Iesu Ngke e Kabwarabwara iaon te Maunga, iroun Gustave Doré

Beberuare 13–19

Mataio 5; Ruka 6

“Ko a Kakabwaiaki”

Kakauongo nakon taian namakin ake ko karekei ngkai ko wareka Mataio 5 ao Ruka 6, ao korei inanon am boki ni kamatebwai ke n aanga riki tabeua. E kona te kamatata aio ni buokiko ni kinai tabeua reirei aika a kakawaki inanon taian mwakoro aikai, ma kakauka nanom nakoia tabeman ibukin baike ko kunei inanon am kamatebwai.

Korei Am Namakin

Man oin te kantaninga aio n Ana mwakuri, e matata raoi bwa ana angareirei Iesu kanga tiaki are a taneiai n ongoraeakin aomata inanon Ana tai. Naake a kainnano a na karekea uean te Atua? Naake a nimamannei a na abana te aba? A Kabwaia akana a bwainikirinaki? Taan koroboki ao Baritaio a aki reiakin taekan bwaai aikai. Ao irarikina naake iai aia atatai n ana tua te Atua a ataa te koaua n ana taeka te Tia Kamaiu. “Te mata boona te mata” ao “n riba am kairiribai” bon tua aika a rinano (Mataio 5:38, 43). Ma e roko Iesu Kristo bwa e na reirei iaon tua aika a rietata riki (taraa 3 Nibwaai 15:2–10), e baireaki bwa e na buokiira n te bong teuana bwa ti na “moanbaen te raoiroi, n aron [Tamara] are i karawa ae moan te raoiroi” (Mataio 5:48).

Iango ibukin te Kamatebwai i bon Iroum ni Koroboki aika Tabu

Mataio 5:1-12; Ruka 6:20–26, 46–49

Te kukurei ae reitinako e roko man maiuakinan te kawai are e reireinira iai Iesu Kristo.

Aomata ni kabane a tangiria ni kan kukurei, ma ti aki ni kabane akakaea te kukurei n taabo aika ti te arona. Tabeman a ukoukoria ni korakoran te aonaaba ma nakoa, tabeman inanon te kaubwai ke ni kakukurei nanoia n te bwai are a tangiria. E roko Iesu Kristo bwa e na reirei te kawai nakon te kukurei ae reitinako, n reirei bwa tera raoi nanon ae ko aonga ni kakabwaiaki. Tera ae ko reiakinaki ibukin karekean te kukurei ae reitinako man Mataio 5:1–12 and Ruka 6:20–26? E kanga ni kaokoro aio man ana taratara te aonaaba ibukin te kukurei?

A kanga kiibu aikai, n ikotaki ma Ruka 6:46–49, n reireiniko arom n riki bwa ana reirei Iesu Kristo? Tera ae ko namakinna bwa ko kan karaoia ni karikirakei anua aika a kabwarabwaraaki inanon kiibu aikai?

Taraa naba Bwai ni Kairi nakon Koroboki aika Tabu, “Taeka Ni Kakabwaia,” scriptures.ChurchofJesusChrist.org; “Sermon on the Mount: The Beatitudes” (witeo), ChurchofJesusChrist.org.

Mataio 5:13

“Taarin te aba ngkami.”

E kabonganaki taari ke te taoro ni kawakinan, n renganan te kuuka ibukin katongana, ao ibukin te kaitiaki. Iai nanon te taoro n te aro ibukiia Iteraera. Bon iai rekerekena ma mwakuri iaon tiringakiia maan ibukin karea ni kabuokaki n taai ake ngkoa iaan ana tua Mote (taraa Nakoaia Ibonga 2:13; Warekaia Iteraera 18:19). Ngkana e bua taarina, a na akea bonganana, ke “akea uaana ae tamaroa” (Mataio 5:13). E riki aio ngkana e renganaki ma ke e kabarekaaki man bwaai riki tabeua.

Kawakina aei n am iango ngkana ko iangoia ni koaua Mataio 5:13. Ko na kanga ni kateimatoa taarina ngkai ana reirei Iesu Kristo ngkoe? Ko na kanga ni kakoroa bukin kakawakin ao kaitiakan am mwakuri ngkai taarin aon te aba ngkoe?

Taraa naba Reirei ao Berita aika Tabu 103:9–10.

“Taarin te aba ngkami” (Mataio 5:13).

Mataio 5:17–48; Ruka 6:27–35

Ana tua Kristo e oneamwin ana tua Mote.

A na bon miimi ana reirei n ongo ana taeka Iesu bwa a kainnanoaki raoiroia nakoia riki taan koroboki ao Baritaio (taraa Mataio 5:20), are a rangi kamoamoa aron nakoraoia ni kawakinan ana tua Mote.

