’A fa’a’amu ia rātou nā Jorge Cocco

25-31 nō māti.

Mataio 14–15 ; Mareko 6–7 ; Ioane 5–6

« ’Eiaha e mata’u »

’A fa’aineine ai ’outou nō te ha’api’i mai roto mai i te Mataio 14–15 ; Mareko 6–7 ; e Ioane 5–6, ’a ’imi i te mau parau poro’i tano maita’i nō te orara’a ’o te mau tamari’i tā ’outou e ha’api’i ra. I tō ’outou mana’o, e aha te mea e tauturu ia rātou ’ia hāro’aro’a i teie mau parau poro’i ? E hōro’a mai teie fa’anahora’a ia ’outou i te tahi mau mana’o.

Pāpa’i i tō ’outou mau mana’o

Ani ’ia fa’a’ite

’A fa’a’ite i te hō’ē hōho’a nō Iesu tē haere ra nā ni’a i te pape (’a hi’o i te fa’anahora’a o teie hepetoma i roto Mai, pe’e mai—Nō te ta’ata iho ’e te ’utuāfare), ’e ’a ani i te mau tamari’i ’ia fa’a’ite mai i te mea tā rātou i ’ite nō ni’a i te ’ā’amu.

Ha’api’i i te ha’api’ira’a tumu

Te mau tamari’i ’āpī a’e

Ioane 5:1–9

’Ua ’ite Iesu Mesia i te mea tā tātou e hina’aro ’e e nehenehe ’oia e tauturu ia tātou.

’A tai’o ai ’outou nō ni’a ia Iesu i te fa’aorara’a i te hō’ē ta’ata i te hopura’a pape nō Beteseda, ’a feruri e nāfea e ti’a ai ia ’outou ’ia tauturu i te mau tamari’i ’ia ’ite, e aha tā te ’ā’amu e ha’api’i mai nei nō ni’a i te maita’i, te here ’e te tahi atu mau ateributi ’o Iesu.

Te mau ’ohipara’a e ti’a ’ia rave

• ’A fa’a’ohipa i te hōho’a Te Mesia i te fa’aorara’a i tei ma’ihia i Beteseda (Gospel Art Book, no. 42) nō te fa’ati’a i te mau tamari’i i te ’ā’amu i roto i te Ioane 5:1–9. ’E ’aore rā, ’a fa’a’ite i te video « ’Ua fa’aora Iesu i te hō’ē ta’ata i te Sābati » (LDS.org). ’A ani i te mau tamari’i ’ia feruri, o rātou te ta’ata tā Iesu i fa’aora. E aha tō rātou huru ’a fa’aora ai Iesu ia rātou ?

• ’A ani i te mau tamari’i ’ia fa’a’ite mai i te tahi mau mea pa’ari nō rātou ’e ’aore rā, o te fa’atupu i te ’oto i roto ia rātou. ’A fa’ati’a ia rātou nō ni’a i te hō’ē taime i roto i tō ’outou orara’a ’a fāri’i ai ’outou i te tauturu nō ’ō mai i te Fa’aora ra i roto i te hō’ē tāmatara’a teimaha. ’A fa’a’ite pāpū ē, ’ua ’ite Iesu i tō tātou mau fifi ato’a ’e tē hina’aro nei ’oia e tauturu ia tātou.

Mataio 14:13–21

Tē pe’e ra tātou i te hi’ora’a ’o Iesu ’ia maita’i ana’e tātou i ni’a ia vetahi ’ē.

Hō’ē rāve’a tā Iesu i fa’a’ite i te here ’oia ho’i, te fa’a’amura’a ïa i tāna mau pipi ’a po’ia ai rātou. Nāfea e ti’a ai ia ’outou ’ia tauturu i te mau tamari’i ’ia ha’api’i i te tāvini ia vetahi ’ē mai tā Iesu i rave ?

Te mau ’ohipara’a e ti’a ’ia rave

• ’A fa’a’ite i te mau tamari’i i te hō’ē panie ’e i te tahi mau faraoa ’a fa’ati’a ai ’outou i te ’ā’amu i roto i te Mataio 14:13–21. ’A fa’ata’a ē, noa atu ’ua ’imi Iesu i te hō’ē vāhi ’ia vai ’oia ana’e, ’ua hina’aro te ta’ata e fa’aea i pīha’i iho iāna. ’A fa’a’ite i te toe’a o te ’ā’amu i te mau tamari’i, ’e ’a ani ia rātou ia fa’aro’o i te mea tā Iesu i rave nō te fa’a’ite i te maita’i ’e te here nō rātou.

