Tē fa’aora nei Iesu i te ta’ata piri’o’i

Te orara’a i raro a’e i tōna pererau nā Jon McNaughton

4–10 nō Māti.

Mataio 8–9 ; Mareko 2–5

« 'Ua ora ’oe i tō ’oe fa’aro’o »

Ha’amata nā roto i te tai’ora’a i te Mataio 8–9 'e Mareko 2–5. Mai, pe’e mai—Nō te ta’ata iho 'e te ’utuāfare e nehenehe te reira e tauturu ia ’outou 'ia hāro’aro’a i teie mau pene, 'e e nehenehe teie fa’anahora’a e hōro’a mai ia ’outou i te mau mana’o e ha’api’i.

Pāpa’i i tō ’outou mau mana’o

tāpa’o nō te fa’a’itera’a

Ani ’ia fa’a’ite

’A ani i te mau tamari’i ’ia fa’a’ite mai i te hō’ē ’ā’amu nō Iesu e fa’atupu ra i te hō’ē temeio (’a hi’o i te tāpura o te mau temeio i roto te fa’anahora’a o teie hepetoma i roto Mai, pe’e mai—Nō te ta’ata iho ’e te ’utuāfare). E nehenehe ato’a ’outou e fa’a’ite i te mau hōho’a e tū’ati i te reira (’a hi’o i te Gospel Art Book, nos. 40, 41, e ’aore rā LDS.org).

tāpa’o nō te ha’api’ira’a

Ha’api’i i te ha’api’ira’a tumu

Te mau tamari’i ’āpī a’e

Mataio 8–9 ; Mareko 2 ; 5

E mana tō Iesu nō te fa’atupu i te mau temeio.

’A tai’o ai ’outou i te mau temeio fa’aorara’a a te Fa’aora, ’a feruri e aha te temeio e fa’a’ite. Nāfea e ti’a ai ia ’outou ’ia tauturu i te mau tamari’i tā ’outou e ha’api’i ra ’ia hāro’aro’a i te ’ohipa a te fa’aro’o i roto i te mau temeio tā Iesu i fa’atupu ?

Te mau ’ohipara’a e ti’a ’ia rave

• ’A fa’a’ite i te ’ā’amu ’o te ta’ata hāpepa i roto i te Mareko 2:1–12. Nō te tauturu, ’a hi’o « Pene  23 : Te ta’ata e’ita e ti’a ’ia haere », Te mau ’ā’amu o te Faufa’a ’Āpī , 57–58, ’e ’aore rā, te video e tano (LDS.org). ’A parau i te mau tamari’i ē, e’ita e ti’a i te ta’ata hāpepa ’ia haere. ’A tauturu ia rātou ’ia ’ite ē, nā te Fa’aora i fa’aora i teie ta’ata ’e i fa’a’ore i tāna hara.

• ’A ani i te mau tamari’i ’ia fa’ahua « ti’a i ni’a » rātou mai te tamāhine a Iaeiro ’a tai’o ai ’outou i te Mareko 5:22–23, 35–43. ’A tauturu ia rātou ’ia hāro’aro’a ē, ’ua rave Iesu i te mea e ti’a ai ia tātou pā’āto’a ’ia roa’a te ora mure ’ore.

• ’A tai’o Mareko 5:34. ’A tauturu i te mau tamari’i ’ia tāmau ’ā’au i te pereota « ’ua ora ’oe i tō ’oe fa’aro’o », penei a’e nā roto i te hōro’ara’a i te tamari’i tāta’itahi i te hō’ē ta’o ’e ’ia ani i te mau tamari’i ’ia fa’ahiti i tā rātou ta’o i roto i te āna’ira’a ti’a. ’Ua ’ite a’ena ānei rātou i te hō’ē ta’ata i fa’aorahia ’a ro’ohia ai rātou i te ma’i ?