Ngkai ko wareka Mataio 5:21–48 ao Ruka 6:27–35, iangoia ni kanikinaea anua ake a kainnanoaki n ana tua Mote (“Ko a tia n ongo anne bwa …”) ao terana are e reireia Iesu ni karikirakei anua aikai. Bukin tera ngkai n am iango ana kawai te Tia kamaiu bon te tua ae rietata?

N aron te katoto, tera are reireia Iesu n Mataui 5:27–28 ibukin mwiokora iaon ara iango? Ko na kanga ni kona riki n tararua am iango ma am namakin are e roko n am iango ao inanom? (taraa Reirei ao Berita aika Tabu 121:45).

Taraa naba “Sermon on the Mount: The Higher Law” (witeo), ChurchofJesusChrist.org.

Mataio 5:48

E bon kantaningaia Tamau are i Karawa bwa N na kororaoi?

Beretitenti Russell M. Nelson e anga reirei:

“Te taeka ae kororaoi e rairaki man te taetae n Greek teleios, are nanona ‘e bwanin.’ … Te karinan taeka ae ibukin te weabe bon teleiono, are nanona ‘ni karoko n tokin te tabo ae raroanako, n rikirake ni bwanin raoi, nakon te kororaoi, ke ni katiaa.’ Taiaoka ataia bwa te taeka e aki kaineti ma ‘te inaomata man te kairua’; e kaineiti ma ‘karekean te bwai ae raroanako.’ …

“… E reirei te Uea, ‘Kam aki kona ni maiu i matan te Atua ngkai …; mangaia are, reitinako n te taotaonakin nano ni karokoa kam a kororaoi’ [Reirei ao Berita aika Tabu 67:13].

“Ti riai n aki bwarannano ngkana ara mwakuri korakora nakon te kororaoi n te tai aei e taraa ni kaangaanga ao e aki toki. Te Kororaoi e tuai tabwanin raoi. E roko ni bwanin tii imwin te Mangauti ao tii mairoun te Uea. E tataningaia ni kabane ake a tangiria ao ni kawakin ana tua” (“Perfection Pending,” Ensign, Nob. 1995, 86, 88).

Taraa naba 2 Betero 1:3–11; Moronaai 10:32–33; Reirei ao Berita aika Tabu 76:69; Jeffrey R. Holland, “Be Ye Therefore Perfect—Eventually,” Riaona, Nob. 2017, 40–42.

Iango ibukin Kamatebwai ni Koroboki aika Tabu n te Utu ao te Bootaki n te Tairiki

Mataio 5:1–9.Tera reirei aika a taekinaki ni Mataio 5:1–9 a kona ni buoka mweengam n riki bwa te tabo ae raka kakukureina? Ko kona n rinea teuana ke uoua are a taraa n rangi ni kakawaki nakoia am utu. N aron te katooto, tera reirei aika ti kunei ake a na kona ni buokiira n riki bwa taan raoi? (taraa Mataio 5:21–25, 38–44). Tera taian kouru ae ti kona ni katei? Ti na kanga n taorimwiia?

Mataio 5:13.Uaia ni kang tabeua amwarake ake a rengaki n te taoro ao te amwarake naba ae aekan anne ma akea taorona. Tera te kaokoro ae ti nooria? Tera ae e nanonaki n riki bwa “taarin te aba”? Ti na kanga ni karaoa aei?

Mataio 5:14–16.Ni buokiia am utu ni matata bwa tera ae nanonaki n riki bwa “otan te aonaaba,” ko kona ni kakaei tabeua aekan nako bwaai n aron te ota inanon mweengam, kaain rarikim, ao te aonaaba. E na kona n ibuobuoki ni kaota te bwai ae e riki ngkana ko karaba te ota. Tera ae nanonna Iesu ngke e taku, “Otan te aba ngkami”? (Mataio 5:14). Antai ae e a tia n riki bwa te ota ibukin ara utu? Ti na kanga n riki bwa te ota nakoia aomata? (taraa 3 Nibwaai 18:16, 24–25).

Mataio 5:43–45.Ngkai am utu a wareka ana taeka te Tia Kamaiu inanon kiibu aikai, ko kona n taekinna bwa antai, ae onoti, ko namakinna bwa ko kona n tangiria, kakabwaiaia, ao n tataro ibukiia. Ti na kanga ni karikirakea ara tangiria ibukiia?

Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.

Te anene ae rineaki: “Shine On,” Aia Boki n Anene Ataei, 144.

Katamaroan Ara Anga Reirei

Taratara raoi. Ngkai ko kaatua am taratara nakon baike a riki n maiuia [natim], kona kunei taai n anga reirei aika tamaroa. … Taeka ake [a] karaoi ke titiraki ake a tabeki a kona naba ni kairiiri nakon taai n angareirei” (Reirei n ana Kawai te Tia Kamaiu, 16).

“Taarin te aba ngkami” (Mataio 5:14).