11-17 nō Māti.

Mataio 10–12 ; Mareko 2 ; Luka 7 ; 11

« O taua Tino ’Ahuru ma Piti nei tā Iesu i fa’atono »

’A tai’o ai ’outou i te Mataio 10–12 ; Mareko 2 ; ’e Luka 7 ; 11, e fāri’i ’outou i te mau muhumuhu nō ’ō mai i te Vārua Mo’a ra o te tauturu ia ’outou ’ia fa’aineine. E nehenehe teie mau muhumuhu, ’e te Mai, pe’e mai—Nō te ta’ata iho ’e te ’utuāfare e teie fa’anahora’a, e tauturu i tā ’outou fa’aineinera’a.

Pāpa’i i tō ’outou mau mana’o

Ani ’ia fa’a’ite

’A fa’aitoito i te mau tamari’i ’ia fa’a’ite mai e mea nāfea rātou i te ha’amo’a i te mahana sābati.

Ha’api’i i te ha’api’ira’a tumu

Te mau tamari’i ’āpī a’e

Mataio 10:1–10

’Ua pi’i Iesu ’Ahuru ma Piti ’āpōsetolo ’e ’ua hōro’a ia rātou i te mana nō te rave i tāna ’ohipa.

’Ua ’ite ānei te mau tamari’i tā ’outou e ha’api’i ra ē, tē vai nei tā tātou ’Ahuru Ma Piti ’āpōsetolo i teie mahana ? Nāfea e ti’a ai ia ’outou ’ia fa’a’ohipa i teie mau ’īrava nō te ha’api’i ia rātou nō ni’a i te faufa’a o te mau ’āpōsetolo o teie ’anotau, ’e e aha tei pi’ihia ia rātou ’ia rave ?

Te mau ’ohipara’a e ti’a ’ia rave

• ’A tātara poto noa i te Mataio 10:1–10 nā roto i te mau parau ’ōhie. (’A hi’o Te Mesia e fa’atōro’a ra i te mau ’āpōsetolo , Gospel Art Book, no. 38.) ’A fa’ata’a ē, ’ua pi’i Iesu i te mau ’āpōsetolo nō te tauturu iāna ’ia patu i tāna ’Ēkālesia.

• ’A fa’aue i te mau tamari’i ’ia tai’o i te mau ’āpōsetolo i roto i te hōho’a Te Mesia e fa’atōro’a ra i te mau ’āpōsetolo (Gospel Art Book, no. 38) ’e i roto i te hō’ē hōho’a o te Pupu nō te Tino ’Ahuru ma Piti ʼāpōsetolo o teie mahana (’a hi’o LDS.org ’e ’aore rā, te Ensign ’e ’aore rā, te Liahona) nō te hō’ē ’āmuira’a rahi. ’A fa’ata’a ē, tē vai nei tā tātou Tino ’Ahuru ma Piti ʼāpōsetolo i teie mahana, mai te ’anotau ’o Iesu ra.

• ’A huna i te mau hōho’a o te mau ’āpōsetolo o teie tau nā roto i te piha (nō te mau hōho’a, ’a hi’o i te Ensign ’e ’aore rā, te Liahona) nō te ’āmuira’a rahi i ma’iri a’e nei. ’A ani i te mau tamari’i ’ia ’imi i te mau hōho’a, ’e ’a fa’a’ite ia rātou i te tahi mau parau ri’i nō ni’a i te ’āpōsetolo tāta’itahi (’a hi’o « Fārerei i te mau Peropheta ’e te mau ’Āpōsetolo nō teie tau » i ni’a LDS.org).

• ’A ani i te hō’ē tamari’i ’ia tāpe’a i te hō’ē hōho’a ’o te Peresidenira’a Mātāmua ’e hō’ē hōho’a ’o te Pupu nō te Tino ’Ahuru ma Piti ʼĀpōsetolo. ’A ani i te tamari’i ’ia arata’i i te tahi atu mau tamari’i nā roto i te piha e tae atu i te hōho’a ’o Iesu. ’A fa’a’ite pāpū ē, e arata’i te mau peropheta ’e te mau ’āpōsetolo ia tātou ia Iesu Mesia ra.

• ’A fa’a’ite i tō ’outou ’itera’a pāpū nō ni‘a i te mau ’āpōsetolo a te Fatu.

Tē rave nei nā ’Ahuru ma Piti ʼāpōsetolo i te ’ohipa a te Fatu i teie mahana.

Mataio 11:28–30

E tauturu mai Iesu iā’u mai te mea ē, e haere mai au iāna ra.

E fāri’i te mau tamari’i i te māhanahana nā roto i te ’itera’a ē, e tauturu Iesu ia rātou i roto i tā rātou mau hōpoi’a mai te mea ē, e haere mai rātou iāna ra.

