« 25–31 nō māti. Mataio 14–15 ; Mareko 6–7 ; Ioane 5–6: ‘’Eiaha e mata’u’ », Mai, pe’e mai—nō te ta’ata hō’ē ’e te ’utuāfare : Faufa’a ’Āpī 2019 (2019)
« 25–31 nō māti. Mataio 14–15 ; Mareko 6–7 ; Ioane 5–6 », Mai, pe’e mai—nō te ta’ata hō’ē ’e te ’utuāfare : 2019
Feed Them, nā Jorge Cocco
25–31 nō māti
Mataio 14–15 ; Mareko 6–7 ; Ioane 5–6
« ’Eiaha e mata’u »
’Ia tai’o ’outou i te Mataio 14–15 ; te Mareko 6–7 ; ’e te Ioane 5–6, e hi’o i te mau parau mau e aura’a ta’a ’ē nō ’outou. E nehenehe e ui ia ’outou iho i te mau uira’a mai teie : « Nāhea te mau ’ā’amu i roto i teie mau pene e tū’ati nei i ni’a iā’u ? » « E aha te mau poro’i tā’u e ’ite ra nō tō’u orara’a ? » ’aore rā « E aha tā’u e fa’a’ite i tō’u ’utuāfare ’aore rā i te ta’ata ? »
Tāpa’opa’o i te mau mana’o e tae mai ia ’outou
E aha te mea i fa’auru ia Petero e fa’aru’e i te poti i ni’a i te roto nō Galilea i roto i te vero rahi ? Nō te aha ’oia i ti’aturi ai ē, ’ua haere Iesu nā ni’a i te pape ra, e ti’a ato’a ïa iāna ? ’Aita i pāpū maita’i, penei a’e rā ’ua māramarama Petero ē, ’aita te Tamaiti a te Atua i haere noa mai nō te rave i te mau mea fa’ahiahia nō te ta’ata, nō te ha’amana ato’a rā i te ta’ata mai ia Petero, ’ia rave ato’a ’oia i te mau mea fa’ahiahia. Te pi’ira’a ho’i a Iesu, ’oia ho’i, « ’A haere mai, ’a pe’e mai iā’u » (Luka 18:22). ’Ua fāri’i Petero i teie anira’a hō’ē taime, ’e ’ua ineine ’oia nō te fāri’i fa’ahou ā i te reira, noa atu ā e fa’aruru ’oia i tōna mau mata’u ’e e rave ’oia i te hō’ē ’ohipa e’ita e nehenehe e rave ’ia hi’ohia. Penei a’e e’ita te Fatu e ani mai ia tātou ’ia ’ou’a mai i rāpae i te poti i te taime vero ’aore rā ’ia fa’atāmā’a i nā tauasini ta’ata i tā ’outou mā’a faraoa iti, e ani mai rā ’oia ia tātou ’ia fāri’i i te mau arata’ira’a, noa atu ā ’aita tātou e māramarama hope roa ra i te reira. Ta’a ’ē noa atu tāna mau anira’a ia tātou, tē vai ra e hitimahuta tātou i te tahi taime ’aore rā ri’ari’a tātou. E mau semeio rā e tupu mai mai te mea e tu’u tātou i tō tātou mata’u i te hiti, te fē’a’ara’a ’e te ta’a ’ore, mai ia Petero te huru, ’e e pe’e tātou iāna ma te fa’aro’o.
Mau mana’o nō tā ’oe iho tuatāpapara’a pāpa’ira’a mo’a
’Ua fa’atura Iesu Mesia i tōna Metua.
’Ua fa’ata’ahia te aura’a i rotopū i te Metua i te Ao ra ’e tāna mau tamari’i tāta’itahi ’ia riro ’ei aura’a mo’a. I roto i teie mau ’īrava, ’ua hōro’a Iesu Mesia ia tātou i te hō’ē hōho’a fa’auru e pe’e i roto i tō tātou aura’a ’e te Metua i te Ao ra. E tai’o i te Ioane 5:17–47, ’e tāpa’o ’aore rā e pāpa’i i te mau taime tāta’itahi e ’itehia te ta’o Metua. Nāhea te Tamaiti e fa’atura nei i te Metua, ’e nāhea ’oe e nehenehe ai e pe’e i tōna hi’ora’a ? E aha tā ’oe e ha’api’i ra nō ni’a i te mana’o o te Metua i te Tamaiti ? Nāhea te ha’apūaira’a i tō ’oe aura’a ’e te Metua i te Ao ra e fa’arahi nei i tō ’oe ineinera’a nō te ’imi ’e nō te ha’apa’o i tōna hina’aro ?