• ’A ani i te mau tamari’i ’ia tāpiri i tō rātou mata ’e ’ia fa’aro’o ’a tai’o ai ’outou i te Mataio 9:27–30. ’Ia tai’o ana’e ’outou i te parau nō Iesu i te fa’aorara’a i te ta’ata matapō, ’a ani i te mau tamari’i ’ia ’ara’ara i tō rātou mata. E aha te mana’o ’o te mau tamari’i ’āhiri ē, ’ua fa’aora Iesu ia rātou ?

• ’A ani i te mau tamari’i ’ia paraparau mai i te hō’ē taime ’a ma’ihia ai rātou. ’A fa’ati’a i te hō’ē ’ā’amu nō Iesu i te fa’aorara’a i te ma’i, ’e ’a fa’a’ite pāpū ē, e nehenehe te mana ’o Iesu e fa’aora ’e e ha’amaita’i ia tātou mai te mea ē, e pure tātou ’e e fāri’i i te mau ha’amaita’ira’a ’autahu’ara’a. ’A fa’ata’a ē, noa atu i te tahi taime, e’ita te Fatu e hōro’a mai ia tātou i te mau temeio tā tātou e hina’aro ra, ’ua here rā ’oia ia tātou, e ’ua ’ite ’oia i tō tātou mau hina’aro. E hōro’a mai ’oia ia tātou i te tāmāhanahana tā tātou e hina’aro.

Mareko 4:35–41

’Ia ri’ari’a ana’e au ’e ’aore rā, ’ia fifi ana’e, e nehenehe Iesu e tauturu mai iā’u ’ia vai hau noa.

E nehenehe te ’ā’amu ’o Iesu i te tāmarūra’a i te vero e tauturu i te mau tamari’i ’ia ’ite ē, e nehenehe ’oia e hōro’a ia rātou i te hau ’ia ri’ari’a ana’e rātou.

Te mau ’ohipara’a e ti’a ’ia rave

• ’A tauturu i te mau tamari’i ’ia feruri ē, tei ni’a rātou i te poti ’a tai’o ai ’outou i te Mareko 4:35–41. (’A hi’o ato’a « Pene 21 : ’Ua ’avau Iesu i te mata’i ’e te ’are », Te mau ’ā’amu o te Faufa’a ’Āpī, 53, ’e ’aore rā, te video e tano LDS.org.) A ani i te mau tamari’i ’ia fa’ata’a mai e aha tō rātou huru ’āhiri ē, te reira rātou. E aha te taime te mau tamari’i i te ri’ari’a’ra’a ? E mea nāfea te roara’a ia rātou te tāmāhanahana?

• ’A ani i te mau tamari’i ’ia fa’ata’i i te hāruru o te vero ’e ’ia fa’aea ’ia parau ana’e te hō’ē ta’ata ē, « ’a fa’aea, ’a mania ». ’A fa’a’ite pāpū ē, mai ia Iesu e nehenehe e hōpoi mai ia tātou i te hau ’ia tupu ana’e te vero i rāpae, e nehenehe ato’a tāna e hōpoi mai i te hau i tō tātou māfatu ’ia pe’ape’a ana’e tō tātou mana’o.

• ’A feruri i te mau ’ohipa nō te ’āpe’e i te ’īrava toru o te « Raconte moi les histoire de Jesus » Chants pour les enfants, 36.

Te Mesia i te tāmarūra’a i te vero

Te Mesia i te tāmarūra’a i te vero, nā Robert T. Barrett

tāpa’o nō te ha’api’ira’a

Ha’api’i i te ha’api’ira’a tumu

Te mau tamari’i pa’ari a’e

Mareko 2 ; 5

E nehenehe Iesu e fa’atupu i te mau temeio i roto i tō’u orara’a mai te mea ē, e fa’aro’o tō’u iāna.

