« ថ្ងៃទី ២៩ ខែមេសា–ថ្ងៃទី ៥ ខែឧសភា ។ យ៉ូហាន ៧–១០ ៖ ‹ ខ្ញុំជាអ្នកគង្វាលល្អ › »ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ព្រះគម្ពីរសញ្ញាថ្មី ឆ្នាំ ២០១៩( ឆ្នាំ ២០១៩ )
« ថ្ងៃទី ២៩ ខែមេសា–ថ្ងៃទី ៥ ខែឧសភា ។ យ៉ូហាន ៧–១០ »ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០១៩
អ្នកណាដែលគ្មានបាបសោះ, ដោយ លីស លេម៉ុន ស្វិនដល
ថ្ងៃទី ២៩ ខែមេសា–ថ្ងៃទី ៥ ខែឧសភា ។
យ៉ូហាន ៧–១០
« ខ្ញុំជាអ្នកគង្វាលល្អ »
នៅពេលអ្នកអាន យ៉ូហាន ៧–១០, អ្នកអាចទទួលបានចំណាប់អារម្មណ៍មកពីព្រះវិញ្ញាណបរិសុទ្ធអំពីគោលការណ៍ខាងគោលលទ្ធិនៅក្នុងជំពូកទាំងនេះ ។ ការកត់ត្រាចំណាប់អារម្មណ៍របស់អ្នកអាចជួយអ្នកឲ្យធ្វើផែនការមួយដើម្បីធ្វើសកម្មភាពទៅលើវា ។
កត់ត្រាចំណាប់អារម្មណ៍របស់អ្នក
ថ្វីដ្បិតតែព្រះយេស៊ូវគ្រីស្ទយាងមកដើម្បីនាំឲ្យមាន «សេចក្តីសុខសាន្ត [និង] ដែលជាទីគាប់ព្រះហឫទ័យដល់ទ្រង់ » ក្ដី ( លូកា ២:១៤ ),ក៏មាន « ការបាក់បែកទាស់គ្នា ដោយព្រោះទ្រង់ » ( យ៉ូហាន ៧:៤៣ ) ។ មនុស្សដែលបានធ្វើជាសាក្សីក្នុងព្រឹត្តការណ៍ដូចគ្នា បានមាននូវការសន្និដ្ឋានខុសគ្នាទាំងស្រុងអំពីព្រះយេស៊ូវគ្រីស្ទជានរណា ។ អ្នកខ្លះសន្និដ្ឋានថា « លោកជាមនុស្សល្អ » ខណៈដែលអ្នកឯទៀតនិយាយថា « អ្នកនោះជាអ្នកបញ្ឆោតប្រជាជន » ( យ៉ូហាន ៧:១២ ) ។ ពេលទ្រង់ព្យាបាលដល់បុរសខ្វាក់ភ្នែកម្នាក់នៅថ្ងៃឈប់សម្រាក មានមនុស្សខ្លះបានទទូចថា « មនុស្សនោះមិនមែនមកពីព្រះទេ ព្រោះមិនកាន់ថ្ងៃឈប់សម្រាកសោះ » ខណៈដែលអ្នកឯទៀត បានសួរថា « ធ្វើដូចម្តេចឲ្យមនុស្សមានបាបអាចធ្វើទីសម្គាល់យ៉ាងនេះបាន ? » ( យ៉ូហាន ៩:១៦ ) ។ ប៉ុន្ដែដាច់ដោយឡែកពីការសន្និដ្ឋានអស់ទាំងនោះ មានអ្នកដែលស្វែងរកសេចក្ដីពិតបានទទួលស្គាល់ព្រះចេស្ដានៅក្នុងព្រះបន្ទូលរបស់ទ្រង់ « មិនដែលមានអ្នកណានិយាយដូចអ្នកនោះទេ » ( យ៉ូហាន ៧:៤៦ ) ។ ខណៈដែលពួកសាសន៍យូដាបានសូមព្រះយេស៊ូវឲ្យ « ប្រាប់ពួកយើង ឲ្យច្បាស់ » ថាតើទ្រង់គឺជាព្រះគ្រីស្ទឬ រួចទ្រង់បានបើកសម្ដែងគោលការណ៍មួយដែលអាចជួយយើងញែកដឹងការពិត ពីភាពខុសឆ្គងថា ៖ « ចៀមខ្ញុំទាំងប៉ុន្មានវាស្តាប់ខ្ញុំ » ទ្រង់មានព្រះបន្ទូលថា « ហើយមកតាម ខ្ញុំក៏ស្គាល់វាដែរ » ( យ៉ូហាន ១០:២៧ ) ។
