« ថ្ងៃទី ១–៧ ខែ កក្កដា ។ កិច្ចការ ១–៥ ៖ ‹ អ្នកនឹងធ្វើជាទីបន្ទាល់ពីខ្ញុំ › » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរសញ្ញាថ្មី ឆ្នាំ ២០១៩ ( ឆ្នាំ ២០១៩ )
« ថ្ងៃទី ១–៧ ខែ កក្កដា ។ កិច្ចការ ១–៥ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០១៩
បុណ្យ ថ្ងៃ ទី ហាសិប ដោយ ស៊ីឌនី ឃីង
ថ្ងៃទី ១–៧ ខែកក្កដា
កិច្ចការ ១–៥
« អ្នកនឹងធ្វើជាទីបន្ទាល់ពីខ្ញុំ »
នៅពេលបងប្អូនសិក្សា កិច្ចការ ១–៥ ព្រះវិញ្ញាណបរិសុទ្ធអាចបំផុសគំនិតបងប្អូនឲ្យស្វែងរកសេចក្ដីពិតដែលទាក់ទងសម្រាប់ជីវិតរបស់បងប្អូន ។ សូមកត់ចំណាំខគម្ពីរដែលបងប្អូនចាប់អារម្មណ៍ ហើយស្វែងរកឱកាសដើម្បីចែកចាយនូវអ្វីដែលបងប្អូនកំពុងរៀន ។
កត់ត្រាចំណាប់អារម្មណ៍របស់បងប្អូន
តើបងប្អូនធ្លាប់មានឆ្ងល់ថាតើពេត្រុសអាចនឹងគិត ហើយមានអារម្មណ៍យ៉ាងណាទេ នៅពេលគាត់ ព្រមទាំងពួកសាវកដទៃទៀត « ងើយសម្លឹងមើលទៅលើមេឃ » នៅពេលទ្រង់យាងឡើងទៅព្រះបិតាទ្រង់វិញនោះ ? ( កិច្ចការ ១:១០ ) ។ សាសនាចក្រដែលត្រូវបានបង្កើតឡើងដោយព្រះរាជបុត្រារបស់ព្រះ ឥឡូវត្រូវបានដឹកនាំដោយព្រះយេស៊ូវតាមរយៈពេត្រុស ជាព្យាការីរបស់ព្រះ ។ កិច្ចការដឹកនាំកិច្ចខិតខំដើម្បី « បញ្ចុះបញ្ចូលឲ្យមានសិស្សនៅគ្រប់ទាំងសាសន៍ » ឥឡូវធ្លាក់មកលើពេត្រុស ( ម៉ាថាយ ២៨:១៩ ) ។ ប៉ុន្តែ យើងរកមិនឃើញភស្ដុតាងថាតើគាត់មានអារម្មណ៍ពុំល្អគ្រប់គ្រាន់ ឬភ័យខ្លាចនៅក្នុងគម្ពីរកិច្ចការនោះទេ ។ អ្វីដែលយើងរកឃើញនោះ គឺគំរូនៃទីបន្ទាល់ និងការផ្លាស់ប្រែចិត្តជឿដោយគ្មានភាពភ័យខ្លាច ការព្យាបាលប្រកបដោយអព្ភូតហេតុ ការបើកសម្ដែងខាងវិញ្ញាណ និងការរីកចម្រើនសាសនាចក្រយ៉ាងខ្លាំង ។ ឥឡូវ ដោយមានអំណោយទាននៃព្រះវិញ្ញាណបរិសុទ្ធ ពេត្រុសឈប់ជាអ្នកនេសាទដែលពុំបានរៀនសូត្រ ដូចកាលព្រះយេស៊ូវបានរកឃើញនៅឯឆ្នេរសមុទ្រកាលីឡេទៀតហើយ ។ ទាំងឈប់ជាបុរសដែលរវើរវាយកាលពីប៉ុន្មានសប្ដាហ៍មុននោះដែលបានយំយ៉ាងជូរចត់ ដោយសារតែគាត់បានបដិសេធថា គាត់ពុំធ្លាប់ស្គាល់ព្រះយេស៊ូវអ្នកស្រុកណាសារ៉ែតទៀតហើយ ។