’Ua fa’atupu Iesu e rave rahi temeio i tōna ’anotau i te tāhuti nei. Nāfea e ti’a ai ia ’outou ’ia tauturu i te mau tamari’i ’ia ’ite ē, tē tupu nei te mau temeio i teie mahana ?

Te mau ’ohipara’a e ti’a ’ia rave

• ’A ani i te mau tamari’i ’ia rave i te hō’ē o teie mau temeio nō te tai’o e nō te pāpa’i i te hōho’a : Mareko 2:1–12 ; Mareko 5:22–23, 35–43 ; ’e ’aore rā Mareko 5:24–34. ’A ani i te mau tamari’i ’ia fa’ata’a i tā rātou mau hōho’a i te piha ha’api’ira’a. E aha tā rātou e ha’api’i nō ni’a ia Iesu mai roto mai i teie mau ’ā’amu ?

• ’A ani i te mau tamari’i ’ia ha’uti mai i tō rātou huru ’ia ma’i-ana’e-hia rātou, ’ia ’oto, ’ia ri’ari’a, ’e ’aore rā, ’ia ha’ape’ape’a. Nāfea e ti’a ai ia Iesu ’ia tauturu ia tātou ’ia tupu ana’e teie mau huru i ni’a ia tātou ? ’A fa’a’ite pāpū ē, e nehenehe Iesu e tauturu i te mau tamari’i i roto i teie mau huru ato’a.

• ’A ani i te mau tamari’i ’ia fa’a’ite mai i te mau ’itera’a nō ni’a ia rātou ’e ’aore rā, nō ni’a i te hō’ē ta’ata tā rātou i ’ite, ’a fāri’i ai rātou i te hō’ē ha’amaita’ira’a autahu’ara’a. E mea nāfea te reira ta’ata i te orara’a ’e ’aore rā, i te ha’amaita’ira’ahia ?

Mataio 8–9 ; Mareko 2 ; 5

E ti’a iā’u ’ia fa’a’ite i te here nō vetahi ’ē mai tā Iesu i nā reira ?

’Ua fa’a’ite Iesu i te here rahi nā roto i te fa’aorara’a i tei ma’ihia ’e tei pe’ape’a. ’A feruri nāfea e ti’a ai ia ’outou ’ia ha’api’i i te mau tamari’i ’ia fa’a’ite i te aroha i te ta’ata i roto i te nava’i ’ore.

Te mau ’ohipara’a e ti’a ’ia rave

• ’A mā’iti hō’ē temeio a Iesu ’e ’aore rā, hau atu, nō te hi’o ’e te mau tamari’i, mai te mau temeio i roto i te Mareko 2:1–12 ; Mareko 5:22–23, 35–43 ; ’e ’aore rā Mareko 5:24–34. (’A hi’o ato’a i te mau video « Ua fa’a’ore Iesu i te mau hara ’e ’ua fa’aora i te hāpepa », « ’Ua fa’ati’a Iesu i te tamāhine ’a Iaero », ’e « ’Ua fa’aora Iesu i te hō’ē vahine fa’aro’o » i ni’a LDS.org.) ’A ani i te mau tamari’i ’ia fa’a’ite mai i te hō’ē taime ’a tauturu ai rātou i te hō’ē ta’ata e fifi tōna, ’e e’aha tō rātou mana’o.

• ’A fa’a’ite i te video « Gordon Hinckley : Te mau ha’api’ira’a tā’u i ’apo mai i tō’u tamari’ira’a » ’e ’aore rā, « Te pereue »LDS.org). E mea nāfea te mau tamāroa i roto i te mau video i te pe’era’a i te hi’ora’a ’o Iesu ? ’A ani i te mau tamari’i ’ia fa’a’ite mai i te tahi atu mau huru ’a topa ai te hō’ē ta’ata i roto i te hō’ē fifi. E aha te ti‘a ia tātou ’ia rave nō te tauturu ia rātou ?