គំនិតយោបល់សម្រាប់ការសិក្សាព្រះគម្ពីរផ្ទាល់ខ្លួន
នៅពេលខ្ញុំរស់នៅតាមសេចក្ដីពិតដែលព្រះយេស៊ូវគ្រីស្ទបានបង្រៀន ខ្ញុំបានដឹងថាវាគឺជាការពិត ។
ពួកសាសន៍យូដានឹកឆ្ងល់យ៉ាងអស្ចារ្យនៅពេលព្រះយេស៊ូវចេះគម្ពីរយ៉ាងច្រើន ព្រោះទ្រង់ពុំបានរៀនសូត្រសោះ ( សូមមើលខ ១៥ ) —គឺពុំបានរៀនតាមរបៀបដែលពួកគេធ្លាប់រៀន ។ នៅក្នុងការឆ្លើយតបរបស់ព្រះយេស៊ូវ ទ្រង់បានបង្រៀនពីរបៀបផ្សេងមួយអំពីការស្គាល់សេចក្ដីពិត ដែលមានចំពោះមនុស្សគ្រប់រូប ដោយពុំគិតពីការអប់រំ ឬជីវប្រវត្តិ ។ ស្របតាមយ៉ូហាន ៧:១៤–១៧តើអ្នកអាចដឹងថាគោលលទ្ធិដែលព្រះយេស៊ូវបានបង្រៀនគឺជាការពិតយ៉ាងដូចម្ដេច ? តើដំណើរការនេះបានជួយអ្នកអភិវឌ្ឍទីបន្ទាល់របស់អ្នកអំពីដំណឹងល្អយ៉ាងដូចម្ដេច ?
សេចក្តីមេត្តាករុណារបស់ព្រះអង្គសង្គ្រោះមានសម្រាប់មនុស្សគ្រប់រូប ។
នៅពេលនិយាយអំពីការប្រាស្រ័យទាក់ទងរបស់ព្រះអង្គសង្គ្រោះជាមួយនឹងស្ត្រីដែលនាំមកដោយចោទថាបានប្រព្រឹត្តសាហាយស្មន់ អែលឌើរ ឌែល ជី រិនឡាន់ បានមានប្រសាសន៍ថា ៖ « ប្រាកដណាស់ ព្រះអង្គសង្គ្រោះពុំលើកទោសដល់សេចក្តីកំផិតទេ ។ ប៉ុន្តែទ្រង់ក៏ពុំកាត់ទោសស្ត្រីនោះដែរ ។ ទ្រង់បានលើកទឹកចិត្តនាងឲ្យកែប្រែជីវិតនាងសារជាថ្មី ។ នាងមានការជំរុញចិត្តឲ្យផ្លាស់ប្តូរ ដោយសារតែក្តីអាណិតមេត្តា និងសេចក្តីមេត្តាករុណារបស់ទ្រង់ ។ ការបកប្រែរបស់យ៉ូសែប ស្ម៊ីធអំពីព្រះគម្ពីរប៊ីបបានបញ្ជាក់ពីលទ្ធផលនៃភាពជាសិស្សរបស់ស្ត្រីនោះថា ៖ ‹ ហើយស្ដ្រីនោះបានថ្វាយសិរីល្អដល់ព្រះចាប់តាំងពីគ្រានោះមក ហើយបានជឿទៅលើព្រះនាមរបស់ទ្រង់ › [ សូមមើល យ៉ូហាន ៨:១១, លេខយោង គ ] » ( « Our Good Shepherd, » Ensign ឬ លីអាហូណា ខែឧសភា ឆ្នាំ ២០១៧ ទំព័រ ៣០ ) ។