នៅក្នុងគម្ពីរកិច្ចការ បងប្អូននឹងអានការប្រកាសដ៏មានអានុភាពអំពីព្រះយេស៊ូវគ្រីស្ទ និងដំណឹងល្អរបស់ទ្រង់ ។ បងប្អូនក៏នឹងមើលឃើញពីរបៀបដែលដំណឹងល្អអាចផ្លាស់ប្ដូរមនុស្ស—រួមទាំងបងប្អូនផងដែរ—ឲ្យក្លាយជាពួកសិស្សដ៏អង់អាចតាមដែលព្រះស្គាល់ថាពួកគេអាចធ្វើបាននោះ ។
គំនិតយោបល់សម្រាប់ការសិក្សាព្រះគម្ពីរផ្ទាល់ខ្លួន
កិច្ចការ ១:១–៨, ១៥–២៦; ២:១–៤២; ៤:១–១៣, ៣១–៣៣
ព្រះយេស៊ូវគ្រីស្ទដឹកនាំសាសនាចក្ររបស់ទ្រង់តាមរយៈព្រះវិញ្ញាណបរិសុទ្ធ ។
ព្រះគម្ពីរកិច្ចការកត់ត្រាអំពីការខិតខំរបស់ពួកសាវកដើម្បីស្ថាបនាសាសនាចក្រនៃព្រះយេស៊ូវគ្រីស្ទបន្ទាប់ពីការយាងឡើងទៅវិញរបស់ព្រះអង្គសង្គ្រោះ ។ ថ្វីដ្បិតតែព្រះយេស៊ូវគ្រីស្ទ ឈប់នៅលើផែនដីទៀតក្ដី ក៏ទ្រង់បានដឹកនាំសាសនាចក្រតាមរយៈវិវរណៈតាមរយៈព្រះវិញ្ញាណបរិសុទ្ធដែរ ។ សូមពិចារណាអំពីរបៀបដែលព្រះវិញ្ញាណបរិសុទ្ធបានដឹកនាំអ្នកដឹកនាំថ្មីៗរបស់សាសនាចក្រនៃព្រះគ្រីស្ទ នៅពេលអ្នកមើលវគ្គបទគម្ពីរដូចតទៅនេះ ៖ កិច្ចការ ១:១–៨, ១៥–២៦; ២:១–៤២; ៤:១–១៣, ៣១–៣៣ ។
តើព្រះអម្ចាស់ប្រទានកិច្ចចាត់តាំង ការហៅបម្រើ ឬការទទួលខុសត្រូវមួយចំនួនអ្វីខ្លះដល់បងប្អូន ? តើបងប្អូនរៀនអ្វីខ្លះមកពីបទពិសោធន៍ទាំងឡាយរបស់ពួកសាវកពីបុរាណអំពីរបៀបដែលបងប្អូនអាចពឹងផ្អែកទៅលើព្រះវិញ្ញាណបរិសុទ្ធឲ្យដឹកនាំបងប្អូននោះ ?
សូមមើល Bible Dictionary « Holy Ghost » ។
តើគោលបំណងនៃអំណោយទានខាងភាសាជាអ្វី ?
ពេលខ្លះ អំណោយទានខាងភាសាត្រូវបានសម្គាល់ថាជាការនិយាយភាសាមួយដែលពុំមាននរណាម្នាក់យល់ ។ ទោះជាយ៉ាងណាក៏ដោយ ព្យាការីយ៉ូសែប ស៊្មីធបានយោងទៅលើព្រឹត្តិការណ៍នៅក្នុង កិច្ចការ ២ ដើម្បីបញ្ជាក់ថាអំណោយទានខាងវិញ្ញាណនេះគឺ « ត្រូវបានប្រទានឲ្យសម្រាប់គោលបំណងនៃការផ្សាយ [ ដំណឹងល្អ ] នៅក្នុងចំណោមភាសាណាដែលពុំយល់ ដូចជានៅថ្ងៃបុណ្យទីហាសិប ។… ទីបញ្ចប់ ការរៀបចំនៃ [ អំណោយទាន ] ខាងភាសា គឺដើម្បីនិយាយទៅកាន់ជនបរទេស » ( ការបង្រៀននៃប្រធានសាសនាចក្រ ៖ យ៉ូសែប ស្ម៊ីធ [ ឆ្នាំ ២០០៨ ] ទំព័រ ៣៨៣–៨៤ ) ។ ពិធីជប់លៀងនៃបុណ្យថ្ងៃទីហាសិប ជាថ្ងៃឈប់សម្រាកដ៏សំខាន់របស់ពួកយូដា ជាពេលដែលបាននាំពួកសាសន៍យូដាមកពីជាតិសាសន៍ជាច្រើនទៅកាន់ទីក្រុងយេរូសាឡិម ។ អំណោយទានខាងភាសាបានអនុញ្ញាតឲ្យអ្នកមកទស្សនាទាំងនេះយល់ពាក្យសម្ដីរបស់ពួកសាវកនៅក្នុងភាសាកំណើតរបស់ពួកគេ ។