Te mau ’ohipara’a e ti’a ’ia rave

• ’A tai’o Mataio 11:28–30 ’e ’a fa’a’ite i te hōho’a o te mau pua’atoro i tā’amuhia i raro a’e i te zugo i roto i teie fa’anahora’a nō teie hepetoma i roto Mai, pe’e mai—Nō te ta’ata iho ’e te ’utuāfare. ’A fa’ata’a ē, e nehenehe te mau pua’atoro i tā’amuhia i raro a’e i te zugo e huti ’āmui e rave rahi fāito teiaha i tā rātou e huti tāta’ihō’ē. ’A fa’a’ite pāpū ē, ’ia tupu ana’e te ’oto, te pe’ape’a ’e ’aore rā, te mata’u i roto ia tātou, e nehenehe tā tātou e ’imi ia Iesu, ’e e tauturu mai ’oia ia tātou.

• ’A ani i te hō’ē tamari’i ’ia amo i te hō’ē tao’a teiaha. Mai te mea e teiaha roa, ’a pūpū atu i te tauturu. Nāhea Iesu i te tauturu ia tātou ’ia rave i te mau ’ohipa pa’ari ? ’Ua fāri’i a’ena ānei te mau tamari’i i tāna tauturu ?

Mataio 12:1–13

E nehenehe tā’u e ha’amo’a i te mahana sābati.

E aha te tahi mau rāve’a ’ārearea e ti’a ia ’outou ’ia ha’api’i i te mau tamari’i nō ni’a i te mahana sābati ’e nō te aha tātou e ha’amo’a ai i te reira ?

Te mau ’ohipara’a e ti’a ’ia rave

• ’A tai’o ha’apūai Mataio 12:10–13. ’A ani i te mau tamari’i ’ia ti’a i ni’a ’e ’ia pārahi i raro i te mau taime ato’a e parau ’outou ē, « sābati », ’e ’a fa’ahiti fa’ahou ’e ’o rātou i te pereota « e au maori i te ture ’ia hāmani maita’i i te sābati » (Mataio 12:12). E aha te aura’a o te reira i tō rātou mana’o ?

• ’A fa’a’ite i te hō’ē tārena i te mau tamari’i ’e ’a peni i te mahana sābati nō rātou. E aha tā tātou e rave i te tahi atu mau mahana o te hepetoma ? E aha tā tātou e nehenehe e rave i te sābati nō te fa’ariro ’ei mahana ta’a ’ē i te tahi atu mau mahana ? (’a hi’o Isaia 58:13–14).

• ’A ani i te mau tamari’i ’ia pāpa’i i te hōho’a o te mau mea maita’i e nehenehe tā rātou e rave i te mahana sābati (’a hi’o i te ’api ’ohipara’a o teie hepetoma).

• ’A ani i te mau tamari’i ’ia haere mai ’e te mau ’ohipa nō te tauturu ia rātou ’ia ha’amana’o i te mau rāve’a e fa’aineine tātou ia tātou nō te sābati ’a hīmene ai rātou i te hīmene ra « Samedi », Chants pour les enfants, 105.

• ’A pāpa’i hōho’a nā mata, nā tari’a, te vaha ’e nā rima i ni’a i te tāpura ’ere’ere. ’A ani i te mau tamari’i ’ia parau mai ia ’outou e aha tā teie mau tuha’a tāta’itahi o tō ’outou tino e nehenehe e rave nō te ha’amo’a i te mahana sābati.

Ha’api’i i te ha’api’ira’a tumu

Te mau tamari’i pa’ari a’e

Mataio 10:1–10; Mareko 3:13–19

E nehenehe nā ’Ahuru ma Piti ʼāpōsetolo e ha’api’i mai iā’u nō ni’a ia Iesu.

Nāhea te ha’api’ira’a nō ni’a i nā ’Ahuru ma Piti ʼāpōsetolo i te ’anotau ’o te Mesia e nehenehe ai e tauturu i te mau tamari’i ’ia hāro’aro’a maita’i a’e i te ’ohipa tā te ’Ahuru ma Piti ʼāpōsetolo e rave i teie mahana ?

Te mau ’ohipara’a e ti’a ’ia rave

• ’A fa’a’ite i te mau hōho’a ’o te mau ’āpōsetolo i te ’anotau ’o Iesu ’e i tō tātou nei ’anotau (’a hi’o Te Mesia e fa’atōro’a ra i te mau ’āpōsetolo, Gospel Art Book, no. 38, ’e te ve’a a te ’Ēkālesia nō ni’a i te ’āmuira’a rahi i ma’iri a’e nei). ’A ani i te mau tamari’i ’ia tai’o Mataio 10:1–10 ’e Mareko 3:14–15 nō te ’imi e aha tā te mau ’āpōsetolo ’ohipa e rave.

• ’A ani i te tahi mau tamari’i ’ia haere mai ma te ineine nō te fa’a’ite i te hō’ē ’ā’amu tei fa’ati’ahia e te hō’ē ’o te mau ’āpōsetolo ora. Nāhea te mau ’āpōsetolo ora i te tauturura’a ia tātou ’ia riro hau atu mai te Fa’aora te huru ?

