« 18-24 nō Māti. Mataio 13 ; Luka 8 ;13 : ‘E tari’a tōna ’ei fa’aro’ora’a ra, e fa’aro’o ’oia’ » Mai, pe’e mai—Nō te Paraimere : Faufa’a ’Āpī 2019 (2019)
« 18-24 nō Māti. Mataio 13 ; Luka 8 ;13 », Mai, pe’e mai—Nō te Paraimere : 2019
18-24 nō Māti.
Mataio 13 ; Luka 8 ; 13
« E tari’a tōna ’ei fa’aro’ora’a ra, e fa’aro’o ’oia »
Te mau parabole e mau ’ā’amu ’ōhie ïa o te nehenehe e riro ’ei mea ’ana’anatae nō te mau tamari’i. E nehenehe teie fa’anahora’a ’e Mai, pe’e mai—Nō te ta’ata iho ’e te ’utuāfare e tauturu ia ’outou ’ia fa’a’ohipa i te mau parabole a te Fa’aora nō te ha’api’i i te mau tamari’i i te mau parau mau faufa’a roa.
Pāpa’i i tō ’outou mau mana’o
Ani ’ia fa’a’ite
’Āfa’i mai e rave rahi tao’a e nehenehe e tauturu i te mau tamari’i ’ia ha’amana’o i te tahi mau parabole i roto i te Mataio 13, mai te hō’ē huero, hō’ē poe, ’e ’aore rā, hō’ē ’āfata fa’ari’i pirū. ’A ani i te mau tamari’i ’ia fa’a’ite mai i te mau mea tā rātou e ha’amana’o ra nō ni’a i te mau parabole.
Ha’api’i i te ha’api’ira’a tumu
Te mau tamari’i ’āpī a’e
Tītauhia ’ia vai ineine au nō te ha’api’i mai i te mau ha’api’ira’a a Iesu.
Penei a’e ’e’ita te mau tamari’i ’āpī a’e e hāro’aro’a i te mau tāpa’o ato’a i roto i te parabole o te ta’ata ueue huero, terā rā, e nehenehe tā rātou e ha’api’i mai i te mau parau mau ’ōhie o te ’evanelia e ha’api’ihia ra. Nāfea e ti’a ai ia ’outou ’ia tauturu maita’i a’e ia rātou ’ia hāro’aro’a i te tū’atira’a teie parabole i ni’a ia rātou ?
Te mau ’ohipara’a e ti’a ’ia rave
-
’A fa’a’ite i te mau huru ta’a ’ē o te repo (’e ’aore rā, te mau hōho’a nō te repo) ’a tātara poto noa ai ’outou i te Mataio 13:3–8. ’A hōro’a i te tamari’i tāta’itahi i te hō’ē huero nō te tanu i roto i te repo. ’A ani i te mau tamari’i e aha te ti’a ia tātou ’ia rave nō te tauturu i tā tātou huero ’ia tupu. ’A fa’ata’a ē, te roa’ara’a te fa’aro’o i te Metua i te Ao ra ’e ia Iesu Mesia, ’o te hō’ē ïa rāve’a nō te tauturu i tō tātou « huero » ’itera’a pāpū ’ia tupu.
-
’A fa’a’ohipa i teie ’api ’ohipara’a o te hepetoma nō te tauturu i te mau tamari’i ’ia hāro’aro’a, e aha tā te huru repo tāta’itahi i fa’ata’ahia i roto i te Mataio 13 e ha’api’i nei nō ni’a i tō tātou ’ā’au. ’A ani i te mau tamari’i e aha te huru ’ā’au tā Iesu e hina’aro nō rātou e ti’a ai ia rātou ’ia ha’api’i mai i tāna mau ha’api’ira’a.
-
’A tai’o i te Mataio 13:9, 15, ’e ’a ani i te mau tamari’i ’ia fa’a’ite i terā e terā tuha’a ’o tō rātou tino ’ia fa’aro’o ana’e rātou ’ia fa’ahitihia te reira. Nāfea e ti’a ai ia tātou ’ia fa’a’ohipa i teie mau tuha’a o te tino nō te ha’api’i mai i te mau ha’api’ira’a a Iesu ?
Tē hina’aro nei te Metua i te Ao ra ’ia mā’iti au i te maita’i.
Tē ha’api’i nei te tahi mau parabole a Iesu ē, i te mahana hōpe’a, e fa’ata’a ’ē te Atua i te feiā parau ti’a ’ore i te feiā parau ti’a. Nāfea e ti’a ai ia ’outou ’ia fa’a’ohipa i te mau parabole nō te fa’auru i te mau tamari’i ’ia mā’iti i te maita’i ?
Te mau ’ohipara’a e ti’a ’ia rave
-
’A fa’aue i te mau tamari’i ’ia ha’uti i te parabole o te tītona ’e te tītānia (’a hi’o Mataio 13:24–30). ’A fa’ata’a ē, te tītona ’o te feiā ïa tei rave i te mau mā’itira’a maita’i, ’e te tītānia ra, (te mau huero ’ino) ’o te feiā ïa ’aita i rave i te mā’itira’a maita’i. ’Ia tae i te hō’ē mahana, e ha’aputuputu te Metua i te Ao ra i te feiā parau ti’a nō te ora i pīha’i iho iāna.