គោលការណ៍ និងពិធីបរិសុទ្ធទីមួយនៃដំណឹងល្អ ជួយខ្ញុំឲ្យមករកព្រះគ្រីស្ទ ។
តើបងប្អូនធ្លាប់មានអារម្មណ៍ « ចាក់ចុចក្នុងចិត្ត [ របស់បងប្អូន ] » ដូចជាពួកយូដានៅបុណ្យថ្ងៃទីហាសិបដែរឬទេ ? ( កិច្ចការ ២:៣៧ ) ។ ប្រហែលជាបងប្អូនបានធ្វើអ្វីមួយដែលបងប្អូនសោកស្ដាយ ឬប្រហែលជាបងប្អូនគ្រាន់តែ ចង់ផ្លាស់ប្ដូរជីវិតរបស់បងប្អូន ។ តើបងប្អូនគួរធ្វើអ្វីខ្លះនៅពេលបងប្អូនមានអារម្មណ៍ទាំងនេះ ? ការទូន្មានរបស់ពេត្រុសទៅកាន់ពួកយូដាត្រូវបានរកឃើញនៅក្នុង កិច្ចការ ២:៣៨ ។ សូមកត់ចំណាំពីរបៀបដែលគោលការណ៍ និងពិធីបរិសុទ្ធទីមួយនៃដំណឹងល្អ ( រួមមាន សេចក្តីជំនឿ ការប្រែចិត្ត បុណ្យជ្រមុជទឹក និងអំណោយទាននៃព្រះវិញ្ញាណបរិសុទ្ធ—ឬពេលខ្លះសំដៅថាជាគោលលទ្ធិនៃព្រះគ្រីស្ទ ) បានជះឥទ្ធិពលលើអ្នកផ្លាស់ប្រែចិត្តជឿទាំងនេះដូចបានកត់ត្រានៅក្នុង កិច្ចការ ២:៣៧–៤៧ ។
បងប្អូនបានទទួលបុណ្យជ្រមុជទឹករួចហើយ ហើយបានទទួលអំណោយទាននៃព្រះវិញ្ញាណបរិសុទ្ធ ដូច្នេះតើបងប្អូនបន្ដអនុវត្តគោលលទ្ធិនៃព្រះគ្រីស្ទដោយរបៀបណា ? សូមពិចារណាអំពីពាក្យសម្ដីទាំងនេះមកពីអែលឌើរ ឌេល ជី រេនឡាន់ ៖ « យើងអាចត្រូវបានល្អឥតខ្ចោះតាមរយៈ…ការអនុវត្តសេចក្ដីជំនឿទៅលើ [ ព្រះគ្រីស្ទ ] ការប្រែចិត្ត ការទទួលទានសាក្រាម៉ង់ ការរំឭកសេចក្ដីសញ្ញា និងពរជ័យនៃបុណ្យជ្រមុជទឹក និងការទទួលព្រះវិញ្ញាណបរិសុទ្ធជាដៃគូដ៏ខ្ជាប់ខ្ជួនទៅដល់កម្រិតកាន់តែខ្លាំងម្ដងហើយម្ដងទៀត ។ នៅពេលយើងធ្វើដូច្នេះ យើងប្រែក្លាយកាន់តែដូចជាព្រះគ្រីស្ទ ហើយអាចកាន់ខ្ជាប់ដរាបដល់ចុងបំផុត ព្រមជាមួយនឹងការផ្ទេរមរតក » ( « Latter–day Saints Keep on Trying » Ensign ឬ Liahona ខែ ឧសភា ឆ្នាំ ២០១៥ ទំព័រ ៥៦ ) ។
សូមមើលផងដែរ នីហ្វៃទី ២ ៣១, នីហ្វៃទី ៣ ១១:៣១–៤១, ២៧, ប្រាយអិន ខេ អាស្ដុន « The Doctrine of Christ » Ensign ឬ Liahona ខែ វិច្ឆិកា ឆ្នាំ ២០១៦ ទំព័រ ១០៦–៩ ) ។
តើអ្វីជា « ពេលលំហើយ » និង « គ្រាតាំងរបស់ទាំងអស់ឡើងវិញ » ?