• ’A ani i te mau tamari’i ’ia fa’a’ite mai i te mau rāve’a ’a fa’a’ite ai te hō’ē ta’ata i te maita’i i ni’a ia rātou. E aha tā rātou e nehenehe e rave i teie hepetoma nō te fa’a’ite i te maita’i i ni’a ia vetahi ’ē? Nō te mau pāhonora’a ato’a tā rātou e hōro’a mai, ’a pāpa’i i te hō’ē faraoa ’e ’aore rā, te hō’ē i’a i ni’a i te tāpura ’ere’ere. ’A parau i te mau tamari’i ē, ’ia rave ana’e rātou i teie mau mea, tē pe’e ra ïa rātou i te hi’ora’a tā Iesu i fa’a’ite ’a fa’a’amu ai ’oia i nā ta’ata e pae tauatini tei po’ia.

Mataio 14:22–33

E nehenehe te fa’aro’o ia Iesu Mesia e tauturu ia tātou ’eiaha ’ia mata’u.

’Ua fa’a’ite Petero i te fa’aro’o rahi i te taime ’a haere ai ’oia nā ni’a i te pape ia Iesu ra. E aha te mau ha’api’ira’a e vai ra nā te mau tamari’i i roto i teie ’ā’amu ?

Te mau ’ohipara’a e ti’a ’ia rave

• ’A fa’a’ite i te hōho’a Iesu e haere ra nā ni’a i te pape (Gospel Art Book, no. 43) ’a fa’ati’a ai ’outou i te ’ā’amu nā roto i tā ’outou iho mau parau. ’A fa’a’ohipa i te ’api ’ohipara’a nō teie hepetoma nō te tauturu i te mau tamari’i ’ia fa’ati’a fa’ahou mai i te ’ā’amu ia ’outou. E nehenehe ato’a ’outou e hōpoi mai i te hō’ē au’a pape na’ina’i ’e ’a ani i te mau tamari’i ’ia « fa’ahaere » i tō rātou manimani rima nā ni’a i te pape.

• ’A fa’a’ite i te video « E aha ’oe i mata’u ai ? » (LDS.org), ’e ’a ani i te mau tamari’i ’ia hi’o maita’i i te mea tei fa’atupu i te mata’u i roto ia Petero. I muri iho, ’a parau ia rātou nō ni’a i te mau taime ’a mata’u ai rātou ’e ’ia fa’a’ite mai i te mea tei tauturu ia rātou. ’A tauturu ia rātou ’ia ’ite ē, e tauturu te fa’aro’o ia Iesu Mesia ia tātou ’ia upo’oti’a i ni’a i te mata’u.

Ha’api’i i te ha’api’ira’a tumu

Te mau tamari’i pa’ari a’e

Ioane 5:17–47

Tē ha’api’i mai nei Iesu Mesia ia tātou nō ni’a i te Metua i te Ao ra.

Nāfea te mau ha’api’ira’a a Iesu nō ni’a i tōna Metua e nehenehe ai e tauturu i te mau tamari’i ’ia ha’api’i mai nō ni’a i te Metua i te Ao ra ?

Te mau ’ohipara’a e ti’a ’ia rave

• ’A hāmani e piti ’āpapara’a tāreta ’aifāito ma te pāpa’ihia i ni’a iho te mau parau tā Iesu i fa’a’ohipa nō te ha’api’i nō ni’a i te Metua i te Ao ra i roto i te Ioane 5, mai te here, te ora, ’e te mau ’ohipa (’a hi’o Ioane 5:20, 26, 36). ’A pānaho i te mau tāreta ma te huri te ni’ara’a i raro, ’e ’a ani i te mau tamari’i ’ia ’imi i te mau tāreta ’aifāito nā roto i te hurira’a e piti tāreta i te taime hō’ē. ’Ia ’ite-ana’e-hia nā tāreta ’aifāito, ’a tai’o i te ’īrava tei roto i reira te ta’o, ’e ’a ani i te mau tamari’i e aha tā te ta’o e ha’api’i mai nei ia tātou nō ni’a i te Metua i te Ao ra.

• ’A ani i te mau tamari’i ’ia tai’o Ioane 5:30, ’e i muri iho, ’ia fa’a’ī i teie pereota : « ’Aita ho’i au i ’imi i tō’u iho hina’aro, o te hina’aro rā… » E mea nāfea te Mesia i te ha’apa’ora’a i te hina’aro o tōna Metua i te Ao ra ? Nāfea e ti’a ai ia tātou ’ia ha’apa’o i te hina’aro o te Metua i te Ao ra ?

Ioane 6:5–14

E nehenehe tā tātou mau ō na’ina’i e fa’atupu i te ta’a-’ē-ra’a.

Nā te hō’ē tamaiti iti i hōro’a mai i te faraoa ’e te i’a tā Iesu i fa’a’ohipa nō te fa’a’amu i te pae tauatini. Nāfea e ti’a ai ia ’outou ’ia tauturu i te mau tamari’i tā ’outou e ha’api’i ra ’ia hi’o, e nāfea e ti’a ai ia rātou ’ia tauturu i te ’ohipa a te Fatu ?