Hi’o ato’a Ioane 17 ; Jeffrey R. Holland, « Te hanahana rahi o te Atua », Ensign ’aore rā Liahona, Nov. 2003, 70–73.
Mataio 14:16–21 ; Mareko 6:33–44 ; Ioane 6:5–14
E ti’a i te Fa’aora ’ia fa’arahi i tā’u mau pūpūra’a ha’eha’a iti nō te fa’atupu i tāna mau ’ōpuara’a.
’Ua tae mai a’enei ānei te mana’o paruparu i mua i te mau hina’aro ato’a ’ati a’e ia ’oe—i tō ’oe fare, i roto i te mau aura’a ’e te ta’ata ’aore rā i roto i te sōtaiete ? ’Ua tae ato’a mai paha te mana’o paruparu i roto i te mau pipi a Iesu i te anira’a ’oia ia rātou ’ia fa’atāmā’a hau i te pae tauasini ta’ata po’ia (hi’o Mataio 14:21) e pae noa ho’i faraoa iti ’e e piti i’a. ’A tai’o ai ’oe i te semeio i tupu i muri iho, ’a feruri nāhea te Atua e fa’a’ohipa i tā ’oe pūpūra’a ha’eha’a iti tāvinira’a nō te ha’amaita’i i te feiā ’ati a’e ia ’oe. Nāhea tāna e nehenehe ai e fa’arahi i tā ’oe mau tauto’ora’a ’a tāvini ai ’oe i roto i te ’Ēkālesia ? ’A hi’o na i teie parau a te peresideni James E. Faust : « E rave rahi ta’ata ’aita te i’oa e parauhia ra ’e e pae faraoa noa ’e e piti i’a noa tā rātou e hōro’a nei, tē fa’arahi nei rā rātou i tō rātou pi’ira’a ’e tē tāvini nei rātou, ma te ha’apa’o-’ore-hia ’e ma te ha’amāuruuru-’ore-hia, ma te fa’atāmā’a rā i te tahi tauasinira’a ta’ata » (« Five Loaves and Two Fishes », Ensign, Mē 1994, 5).
Mataio 14:22-33 ; Mareko 06:45-52 ; Ioane 6:-15-21
Tē ani nei Iesu Mesia iā’u ’ia tu’u i te hiti i tō’u mata’u ’e te fē’a’a ’e ’ia fa’a’ohipa i te fa’aro’o iāna.
’A hi’o mana’oe i roto i tō ’oe ferurira’a i te mau ’ohipa i tupu i roto i te Mataio 14:22–33 ; te Mareko 6:45–52 ’e te Ioane 6:15–21. E feruri na i te mana’o o Petero ’e o te tahi mau pipi. E aha tā ’oe e ha’api’i nei nō ni’a i te ti’ara’a pipi i roto i te mau parau ’e te mau ’ohipa a te Fa’aora e vai ra i roto i teie mau ’īrava ? E aha tā ’oe e ha’api’i nei i roto i te mau parau ’e te mau ’ohipa a Petero ? (Hi’o ato’a 1 Nephi 3:7.) E aha tā te Fatu e ani ra ia ’oe e au i te ’ōu’ara’a i rāpae i te poti ? E aha tā ’oe e ’ite ra i roto i teie mau ’īrava e fa’aitoito ra ia ’oe ’ia fa’a’ohipa i te fa’aro’o ia Iesu Mesia ?
’Ei pipi nā Iesu Mesia, e mea ti’a ’ia ineine au nō te ti’aturi ’e nō te fāri’i i te parau mau, noa atu ā te fifi o te reira.