« ពេលលំហើយ » សំដៅទៅលើសហសវត្សរ៍ នៅពេលព្រះយេស៊ូវនឹងយាងត្រឡប់មកលើផែនដីវិញ ។ « គ្រាតាំងរបស់ទាំងអស់ឡើងវិញ » សំដៅទៅលើការស្ដារឡើងវិញនៃដំណឹងល្អ ។
ពួកសិស្សរបស់ព្រះយេស៊ូវគ្រីស្ទត្រូវបានប្រទានអំណាចឲ្យធ្វើអព្ភូតហេតុនៅក្នុងព្រះនាមរបស់ទ្រង់ ។
បុរសខ្វិនសង្ឃឹមថា នឹងទទួលបានប្រាក់មកពី អស់អ្នកដែលមកព្រះវិហារ ។ ប៉ុន្តែពួកអ្នកបម្រើរបស់ព្រះអម្ចាស់បានផ្ដល់ឲ្យគាត់ច្រើនជាងនោះទៅទៀត ។ នៅពេលអ្នកអាន កិច្ចការ ៣, ៤:១–៣១ និង ៥:១២–៤២ សូមពិចារណាអំពីរបៀបដែលអព្ភូតហេតុដូចខាងក្រោមនេះជះឥទ្ធិពលលើ ៖
បុរសខ្វិន
ពេត្រុស និង យ៉ូហាន
សាក្សីនៅក្នុងព្រះវិហារ
ពួកសង្ឃ និងអ្នកគ្រប់គ្រង
ពួកបរិសុទ្ធផ្សេងៗទៀត
សូមមើលវីដេអូ « Peter and John Heal a Man Crippled Since Birth » « Peter Preaches and Is Arrested » ( LDS.org ) ។
គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្រុមគ្រួសារ
នៅពេលអ្នកអានគម្ពីរជាមួយនឹងគ្រួសាររបស់អ្នក នោះព្រះវិញ្ញាណអាចជួយអ្នកឲ្យស្គាល់ថាគោលការណ៍អ្វីដែលត្រូវគូសបញ្ជាក់ និងពិភាក្សាដើម្បីបំពេញតាមតម្រូវការរបស់គ្រួសារអ្នក ។ នេះគឺជាការផ្ដល់យោបល់មួយចំនួន ៖
តើយើងមានអារម្មណ៍ « ចាក់ចុចក្នុងចិត្ត [ របស់យើង ] » នៅពេលនរណាម្នាក់កំពុងបង្រៀនដំណឹងល្អនៅពេលណា ? តើអារម្មណ៍នេះមានន័យយ៉ាងណា ? ហេតុអ្វីបានជាវាសំខាន់ដើម្បីនិយាយថា « តើយើងគួរធ្វើអ្វីខ្លះ ? » នៅពេលយើងមានអារម្មណ៍ដូច្នេះ ?
តើបុរសនៅឯព្រះវិហារត្រូវបានប្រទានពរខុសប្លែកពីអ្វីដែលគាត់រំពឹងទុកដោយរបៀបណា ? តើយើងបានឃើញពរជ័យរបស់ព្រះវរបិតាសួគ៌មានមកចំពោះយើងតាមរបៀបដែលពុំបានរំពឹងទុកយ៉ាងដូចម្ដេចខ្លះ ?
អ្វីដែលខ្ញុំមាន ខ្ញុំផ្ដល់ឲ្យអ្នក ដោយ វលធើរ រេន
តើមានអ្វីខ្លះដែលធ្វើឲ្យបងប្អូនចាប់អារម្មណ៍អំពីភាពស្មោះត្រង់របស់ពេត្រុស និង យ៉ូហាន ? តើបងប្អូនអាចមានភាពមុតមាំក្នុងទីបន្ទាល់របស់បងប្អូនអំពីព្រះយេស៊ូវគ្រីស្ទបានយ៉ាងដូចម្ដេច ?
គ្រួសាររបស់បងប្អូនអាចរីករាយនឹងការដើរតួនៅក្នុងដំណើររឿងរបស់អាន៉្នានាស និងសាភីរ៉ាដោយស្លៀកពាក់សម្លៀកបំពាក់សាមញ្ញៗ ហើយមានកាក់ខ្លះៗ ។ តើយើងអាចរៀនមេរៀនអ្វីខ្លះមកពីរឿងនេះ ? អាស្រ័យទៅលើតម្រូវការក្នុងគ្រួសាររបស់បងប្អូន បងប្អូនអាចពិភាក្សាពីភាពទៀងត្រង់ ការគាំទ្រដល់ថ្នាក់ដឹកនាំសាសនាចក្រ ឬការថ្វាយ ។
សម្រាប់គំនិតបន្ថែមដើម្បីបង្រៀនកុមារ សូមមើល គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់ថ្នាក់អង្គការបឋមសិក្សា ។
ការកែលម្អការបង្រៀនរបស់យើង
សូមជ្រើសរើសប្រធានបទមួយ ។ សូមឲ្យសមាជិកគ្រួសារផ្លាស់វេនគ្នាជ្រើសរើសប្រធានបទមួយមកពី កិច្ចការ ១–៥ ដើម្បីសិក្សារួមគ្នា ។
ការយាងឡើងទៅឋានសួគ៌របស់ព្រះអម្ចាស់ដោយ វិល្លាម ហ៊ែនរី ម៉ាហ្គែតសុន