Te mau ’ohipara’a e ti’a ’ia rave

• ’A ’ōpere i te tahi mau faraoa nā te mau tamari’i. ’A tauturu ia rātou ’ia feruri e aha te rahi o te pae tauatini ta’ata. E aha te huru ’ia fa’a’amu i terā rahira’a ta’ata i nā faraoa e pae ana’e ’e nā i’a e piti ?

• ’A ani i te hō’ē tamari’i ’ia fa’ati’a mai i te ’ā’amu o te fa’a’amura’a i te pae tauatini nā roto i tāna iho mau parau. Nāfea tātou e nehenehe ai ’ia riro mai te tamaiti iti i roto i te Ioane 6:9 ? ’A ani i te mau tamari’i ’ia pāpa’i i te hōho’a o te faraoa ’e te i’a i ni’a i te ’api parau ’e ’a pāpa’i i ni’a iho i te tahi mau mea e nehenehe tā rātou e hōro’a i te Fatu nō te tauturu i tāna ’ohipa.

• ’A hōro’a i te mau tamari’i i te hō’ē puzzle na’ina’i nō te fa’a’ī. E aha te tupu mai te mea ē, ’ua mo’e te hō’ē o te mau tuha’a o te puzzle ? ’A fa’ata’a ē, e au tātou tāta’itahi mai te hō’ē tuha’a o te puzzle—tē vai ra tā tātou pā’āto’a hō’ē mea faufa’a roa nō te tauturu i te orara’a ’o vetahi ’ē. Nāfea te mau tamari’i i te tauturu i tō rātou ’utuāfare ’e ’aore rā, tā rātou piha ha’api’ira’a ?

’Ua fa’atāmā’a Iesu i e 5 000 ta’ata maoti e pae faraoa ’e e piti i’a ’e te hō’ē semeio.

Mataio 14:22–33

E nehenehe te fa’aro’o ia Iesu Mesia e tauturu ia tātou ’eiaha ’ia mata’u.

E ’ohipa faufa’a rahi tā te fa’aro’o ’e tā te mata’u i roto i te ’ā’amu ’o Iesu ’e ’o Petero i te haerera’a nā ni’a i te miti. E aha tā te mau tamari’i e nehenehe e ha’api’i mai nō roto mai i teie ’ā’amu ?

Te mau ’ohipara’a e ti’a ’ia rave

• ’A fa’a’ite i te hōho’a i roto i te fa’anahora’a ’o teie hepetoma i roto Mai, pe’e mai—Nō te ta’ata iho ’e nō te ’utuāfare. ’A ani i te mau tamari’i ’ia ’imi i te hō’ē ’īrava i roto i te Mataio 14 o tē fa’ata’a ra i te hōho’a.

• ’A ani i te mau tamari’i ’ia ’imi i te mau tāpa’o o te fa’aro’o ’e te mau tāpa’o o te mata’u ’a tai’o ai rātou i te Mataio 14:22–33. E nehenehe ato’a tā ’outou e fa’a’ite i te video « E aha ’oe i mata’u ai ? » (LDS.org). E aha te aura’a o te parau ē, fa’aro’o ia Iesu Mesia ? Nāfea tātou ’ia mono te mata’u i te fa’aro’o ?

• ’A ani i te mau tamari’i ’ia feruri ē, tei reira rātou ’e tā rātou pata hōho’a, i te taime ’a haere ai Iesu ’e ’o Petero nā ni’a i te miti. E aha te taime tā rātou e mā’iti nō te pata i te hōho’a ’e nō te aha ? ’A parau ia rātou ’ia ’imi Mataio 14:22–33 nō te mau mana’o. ’A ani ia rātou ’ia pāpa’i i te hōho’a o te taime tā rātou i mā’iti, ’a fa’a’ite i tā rātou hōho’a, ’e ’a fa’ata’a ē, nō te aha rātou i mā’iti ai i taua taime ra.

Fa’aitoito i te ha’api’ira’a i te fare

Mai te mea ē, ’ua fa’a’ī te mau tamari’i i te ’api ’ohipara’a o teie hepetoma, ’a ani ia rātou’ ia fa’a’ohipa i te reira nō te ha’api’i i tō rātou ’utuāfare i te mau mea tā rātou i ha’api’i i teie mahana.

Ha’amaita’i i tā tātou ha’api’ira’a

’Ani ’ia fa’a’ite ’A ani i te mau tamari’i i tō rātou mau mana’o, tō rātou mau mana’o hōhonu, ’e tō rātou mau ’itera’a. E ’ite ’outou ē, e mea pinepine rātou i te fāri’i i te mau mana’o ’ōhie ’e te hōhonu.