-
’A fa’ati’a i te tahi mau ’ā’amu ’ōhie nō te mau tamari’i tei rave i te mau mā’itira’a. ’A ani i te mau tamari’i ’ia parau ē, « mā’itira’a tītona » ’« ia mā’iti ana’e te mau tamari’i i roto i te ’ā’amu i te maita’i, e « mā’itira’a tītānia » ’ia rave ana’e te mau tamari’i i te hō’ē mā’itira’a ti’a ’ore.
-
’Āfa’i mai te tahi mau hōho’a nō te tumu tītona, ’e ’a fa’aue i te mau tamari’i ’ia pāpa’i i ni’a i te mau hōho’a i te tahi mau huru e ti’a ai ia rātou ’ia riro ’ei mea parau ti’a.
-
’A fa’atupu i te hō’ē ha’utira’a i reira te mau tamari’i e fa’atano ai i te mau fa’ata’ara’a nō roto mai i te parabole o te ta’ata ueue huero i ni’a i te tātarara’a i roto i te Mataio13:18–23.
E tao’a faufa’a rahi tō’u ti’ara’a melo i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei
Nāfea e ti’a ai ia ’outou ’ia fa’a’ohipa i te fa’ahōho’ara’a o te tao’a faufa’a rahi ’e te mau poe tao’a rahi nō te tauturu i te mau tamari’i ’ia hāro’aro’a i te faufa’a nō te rirora’a ’ei melo nō te ’Ēkālesia a te Mesia ?
Te mau ’ohipara’a e ti’a ’ia rave
-
’A huna i te mau hōho’a o te hō’ē ’āfata tao’a faufa’a rahi ’e te hō’ē poe i roto i te piha, ’e ’a fa’aue i te mau tamari’i ’ia ’imi i te reira. ’A fa’a’ohipa i te mau hōho’a nō te tauturu ia ’outou ’ia ha’api’i i te parabole i roto i te Mataio 13:44–46. E aha tā te mau tamari’i e hōro’a nō te fāri’i i te hō’ē poe nehenehe ’e ’aore rā, i te hō’ē tao’a faufa’a rahi i roto i te fa’a’apu ? ’A fa’ata’a ē, i te tahi taime e fa’aru’e tātou i te hō’ē mea maita’i nō te hō’ē mea maita’i a‘e. ’A parau i te mau tamari’i ē, nō te aha e mea faufa’a rahi te ’evanelia nō ’outou.
-
’A tu’u i roto i te hō’ē ’āfata ’e ’aore rā, i te hō’ē ’āfata vaira’a pirū e rave rahi tao’a ’e ’aore rā, hōho’a, ’ei fa’ahōho’ara’a i « te mau tao’a faufa’a rahi » i roto i te Te ’Ēkālesia a Iesu Mesia i te Feiā Mo’a i te Mau Mahāna Hōpe’a Nei, mai te mau hiero ’e ’aore rā, te Buka a Moromona. ’A ani i te tamari’i tāta’itahi ’ia mā’iti i te hō’ē tao’a ’e ’aore rā, hō’ē hōho’a, ’e ’ia parau mai, nō te aha e tao’a faufa’a rahi.
-
’A hīmene ’āmui « L’église de Jésus Christ », Chants pour les enfants, 48, ’e ’a ani i te mau tamari’i ’ia fa’aro’o i te mau ha’amaita’ira’a e tae mai nā roto i te rirora’a ’ei melo nō te ’Ēkālesia. ’A fa’a’ite pāpū i te mau ha’amaita’ira’a tā ’outou i fāri’i nō tō ’outou rirora’a ’ei melo nō te ’Ēkālesia.
Ha’api’i i te ha’api’ira’a tumu
Te mau tamari’i pa’ari a’e
Tītauhia iā’u ’ia fa’aineine i tō’u ’ā’au nō te fāri’i i te mau ha’api’ira’a a Iesu.
Nāfea e ti’a ai ia ’outou ’ia tauturu i te mau tamari’i ’ia ’ite i te faufa’a ’ia fāri’i i te hō’ē ’ā’au marū ’e te hina’aro mau, ’ia nehenehe Iesu e ha’api’i ia rātou ?
Te mau ’ohipara’a e ti’a ’ia rave
-
’A fa’aue i te tamari’i tāta’itahi ’ia tai’o hō’ē o nā huru repo e māha i roto i te Mataio 13:4–8. ’A ani ia rātou ’ia ’imi ’e ’ia fa’a’ite mai i te mea tei tupu i ni’a i te huero i roto i te huru repo tā rātou i tāi’o. Nāfea tō tātou ’ā’au e riro ai mai te mau huru repo ta’a ’ē te tahi ’e te tahi ? (’a hi’o Mataio 13:19–23).
