« 18–24 nō māti. Mataio 13 ; Luka 8 ; 13 : ‘E tari’a tōna ’ei fa’aro’ora’a ra, e fa’aro’o ’oia’ » Mai, pe’e mai—nō te ta’ata hō’ē ’e te ’utuāfare : Faufa’a ’Āpī 2019 (2019)
« 18–24 nō māti. Mataio 13 ; Luka 8 ; 13 », Mai, pe’e mai—nō te ta’ata hō’ē ’e te ’utuāfare : 2019
18–24 nō māti
Mataio 13 ; Luka 8 ; 13
« E tari’a tōna ’ei fa’aro’ora’a ra, e fa’aro’o ’oia »
’A tai’o ai ’outou i te Mataio 13 ’e te Luka 8 ; 13, ’a feruri i ni’a i te huru ’outou e fa’aineine ai nō te « fa’aro’o » ’e nō te au i te mau ha’api’ira’a a te Fa’aora i roto i teie mau parabole. E aha tā ’outou e rave nō te fa’a’ohipa i teie mau ha’api’ira’a i roto i tō ’outou orara’a ?
Tāpa’opa’o i te mau mana’o e tae mai ia ’outou
Te tahi o te mau ha’api’ira’a a te Fa’aora e’ita roa e mo’e, ’o terā ïa tei hōro’ahia ’ei ’ā’amu, ’o tei parauhia te mau parabole. ’Ua hau atu te reira i te ’ā’amu iti ’ana’anatae nō ni’a i te tahi tao’a ’aore rā te tahi ’ohipa i tupu. E mau parau mau hōhonu i roto nō ni’a i te bāsileia o te Atua, nō te feiā tei ineine i te pae vārua. Tē ani nei hō’ē o te mau parabole mātāmua i roto i te Faufa’a ’āpī—te parabole nō te ueue huero (hi’o Mataio 13:3–23)—’ia hi’opo’a tātou i tō tātou ineinera’a e fāri’i i te parau a te Atua. ’Ua parau Iesu : « Inaha te ta’ata ato’a e fāri’i, e hōro’ahia atu ā tāna ē ’ia rahi » (’Īritira’a a Iosepha Semita, Mataio 13:10). Nō reira, ’a fa’aineine ai tātou nō te tuatāpapa i te mau parabole a te Fa’aora—’aore rā te tahi noa atu o tāna mau ha’api’ira’a—te vāhi maita’i e ha’amata, ’o te hi’opo’ara’a ïa i tō tātou ’ā’au ’e te fa’aotira’a ē, e hōro’a ānei tātou i te parau a te Atua « te vāhi repo maita’i » ’ia tupu te reira, ’ia ’ūa’a, ’ia ’una’una ’e ’ia hotu mai te mā’a e ha’amaita’i ia tātou ’e i tō tātou ’utuāfare ē ’ia rahi (Mataio 13:8).
Mau mana’o nō tā ’oe iho tuatāpapara’a pāpa’ira’a mo’a
E aha te « bāsileia o te ao » tā te Mesia e fa’ahiti ra i roto i te Mataio 13 ?
I roto i teie pene, te « bāsileia o te ao », ’o te ’Ēkālesia mau ïa a te Mesia, ’o te bāsileia o te ao i ni’a i te fenua nei.
’Ia fa’aineinehia tō’u ’ā’au nō te fāri’i i te parau a te Atua e ti’a ai.
Nō te aha tē vai ra te mau ’ā’au e fāri’i i te parau mau, ’e tē vai ra, mai te huru ē, tē pāto’i ra i te reira ? Nā te tai’ora’a i te parabole nō te ueue huero e nehenehe e fa’afāna’o i te taime tano nō te feruri i ni’a i te huru ’oe e fāri’i nei i te parau mau nō ’ō mai i te Fatu. Penei a’e e tauturu a’e ’ia fa’atū’ati nā mua i te mau ’īrava 3–8 o te Mataio 13 i te tātarara’a i roto i te mau ’īrava 18–23. E aha tā ’oe e nehenehe e rave nō te aupuru noa i « te vāhi repo maita’i » i roto ia ’oe ? E aha te tahi mau « ’aihere » e ha’afifi nei ia ’oe ’ia fa’aro’o maita’i ’e ’ia pe’e maita’i i te parau a te Atua ?