តើអ្នកមានអារម្មណ៍ដូចជាស្ត្រីរូបនោះ ថាបានទទួលសេចក្ដីមេត្តាករុណា ជំនួសឲ្យការផ្ដន្ទាទោសមកពីព្រះអង្គសង្គ្រោះនៅពេលណា ? តើអ្នកដូចជាពួកអាចារ្យ និងពួកផារិស៊ី ដែលថ្កោលទោស ឬវិនិច្ឆ័យអ្នកដទៃ ទាំងខ្លួនអ្នកមានអំពើបាបនៅពេលណាខ្លះ ? ( សូមមើល យ៉ូហាន ៨:៧ ) ។ តើអ្នកអាចរៀនអ្វីខ្លះទៀត មកពីរបៀបដែលព្រះអង្គសង្គ្រោះបានប្រាស្រ័យទាក់ទងនឹងពួកអាចារ្យ និងពួកផារិស៊ី និងស្ត្រីដែលត្រូវបាននាំមកកាន់ទ្រង់ ថាបានប្រព្រឹត្តអំពើសាហាយស្មន់នោះ ? តើអ្នកបានរៀនអ្វីខ្លះអំពីការអភ័យទោសរបស់ព្រះអង្គសង្គ្រោះ នៅពេលអ្នកអានខគម្ពីរទាំងនេះ ?
ហេតុអ្វីក៏ពួកសាសន៍យូដា អាក់អន់ចិត្ត នៅពេលព្រះយេស៊ូវបានមានបន្ទូលថា « មុនដែលលោកអ័ប្រាហាំកើតមក នោះមានខ្ញុំហើយ » ?
« ខ្ញុំ » គឺជាវាក្យសព្ទដែលព្រះយេហូវ៉ាបានប្រើដើម្បីប្រាប់អំពីព្រះអង្គទ្រង់ទៅដល់ម៉ូសេ ដូចបានកត់ត្រានៅក្នុងនិក្ខមនំ ៣:១៤។ ដូច្នេះនៅពេលព្រះយេស៊ូវបានមានបន្ទូលថា « ខ្ញុំ » នោះទ្រង់ប្រាប់អំពីព្រះអង្គទ្រង់ថាជាព្រះយេហូវ៉ា ជា ព្រះនៃព្រះគម្ពីរសញ្ញាចាស់ ។ ពួកសាសន៍យូដាបានគិតថានេះគឺជាការប្រមាថ ហើយនៅ ក្រោមច្បាប់ម៉ូសេ ត្រូវដាក់ទោសដល់ស្លាប់ដោយការចោលនឹងដុំថ្ម ។
ព្រះអាចបើកសម្ដែងព្រះអង្គទ្រង់នៅក្នុងជីវិតរបស់យើងតាមរយៈការលំបាករបស់យើង ។
ដោយសារជាញឹកញាប់លទ្ធផលអវិជ្ជមានកើតមានតាមពីក្រោយអំពើបាប នោះយើងអាចមើលថាភាពអកុសលរបស់យើងមួយចំនួនកើតមានជាលទ្ធផលមកពី ការធ្វើខុស ។ ទោះជាយ៉ាងណាក៏ដោយ ពួកសិស្សរបស់ព្រះអង្គសង្គ្រោះបានសន្មត់ថា បុរសម្នាក់ដែលបានកើតមកខ្វាក់គឺដោយសារឪពុកម្ដាយរបស់គាត់បានធ្វើបាប តែព្រះយេស៊ូវបានកែតម្រូវពួកគេ ។ តើព្រះបន្ទូលរបស់ព្រះអង្គសង្គ្រោះនៅ ក្នុងយ៉ូហាន ៩:៣បានផ្លាស់ប្ដូរទស្សនវិស័យរបស់អ្នកអំពីឧបសគ្គរបស់អ្នក និងឧបសគ្គរបស់អ្នកដទៃយ៉ាងដូចម្ដេច ? នៅពេលអ្នកអាន យ៉ូហាន ៩, ចូរពិចារណាអំពី របៀបដែល « ការរបស់ព្រះ [ បាន ] សម្ដែងមក » ( យ៉ូហាន ៩:៣ ) ។ តើកិច្ចការត្រូវបានបើកសម្ដែងមក នៅពេលអ្នកបានប្រឈមមុខនឹងឧបសគ្គយ៉ាងដូចម្ដេច ?