• ’A pāpa’i i te mau i’oa o te mau ’āpōsetolo o teie tau i ni’a iho i te tahi mau tuha’a ’api parau. ’A ani i te mau tamari’i ’ia fa’atano i te i’oa o te ’āpōsetolo tāta’itahi i ni’a i tōna hōho’a (LDS.org). E nehenehe teie ’ohipara’a e ravehia e rave rahi taime.

• ’A fa’a’ite i te mau tamari’i e rave rahi hi’ora’a o te ’itera’a pāpū ’o te mau ’āpōsetolo o teie tau nō ni’a iho i te Mesia (’a hi’o i te mau parau poro’i o te ’āmuira’a i ma’iri a’e nei ’e ’aore rā, « Te Mesia ora : Te ’Itera’a Pāpū ’o te mau ’Āpōsetolo », Ensign ’e ’aore rā, Liahona, ’Ēperēra 2000, 2).

• ’A tauturu i te mau tamari’i ’ia tāmau ’ā’au ’e ’ia hāro’aro’a i te hīro’a fa’aro’o 1:6.

Mataio 11:28–30

E tauturu mai Iesu iā’u mai te mea ē, e haere au Iāna ra.

Nāhea ’outou ’ia tauturu i te mau tamari’i ’ia hāro’aro’a ē, e fa’aora te Fa’aora ia rātou i tō rātou mau tītaura’a mai te mea ē, e haere rātou iāna ra ?

Te mau ’ohipara’a e ti’a ’ia rave

• ’A ani i te mau tamari’i ’ia fa’a’ite mai i te hō’ē taime ’a ’oto ai ’e ’aore rā, ’a pe’ape’a ai rātou nō te tahi mea. ’A ani ia rātou ’ia mā’imi Mataio 11:28–30 nō te hō’ē a’ora’a o te nehenehe e tauturu ia rātou i roto i taua mau huru ra.

• ’A ani i te mau tamari’i ’ia pāpa’i i te mau hōho’a nō te mau mea tā rātou e rave nō te haere ia Iesu ra ’e ’ia ha’api’i mai nō ni’a iāna. E nehenehe te hīro’a fa’aro’o māha e hōro’a ia rātou i te mau mana’o.

Mataio 12:1–14

’Ua riro te sābati ’ei mahana ravera’a i te mau mea maita’i ’e ’ia ha’afātata atu ia tātou i te Atua.

E ha’apūaihia te mau tamari’i tā ’outou e ha’api’i ra mai te mea ē, e ha’apāpū ’outou i te mau ’ōpuara’a ’e te mau ha’amaita’ira’a o te ha’amo’ara’a i te mahana sābati.

Te mau ’ohipara’a e ti’a ’ia rave

• ’A ani i te hō’ē tamari’i ’ia ha’uti mai i te ta’ata tā te Fa’aora i fa’aora te rima (’a hi’o Mataio 12:10–13). ’E nehenehe te tahi atu tamari’i e uiui iāna nō ni’a i te reira ’ohipa.

• ’A tai’o ’āmui Mataio 12:12. E aha te tahi mau ’ohipa maita’i e nehenehe tātou e rave i te sābati ? ’A fa’aue i te mau tamari’i ’ia pāpa’i i te hōho’a ’o tō rātou mau mana’o i ni’a i te ’api ’ohipara’a o teie hepetoma, tāpūpū i te mau tuha’a, ’e ’a rave ’āmui nō te fa’ati’a fa’ahou i te hōho’a.

• ’A huna e rave rahi hōho’a o te mau ta’ata e rave nei i te mau ’ohipa e fa’a’ite ra i te here i te Metua i te Ao ra i te mahana sābati. ’A ani i te mau tamari’i ’ia ’imi i te mau hōho’a, ’e ’ia fa’a’ite, nāhea te ravera’a i te mau ’ohipa i roto i te mau hōho’a e fa’a’ite ra i tō tātou here i te Atua.

• ’A hōro’a i te tamari’i tāta’itahi i te hō’ē pūtē nō te fa’a’ī i te mau mana’o o te mau ’ōhipa maita’i e rave i te sābati. E ’ite mai rātou i te tahi mau mana’o i roto « Te ha’apa’ora’a i te mahana sābati » i roto Nō te Pūai ’o te Feiā ’Āpī, 30–31.

Fa’aitoito i te ha’api’ira’a mai i te fare

’A ani i te mau tamari’i ’ia fa’a’ite i tō rātou ’utuāfare i te mau mana’o nō te ha’amo’a i te mahana sābati.

Ha’amaita’i i tā tātou ha’api’ira’a

Fa’aitoito i te fa’aturara’a. ’A tauturu i te mau tamari’i ’ia hāro’aro’a ē, te hō’ē fāito faufa’a roa o te fa’aturara’a, ’o te ferurira’a ïa nō ni’a i te Metua i te Ao ra ’e ia Iesu Mesia. E ti’a ia ’outou ’ia fa’aha’amana’o i te mau tamari’i ’ia fa’atura nā roto i te hīmene marūra’a ’e ’aore rā, te hamu noa i te hō’ē hīmene, ’e ’aore rā, te fa’a’itera’a i te hō’ē hōho’a ’o Iesu.