Hi’o ato’a Luka 13:34 ; Mosia 2:9 ; 3:19 ; Alama 12:10–11 ; 32:28–43 ; Dallin H. Oaks, « Te parabole nō te ueue huero », Ensign ’aore rā Liahona, Mē 2015, 32–35.
Tē tauturu nei te mau parabole a Iesu ’ia māramarama vau i te tupura’a ’e te hope’ara’a o tāna ’Ēkālesia.
’Ua ha’api’i te peropheta Iosepha Semita ē, tē fa’ata’a nei te mau parabole i roto i te Mataio 13 i te tupura’a ’e te hope’ara’a o te ’Ēkālesia i roto i te mau mahana hope’a (hi’o Teachings of Presidents of the Church: Joseph Smith [2007], 335–348). ’Ia tai’o ’oe i te mau parabole, ’a pāpa’i i tā te reira e ha’api’i nei ia ’oe nō ni’a i te ’Ēkālesia a te Fatu (e haere ato’a paha e hi’o i tā te peropheta Iosepha i ha’api’i nō ni’a i te tahi o teie mau parabole) :
-
Te sītona ’e te zizania (13:24–30, 36–43): E tupu ’āpipiti te feiā parau ti’a ’ore ’e te feiā parau ti’a ē tae roa atu i te hope’a o te ao nei.
-
Te huero sinapi (13:31–32):
-
Te fa’ahopue (13:33):
-
Te tao’a mo’e ’e te poe tao’a rahi (13:44–46):
-
Te ’ūpe’a (13:47–50):
-
Te ta’ata ’utuāfare (13:52):
I muri mai i te feruri-maita’i-ra’a i ni’a i teie mau parabole, e aha tei fa’auruhia ia ’oe ’ia rave nō te ’āmui hope fa’ahou atu i roto i te ’ohipa a te ’Ēkālesia a te Mesia i teie mau mahana hope’a nei ? E aha te mau uira’a e tae mai nei i tō ’outou ferurira’a ’o te nehenehe e tauturu ia ’oe ’ia fa’a’ohipa i teie mau parabole ? ’Ei hi’ora’a, « E aha te mea ’ua ineine au i te fa’atusia nō te ’Ēkālesia ? »
’Ua riro te ’evanelia a Iesu Mesia ’ei « poe [tao’a rahi] » (Mataio 13:46).
’Ia tupu te feiā parau ti’a i rotopū i te feiā parau ti’a ’ore e ti’a ai ē tae noa atu i te hope’a o te ao nei.
Hō’e rāve’a nō te tāta’a (analyser) i teie parabole, ’o te pāpa’ira’a ïa i te hōho’a nō te reira ma te ’āpiti i te mau parau fa’ata’ara’a e vai ra i roto i te Mataio 13:36–43 ’e Te Parau Ha’api’ira’a ’e te mau Parau Fafau 86:1–7. Te zizania, e « ’aihere ta’ero ïa, e hōho’a ’oia i te sītona maori rā i te hotura’a tōna mā’a » (Bible Dictionary, « Tares »). E aha te mau parau mau i roto i teie parabole e fa’auru nei ia ’oe ’ia vai ha’apa’o maita’i noa noa atu ā te ’ohipa parau ti’a ’ore i roto i te ao nei ?
Nāhea « to’ofanu vahine » i te tāvinira’a i te Fa’aora ?
« E mau pipi vahine tei tere nā muri ia Iesu ’e te Tino ’Ahuru ma Piti, ma te ha’api’i mai i te pae varua nā roto mai [ia Iesu], ’e ma te tāvini iāna i te pae tino… Ta’a ’ē noa atu i te fāri’ira’a i te utuutura’a a Iesu, te parau oaoa nō tāna ’evanelia ’e te mau ha’amaita’ira’a nō tōna mana fa’aora ’ua utuutu teie mau vahine iāna, ma te hōro’a atu i tā rātou tao’a ’e tō rātou fa’aro’o » (E Mau Tamāhine i roto i Tō’u Bāsileia [2011], 4–5). Taua mau vāhine ra tei pe’e i te Fa’aora, ’ua hōro’a ato’a rātou i te ’itera’a pāpū pūai nōna (hi’o Linda K. Burton, « Te mau vahine pāpū », Ensign ’aore rā Liahona, Mē 2017, 12–15).