វាក៏គួរឲ្យចាប់អារម្មណ៍ដើម្បីកត់ចំណាំថា សំណួររបស់ពួកសិស្សនៅក្នុង យ៉ូហាន ៩:២ បានបើកសម្ដែងថា ពួកគេបានជឿទៅលើជីវិតមុនជីវិតរមែងស្លាប់ ជាគោលលទ្ធិមួយដែលត្រូវបានបាត់បង់ពីពួក គ្រីស្ទាន អំឡុងការក្បត់សាសនាដ៏ធំ ប៉ុន្តែបានស្ដារឡើងវិញតាមរយៈព្យាការីយ៉ូសែប ស្ម៊ីធ ( សូមមើល គ និង ស ៩៣:២៩; ម៉ូសេ ៤:១–៤; អ័ប្រាហាំ ៣:២២–២៦ ) ។
តើនរណាជា « ចៀមដទៃទៀត » ដែលព្រះអង្គសង្គ្រោះសំដៅទៅលើនោះ នៅក្នុង យ៉ូហាន ១០:១៦?
នៅពេលព្រះអង្គសង្គ្រោះបានយាងទៅទ្វីបអាមេរិកបន្ទាប់ពីការរស់ឡើងវិញរបស់ទ្រង់ នោះទ្រង់បានពន្យល់ថានរណាគឺជាចៀមផ្សេងទៀតរបស់ទ្រង់ ( សូមមើល នីហ្វៃទី ៣ ១៥:២១–១៦:៥) ។
គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្រុមគ្រួសារ
នៅពេលអ្នកអានគម្ពីរជាមួយនឹងគ្រួសាររបស់អ្នក នោះព្រះវិញ្ញាណអាចជួយអ្នកដឹងថាគោលការណ៍អ្វីដែលត្រូវគូសបញ្ជាក់ និងពិភាក្សាដើម្បីបំពេញតាមតម្រូវការរបស់គ្រួសារអ្នក ។ នេះ គឺជាការផ្ដល់យោបល់មួយចំនួន ៖
តើអ្នកអាចជួយដល់គ្រួសាររបស់អ្នកយល់អំពីការបង្រៀនរបស់ព្រះយេស៊ូវនៅក្នុង យ៉ូហាន ៧:២៤ដោយរបៀបណា ? របៀបមួយគឺត្រូវចេញទៅក្រៅ ហើយធ្វើឲ្យសមាជិកគ្រួសារម្នាក់ប្រឡាក់ខ្លួន ។ តើមនុស្សចម្លែកនោះនឹងគិតអំពីសមាជិកគ្រួសាររូបនេះយ៉ាងណា បើមើលតែអាការៈខាងក្រៅរបស់ពួកគាត់នោះ ? សូមសរសេរនូវគុណសម្បត្តិល្អមួយចំនួនដែលសមាជិកគ្រួសាររូបនេះមាន ដែលពុំអាចមើលឃើញនឹងភ្នែកដោយគ្រាន់តែមើលទៅរូបគាត់នោះ ( សូមមើលផងដែរសាំយូអែលទី ១ ១៦:៧) ។
តើពេលខ្លះយើងក្លាយទៅជាទាសករនៃអំពើបាបយ៉ាងដូចម្ដេច ? តើសេចក្ដីពិតអ្វីខ្លះដែលព្រះយេស៊ូវបានបង្រៀន អាចនាំឲ្យយើងមានសេរីភាព ?