-
’A hōro’a e piti huero i te tamari’i tāta’itahi, ’e ’a ani ia rātou ’ia tanu i tā rātou huero i roto i te repo marū ’e i roto i te hō’ē ’āpapara’a ’ōfa’i. E aha te huero pāpū a’e e tupu mai ? Nāfea e ti’a ai ia tātou ’ia ha’apāpū ē, e au tō tātou ’ā’au mai te repo marū i reira ho’i e ti’a ai ia tātou ’ia fāri’i i te mau ha’api’ira’a a te Fa’aora ?
-
’A ani i te mau tamari’i ’ia tai’o i te Mataio 13:9–17. ’A pāpa’i i te hō’ē mata, hō’ē tari’a ’e hō’ē ’ā’au i ni’a i te tāpura ’ere’ere. Nāfea e ti’a ai ia tātou ’ia fa’a’ohipa i teie mau tuha’a o te tino nō te ha’api’i mai i te mau ha’api’ira’a a Iesu ?
E nehenehe tā’u e mā’iti i te parau ti’a noa atu ē, ’aita te mau ta’ata ’ati a’e iā’u e nā reira ra.
’Ia tai’o ana’e ’outou i teie mau ’īrava ma te feruri i te mau tamari’i, e aha te mau mana’o e tupu mai i roto ia outou ?
Te mau ’ohipara’a e ti’a ’ia rave
-
’A ani i te mau tamari’i ’ia pāpa’i i te hōho’a o te mau ’ohipa rau i tupu i roto i te parabole o te tītona ’e te tītānia, e ’itehia i roto i te Mataio 13:24–30, ’e ’ia fa’a’ite mai i tā rātou hōho’a i te piha ha’api’ira’a. ’A ani ia rātou ’ia tāmau i te hō’ē tīteti i ni’a i tā rātou hōho’a ma te fa’a’ohipa i te tātarara’a o te parabole e ’itehia i roto i te Mataio 13:36–43. ’A fa’ata’a ē, e mau huero ’ino te tītānia.
-
Mai te mea ē, e nehenehe, ’a fa’a’ite i te hō’ē hōho’a o te tītona ’e o te tītānia. ’A fa’ata’a ē, e tupu ’āpipiti noa te tītona ’e te tītānia e hope noa atu te ao nei. Tē ha’api’i mai nei teie ia tātou ē, tē ora nei tātou ma te ha’atihia i te maita’i ’e te ’ino, ’e e ti’a ia tātou ’ia ha’apa’o maita’i nō te mā’iti i te parau ti’a. ’A ani i te mau tamari’i ’ia fa’a’ite mai e nāfea e ti’a ai ia rātou ’ia parau i te ta’a-’ē-ra’a i rotopū i te maita’i ’e te ’ino.
E tao’a faufa’a rahi tō’u ti’ara’a melo i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei.
Te ’ite ra ānei te mau tamari’i tā ’outou e ha’api’i ra i tō rātou ti’ara’a melo i roto i te ’Ēkālesia mai te hō’ē tāo’a faufa’a rahi ? Penei a’e e tauturu paha te mau parabole i roto i te Mataio 13:44–46 ia rātou.
Te mau ’ohipara’a e ti’a ’ia rave
-
’A ani i te mau tamari’i ’ia tai’o i te Mataio 13:44–46 nō rātou iho ’e ’ia fa’a’ite i te mau parabole nā roto i tā rātou iho mau parau i te tahi atu melo o te piha ha’api’ira’a.
-
’A tāpupu e rave rahi menemene ’ei fa’ahōho’ara’a i te toata, ’e ’a tu’u i te reira i roto i te hō’ē ’āfata pirū. ’A ani i te mau tamari’i ’ia rave hō’ē toata ’e ’ia pāpa’i i te hōho’a ’e ’aore rā, ’ia pāpa’i i ni’a iho, i te hō’ē mea tā rātou e au nō ni’a i te rirora’a ’ei melo nō te ’Ēkālesia. ’A ani i te mau tamari’i ’ia fa’a’ite e aha tā rātou i tu’u i ni’a i tā rātou toata.
-
’A ani i te hō’ē melo o te paroisa ’ia fa’a’ite mai i tōna ’ā’amu fa’afāriura’a i mua i te mau tamari’i, ’e ’ia parau e aha tāna i fa’atusia nō te tomo mai i roto i Te ’Ēkālesia a Iesu Mesia i te Feiā Mo’a i te Mau Mahāna Hōpe’a Nei;
Fa’aitoito i te ha’api’ira’a i te fare
’A ani i te mau tamari’i ’ia ha’api’i i tō rātou ’utuāfare nō ni’a i te hō’ē o te mau parabole tā rātou i ha’api’i mai i roto i te Paraimere.
Ha’amaita’i i tā tātou ha’api’ira’a
E mea au nā te mau tamari’i ’ia fa’a’ite i te mea tā rātou i ha’api’i mai. Noa atu ē, e mea ’āpī rātou, e nehenehe te mau tamari’i e ha’apūai i te mau melo ’o tō rātou ’utuāfare. ’A fa’aitoito ia rātou ’ia fa’a’ite i tō rātou ’utuāfare i te mau mea tā rātou i ha’api’i mai i roto i te Paraimere. (’A hi’o Ha’api’ira’a mai tā te Fa’aora, 30.)