Mau mana’o nō tā te ’utuāfare tuatāpapara’a pāpa’ira’a mo’a ’e nō te purera’a pō ’utuāfare
’Ia tuatāpapa ’outou te ’utuāfare i te mau ha’api’ira’a a te Fa’aora, e nehenehe te Vārua e tauturu mai ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o :
’A tai’o noa ai te mau melo o te ’utuāfare i te mau parabole a te Fa’aora, penei a’e e au mai rātou ’ia feruri i tā rātou iho mau parabole e ha’api’i i teie mau parau mau nō ni’a i te bāsileia o te ao (te ’Ēkālesia), ma te fa’a’ohipa i te tahi mau tao’a ’aore rā mau hi’ora’a ’ua mātau maita’i rātou.
E aha tā tātou te ’utuāfare e nehenehe e rave nō te ha’aputu noa i te « repo maita’i » i roto i tō tātou ’ā’au ’e i tō tātou fare ? (Mataio 13:23). Mai te peu e tamari’i ri’i i roto i te ’utuāfare, penei a’e e mea au ’ia ani i te mau melo o te ’utuāfare ’ia ha’uti ta’ata ora i te tahi mau rāve’a nō te fa’aineine i tō tātou ’ā’au ’ia fa’aro’o i te parau a te Atua ’e nā te hō’ē pae o te ’utuāfare e feruri e aha tē fa’a’itehia mai ra.
Nāhea tā ’outou e nehenehe e tauturu i te mau melo o tō ’outou ’utuāfare ’ia māramarama i te faufa’a rahi nō te fāri’i ma te ’ā’au tae i te parau a te Mesia ? ’Ei hi’ora’a, e nehenehe e tāpiri i te tari’a o te hō’ē melo o te ’utuāfare ’a tai’o hau noa ai ’outou i te Mataio 13:13–16. E aha tā teie melo o te ’utuāfare i māramarama i roto i te mau ’īrava ? E aha te ’ohipa a tō tātou mata, tō tātou tari’a ’e tō tātou ’ā’au i roto i te fāri’ira’a i te parau a te Atua ? E aha te tahi mau mea tā tātou e rave, mai te huru tē tāpiri ra tātou i tō tātou mata, tō tātou tari’a ’e tō tātou ’ā’au i te parau a te Atua ?
E aha te tū’atira’a e vai ra i roto i teie nā ta’ata i roto i teie mau parabole ? Tē vai ra ānei te tahi mau mea e ti’a ’ia rave ’ei ta’ata hō’ē ’e ’ei ’utuāfare e tu’u ai i te bāsileia o te Atua i mua roa i roto i tō tātou orara’a ?
Nāhea tā tātou e nehenehe e pe’e i te hi’ora’a o te Fa’aora ’e e fa’aora i te ta’ata i te tītīra’a ?
Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a o teie hepetoma i roto Mai, pe’e mai—nō te Paraimere.
Ha’amaita’i i tā tātou hōro’ara’a i te ha’api’ira’a
Tāmau ’ā’au i te hō’ē ’īrava. E mā’iti i te hō’ē tuha’a ’īrava faufa’a ta’a ’ē nō te ’utuāfare, ’e e ani i te mau melo o te ’utuāfare ’ia tāmau ’ā’au i te reira. ’Ua ha’api’i Elder Richard G. Scott : « E riro mai te hō’ē pāpa’ira’a mo’a tāmau-’ā’au-hia ’ei hoa tāmau ’aore e mōrohi i roto i te roara’a o te tau » (« Te mana o te pāpa’ira’a mo’a », Ensign ’aore rā Liahona, Nov. 2011, 6).
Parable of the Sower, nā George Soper