ព្រះគ្រីស្ទកំពុងព្យាបាលបុរសខ្វាក់ភ្នែកដោយ ខាល ហេនរីក ប្លូច
តើអ្នកអាចជួយគ្រួសាររបស់អ្នកមើលឃើញពីដំណើររឿងរបស់ព្រះយេស៊ូវព្យាបាលបុរសខ្វាក់ភ្នែកនៅក្នុងយ៉ូហាន ៩យ៉ាងដូចម្ដេច ? អ្នកអាចសម្ដែងរឿងជាមួយគ្នា ឬបង្ហាញវីដេអូ « ព្រះយេស៊ូវព្យាបាលបុរសពិការភ្នែកពីកំណើត » ( LDS.org ) ។ សូមផ្អាករឿងបន្ដិចសិន ដើម្បីសមាជិកគ្រួសារអាចអានខឆ្លើយឆ្លងគ្នាមកពីយ៉ូហាន ៩ ។ សូមអញ្ជើញពួកគេឲ្យកត់ចំណាំមេរៀនណាដែលពួកគេបានរៀនអំពីដំណើររឿងដូចជា តើវាមានន័យយ៉ាងណាដើម្បីប្រែជាបានផ្លាស់ប្រែចិត្តជឿទៅលើដំណឹងល្អរបស់ព្រះយេស៊ូវគ្រីស្ទ ។
ដើម្បីឲ្យសមាជិកគ្រួសារចូលរួមក្នុងការរៀនសូត្រមកពី រឿងប្រៀបប្រដូចអំពីអ្នកគង្វាលល្អ ចូរសុំឲ្យពួកគេគូររូបមួយដូចខាងក្រោម ៖ ចោរ ទ្វារ អ្នកគង្វាល កម្មករ ( អ្នកដែលគេជួលឲ្យធ្វើការ ) សត្វចចក និងចៀម ។ សូមអញ្ជើញពួកគេឲ្យអាន យ៉ូហាន ១០:១–១៨, ២៧–២៩, បន្ទាប់មកពិភាក្សាជាគ្រួសារអំពីអ្វីដែលព្រះអង្គសង្គ្រោះបានបង្រៀនអំពីរឿងដែលពួកគេបានគូររូប ។
សម្រាប់គំនិតបន្ថែមដើម្បីបង្រៀនកុមារ សូមមើល គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់ថ្នាក់អង្គការបឋមសិក្សា ។
ការកែលម្អដល់ការសិក្សាផ្ទាល់ខ្លួន
ស្វែងរកពាក្យ និងឃ្លាបំផុសគំនិត នៅពេលអ្នកអាន ព្រះវិញ្ញាណអាចបំផុសពាក្យ ឬឃ្លាជាក់លាក់នានាឲ្យអ្នកយកចិត្តទុកដាក់ ដើម្បីបំផុស និងលើកទឹកចិត្តអ្នក ឬហាក់ដូចជាសរសេរទុកសម្រាប់តែអ្នក ។ សូមពិចារណាធ្វើការកត់ចំណាំពាក្យ ឬឃ្លានានាដែលបំផុសគំនិតអ្នកនៅក្នុង យ៉ូហាន ៧–១០ ។
ពុំវង្វេងបាត់ទៀតឡើយ ដោយ ហ្គ្រេក ខេ អុលសិន