa ’āhani ’o te hō’ē noa ta’ata rave, mai te tāmāra’a i te vāhi tāmā’ara’a i muri iho i te tāmā’ara’a i te pō. E aha tā tātou e nehenehe e rave nō te fa’a’ite i te ’evanelia ?

Mareko 4:35–41

E nehenehe ānei teie ’ā’amu e tauturu i te mau melo o te ’utuāfare i te taime e ri’ari’a rātou ? Penei a’e e nehenehe tā rātou e tai’o i te ’īrava 39 ’a fa’a’ite mai ai i te ’ohipa i tupu ’a tauturu ai te Fa’aora i tō rātou mana’o hau i te taime ’ārepurepu ’aore rā i te taime mata’u.

Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a o teie hepetoma i roto Mai, pe’e mai—nō te Paraimere.

Ha’amaita’i i tā tātou hōro’ara’a i te ha’api’ira’a

Vai vata noa ’e vai matara noa. E ha’amata te tahi o te mau taime maita’i roa a’e nō te ha’api’i nā roto i te mau uira’a ’aore rā te mau māna’ona’ora’a e vai ra i roto i te ’ā’au o te mau melo o te ’utuāfare. ’Ia ’ite te mau melo o te ’utuāfare i roto i tā ’outou mau parau ’e tā ’outou mau ’ohipa ē ’ua hina’aro mau ’outou e fa’aro’o ia rātou (hi’o Ha’api’ira’a mai tā te Fa’aora, 16).

e ta’ata i ni’a i te ro’i tē ha’apouhia ra i mua ia Iesu mai ni’a mai i te tāpo’i fare.

Christ and the Palsied Man, nā J. Kirk Richards