• ’A fa’aha’amana’o i te mau tamari’i ē, te tauturura’a ia vetahi ’ē, tei roto te reira i tā rātou mau fafaura’a o te bāpetizora’a (’a hi’o Mosia 18:8–10 ; Alama 34:28).

Mataio 8:23–27 ; Mareko 4:35–41

’Ia ri’ari’a ana’e au ’e ’aore rā, ’ia fifi ana’e, e nehenehe Iesu e tauturu mai iā’u ’ia vai hau noa.

E ti’a i te mau tamari’i ’ia ’ite ē, e nehenehe te Fa’aora e hōro’a ia rātou i te hau ’ia fārerei ana’e rātou i te mau vero o te orara’a nei—i teienei e a muri a’e.

Te mau ’ohipara’a e ti’a ’ia rave

• ’A ani i te hō’ē o te mau tamari’i ’ia fa’a’ohipa i te Mareko 4:35–41 ’e i te hōho’a ’Ua tāmarū Iesu i te vero (Gospel Art Book, no. 40) nō te fa’ati’a i te ’ā’amu ’o Iesu i te tāmarūra’a i te vero. ’A ani i te mau tamari’i ’ia fa’ata’a mai e aha tō rātou huru ’āhiri ē, tei reira rātou.

• ’A ani i te mau tamari’i ’ia fa’a’ite mai i te mau ’itera’a i te taime ’a fāri’i ai rātou i te hau i muri a’e i te purera’a nō te ani i te tauturu. ’A fa’aha’amana’o ia rātou ē, nō ’ō mai teie hau i te Fa’aora ra.

• ’A hīmene « E mea Pūai te Vero », Te mau Hīmene, no. 52, ’e te tamari’i, ’a ani ia rātou ’ia muhumuhu i te taime a hīmene ai rātou « Fa’aea, fa’aea ».

• ’A hōro’a i te tamari’i tāta’itahi i te hō’ē ata ua papie, ’e ’a ani ia rātou ’ia pāpa’i i ni’a iho i te hō’ē tāmatara’a tā te hō’ē ta’ata e nehenehe e fāri’i. ’A tu’u pauroa i te mau ata i ni’a i te tāpura ’ere’ere, ma te tāpo’i roa i te hō’ē hōho’a o te Fa’aora. ’A ani i te hō’ē tamari’i ’ia tātara i te hō’ē o te mau ata, ’e ’ia fa’a’ite i te mau rāve’a e ti’a ia tātou ’ia tauturu i te hō’ē ta’ata tei roto i taua tāmatara’a ra ’ia ’ite te hau. ’Ia hope te mau ata ato’a i te tātarahia, ’a fa’a’ite pāpū i te mana o te Fa’aora nō te tāmarū i te mau vero i roto i tō tātou orara’a.

tāpa’o nō te ’apora’a mai

Fa’aitoito i te ha’api’ira’a mai i te fare

’A tauturu i te mau tamari’i ’ia pāpa’i ’e ’ia ha’uti i te hō’ē tāvinira’a tā rātou e rave nō te hō’ē ta’ata i teie hepetoma.

Ha’amaita’i i tā tātou ha’api’ira’a

E mea ha’uti te mau tamari’i. I te tahi taime e feruri paha ’outou ē, ’ua riro te ha’uti a te mau tamari’i ’ei ha’afifira’a i te ha’api’ira’a. Terā rā, e nehenehe ’outou e patu i ni’a i tō rātou natura ha’uti, nā roto i te anira’a ia rātou ’ia ha’uti hō’ē ’ā’amu ’e ’aore rā, ’ia rave i te mau ’ohipa e tū’ati i ni’a iho i te mau ’ohipa i roto i te hō’ē hīmene ’e ’aore rā, hō’ē pāpa’ira’a mo’a. (’A hi’o Ha’api’ira’a mai tā te Fa’aora, 25.)

’api ’ohipara’a : E nehenehe Iesu e rave i te mau temeio