Te mahana i muri iho i te semeio no te fa’atāmā’ara’a i te naho’a rahi i roto i te medebara, ’ua ’imi te mau ’āpe’e iāna, tē ’imi ra rātou i te mā’a. Teie rā, ’ua huru ’ē roa rātou ’e ’ua ’ino’ino ato’a i te hōro’ara’a ’oia ia rātou i te tahi atu huru mā’a pae vārua—te « pāne ora » (Ioane 6:48). E rave rahi tei mana’o ē, « e parau ri’ari’a teie » (Ioane 6:60).
’Ua tupu a’enei ānei te tahi taime ē ’ua mana’o ’oe ē e parau « ri’ari’a » ’aore rā e ha’api’ira’a tumu fifi tā te Fa’aora ’aore rā tā tāna mau tāvini i ha’api’i, nō te fāri’i i te reira ? ’A feruri i te reira huru ’ohipa ’ia tai’o ’oe i teie ’ā’amu, te mau parau iho ā rā a Petero i roto i te mau ’īrava 68–69. E aha te tahi o « te mau parau o te ora mure ’ore ra » (Ioane 6:68) e tauturu nei ia ’oe ’ia fafau noa ’ia pe’e i te Fa’aora ?
Hi’o ato’a M. Russell Ballard, « E haere ti’a mātou ia vai ra ? », Ensign ’aore rā Liahona, Nov. 2016, 90–92.
Mau mana’o nō tā te ’utuāfare tuatāpapara’a pāpa’ira’a mo’a ’e nō te purera’a pō ’utuāfare
’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu mai ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o :
’Ia tai’o ’outou nō ni’a i te fa’atāmā’ara’ahia te pae tauasini ta’ata, e nehenehe tā ’outou e ’amu i te tahi faraoa ’e te tahi i’a nō te feruri e fea te tītauhia nō te fa’atāmā’a e pae tauasini ta’ata. Mea nāhea tō ’outou ’utuāfare i te fa’a’āmura’ahia i te pae vārua e te Mesia ? Mea nāhea tōna fa’a’ohipara’a ia ’outou nō te fa’a’amu ia vetahi ’ē ?
’Ua fa’atāmā’a Iesu i e 5 000 ta’ata maoti e pae faraoa ’e e piti i’a ’e te hō’ē semeio.
E au paha tō ’outou ’utuāfare ’ia ha’uti ta’ata ora i te ’ā’amu i roto i teie mau ’īrava. Nō te aha te mau pipi i ri’ari’a ai ? Nō te aha i noa’a ai ia Petero ’ia upo’oti’a i ni’a i tōna ri’ari’a ’e ’ia haere i rāpae i te poti ? Nāhea tōna fa’a’itera’a i tōna fa’aro’o i te taime ’a ha’amata ai ’oia i te pāremo ? Mai ia Petero ānei tātou i te tahi taime ?
E ani i te mau melo o te ’utuāfare ’ia tāpa’o i te mau taime e tai’ohia te parau « ora » i roto i teie mau ’īrava. E aha te ora tā Iesu Mesia e nehenehe e hōro’a i te ta’ata ? I te hea taime ’oia i te hōro’ara’a ia tātou i te ora ’e nāhea ?
E hōro’a i te melo tāta’itahi o te ’utuāfare i te hō’ē tāpū faraoa e ’amu, i reira e paraparau ai i te mau maita’i nō roto mai i te faraoa ’e te tahi atu mā’a maita’i. I muri iho e mā’imi ’āmui i roto i teie mau ’īrava i te tumu Iesu Mesia i parau ai iāna « te pāne ora » (Ioane 6:35).
Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a o teie hepetoma i roto Mai, pe’e mai—nō te Paraimere.
Ha’amaita’i i tā ’oe iho tuatāpapara’a pāpa’ira’a mo’a
’Imi i te mea tā ’outou iho e nehenehe e ’apo mai i te pae vārua. I roto i tā ’outou tuatāpapara’a ta’ata hō’ē ’e ’utuāfare, ’eiaha e tā’ōti’a noa ia ’outou i teie mau ’īrava i roto i teie arata’i ha’api’ira’a. E mea pāpū e mau poro’i tā te Fatu nō ’outou i roto i teie mau pene tei ’ore i paraparauhia i’ō nei. E ’imi i te reira nā roto i te pure.
Against the Wind, nā Liz Lemon Swindle